Sunday, June 30, 2013

இந்திய தலைமை நீதிபதியாக தமிழகத்தின் சதாசிவம் நியமனம்

சென்னை : இந்திய தலைமை நீதிபதியாக, தமிழகத்தைச் சேர்ந்த, நீதிபதி சதாசிவம், ஜூலை, 19ம் தேதி, பதவியேற்கிறார். அவருக்கு, ஜனாதிபதி பதவிப் பிரமாணம் செய்து வைக்கிறார்.

சுப்ரீம் கோர்ட் தலைமை நீதிபதியாக, தற்போது, அல்டமாஸ் கபீர் உள்ளார். தலைமை நீதிபதி கபாடியா, ஓய்வு பெற்ற பின், கடந்த ஆண்டு, செப்டம்பர், 29ம் தேதி, தலைமை நீதிபதியாக அல்டமாஸ் கபீர் நியமிக்கப்பட்டார். இவர், ஜூலை, 18ம் தேதி ஓய்வு பெறுகிறார். கபீருக்கு அடுத்த நிலையில் உள்ள, நீதிபதி சதாசிவம், தலைமை நீதிபதியாக, 19ம் தேதி, பதவியேற்கிறார்.ஈரோடு மாவட்டம், பவானி தாலுகா, கடப்பாநல்லூர் கிராமத்தைச் சேர்ந்தவர், நீதிபதி சதாசிவம். 1949ம் ஆண்டு, ஏப்., 27ம் தேதி பிறந்தார். சிங்கம்பேட்டை, அரசு உயர்நிலைப் பள்ளியில், பள்ளிப் படிப்பு முடித்தார். சென்னை, சட்டக் கல்லூரியில், பி.எல்., பட்டம் பெற்றார். குடும்பத்தில், முதல் பட்டதாரியான இவர், கிராமத்தில், முதலாவதாக, சட்டப் படிப்பு முடித்தவர். விவசாய குடும்பத்தைச் சேர்ந்தவர்.

சென்னை ஐகோர்ட்டில், அரசு வழக்கறிஞர், கூடுதல் அரசு பிளீடர், சிறப்பு அரசு பிளீடராக, பதவி வகித்தார். சிவில், கிரிமினல், கம்பெனி வழக்குகளில் ஆஜராகி வந்தார். சென்னை ஐகோர்ட் நீதிபதியாக, 1996ம் ஆண்டு, ஜனவரி, 8ம் தேதி, நியமிக்கப்பட்டார். 11, ஆண்டுகளுக்குப் பின், பஞ்சாப் - அரியானா ஐகோர்ட்டுக்கு, 2007ம் ஆண்டு, ஏப்ரலில், இடமாற்றம் செய்யப்பட்டார்.சுப்ரீம் கோர்ட் நீதிபதியாக, 2007ம் ஆண்டு, ஆகஸ்ட்டில் நியமிக்கப்பட்டார். தற்போது, சுப்ரீம் கோர்ட் தலைமை நீதிபதியாக, ஜூலை, 19ம் தேதி, பதவியேற்கிறார். 40வது, தலைமை நீதிபதியாக, இவர் பதவியேற்கிறார். ஜனாதிபதி பிரணாப் முகர்ஜி, பதவிப் பிரமாணம் செய்து வைப்பார். 2014ம் ஆண்டு, ஏப்., 26ம் தேதி வரை, தலைமை நீதிபதியாக பதவி வகிப்பார்.

பல்வேறு முக்கிய வழக்குகளில், நீதிபதி சதாசிவம் தீர்ப்பளித்துள்ளார். டில்லியில் நடந்த, ஜெசிகலால் கொலை வழக்கில், மனுசர்மாவுக்கு விதிக்கப்பட்ட ஆயுள் தண்டனையை, உறுதி செய்தார். பகுஜன் சமாஜ் கட்சித் தலைவர் மாயாவதிக்கு எதிரான, சொத்துக் குவிப்பு வழக்கில், சி.பி.ஐ.,யின், முதல் தகவல் அறிக்கையை, ரத்து செய்தார்.ரிலையன்ஸ் வழக்கில், "ஜனநாயகத்தில், நமது நாட்டின் சொத்துக்கள், மக்களுடையது. மக்களின் நலன்களுக்காக, அந்தச் சொத்துக்களை, அரசு பேணுகிறது' என, தீர்ப்பளித்தார். மும்பை குண்டு வெடிப்பு வழக்கில், ஒருவருக்கு தூக்கு தண்டனையை உறுதி செய்தும், 10 பேருக்கு, ஆயுள் தண்டனையாக குறைத்தும், தீர்ப்பளித்தார்.மும்பை குண்டு வெடிப்பு வழக்கில் தான், ஆயுத சட்டத்தின் கீழ், பாலிவுட் நடிகர் சஞ்சய்தத்துக்கு, விதிக்கப்பட்ட தண்டனையை, ஐந்து ஆண்டுகளாக, குறைத்து தீர்ப்பளித்தார். பெண்கள், குழந்தைகள் தொடர்பான வழக்குகளுக்கு, முன்னுரிமை வழங்க வேண்டும் என, நீதிபதி சதாசிவம் வலியுறுத்தியுள்ளார்.தேசிய சட்டப் பணிகள் ஆணைக் குழுவின், நிர்வாகத் தலைவர் என்கிற முறையில், பல மாநிலங்களுக்கும் சென்று, சட்டக் கல்வியறிவு முகாம்களை, கிராமப்புறப் பகுதிகளிலும், பள்ளி, கல்லூரிகளிலும் துவங்கியுள்ளார்.

அரை நூற்றாண்டுக்கு பிறகு தமிழர் : சென்னைப் பல்கலைக்கழகம், சென்னை சட்டக் கல்லூரியில் படித்த, நீதிபதி பதஞ்சலி சாஸ்திரி, சுப்ரீம் கோர்ட் தலைமை நீதிபதியாக, 1951- 54ல் பதவி வகித்துள்ளார். சுப்ரீம் கோர்ட்டின், இரண்டாவது தலைமை நீதிபதியாக, பதவி வகித்தார். நீதிபதி பதஞ்சலி சாஸ்திரிக்குப் பின், தமிழகத்தைச் சேர்ந்த, நீதிபதி சதாசிவம், தலைமை நீதிபதியாக பொறுப்பேற்கிறார்.சென்னை ஐகோர்ட்டில் தலைமை நீதிபதியாக பதவி வகித்த ஆனந்த், கே.ஜி.பாலகிருஷ்ணன் ஆகியோர், சுப்ரீம் கோர்ட் தலைமை நீதிபதியாக பதவி வகித்துள்ளனர். இவர்கள், தமிழகத்தைச் சேர்ந்தவர்கள் அல்ல.

அரசு பள்ளியில் படித்து பெரும் சாதனை நீதிபதி சதாசிவத்தின் தாய் பெருமிதம்:


"கான்வென்டில் படித்தால் தான் சாதிக்க முடியும் என, நினைத்திருந்த எங்களுக்கு, அரசுப் பள்ளியில் படித்தாலும் சாதிக்க முடியும் என, என் மகன் நிரூபித்துள்ளார்,' என, அவரது தாய், நாச்சாயி அம்மாள் பெருமிதம் தெரிவித்தார்.

இந்திய முதன்மை நீதிபதியாக சதாசிவம் தேர்வு செய்யப்பட்டது குறித்து, அவரது தாய், நாச்சாயி அம்மாள் கூறியதாவது:என் மகன் சதாசிவம், சிறுவயதில் இருந்தே படிப்பில் அதிக ஆர்வம் உடையவர். பள்ளிக்கூடத்துக்கு லீவு எடுக்காமல் செல்வார். அதையே, இன்று வரை தொடர்கிறார். விவசாய குடும்பம் என்பதால், குடும்ப சூழல் காரணமாக, ஊரில் உள்ள அரசு பள்ளிக்கூடத்தில் சேர்த்தோம். நாங்கள் படிக்காதவர்கள்.படிப்பின் மேல் உள்ள ஆர்வத்தால், ஆசிரியரின் மீது பெரிதும் மரியாதை கொண்டவர். மேல்நிலைப் பள்ளியின், கணித ஆசிரியர் விஸ்வநாதன் மேல் பக்தி கொண்டவர். அவர், படிப்பின் மேல் வைத்த மரியாதை, இன்று, பெரிய பதவிகளை கொடுத்துள்ளது. கான்வென்டில் படித்தவர்கள் தான் பெரிய பதவிக்கு வரமுடியும் என, நினைத்த எங்களுக்கு, அரசு பள்ளியில் படித்தாலும், வாழ்வில் உயரலாம் என, நிரூபித்துள்ளார்.சென்னை சட்டக் கல்லூரியில் படிக்கும்போது, திருமணம் செய்து வைத்தோம். லீவு எடுக்காமல் பணியாற்றுவதால், என்னை பார்க்க மட்டும் சொந்த கிராமத்துக்கு வருவார். தற்போது சண்டிகரில் பணியாற்றுகிறார். 19ம் தேதி, பதவியேற்பு விழாவுக்கு, 17ம் தேதியே நாங்கள் கிளம்பி, குடும்பத்துடன் டில்லிக்கு செல்கிறோம். சுயமுயற்சியால், என் மகன் வெற்றி பெற்றார்.என் மகனை பள்ளியில் சேர்த்ததுடன், அவராகவே ஒவ்வொன்றாக தேர்வு செய்து படித்தார். என் மகன், இந்தியாவின் முதன்மை நீதிபதியாக தேர்வு செய்யப்பட்டது, எங்கள் அனைவருக்கும் பெருமிதமாக உள்ளது.இவ்வாறு, அவர் கூறினார்.சகோதரர்கள் சுப்ரமணியம், வேலுச்சாமி ஆகியோர் உடனிருந்தனர்.


