Tuesday, November 14, 2017

தினமணி கவிதைமணியில் இந்தவாரம் வெளியான என் கவிதை!

தினமணி கவிதை மணியில் இந்தவாரம் வெளியான எனது கவிதை! தொடர்ந்து வெளியிட்டு ஆதரவு நல்கும் தினமணி குழுமத்தினருக்கும் எழுத ஊக்கமளிக்கும் தமிழக எழுத்தாளர் வாட்சப் குழுமத்தினருக்கும் வலையக நண்பர்களுக்கும் அன்பின் நன்றிகள்!


உன் குரல் கேட்டால்:  நத்தம். எஸ்.சுரேஷ்பாபு

By கவிதைமணி  |   Published on : 12th November 2017 02:32 PM  |   அ+அ அ-   |  
உன் குரல் கேட்கையில்
பாடும் குயில்களும் பாட்டை நிறுத்தி
சற்றே ஆவலுடன் செவிமடுக்கும்!

உன் குரல் கேட்கையில்
ஓடும் நதிகளும் ஒருநிமிடம்
ஓசையின்றி நின்று போகும்!
உன் குரல் கேட்கையில்
செடியில் மொட்டுக்கள் மெல்ல
இதழ்விரித்து புன் சிரிக்கும்!
உன் குரல் கேட்கையில்
ஆடும் மயிலினங்கள் மகிழ்ந்து
மகிழ்நடனம் புரியும்!
உன் குரல் கேட்கையில்
வானில் ஓடும் முகிலினங்கள்
குளிர்ந்து மழை பொழியும்!
உன் குரல் கேட்கையில்
பாடும் புல்லினங்கள் பரவசமாகி
கானம் சேர்ந்திசைக்கும்!
உன் குரல் கேட்கையில் பசுவின்
மடியில் தானாய்
பால் சுரக்கும்!
உன் குரல் கேட்கையில்
முரடனின் மனதில் கூட
அருள் சுரக்கும்!
ஒடுங்கும் முதுமை கூட
உன் குரல் கேட்டால்
ஓடி ஆர்ப்பரித்து வரவேற்கும்!
ஓடி ஆடி அகம் மகிழச்செய்யும்
ஒப்பற்ற குழந்தையின் குரல்
கேட்டால்
பெற்றோர் மனம் புல்லரித்து ஆர்ப்பரிக்கும்!

தங்களின் வருகைக்கு நன்றி! பதிவு குறித்த கருத்துக்களை பின்னூட்டத்தில் தெரிவித்து ஊக்கப்படுத்துங்கள்! நன்றி!

Saturday, November 11, 2017

மீண்டும் பாக்யாவில் ஜோக்ஸ்!

சென்ற வார பாக்யாவில் எனது ஜோக்ஸ்கள் மூன்று பிரசுரம் ஆனது. நீண்ட இடைவெளிக்கு பிறகு மீண்டும் எனது நகைச்சுவைகள் பாக்யாவில் இடம்பெற்றதில் மகிழ்ச்சி! பாக்யா ஆசிரியர் குழுவினருக்கும் நண்பர் எஸ்.எஸ். பூங்கதிர் சாருக்கும். தமிழக எழுத்தாளர் வாட்சப் குழுவில் இதை பதிவிட்டு வாழ்த்திய வேளாங்கண்ணி சாருக்கும் தமிழக எழுத்தாளர் வாட்சப் குழுவினருக்கும் மிக்க நன்றிகள்!

கீழே ஜோக்ஸ்



இந்து  தமிழ் நாளிதழிலும் போன வாரம் செவ்வாயன்று ஒரு முகப்பு பஞ்ச் இடம்பெற்றது. உடனே பகிரமுடியவில்லை! அது கீழே!


தங்களின் வருகைக்கு மிக்க நன்றி! பதிவு குறித்த கருத்துக்களை பின்னூட்டத்தில் பகிர்ந்து கொள்ளுங்கள்! நன்றி!

Sunday, November 5, 2017

இன்றைய தினமணி கவிதை மணியில் எனது கவிதை!