நன்றி: தினமலர்.

உங்களின் தமிழ் அறிவு எப்படி? பகுதி 20

உங்களின் தமிழ் அறிவு எப்படி? பகுதி 20


இந்த பகுதிக்காக இணையத்தில் பலவற்றை தேடிய போது  இணையத்தில் தமிழ் வளர்ப்போர் ஏராளம் என்று அறிய முடிந்தது. தமிழையே உயிராகவும் மூச்சாகவும் கொண்டிருப்போர் பலர் என்று உணரமுடிந்தது. நாம் அவர்களோடு ஒப்புநோக்குகையில் இராமருக்கு உதவிய அணிலிலும் சிறியதாகவே என் பணி எனக்குத் தோன்றுகிறது. எனக்கு பெரிதாய் தமிழ் அறிவு ஒன்றும் கிடையாது. தமிழ்படித்தவனும் கிடையாது. ஆயினும் சிறுவயது முதலே தமிழ் மீது கொண்ட ஆர்வம்தான் இப்பகுதியை தொடரத் தூண்டியது.
     இதில் வரிசையாக இலக்கணமாக எல்லாம் இல்லாமல் நான் அறிந்த தெரிந்துகொண்ட பல செய்திகளை உங்களுடன் பகிர்ந்து கொள்கிறேன். சென்ற பகுதியில் கடவுளர்களின் பெயரை தமிழ்ப்படுத்துதலில் சில சந்தேகங்கள் இருப்பதாக திரு நண்டுநொரண்டு ராஜசேகர் சொல்லியிருந்தார். அதன் பின் யோசிக்கையில் எனக்கும் சில சந்தேகங்கள் தோன்றியது. அது என்னவென்றும் அதற்கான விடைகளையும் தேடிக் கொண்டு இருக்கிறேன். சந்தர்ப்பமும் விடையும் கிடைத்தால் பகிர்கிறேன்.
  இன்று நாம் பார்க்க போவது சிற்றிலக்கியங்கள் பற்றி.
    சிற்றிலக்கியம் என்றால் என்ன? பிரபந்தம் என்ற வடமொழி சொல்லுக்கு நன்றாகக் கட்டப்பட்டது என்று தமிழில் பொருள்.ஒரு பெருங்காப்பியத்தின் உறுப்புகளாக அமைந்திருந்த தூது, குறம் போன்றவை பிற்காலத்தே தனித்தனி இலக்கிய வகைகளாக உருப்பெற்றன.அந்த இலக்கியங்கள் பின்னர் சிற்றிலக்கியங்கள் என்று வழங்கலாயின.
    பாட்டியல் நூல்கள் சிற்றிலக்கியங்களை சிறப்பாக வகைப்படுத்தி கூறுகின்றன. வீரமா முனிவர் எழுதிய சதுரகராதி என்னும் இலக்கண நூல் சிற்றிலக்கியங்கள் 96 வகை என்று வகைப்படுத்தியுள்ளது. இறைவன், மன்னன், மக்களில் சிறந்தோரை சிறப்பிக்கும் வகையிலேயே சிற்றிலக்கியங்கள் எழுதப்பட்டு உள்ளன.

     சிற்றிலக்கியங்களில் கோவை, உலா,தூது. கலம்பகம்,பிள்ளைத்தமிழ், குறவஞ்சி, அந்தாதி முதலியன சிறப்பானவைகளாக கருதப்படுகின்றன.
 வீரமாமுனிவர் கூறும் 96 வகை சிற்றிலக்கியங்கள்:
1.சாதகம்2.பிள்ளைத்தமிழ்,3.பரணி 4.கலம்பகம் 5.அகப்பொருள்கோவை 6.ஐந்தினைச் செய்யுள். 7.வருக்க கோவை 8.மும்மணிக்கோவை 9.அங்கமாலை 10. அட்டமங்கலம் 11.அநுராகமாலை 12.இரட்டைமணிமாலை 13.இணைமணிமாலை. 14.நவமணிமாலை 15.நான்மணிமாலை 16.நாமமாலை 17.பலசந்தமாலை 18.கலம்பகமாலை 19. மணிமாலை 20 புகழ்ச்சிமாலை 21.பெருமகிழ்ச்சிமாலை 22.வருத்தமாலை 23.மெய்க்கீர்த்திமாலை 24.காப்புமாலை 25. வேனில் மாலை 26.வசந்தமாலை 27.தாரகைமாலை 28.உற்பவமாலை 29.தானைமாலை 30.மும்மணிமாலை 31. தண்டகமாலை 32.வீரவெட்சிமாலை 33.வெற்றிக்கரந்தை மஞ்சரி. 34.போர்க்கெழுவஞ்சி 35.வரலாற்றுவஞ்சி 36.செருக்கள்வஞ்சி 37.காஞ்சிமாலை 38நொச்சிமாலை 39.உழிஞை மாலை 40.தும்பைமாலை 41.வாகைமாலை 42.வதோரணமஞ்சரி.43.எண்செய்யுள் 44.தொகைநிலைசெய்யுள். 45 ஒலியல் அந்தாதி 46.பதிற்றந்தாதி 47.நூற்றந்தாதி 48.உலா 49.உலாமடல் 50.வளமடல் 51. ஒருபா ஒருபஃது 52. இருபா இருபஃது 53.ஆற்றுப்படை 54.கண்படைநிலை 55.துயிலெடை நிலை 56.பெயரின்னிசை 57.ஊரின்னிசை 58.பெயர்நேரிசை 59.ஊர்நேரிசை 60.ஊர்வெண்பா. 61.விளக்கநிலை 62.புறநிலை 63.கடைநிலை 64.கையறுநிலை 65.தசாங்கப்பத்து 66.தசாங்கத் தையல் 67.அரசன்விருத்தம் 68.நயனப்பத்து 69. பயோதரப்பத்து 70. பாதாதி கேசம் 71.கேசாதிபாதம் 72.அலங்காரபஞ்சகம். 73.கைக்கிளை 74.மங்களவள்ளை 75 தூது 76 நாற்பது 77.குழமகன் 78.தாண்டகம். 79.பதிகம் 80.சதகம் 81.செவியறிவுறூஉ 82வாயுறைவாழ்த்து 83.புறநிலை வாழ்த்து 84.பவனிக்காதல் 85.குறத்திப்பாட்டு 86.உழத்திப்பாட்டு 87.ஊசல் 88 எழுகூற்றிருக்கை 89.கடிகைவெண்பா 90.சின்னப்பூ 91. விருத்தவிலக்கணம் 92.முதுகாஞ்சி 93.இயன்மொழிவாழ்த்து. 94.பெருமங்கலம் 95.பெருங்காப்பியம் 96.சிறுகாப்பியம்.
   சதுரகராதியில் இவை குறிப்பிடப்பட்டுள்ளன. இவை தவிர வேறு சிலவகைகளும் இலக்கண நூல்களில் காணப்படுகிறது.
   காலம் தோறும் வளர்ந்துவரும் தமிழ்த்தாய் தனக்கு புதுப்புது அணிகலன்களை அணிந்து வருகிறாள். அதன் மூலம் அழகுத்தமிழ் மென்மேலும் மெருகு பெறுகிறது என்பதில் ஐயமில்லை.
   சென்றவாரம் போல் இந்த வாரமும் காளமேகப்புலவரின் சொல் விளையாட்டு பாடலை ரசிப்போமா? “கா” வரிசையில் காளமேகம் புகுந்து விளையாடியிருப்பதை பாருங்கள்!
   காக்கைக்கா காகூகை கூகைக்கா காகாக்கை
கோக்குக்கூ காக்கைக்குக் கொக்கொக்க - கைக்கைக்குக்
காக்கைக்குக் கைக்கைக்கா கா.

(
கூகை - ஆந்தை. காக்கையானது பகலில் கூகையை (ஆந்தையை) வெல்ல முடியும். கூகையானது இரவில் காக்கையை வெல்லமுடியும். கோ எனும் அரசன் பகைவரிடத்திலிருந்து தம் நாட்டை இரவில் ஆந்தையைப் போலவும், பகலில் காக்கையைப் போலவும் காக்கவேண்டும். எதிரியின் பலவீனமறிந்து, கொக்கு காத்திருப்பது போல தக்க நேரம் வரும் காத்திருந்து தாக்க வேண்டும். தகுதியற்ற காலம் எனில் தகுதியான அரசனுக்குக் கூட (கைக்கு ஐக்கு ஆகா) கையாலாகிவிடக்கூடும்).

 என்ன அருமையான கருத்தமைந்த பாடல்! இத்தகைய அறிஞர் பெருமக்களை புதல்வர்களாக கொண்ட தமிழை வணங்கி போற்றுவோம்.

  மீண்டும் ஒரு சந்தர்ப்பத்தில் இன்னும் நிறைய பார்ப்போம்! தங்களின் கருத்துக்களை பின்னூட்டத்தில் தெரிவித்து ஊக்கப்படுத்துங்கள்! நன்றி!

Saturday, June 29, 2013

நல்ல வைத்தியன்! பாப்பா மலர்!

நல்ல வைத்தியன்!  பாப்பா மலர்!


சின்னம்பேடு என்ற கிராமத்தில் சீனிவாசன் என்ற வைத்தியர் ஒருவர் வசித்து வந்தார். எத்தகைய நோயாக இருந்தாலும் தீர்த்துவிடும் ஆற்றல் அவருக்கு உண்டு. பல்வேறு வைத்திய நூல்களை கற்று எல்லாவிதமான மூலிகை மருத்துவங்களையும் படித்து இருந்தார். அதனால் அவ்வூரில் மட்டும் அல்ல பல சுற்றுப்புற கிராமங்களை சேர்ந்தவர்களும் அவரிடம் வைத்தியம் பார்க்க குவிந்தனர். அதனால் அவரது செல்வாக்கு கூடியது. அவருக்கு தலைக்கனமும் உண்டாகியது.
    அவரை சந்திக்க வைத்தியம் செய்து கொள்ள முன்கூட்டி அனுமதி பெற்று வரவேண்டும் என்ற சூழலும் உருவாகியது. இருப்பினும் அவரிடம் வைத்தியம் செய்து கொள்ள நிறைய பேர் விரும்பியதால் வருமானம் செழித்து வந்தது. வைத்தியம் பார்ப்பது மட்டும் இல்லாமல் வைத்தியம் கற்றுக்கொடுக்கவும் செய்தார் அவர். அவரிடம் பல சீடர்கள் மருத்துவம் கற்றுக்கொண்டு உதவி செய்து வந்தனர். அதில் ஒருவன் நல்ல முத்து. நல்ல அறிவாளி திறமை சாலியும் கூட. நல்ல முத்து நோய்நாடி நோய் முதல் நாடி என்பது போல நோய் எதனால் வந்தது என்பதை நோயாளியின் பேச்சில் இருந்தே அறிந்து கொண்டு அதற்கேற்ப வைத்தியம் செய்யும் ஆற்றல் உடையவன். சீனிவாசன் ஊரில் இல்லாத சமயம் நல்லமுத்து வைத்தியம் பார்ப்பான். அவனது திறமை பற்றியும் ஊரில் நல்ல பேச்சு இருந்தது.
   ஒரு நாள் சீனிவாசன் வைத்தியரிடம் ஒருவர் அரக்க பரக்க ஓடிவந்தார். ஐயோ குடலைப் புரட்டுகிறதே குமட்டி எடுக்கிறதே! வாந்தி வருகிறதே! என்றவாரு வாந்தியும் செய்து விட்டார் அவர். அவரின் படபடப்பான நிலையை பார்த்த வைத்தியர் என்ன ஆயிற்று என்று கேட்டார். வந்தவர் ஐயா! பல்லியை முழுங்கிவிட்டேன்! அதான் வயிற்றை குமட்டுகிறது. வாந்தி மயக்கமாய் வருகிறது என்றவாரே மயங்கிவிழுவதுபோல தெரிந்தார்.
     என்னது பல்லியை முழுங்கி விட்டீரா? எப்படி? என்றார் சீனிவாசன்.! ஐயா! நல்ல வெயில் வேளை வெளியே சென்று வந்தேனா! தாகம் பிடுங்கி எடுத்தது. வீட்டில் பானையில் நன்னாரி ஊறப்போட்ட தண்ணீர் வைத்து இருந்தனர். தாகத்திற்கு ஒரு சொம்பு மொண்டு குடித்துவிட்டேன்! அப்படி குடிக்கும்போதுதான் தொண்டைக்குள் ஏதோ சிக்கிக் கொண்டார் போல இருந்தது. அது என்னவாக இருக்கும் என்று அப்படி மோட்டுவளையை நோக்கினேனா! அங்கே இரண்டு பல்லிகள் மேய்ந்து கொண்டிருந்தன. அப்போதுதான் தெரிந்தது. பல்லி பானைக்குள் விழுந்து அதை தெரியாமல் நான் தண்ணீருடன் சேர்த்து முழுங்கிவிட்டேன் என்று. ஐயா! காப்பாற்றுங்கள்! கதை கேட்டுக் கொண்டு இருக்கிறீர்களே! பல்லி கடித்தால் பத்துநிமிடத்தில் மரணம் என்று சொல்வார்களே! நான் பல்லியையே முழுங்கிவிட்டேனே என்ன ஆகுமோ? என்று தவித்தார் அவர்.
   வைத்தியர் சீனிவாசன் அவரை அமைதிப் படுத்தி நாடி பிடித்து பார்த்தார். உதட்டை பிதுக்கிவிட்டு ஐயா! உங்களுக்கு ஒன்றும் இல்லை! நீங்கள் பல்லி எதையும் முழுங்கவில்லை! தண்ணீரில் இருந்த நன்னாரி வேர் ஒன்றைத்தான் முழுங்கி இருக்கிறீர்கள் ! வீண்பயம் காரணமாக உங்களுக்கு இந்த வாந்தியும் மயக்கமும்! கவலைப்படாதீர்கள்! மருந்து ஒன்றும் தேவையில்லை போய் வாருங்கள் என்றார்.
   வந்தவரோ! நீர் என்ன பெரிய வைத்தியர்! நான் பல்லியை முழுங்கிவிட்டு வாந்தியும் மயக்கமுமாய் வந்து உயிருக்கு போராடிக் கொண்டு இருக்கிறேன்! நீர் என்னடாவென்றால் மருந்து தேவையில்லை என்று விரட்டி அடிக்கிறீரே! என்று கோபப்பட்டார்.