இன்றைய தினமணி கவிதை மணி இணையதளக் கவிதைப் பக்கத்தில் வெளியான எனது கவிதை! தொடர்ந்து ஆதரவளித்து என்படைப்புக்களை வெளியிட்டு வரும் தினமணி குழுமத்திற்கு மிக்க நன்றி!

கவிதையை வாசித்து கருத்திட்டு ஊக்கப்படுத்தும் வலையக நட்புக்களுக்கு மனமார்ந்த நன்றி!


மேகத்தில் கரைந்த நிலா:  நத்தம். எஸ்.சுரேஷ்பாபு

By கவிதைமணி  |   Published on : 04th November 2017 05:43 PM  |   அ+அ அ-   |  
கிராமத்து இரவொன்றின் நீள்பொழுதில்
தனியனாய் எனக்கு
நீண்ட துணையாக வருகின்றது நிலா!
அதன் மோனத்தில் வசீகரித்து மூழ்கையில்
வதனத்தில் உதிக்கிறது ஓர் புன்னகை!

நடுவானில் கம்பீரமாய் ஒளிவீச
சுற்றிலும் மின்மினிகளாய் நட்சத்திரங்கள்!
இரவின் கருமையை
இரவின் தனிமையை
அழகாக்கிய நிலவை ரசிக்கையில்
ஆபத்தொன்று சூழ்ந்தது!

கருமேகக் கூட்டமொன்று
உருவாகி நிலவினை விழுங்க வேகமெடுத்தது!
பதறிப்போனேன்! ஆனால் பதறவில்லை நிலா!
மேகம் நெருங்க நெருங்க
ஒளியிழந்தது பூமி! தன் காதலியை காக்க முடியாமல்!
மேகம் சிறிது சிறிதாய் நிலவை விழுங்க
நிமிடங்கள் நீண்டது! 

கருமேகத்தினுள் ஓளிவெள்ளம் பாய்ச்சி 
 கரைந்து மறைந்த நிலா
மெல்ல தலைகாட்டியது!
மேகம் மறைக்க முடியுமோ என் புகழை!

மேகத்தில் கரைந்த நிலா
மேலும் அழகாகி குளிர்ந்தது!
குளிர்ந்த மேகம் பொழிந்த மழையில்
தேங்கிய நீரில்
பூமியில் தவழ்ந்த நிலா
மவுனமாய் புன்னகைத்துக் கொண்டிருந்தது!

Saturday, November 4, 2017

இன்றைய இந்து நாளிதழில் எனது பஞ்ச்!

இன்று வெளியான இந்து தமிழ் நாளிதழ் பஞ்ச்சோந்தி பராக் பகுதியில் எனது பஞ்ச் இடம்பெற்றுள்ளது. முதல் தகவல் தந்த சிவகுமார் நடராஜன் சாருக்கும் தமிழக எழுத்தாளர் வாட்சப் குழுவினருக்கும் தொடர்ந்து எனது படைப்புக்களை வெளியிட்டு வரும் இந்து தமிழ் நாளிதழ் குழுமத்தினருக்கும் எனது மனமார்ந்த நன்றிகள்! பஞ்ச் கீழே!



தங்களின் வருகைக்கு நன்றி !பதிவு குறித்த கருத்துக்களை பின்னூட்டத்தில் தெரிவித்து ஊக்கப்படுத்துங்கள்! நன்றி!

Tuesday, October 31, 2017

இன்றைய இந்து எக்ஸ்ட்ரா பஞ்ச்சில் எனது பஞ்ச்

இன்றைய இந்து தமிழ் நாளிதழில் எக்ஸ்ட்ரா பஞ்ச் பகுதியில் வெளியான எனது கருத்து. முதல் தகவல் தந்த டாக்டர் லக்‌ஷ்மணன் சாருக்கும் தெளிவான படம் அனுப்பிய சிவகுமார் நடராஜன் சாருக்கும் வாழ்த்துக்களை பரிமாறிய தமிழக எழுத்தாளர் வாட்சப் குழும நண்பர்களுக்கும் இந்து பத்திரிக்கை குழுமத்தினருக்கும் மனமார்ந்த நன்றிகள்!