   வைத்தியர் எவ்வளவு சொல்லியும் அவர் கேட்கவில்லை! பல்லியை முழுங்கியது உறுதி! அதற்கு மருந்து தந்தே ஆகவேண்டும் என்று பிடிவாதம் செய்தார். இல்லாத நோய்க்கு என்ன மருந்து கொடுப்பது என்று சீனிவாசன் முழித்தார். இது அத்தனையும் பார்த்துக் கொண்டிருந்த நல்ல முத்து! ஐயா! நான் இவருக்கு வைத்தியம் செய்யட்டுமா? என்று மருத்துவர் சீனிவாசனிடம் கேட்டார்.
    என்ன நீ மருத்துவம் செய்கிறாயா? இவர்தான் எதையும் முழுங்கவில்லை என்று நான் கூறுகிறேன்! நீ அதை மறுக்கிறாயா? என்றார் வைத்தியர்.
    அவர் மறுக்கிறாரே! அவருக்கு வைத்தியம் செய்யவேண்டியது நம் கடமை அல்லவா? என்றார் நல்லமுத்து.
    ஐயா! நீங்கள் எனக்கு வைத்தியம் செய்யுங்கள்! எதாவது மருந்து தாருங்கள்! என் வயிற்றில் புகுந்த பல்லி என்னமோ செய்கிறது? என்று துடித்தார் வந்தவர்.
   சீனிவாசனும் என்னமோ செய்துகொள்! என்று கிளம்பிவிட்டார். நல்லமுத்து வந்தவரை நாடி பிடித்துப் பார்த்தார். சில மருந்துகளை கலக்கி புகட்டினார். அருகில் இருந்த இன்னொரு சிஷ்யனுக்கு கண்ஜாடை காட்டி அருகில் வரவைத்து அவனது காதில் ஏதோ சொன்னார். அவனும் நகர்ந்தான்.
     வந்தவர் ஐயோ! வயிற்றை கலக்குகிறதே! என வயிற்றை பிடித்துக் கொண்டார். உன் வயிற்றில் புகுந்த பல்லியை வெளிக்கொண்டுவர பேதிக்கு கொடுத்துள்ளேன்! போய் மலம் கழியுங்கள் அதில் பல்லி வந்துவிடும் என்றார் நல்ல முத்து. வந்தவர் மறைவிடம் நோக்கி ஓடினார். அவர் மலம் கழித்தபோது அவர் அறியாமல் அந்த மலத்தில் ஒரு செத்த பல்லியை  போட்டனர் நல்ல முத்துவின் சிஷ்யர்கள்.
      மலம் கழித்து எழுந்தவர் அங்கிருந்த பல்லியை பார்த்து, தான் முழுங்கிய பல்லி வெளியே வந்துவிட்டது என்று மகிழ்ந்தார். முழு மகிழ்ச்சியுடன் நல்லமுத்துவிடம் வந்து! ஐயா! நல்ல வேளை செய்தீர்கள் என் வயிற்றில் புகுந்த பல்லியைவெளியே வரச்செய்து விட்டீர்கள் நீங்கள்தான் நல்ல வைத்தியர். உங்கள் குருவை விட நீங்கள் தான் திறமை சாலி! இந்தாருங்கள்! என்று சிறிது பொன்னை தந்துவிட்டு போனார்.
   இதையெல்லாம் பார்த்துக்கொண்டிருந்த குரு கேட்டார். எப்படி இல்லாத பல்லியை வரவைத்தாய்?
  நல்லமுத்து நடந்ததை கூறினார். இது வைத்திய சாஸ்திரத்துக்கு விரோதம் இல்லையா?
  இதில் விரோதம் எங்கே வந்தது? நோயின் காரணத்தை அறிந்தேன்! அதை தீர்த்து வைத்தியம் செய்தேன். இங்கு வந்தவருக்கு பல்லியை முழுங்கிவிட்டதாக சந்தேகம் இல்லை! நம்பிக்கையே கொண்டிருந்தார். அவர் உங்கள் பேச்சை மறுத்தபோதே அவர் பல்லியை முழுங்கிவிட்டதாக முழு நம்பிக்கையில் உள்ளார். அதுவே அவருக்கு நோயை தந்துள்ளது என்று அறிந்தேன். அந்த சந்தேகத்தை தீர்த்து வைத்தேன். அவரும் மகிழ்ச்சியுடன் சென்றார் என்றார்.
      சீடனின் திறமையை மெச்சிய குரு, நான் தான் வைத்திய சாஸ்திரத்தில் சிறந்தவன் என்று பெருமை பட்டு கொண்டிருந்தேன். இன்று நீ என்னை  மிஞ்சிவிட்டாய்! நோயின் காரணத்தை சிறப்பாக அறிந்து அதற்கேற்ப வைத்தியம் செய்து நல்ல பெயரை எடுத்துவிட்டாய்! என்று பாராட்டினார்.
     
     இப்படித்தான் இல்லாத ஒன்றை இருப்பதாக நினைத்து வீண்பீதியில் நோயாக கற்பனை செய்துகொள்வோர் பலர். அவர்களை அவர்கள் போக்கிலேயே சென்று திருத்த வேண்டும். அதை செய்த நல்ல முத்து உண்மையிலேயே நல்ல வைத்தியர் தானே!

தங்கள் வருகைக்கு நன்றி! பதிவு குறீத்த கருத்துக்களை கமெண்ட் செய்து ஊக்கப் படுத்துங்கள்! நன்றி!



Friday, June 28, 2013

அமானுஷ்ய அனுபவங்கள்! பகுதி 3 ஆவியுடன் பேசினேன்!

அமானுஷ்ய அனுபவங்கள்! பகுதி 3

என் வாழ்க்கையில் நடந்த சில அமானுஷ்ய நிகழ்வுகளை கடந்த இரு பகுதிகளில் பகிர்ந்து கொண்டேன். கடவுள், பேய், பிசாசு, ஆவி, பூதம் போன்றவைகளை அனுபவத்தால் உணரமுடியுமே தவிர சொன்னால் விளங்காது. புரட்சி பேசுவோர் பேய் இல்லை! கடவுள் இல்லை என்று வாதிடலாம். அவர்களோடு வாதிட முடியாது. அவர்கள் இல்லை என்று நம்புகிறார்கள். நான் இருக்கிறது என்று நம்புகிறேன். நம்பிக்கையில் தான் இருக்கிறது வாழ்க்கை.
      என் தந்தை ஒரு உபாசகர் என்று கூறி இருந்தேன். அவரிடம் சில தெய்வங்கள் பேசும். சில சக்திகள் இருந்தும் ஏழையை பணக்காரன் ஆக்குதல் போன்று சினிமாவில் வரும் ஜாலங்கள் ஏதும் செய்தது இல்லை. நோய் என்று வருவபருக்கு மந்திரித்து திருநீறு தருவார். சிலசமயம் கயிறு மந்திரித்து தருவார். உடல் நிலை சுமாராகிவிட்டதாக கூறி அவரிடம் நிறைய பேர் இன்றும் திருநீறு கேட்டு வருவர். அதற்காக கட்டணம் ஏதும் வசூலிப்பது இல்லை. இவரிடம் சில சக்திகள் இருப்பதால் எங்கள் குடும்பம் சில இன்னல்களை முன்னரே அறிந்து தவிர்த்துக் கொள்ள முடிந்திருக்கிறது. ஆனால் விதி வலியது என்பது உண்மை. இதனால்தான் அவரால் தன்னுடைய முதல் மனைவியை காப்பாற்ற முடியாமல் போய்விட்டது. அதே போல் என் தங்கையின் வாழ்க்கையும் இன்று கேள்விக் குறி ஆகிவிட்டது.
       மந்திரத்தால் மாங்காய் பறிக்க முடியாது என்பார்கள்! பறிக்கலாம்! ஆனால் நம்விதி நமக்கு சாதகமாக அமைந்தால் என்று நான் கூறுவேன். என்னதான் மந்திரம் தந்திரம் எல்லாம் இருப்பினும் நமது ஊழ்வினை, தலைவிதியை அனுபவித்தே தீரவேண்டும் என்பதை சில வருடங்களாகவே வாழ்க்கை எனக்கு உணர்த்தி வருகிறது.
         இந்த அமானுஷ்ய அனுபவங்களில் இன்னொன்று இப்போது பார்ப்போம். ஆவியுடன் பேசலாம் என்பார்கள் ஒரு காலத்தில் ஆவி அமுதா என்றெல்லாம் பேமஸாக உலா வந்தார்கள் இல்லையா? நானும் ஆவியுடன் பேசி இருக்கிறேன். அதை இப்போது பார்ப்போம்.
     ஆவியுடன் பேசுவதற்கு இருவர் தேவை. அதில் ஒருவர் குரு. அதாவது உபாசனை உள்ளவராக இருத்தல் நல்லது. இன்னொருவர் வேறு யாராக வேண்டுமானாலும் இருக்கலாம். சுத்தமானவராக இருத்தல் வேண்டும். ஒரு சதுரவடிவிலானா  கண்ணாடி பலகையை எடுத்து அதில் நான்கு புறமும் ஆங்கில எழுத்துக்கள் எழுதி வைக்க வேண்டும். காகிதத்தில் எழுதி ஒட்டிக் கொள்ளவும் செய்யலாம். நடு மையத்தில் ஒரு வட்டம் அமைக்க வேண்டும். அந்த வட்டத்தை மூடுமளவுக்கு ப்ளாஸ்டிக் மூடி அல்லது டம்ளர் எதுவாகினும் வைத்துக் கொள்ள வேண்டும்.
       
  இப்போது குருவானவரும் சிஷ்யரும்  அந்த பலகையின் எதிரே அமர்ந்து  மனதை ஒருநிலைப்படுத்தி  அந்த பலகையின் நடுமையத்தில் உள்ள மூடி மீது ஆள்காட்டி விரலை  வைத்து  கொள்ளவேண்டும். நமது குடும்பத்தில் இறந்து போனவரை அழைத்து பேச வேண்டும் என்று முடிவாகிவிட்டால் குடும்பத்தில் மூத்தவரை ஆவி உலகத்தின் தலைவர் என விளித்து அவரை இந்த மூடியில் வருமாறு தொடர்ந்து கூற வேண்டும். இவ்வாறு ஒரு ஐந்து நிமிடம் கூறி அழைத்தோம் என்றால் தன்னிச்சையாக மூடி நகர ஆரம்பிக்கும். வந்திருப்பது யார்? என்று கேட்டால் அந்த மூடி நகர்ந்து ஒவ்வொரு எழுத்தாக சென்று காண்பிக்கும். இதை பக்கத்தில் உள்ளவர்கள் எழுதிக் கொள்ளலாம். அப்புறம் அவரிடம் என்ன கேட்க வேண்டுமோ அதை கேட்கலாம். அப்போது மூடி நகர்ந்து எழுத்துக்களை அடைந்து பதில் அளிக்கும். பெரும்பாலும் ஆம், இல்லை என்ற வகையிலேயே பதில் அளிக்கும். சில சமயம் மூடி இலக்கில்லாமல் அலையும். அப்போது அந்த ஆவி கோபமாக இருப்பதாக அறியலாம். அதனால் மீண்டும் வேறு ஒரு ஆவியை அழைக்கலாம்.
  அந்த போர்டின் முன் அமர்பவர்களை மீடியம் என்பார்கள். சில மீடியத்தில் ஆவி பேசாது. ஆவி உலகில் இருண்ட உலகம் என்றும் உள்ளது. அதாவது நமக்கு இரவு என்பது போல அந்த ஆவிகளுக்கு இரவு நேரமாகும். அந்த நேரத்தில் ஆவி நம்மிடம் பேசாது.
     இந்த போர்டுக்கு ஓஜா போர்டு என்று பெயர். ஆவி அமுதா ஆவியையே நேரடியாக உடலில் செலுத்தி பதில் சொன்னார். அது வேறு வகை. நான் சொன்னது வேறு வகை. இந்த வகை முறையில் நானும் என் தந்தையும் இணைந்து இறந்து போன என் பெரியம்மாவிடம் பேசினோம்.அப்போது நான் பன்னிரண்டாம் வகுப்பு முடித்த சமயம். என் அக்கா (பெரியம்மா மகள்) திருமணம் நடந்தது. எங்களுக்கு திருமணத்திற்கு போகலாமா வேண்டாமா? என்று குடும்ப சண்டை காரணமாக ஒரு தயக்கம் இருந்தது. அதனால் பெரியம்மாவை அழைத்து பேசினோம். போகச்சொன்னார். சென்றோம்.
      இப்படி ஓரிரு முறை ஆவியுடன் பேசி உள்ளேன். கண்ணாடிப் பலகையில் நம்முடைய ஆட்காட்டி விரல் அழுந்தி இருக்க தானாக மூடி நகர்ந்து  செல்லும்போது ஒருவித பிரமிப்பு இருக்கும்.
    அதற்கடுத்த பிரமிப்பு என்னவென்றால் இறந்து போன எங்கள் தாத்தா என் தந்தை உடலில் வந்து பேசுவதுதான். அவர் என் தந்தை உடலில் வந்ததுமே அவரது குரல் நடை உடை பாவனை எல்லாம் தாத்தா போல் மாறிவிடும். இதை நான் மட்டும் அல்ல என் குடும்பத்தில் உள்ள அனைவருமே வியந்து பார்த்து உள்ளார்கள். குடும்ப பிரச்சனைகள் பலவற்றை தாத்தா தீர்த்து வைத்து உள்ளார்.
        இப்படி அமானுஷ்யங்கள் நிறைந்தது இந்த உலகம்! இதில் நான் முன்னரே சொன்னது போல நம்பிக்கை என்ற ஒன்றுதான் நமது வாழ்க்கை சக்கரத்தை சுழற்றி விடுகிறது.


தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!

Thursday, June 27, 2013

புகைப்பட ஹைக்கூ 36

புகைப்பட ஹைக்கூ


 ஓடி வந்து
 நனைத்தது
 அருவி!

வீழ்ச்சியை கண்டதும்
எழுந்தது மகிழ்ச்சி!
அருவி!

மலையைப் பிளந்தது
மலைக்கவைத்தது
அருவி!

மழைமகளை தழுவிய
மலைமகள்!
அருவி!

இரைச்சல் போட்டாலும்
இன்பம்தான்
அருவி!

குளிர்வித்து
குதூகலித்தது
அருவி!

பள்ளத்தில் விழுந்தாலும்
உள்ளத்தில் நிறைந்தது
அருவி!

பள்ளம் நோக்கி பயணம்
இல்லைஇதற்கு நிதானம்
அருவி!

மூலிகைகளை நனைத்து
முகட்டில் குதித்தது
அருவி!

நுரைத்து வந்தாலும்
புளிக்கவில்லை
அருவி!

மலையிலே தவழ்ந்து
மண்ணிலே வீழ்ந்து
மனதிலே இடம்பிடித்தது அருவி!

ஆரவாரத்துடன்
ஆடிவந்தது
அருவி!

பெறுக்கெடுத்த மழையால்
உயிர்பெற்றது
அருவி!


தங்கள் வருகைக்கு நன்றி! பதிவு குறித்த கருத்துகளை கமெண்ட் செய்து ஊக்கப்படுத்துங்கள்! நன்றி!


Wednesday, June 26, 2013

"கை"விட்ட காங்கிரஸ்! நட்டாற்றில்தேமுதிக! கரையேர முடியாத கேப்டன்!

     "கை"விட்ட காங்கிரஸ்! நட்டாற்றில்தேமுதிக! கரையேர முடியாத கேப்டன்!