தங்களின் வருகைக்கு நன்றி! பதிவு குறித்த உங்கள் கருத்துக்களை பகிர்ந்து செல்லலாமே! மிக்க நன்றி!

Monday, October 30, 2017

இன்றைய தினமணி கவிதை மணியில் என் கவிதை!

தினமணி கவிதை மணி இணையதளத்தில் இன்று என்னுடைய கவிதை வெளிவந்துள்ளது. தொடர்ந்து ஆதரவளித்து வரும் தினமணி ஆசிரியர் குழுவினர் மற்றும் தினமணி குழுமத்தினருக்கு நன்றி!


தீ தின்ற உயிர்! நத்தம். எஸ்.சுரேஷ்பாபு

By கவிதைமணி  |   Published on : 28th October 2017 03:58 PM  |   அ+அ அ-   |  
தீயின் நாக்குகளை விட
தீட்சண்யமாக்கி விட்டு சென்றிருக்கிறது
கந்துவட்டி!
கந்தை வேட்டி உடுத்தும்
ஏழைக்கு ஆசைக்காட்டி மோசம்
செய்திருக்கிறது கந்துவட்டி!
நூற்றுக்கு நூறு வட்டி
வாங்கிய பின்னும் தீரவில்லை அசல்!
அதனால் உயிராடியது ஊசல்!
ஆட்சியாளர்கள் காத்துக் கொண்டார்கள்
தங்கள் ஆட்சியை!
தடுக்கவில்லை கந்துவட்டி கும்பலின்
ஆட்சியை!
கொஞ்சம் மண்ணெண்ணெயும் ஒரு தீப்போறியும்
நாலு பேரை பற்ற வைத்து
காட்சியாக்கி தமிழகத்திற்கு
தந்திருக்கிறது பேரதிர்ச்சியை!

தீ தின்ற உயிர்கள்!
கேட்பதெல்லாம் கந்து வட்டி
அரக்கனிடமிருந்து
மீட்சியை!

மீட்டெடுக்க அரசு செய்யுமா
முயற்சியை?
தீ தின்ற உயிர்
தீயாய் சுட்டெரித்துக்கொண்டிருக்கிறது
லட்சக்கணக்கான
தமிழர்களின் நெஞ்சை!
நெறிக்க வேண்டும்
கந்துவட்டி அரக்கனின் நெஞ்சை!

தங்களின் வருகைக்கு நன்றி! பதிவு குறித்த கருத்துக்களை பின்னூட்டத்தில் தெரிவித்து ஊக்கப்படுத்துங்கள்! நன்றி!

Sunday, October 29, 2017

இந்து ஆன் லைன் கார்டூனில் எனது கருத்துச் சித்திரம்!

இந்து இணைய இதழில் எனது கருத்துச்சித்திரம் நேற்று இரவு வெளியானது. தொடர்ந்து எனது படைப்புக்களை வெளியிட்டு ஆதரவு இந்து குழுமத்திற்கு மனமார்ந்த நன்றிகள்! முதலில் தகவல் தெரிவித்த பஞ்ச் மாஸ்டர் டாக்டர் கே. லக்‌ஷ்மணன் அவர்களுக்கும் வாழ்த்துக்கள் தெரிவித்த நட்புக்களுக்கும் சிரம் தாழ்ந்த நன்றிகள்!


Thursday, October 26, 2017

இன்றைய இந்து முகப்பு பஞ்சில் எனது பஞ்ச்!

இன்றைய இந்து தமிழ் நாளிதழில் பஞ்சோந்தி பராக் பகுதியில் எனது பஞ்ச் இடம்பெற்றது. முதல் தகவல் அளித்த ரேகா ராகவன் சாருக்கும் வாட்சப்பில் பதிந்து வாழ்த்திய சிவகுமார் நடராஜன் சாருக்கும் மற்றும் தமிழக எழுத்தாளர் வாட்சப் குழுவினருக்கும் மனமார்ந்த நன்றிகள்!
  அவ்வப்போது என் படைப்புக்களை வெளியிட்டு ஆதரவளிக்கும் இந்து நாளிதழ் ஆசிரியர் குழுமத்தினருக்கும் மனமார்ந்த நன்றிகள்!
பஞ்ச் உங்கள் பார்வைக்கு!