   ராஜ்யசபா சஸ்பென்ஸ் ஒரு வழியாக முடிவுக்கு வந்து விட்டது! எல்லோரும் நினைத்தது போல திமுகவிற்குத்தான் தன்னுடைய ஆதரவு என்று காங்கிரஸ் என்று கூறிவிட்டது. பாமக எந்த கட்சிக்கும் ஆதரவு இல்லை என்று சொன்னாலும் கூட்டணி பேரம் படியாததுதான் காரணம் என்று தகவல்கள் கசிகின்றன. கடைசி நேரத்தில் திமுகவை ஆதரிக்க வாய்ப்பு உள்ளது. புதியதமிழகம், மமக போன்ற உதிரிக் கட்சிகள் ஆதரவுடன் ராஜ்யசபாவில் கனிமொழி அமரப் போவது உறுதியாகிவிட்டது.
     இப்போது பாவம் தேமுதிகவின் நிலை! கேப்டன் எதை நம்பி களத்தில் குதித்தார் என்றே தெரியவில்லை! சொந்த கட்சி எம்.எல்.ஏக்கள் ஏழுபேர் அம்மா விசுவாசிகளாக மாறியபின் மார்க்சிஸ்ட்கள் ஆதரவு இல்லை என்றான பின் எப்படி ஜெயிப்போம் என்று நினைத்தார் என்று புரியவில்லை! காங்கிரஸ் ஒருவேளை ஆதரித்து இருந்தாலும் இவரது நிலைமை கவலைக் குறியாகத்தான் இருந்தது. அதனால்தான் என்னமோ சுதிஷை களம் இறக்காமல் இளங்கோவனை இறக்கிவிட்டார்.
       இப்போது காங்கிரஸும் காலை வாரிவிட நட்டாற்றில் நிற்கிறார் கேப்டன். எப்போது எம்.எல்.ஏக்கள் அம்மா பாசம் காட்ட ஆரம்பித்துவிட்டார்களோ அப்போதே உஷாராக இருக்க வேண்டும் கேப்டன். சினிமாவும் அரசியலும் ஒன்று என்று நினைத்துவிட்டாரோ என்னமோ? அவரது பேச்சுக்களில் நிதானம் இல்லை! எம்.எல்.ஏக்கள், கட்சியினரை மதிப்பது இல்லை. சமீபத்தில் ஒரு கும்மிடி பூண்டி அருகே ஓர் இழவு வீட்டில் கூட தொண்டர்கள் மீது எரிந்து விழுந்துள்ளார். இது அரசியல் செய்வதற்கு நல்லது இல்லை.
      கண்கெட்டபிறகு சூரிய நமஸ்காரம் என்பது போல அம்மா கட்சிக்கு போன எம்.எல்.ஏக்களுக்கு இப்போது கடிதம் எழுதியுள்ளார். நமது கட்சிக்கு ஓட்டுப் போடுங்கள் என்று! கட்சி மறந்து சென்றவர்களை இந்த கடிதம் ஒன்றும் பாதிப்பை ஏற்படுத்தவில்லை! அவர்கள் அம்மா கட்சிக்குத்தான் எங்கள் ஓட்டு என்று அறிவித்து விட்டனர். இதே கேப்டன் அன்று தனித்து போட்டி என்றார். பின்னர் கடவுளிடம் மட்டுமே கூட்டு என்றார். இறுதியில் திமுகவுடன் பேரம் படியாத நிலையில் யாரை எதிர்த்து அரசியல் செய்தாரோ அவருடனேயே கூட்டணி வைத்தபோதே அவர் மீதான நம்பிக்கை குறைந்துபோய்விட்டது.
     அம்மாவுடன் கூட்டணி வைத்தால் பணிவுதான் முதல் அரிச்சுவடி! இது இவருக்கு சரிபட்டு வரவில்லை! முறித்துக் கொண்டார். நிறைய செலவு பண்ணி சம்பாதிக்க காத்திருந்த எம்.எல்.ஏக்கள் அம்மா பக்கம் சாய்ந்து காசு பார்க்க முடிவு செய்துவிட்டனர். ஆனால் பார்க்க முடியாது என்பது வேறுவிசயம். இந்த எம்.எல்.ஏக்கள் மாற்றுக் கட்சிக்கு சென்றனர் என்றபோதே விஜயகாந்த் அவர்களை எதிர்க்காமல் அரவணைத்து அவர்களின் குறை கேட்டு நடந்திருப்பாரேயானால் கட்சியாவது உடையாமல் இருந்திருக்கும். ஆனால் அவரது எடுத்தேன் கவிழ்த்தேன் தனமான அரசியலால் இன்று கட்சி உடைந்து சிதறிக் கிடக்கிறது.
     இருக்கும் சிலராவது வேறு கட்சிக்கு தாவாமல் இருக்க வேண்டுமானால் அவரது அணுகுமுறை மாறவேண்டியது அவசியம். சும்மா குறை பேசி கைதட்டல் பெறுவதை குறிக்கோளாக கொள்ளாமல் ஆக்கப்பூர்வமாக செயல்பட வேண்டும். மக்களோடு மக்களாக கை கோர்த்து மக்கள் பிரச்சனைகளை குறித்து அறிந்து போராடவேண்டும். அதை செய்யாமல் எம்.எல்.ஏக்களின் விசுவாசத்தை அறியவே ராஜ்யசபா தேர்தலில் போட்டி என்றால் என்ன அர்த்தம். ஏற்கனவே ஏழுபேர் போன நிலையில் இருப்பவர்களையும் சந்தேகப்படுவது போல அல்லவா இருக்கிறது பேச்சு. இந்த பேச்சு அவர்களை காயப்படுத்தாதா?
     இன்றைய நிலையில் இருக்கும் 22 எம்.எல்.ஏக்களாவது அவருக்கு விசுவாசமாக இருந்து ஓட்டு போடுவார்களா என்பது சந்தேகம்தான். ஆனால் விசுவாசத்தை அறியத்தான் தேர்தல் என்ற அவரது ஸ்டேட்மெண்ட் அறியாமைத்தனத்தை தான் காட்டுகிறது. இதையே எங்களின் ஒற்றுமையை காட்டவே இந்த தேர்தலில் போட்டியிடுகிறேன்! கருத்து வேற்றுமைகளை மறந்து எங்கள் கட்சி உறுப்பினர்கள் எங்களுக்கே வாக்களிப்பார்கள்! திமுகவிற்கு ஓர் போட்டியாக நாங்கள் இருப்போம். என்று சொல்லியிருந்தார் என்றால் அவர்தான் கேப்டன்.
    ஆனால் தவறான ஸ்டேட்மெண்ட் விடுத்து இருப்பவர்களையும் காயப்படுத்திவிட்டு மற்றகட்சிகளையும் அரவணைக்க முடியாமல் ஒரு ஓட்டைக் கப்பலுக்கு கேப்டனாய் நட்டாற்றில் தவிக்கிறார் கேப்டன். இவர் கரையேறினால் அதிசயம்தான்!
   இன்றைய நிலையில் திமுகவின் பலம் முப்பத்தி இரண்டு  திமுக 23. புதியதமிழகம் 2 மமக 2 காங்கிரஸ் 5 பா.ம.கவும் ஆதரித்தால் 35 ஓட்டுகள் பெற்று கனிமொழி எம்.பி ஆகிவிடுவார். அப்படி ஆதரிக்காவிடினும் தேமுதிகவினைவிட கூடுதல் ஓட்டுகள் இருப்பதால் எம்.பி ஆகிவிடுவார்.
 தேமுதிகவின் பலம் 22. அதிருப்தி எம்.எல்.ஏ ஏழுபேர் வாக்களித்தாலும் 29 பேர்தான் வருகிறது. காங்கிரஸ் ஓட்டு கிடைத்தால் ஏதாவது அதிசயம் நிகழ்ந்திருக்கும்.. இதனால் தேமுதிகவின் தோல்வி உறுதியாகிவிட்டது.
  இப்போது தேமுதிகவை காங்கிரஸ் ஆதரித்தால் பலன் ஒன்றும் கிடையாது. தமிழகத்தில் திமுகவே தேமுதிகவைவிட செல்வாக்கு பெற்ற கட்சி. திமுகவிற்கு தற்போது லோக்சபாவில் 18 உறுப்பினர்கள் உள்ளனர். தேமுதிகவிற்கு ஒன்றும் கிடையாது இதையெல்லாம் யோசித்தே காங்கிரஸ் தேமுதிகவை கை கழுவி நட்டாற்றில் விட்டுவிட்டது. கரையேரமுடியாத கேப்டனாகிவிட்டார் விஜயகாந்த்.


தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!

தளிர் கல்விநிலையமும் தளிர் அண்ணா ஆன கதையும்!

தளிர் கல்விநிலையமும் தளிர் அண்ணா ஆன கதையும்!
    சென்ற புதன் மற்றும் வெள்ளிக் கிழமைகளில் என்னுடைய அமானுஷ்ய அனுபவங்களை பகிர்ந்து கொண்டேன். இன்று நான் பகிரப் போவது தளிர் அண்ணா ஆன கதையை! இந்த தளிர் அண்ணா விஷயம் ஏற்கனவே விவாதத்திற்கு வந்த ஒன்று.  என்னுடைய  நினைவுகளை பகிர்கையில் ஒருசமயம் நான் டியுசன் எடுத்த கதையை கூறுகிறேன் என்றும் சொல்லியிருந்தேன். இன்று என்ன பதிவு? என்று காலையில் யோசிக்கும் போது இதை பதிவிடலாமே என்று தோன்றியது. ஏனெனில் இரண்டு ஆண்டு இடைவெளிக்குப் பின் மீண்டும் டியுசன் எடுக்கப் போகிறேன். இந்த சமயத்தில் பழைய நினைவுகளை கொஞ்சம் அசை போடலாம் என்று நினைக்கிறேன். பதிவு நீளமானால் இரண்டு மூன்று பகுதிகளாக பிரிந்து வரும். பொறுத்துக் கொள்ளுங்கள்.
        நான் ஏற்கனவே சொல்லியிருந்தபடி நேரு நண்பர்கள் நலச்சங்கம் என்று ஒரு சங்கம் எங்கள் ஊரில் நடத்தி வந்தோம். அதனுடைய பத்தாவது ஆண்டுவிழாவில் கலை நிகழ்ச்சி செய்ய சிறுவர் சிறுமியரை தேடிய போது ஊரில் டியுசன் எடுத்துக் கொண்டிருந்த ஒரு கைம்பெண் உதவினார். அவருடைய டியுசனில் இருந்து சிலரை தேர்வு செய்து கொண்டோம். அவர் ஐந்தாம் வகுப்புவரை மட்டுமே டியுசன் எடுத்துவந்தார். வயது கூட தேவைப்பட்ட சிலரை அணுகிய போது அவர்கள் இளைஞர் மன்ற டியுசனில் படிப்பதாக கூறினார்கள். ஆனால் அனுமதி ஏதும் கேட்க வேண்டாம். நாங்களே கேட்டுக் கொண்டு கலைநிகழ்ச்சிகளில் கலந்து கொள்வதாக கூறிவிட்டார்கள். கலைநிகழ்ச்சிக்கான பணிகளில் மூழ்கி விட்டதால் இதை பெரியதாக நான் எடுத்துக் கொள்ளவில்லை. பாதி நாள் ரிகர்சல் முடிந்த பின் சிலர் ரிகர்சலுக்கு வரவில்லை. விசயம் என்னவென்றால் அவர்கள் இளைஞர் மன்ற டியுசனில் படித்துக் கொண்டிருந்தார்கள் அங்கு பாடம் எடுத்த ஒருவர் தனிப்பட்ட வெறுப்பினால் மாணவர்களை அனுப்பவில்லை. அதோடு விட்டிருந்தால் பரவாயில்லை. கூத்தாடிகள் என்றும் எங்கள் சங்கத்தையும் கேவலமாக பேசியுள்ளார். அப்போது இள ரத்தமான எனக்கு இது கோபம் தந்தது. அவர்கள் தடையையும் மீறி கலைநிகழ்ச்சியில் கலந்து கொண்டவர்களை அவர்கள் படிப்பு கெடாமல் இருக்க வேண்டும் என்ற நோக்கில் நாங்களும் டியுசன் எடுக்கிறேன் என்று அந்த ஆண்டுவிழாவில் தெரிவித்துவிட்டேன்.
        ஆனால் அப்போது யாரும் எங்கள் டியுசனுக்கு வரவில்லை! ஒரு நாலைந்து நபர்கள் வந்தார்கள். அவர்களும் இடையில் நின்றுவிட்டார்கள். நானும் இளைஞர் மன்றத்தினருடன் சமாதானமாகி அவர்கள் டியுசனில் ஒரு ஆசிரியராக சில வகுப்புக்களுக்கு பாடம் நடத்திக் கொண்டு இருந்தேன். இதற்கிடையில் ஐந்தாம் வகுப்பு வரை பாடம் நடத்திக் கொண்டு இருந்த அந்த விதவைப் பெண்மணி உடல் நலக் குறைவால் டியுசன் எடுப்பதை நிறுத்திவிட்டார். அங்கு படித்துக் கொண்டிருந்த மாணவர்களுடைய பெற்றோர்கள் என் தங்கையிடம் நீ படித்துவிட்டு சும்மாத்தானே இருக்கே! இந்த பசங்களுக்கு டியுசன் எடேன் என்று கேட்க என் தங்கையும் ஒத்துக் கொண்டார். இப்படி ஒரு பத்து பேர் என் தங்கையிடம் சேர்ந்தார்கள். ஐந்தாம் வகுப்புவரை மட்டுமே அப்போது எடுத்தோம். தங்கைக்கு உதவியாக நான் சில சமயம் பாடம் எடுப்பேன். இந்த சமயத்தில் இளைஞர் மன்றத்தினரின் டியுசனும் நின்று போனது.
      அங்கு பாடம் நடத்தியவர்கள் வேலை கிடைத்து போய்விட அங்கு படித்தவர்களும் என் தங்கையின்
 இது திருவாலீஸ்வரர் கோயில் பிரகாரம் இங்குதான் டியுசன் வகுப்புக்கள் நடந்தன.
டியுசனுக்கு வந்தார்கள். இப்போது எட்டாம் வகுப்புவரை என டியுசன் உயர்வு பெற்றது. எல்லோருக்கும் கட்டணம் பத்து ரூபாய் மட்டுமே. இப்படி ஒரு இரண்டு மாதம் சென்றதும் சில பத்தாம் வகுப்பு மாணவர்களும் சேர்ந்து கொண்டார்கள் அவர்களுக்கு கட்டணம் இருபது ரூபாய் வசூலித்தோம்.  பத்தாம் வகுப்பு மாணவர்களுக்கு நானும் எனது நண்பனும் பாடம் எடுப்போம். மொத்தம் மாதம் ஒரு 300 ரூபாய் வசூல் ஆகும் அதில் ஒரு பகுதியை என் நண்பனுக்கு தந்துவிட்டு மீதியை நாங்கள் எடுத்துக் கொள்வோம். அந்த வருட இறுதியில் நண்பனும் நின்று விட்டான். பத்தாம் வகுப்பு தேர்வு முடிவுகள் வந்தன. எங்களிடம் ஆறு பத்தாம் வகுப்பு மாணவர்கள் படித்தார்கள் அதில் இருவர் இடையில் நின்றுவிட மீதி நான்கு பேரில்  மூவர் பாஸ். ஒருவர் மட்டும் ஒரு சப்ஜெக்டில் பெயில்.
      பரவாயில்லை எதோ ஜெயித்துவிட்டோம்! என்று எண்ணி  வீதிக்கு சென்றால் அங்கே பெயிலான ஒரு பெண்ணின் அம்மா எதிரில் வந்தார். மாசம் இருபது ரூபா கொடுத்து டியுசன் அனுப்பினேன்! அப்படியும் என் பொண்ணு பெயில் ஆயிருச்சு! என்று சொன்னார் அவர். எனக்கு ஏதோ செவிட்டில் அறைந்த மாதிரி இருந்தது. பள்ளியில் ஏறக்குறைய ஆறு மணி நேரம் படித்து வருகிறார்கள் டியுசனிலோ ஒரு மணி அல்லது ஒன்றரை மணிநேரம் மட்டுமே படிப்பு! பள்ளியை குறை சொல்லாமல் நம்மை குறை சொல்கிறார்களே என்று ஓர் ஆதங்கம். ஆனாலும் காசு வாங்கி கற்றுத்தருகிறோம். பெயிலானால் குறை சொல்லத்தான் செய்வார்கள் என்று மனதை தேற்றிக் கொண்டேன்.
    அடுத்த ஆண்டும் இந்த மூவர் பாஸ் செய்தமையால் கூடுதலான பிள்ளைகள் சேர்ந்தார்கள். அப்போதுதான் டியுசனுக்கு பெயர் சூட்டினேன். டியுசன் நிர்வாகம் என் தங்கையின் கையில் இருந்து என்னிடம் வந்தது. அப்போது இளந்தளிர் என்ற கையெழுத்துப் பத்திரிக்கை நடத்திக் கொண்டிருந்தேன். அத்துடன் இளந்தளிர் என்ற வாடகை நூல் நிலையமும் வைத்திருந்தேன். அதனால் இளந்தளிர் கல்வி நிலையம் என்று பெயர் வைத்தேன். அப்போது கணக்குப் பாடம் நான் சொல்லித்தர மாட்டேன். என்னுடைய நண்பர்கள் சிலர் சொல்லித்தருவார்கள். மற்ற பாடங்களை நானும் எனது தங்கைகளும் கவனித்துக் கொண்டோம். டியுசன் மாணவர்கள் என்னை சார்! என்று அழைக்காமல் அண்ணா என்று விளித்தனர். இதனால் கையெழுத்துப்பத்திரிக்கையில் நான் எழுதும் போது தளிர் அண்ணா என்று புனைப் பெயர் சூட்டிக் கொண்டேன். ஆனால் இந்த வருடமும் எனக்கு தோல்விதான் கிட்டியதும் மொத்த எட்டுபேர் படித்ததில் ஏழு பேர் தோற்றுப் போனார்கள் ஒருவர்தான் ஜெயித்தார். இது எனக்கு முதலிலேயே தெரியும். இவர்கள் பாஸ் செய்ய மாட்டார்கள் என்று அவர்களின் படிப்பு லட்சணத்தை வைத்தே உறுதி செய்தேன். ஆனால் அவர்களை படிக்கும் படி தயார்செய்ய முடியவில்லை. போச்சு! அவ்வளவுதான் இனி யாரும் நம்மிடம் பத்தாம் வகுப்பு சேர மாட்டார்கள் என்று நினைத்தேன்.
     ஆனால் மீண்டும் பத்து பேர் என்னிடம் பத்தாம் வகுப்புக்கு சேர்ந்தார்கள். என்மீது அவர்கள் நம்பிக்கை வைத்தமையால் எனக்கும் ஒரு நம்பிக்கை வந்தது. இந்த சமயத்தில் தான் நான் ஒரு எஸ்.டீ.டி பூத் மற்றும் பெட்டிக்கடையை பஞ்செட்டியில் துவக்கி இருந்தேன். எனக்கு அந்த தொழிலில் அவ்வளவு ஆர்வம் இல்லை. ஆனால் வீட்டினரின் நிர்பந்தத்தினால் அதை துவக்கி இருந்தேன். அதனால் டியுசனை கவனிக்க கொஞ்சம் சிரமமாக இருந்தது. என் தங்கைகள் எனக்கு கை கொடுத்தனர். அவர்கள் திறம்பட கவனித்துக் கொள்ள எங்கே குறை என்று கவனித்து அதை களைய ஆரம்பித்தேன். ஒவ்வொரு மாணவனிடமும் தனிப்பட்ட கவனம் செலுத்தி அவன் எந்த சப்ஜெக்டில் வீக் என்று கண்டறிந்து அதில் தனிப்பட்ட பயிற்சி கொடுக்க ஆரம்பித்தேன். எஸ்.டீ.டீ பூத் கவனித்துக் கொள்ள முதலில் என் தந்தையை அனுப்பினேன். பின்னர் அது சரிவராமையால் ஆள் வைத்துவிட்டு முழு நேரமும் டியுசனில் இறங்கினேன்.
       இந்த சமயத்தில் என் முதல் தங்கையின் திருமணம் வேறு. அதிலும் கவனம் செலுத்தவேண்டிய சூழல். கணக்கு பாடம் கசந்த எனக்கு டியுசன் அதை இனிமையாக்கியது. கைடு வாங்கி கணக்குப் போட்டுப் பார்த்து அதை எளிமையாக்கி மாணவர்களுக்கு கற்றுத்தர ஆரம்பித்தேன். இந்த விசயத்தில் நண்பர் மகேஷ் எனக்கு உறுதுணையாக இருந்தார். என்னைவிட வயதில் இளையவர். ஆனாலும் அப்போதுதான் படிப்பு முடித்திருந்தமையால் கணக்கு குறித்த சந்தேகங்களை அறிந்துகொள்ள அவரை நாடுவேன். அவரும் சளைக்காமல் சொல்லித்தருவார். இப்போது ஒரு பள்ளியில் ஆசிரியராக வேலை செய்யும் திரு சங்கரும் எங்கள் டியுசனில் கணக்கு ஆசிரியராக சிறப்பாக மாணவர்களுக்கு போதித்தார்.
     எது எப்படியோ கடுமையாக உழைத்தோம்! ஆனால் மாணவர்கள் உழைத்தால்தானே! அவர்கள் விளையாட்டாய் இருக்க தேர்வு வந்தது. பத்து மாணவர்களில் இருவர் இடையில் நிற்க  எட்டு பேர் எழுதினார்கள் ஐந்து பேர் பாஸ். இப்போது போல அப்போது இண்டர் நெட் கிடையாது. பேப்பரில் தேர்வு முடிவுகள் வெளியாகும். பொன்னேரி சென்று பேப்பரை வாங்கி தேர்வு முடிவை பார்க்கும் வரை மாணவர்களுக்கு அடித்துக் கொள்கிறதோ இல்லையோ எனக்கு நெஞ்சு திக்திக் என அடித்துக் கொள்ளும். ஐந்து பேர் பாஸ் அப்பாடா! என்று இருந்தது. இன்னும் சாதிக்க வேண்டும் என்ற வெறியும் பிறந்தது!