பதிவை வாசித்து கருத்திட்டு ஊக்கப்படுத்துங்கள்! மிக்க நன்றி!

Wednesday, October 25, 2017

இன்றைய இந்து மாயாபஜார் சிறுவர் பகுதியில் என் கதை!

இந்து மாயாபஜார் சிறுவர் பகுதியில் இன்று என்னுடைய கதை இடம்பெற்றுள்ளது. இது 20ம் தேதியே ஆன்லைனில் பதிவு செய்யப்பட்டது. அப்போது முகநூலில் பகிர்ந்து கொண்டேன்.  நான் அனுப்பியதை கொஞ்சம் எடிட் செய்து மாற்றி வெளியிட்டுள்ளார்கள். இந்த கதை உங்களின் பாராட்டுக்களை ஏற்கனவே பெற்ற ஒன்றுதான். மீண்டும் படித்து ரசித்து மகிழுங்கள்! உங்கள் கருத்துக்களை பகிர்ந்து கொள்ளுங்கள்! வெளியிட்ட இந்து பத்திரிக்கை குழுமம் ஆசிரியர் குழுவினருக்கும் முதல் தகவல் தந்த சின்னஞ்சிறு கோபு சார், இமேஜ் பதிவு தந்த திருவாளர்கள் முத்துஆனந்த், ஏந்தல் இளங்கோ  அவர்களுக்கும் நன்றி! வாட்சப்பில் வாழ்த்துக்கள் பரிமாறிய அனைத்து தமிழக எழுத்தாளர் வாட்சப் குழு நண்பர்களுக்கும் மனமார்ந்த நன்றி!


Monday, October 23, 2017

பஞ்ச்”சர் பாபு- பகுதி 3

தி- இந்து தமிழ் நாளிதழின் பஞ்ச்சோந்தி பராக் பகுதிக்கு தொடர்ந்து பஞ்ச்கள் அனுப்பி வருகிறேன். சில பிரசுரம் ஆகியிருக்கிறது. பல திரும்பி எனக்கே பஞ்ச்சாக வந்துகொண்டிருக்கிறது. ஆனாலும் விடாமுயற்சியோடு களத்தில் குதித்துள்ளேன். அக்டோபர் 12 முதல்  அக்டோபர் 20 வரை அனுப்பிய சில பஞ்ச்கள் உங்களின் பார்வைக்கு!

1.செய்தி: 

டெங்கு காய்ச்சல் ஒழிய வேண்டுமென்றால் ஈபிஎஸ் தலைமையிலான டெங்கு ஆட்சி ஒழிய வேண்டும்: ஸ்டாலின்


பஞ்ச்: அ’டெங்க”  மாட்றீங்களே அண்ணே!

2. செய்தி: 

பிரதமருடனான சந்திப்பில் அரசியல் பேசவில்லை: ஓபிஎஸ் மறுப்பு


பஞ்ச்: உங்களுக்கும் ஈ.பி.எஸ்ஸுக்குமான உரசியல் குறித்தாவது பேசினீங்களா அண்ணே!

செய்தி: 
'காந்தி ஒன்றும் கடவுள் கிடையாது': மாணவர்களுக்கு பிகார் முதல்வர் நிதிஷ்குமார் அறிவுரை! 

பஞ்ச்: ’காந்தி’ போன பேச்சா இருக்குதே ஐயா!

பஞ்ச்: ஆனா காந்தி படம் போட்ட ரூபா நோட்டெல்லாம் கடவுள்னும் சொல்லிக்கொடுங்க!