   அதற்காக என்ன செய்தேன்! என் வீட்டாரின் கடுமையான எதிர்ப்பையும் மீறி எஸ்டீடி பூத்தை மூடிவிட்டேன்! முழுவீச்சில் டியுசனில் குதித்தேன்!  வெற்றி பெற்ற கதையை அடுத்த பகுதிகளில் தொடர்கிறேன்! நன்றி!

Tuesday, June 25, 2013

புகைப்பட ஹைக்கூ 35

புகைப்பட ஹைக்கூ


  ஏழ்மை பீடித்தாலும்
  வீழவில்லை!
  தாம்பத்யம்!

 சுமையான துணை!
 சுளிக்கவில்லை முகம்!
படிக்கவேண்டும் படிப்பினை!

வலிநிறைந்த வாழ்க்கை!
சலிக்கவில்லை!
வாழ்க்கைத்துணை!

ஜடங்களுக்கு நடுவே
நடமாடும்
மனிதன்!

முடமானது கால்கள்மட்டுமே
திடமானது
வாழ்க்கை!

கைப்பிடித்த மனைவிக்கு
நம்பிக்கை ஊட்டும்
கணவன்!

குடும்பத்தினை சுமந்தவளை
கொஞ்ச நேரம் சுமக்கிறான்
கணவன்!

 கலியுகத்திலும் ஒரு
 கல் ஆகாத
 கணவன்!

  தளர்ச்சி வந்தாலும்
  வளர்ச்சி ஆனது
  தாம்பத்யம்!

  அன்பும் அறனும்
  உடைத்தது
  இல்வாழ்க்கை!

  ஊன்று கோலாய் கணவன்
  வென்று காட்டியது
  தாம்பத்யம்!



  தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!

Monday, June 24, 2013

புகைப்பட ஹைக்கூ 34

புகைப்பட ஹைக்கூ


கல் மெத்தையில்
களைத்தவர்கள்
உறக்கம்!
 

உழைக்கும் இந்தியரின்
உறுதிமிக்க
படுக்கை!

ஓடிக் களைத்த ரயிலடியில்
உழைத்து களைத்தவர்கள்
படுக்கை!

கூடாரமானது
தொடர்வண்டி
கூலித்தொழிலாளர்கள்!
இருண்ட இந்தியா
உறங்குகிறது
தொடர்வண்டியடியில்!

தலையணையான
தண்டவாளம்!
தலையெழுத்தை தொலைத்த
தொழிலாளர்கள்!

ரயிலடியில் இடம்பிடித்தது
வறுமையின்
பிடி!

நிகழ்காலத்தை
தொலைத்து எதிர்காலத்தை தேடுகிறார்கள்
கூலித்தொழிலாளர்கள்!

வறட்சி தந்த
வீழ்ச்சி!
ரயிலடியில் தொழிலாளர்கள்!

 கல்லும் முள்ளும்
 கனவுக்கு எல்லை!
 கூலித்தொழிலாளர்கள்!

   புலம் பெயர்ந்தவர்களுக்கு
புகலிடமானது
ரயிலடி!

பொழுதெல்லாம் உழைத்தவர்கள்
பழுதான
ரயிலடியில்!

கற்குவியலில்
களைத்து உறங்குகிறார்கள்
உழைத்தவர்கள்!

கல்லாய் குத்தும் வாழ்க்கை
களைத்து போட்டது
படுக்கை!

 களைத்துப் படுத்தாலும்
 கவலையில் வரவில்லை!
 உறக்கம்!

 தண்டவாளமே தலையணை
 கல்லே மெத்தை!
 களைத்தவர்களை கலைக்கவில்லை உறக்கம்!

தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!


Sunday, June 23, 2013

உங்களின் தமிழ் அறிவு எப்படி?! பகுதி 19

உங்களின் தமிழ் அறிவு எப்படி?! பகுதி 19

தமிழின் சுவையை கடந்த பதினெட்டு பகுதிகளாக பல்வேறு விதங்களில் அனுபவித்து வருகிறோம். இப்போது புழக்கத்தில் உள்ள சில ஊர்ப்பெயர்கள் கடவுள் பெயர்கள் தமிழ்மொழி போல இருந்தாலும் வடமொழிக் கலப்பில் இருக்கும். அப்படி சிலவற்றின் வடமொழிப்பெயரையும் அதற்குண்டான தூயதமிழ் பெயரையும் இந்த பகுதியில் பார்க்க இருக்கிறோம்.


  வடமொழி                                தமிழ் மொழி
1.ஸ்ரீரங்கம்                              திருவரங்கம்.
2.சிதம்பரம்                           திருச்சிற்றம்பலம்.
3.வேதாரண்யம்-                        திருமறைக்காடு.
4.விருத்தாசலம்                         திருமுதுகுன்றம், பழமலை
5.ஸ்ரீகாளஹஸ்தி                        காளகூடம்.
6.மீனாட்சி                            அங்கயற்கண்ணி
7.தர்மசம்வர்த்தினி-                     அறம்வளர்த்த நாயகி
8.ரௌத்திர துர்க்கை-                    எரிசினக் கொற்றவை.
9.பஞ்சநதீஸ்வரர்                         ஐயாறப்பர்.
10விருத்தகிரிஸ்வரர்                      பழமலை நாதர்
11. அஞ்சனாட்சி-                        மைவிழியம்மை
12.  நடராஜன்                         ஆடலரசன்.
13  வேதபுரிஸ்வரர்.                    திருமறை நாதர்.
14  மாத்ருபூதம்                        தாயுமானவர்
15   வண்மீகநாதர்                     புற்றிடம்கொண்டான்.

 இப்படி தமிழ் சொற்கள்  கடவுளருக்கும் ஊரிற்கும் உண்டு. காலப்போக்கில் அவை மறுவின.

   சில மரபு சொற்களை கீழே பார்ப்போம். இவை மரபாக தொன்று தொட்டி வழங்கி வருதலால் இப்பெயரை அடைந்தன.
    பலாப் பிஞ்சு-  பலாமூசு
    வாழைப்பிஞ்சு- வாழைக்கச்சல்
    முருங்கைப்பிஞ்சு-  முருங்கைசாடு
    அவரைப்பிஞ்சு-  அவரைப்பொட்டு
     மாம்பிஞ்சு        மாவடு
     இளம்தேங்காய்-    வழுக்கை
     முற்றிய தேங்காய்-      நெற்று.

இனி இலக்கிய சுவைக்கு போவோமா?
     தத்தித்தா தூதுதி தாதூதித் தத்துதி
துத்தித் துதைதி துதைதத்தா தாதுதி
தித்தித்த தித்தித்த தாதெது தித்தித்த
தெத்தாதோ தித்தித்த தாது?

   இது என்ன? தா, தி என்று எழுத்துக்களை கோர்த்து  என்ன விளையாடுகிறீர்கள் என்று தானே நினைக்கிறீர்கள். இது கவி காளமேகத்தின் கவிதை விளையாட்டு. த என்ற எழுத்திலேயே பாடவேண்டும் என்று சவால் விட்டவருக்கு காளமேகம் பாடிய பாடல் இது. இதன் பொருள் என்ன?  பார்ப்போமா?
  பூக்களை மேயும் வண்டினம் குறித்து காளமேகம் இவ்வாறு பாடுகிறார். ஒவ்வொரு பூவாக தத்தி தாவி சென்று பூக்களில் உள்ள தாதுவான மகரந்தத்தை உண்ணும்  வண்டே! ஒரு பூவிலுள்ள தாதுவை உண்ட பின் தாவி அடுத்த பூக்களை நாடுகிறாய்!  நீ உண்ட தித்திப்பான தாதுக்களில் மிகவும் தித்தித்த தாது எது? என்று வண்டை கேள்வி கேட்கிறா காளமேகம்.
    அருமையாக இருக்கிறது அல்லவா?
படித்து தங்களின் கருத்துக்களை பின்னூட்டத்தில் பகிருங்கள்! அடுத்த பகுதியில் இன்னும் சிறப்பான தகவல்களுடன் சந்திப்போம்! நன்றி!
Related Posts Plugin for WordPress, Blogger...