4.செய்தி: வாசலில் சாணம் தெளித்தால் டெங்கு வராது.. அமைச்சர் செல்லூர் ராஜு அடடே ஐடியா

பஞ்ச்: 49 வது வட்டம் சார்பாக அண்ணணுக்கு “தமிழ் நாட்டு எடிசன்” பட்டம் வழங்குகிறோம்!

5.செய்தி: டெங்கு கொசு உற்பத்தியாக காரணமாக இருந்த நிறுவனங்களிடம் இருந்து ரூ.1 கோடி அபராதம் வசூல் - விஜயபாஸ்கர்

பஞ்ச்: திருடனை வெளியே விட்டுட்டு ஜெயிலை நல்லா இழுத்து பூட்டறீங்களே அமைச்சர் ஐயா!

6.செய்தி: மெட்ரோ ரயில் சுரங்க வழித்தடத்தால் குடியிருப்புப் பகுதியில் வீடுகளில் விரிசல்

பஞ்ச்: வீடுகளுக்கே நேரா கொண்டு இறக்கி விடுவாங்களோ என்னவோ?

7.செய்தி: 
உணவுப் பொருள்களை அதிக விலைக்கு விற்கக்கூடாது: திரையரங்குகளுக்கு விஷால் எச்சரிக்கை!

பஞ்ச்: முதல்ல ஹீரோவுங்க சம்பளத்தை அதிகமாக்கிறதை நிறுத்துங்க! அப்புறம் நாங்க நிறுத்தறோம்னு! சொல்லிடப்போறாங்க

8.செய்தி: 
ஆளுநர் மாளிகையே மக்களின் கடைசி புகலிடமாக உள்ளது: கிரண்பேடி

பஞ்ச்: என்ன பண்ணுவாங்க! நீங்கதான் “தனி ராஜ்யமே” நடத்தறீங்களே!

9.செய்தி: 
ஆர்.கே.நகர் இடைத்தேர்தலில் தேமுதிக போட்டியிடாது: விஜயகாந்த்

பஞ்ச்: நீங்க போட்டியிடாதது கட்சிகளுக்கு பெரிய இழப்பு இல்லை! போட்டியிட்டா உங்களுக்கு பெரிய இழப்பு!

பஞ்ச்:  கேப்டன்! இன்னும் நங்கூரத்தையே கிளப்பலை! சுக்கானை போட ஆரம்பிச்சிட்டீங்களே!

10. செய்தி:  மது குடிப்பவர்களை குறைக்கவே மதுபான விலை உயர்த்தப்பட்டுள்ளது: அமைச்சர் ஓ.எஸ். மணியன்

பஞ்ச்: எல்லா அமைச்சர்களும் 23ம் புலிகேசிகிட்ட ட்ரெயினிங் எடுத்துட்டு வந்திருப்பீங்களோ?

11. செய்தி: ராகுல் விரைவில் காங்கிரஸ் தலைவராவார்: சோனியா காந்தி

பஞ்ச்: அப்ப கூடிய சீக்கிரம் காங்கிரஸை அழிச்சிடறதுன்னு முடிவெடுத்திட்டீங்க போலிருக்கே!

பஞ்ச்:  காந்தியோட கனவு நினைவாகப்போகுதுன்னு சொல்லுங்க!

12செய்தி: 

ஜெயலலிதா கைரேகை விவகாரம்: மதுசூதனன் உறுதியின் பேரில் ஏற்றுக்கொண்டோம்- தேர்தல் ஆணைய அதிகாரி விளக்கம்

பஞ்ச்: மது( சூது)னன்! பேச்சை நம்பலாமா?

13செய்தி: தேர்தலுக்கு திமுக தயார்!   -ஸ்டாலின்.

பஞ்ச்:  ஆனா “தேர்ந்தெடுக்கத்தான்” மக்கள் தயாரா இல்லையே தலைவரே!

பஞ்ச்:  அப்படியே “தேறுதலுக்கும்” தயாரா இருப்போம் தலைவரே!

14 செய்தி: இந்தியாவில் கோயில் கோயிலாக சென்று பிச்சை எடுத்து வாழப்போகிறேன்: ரஷ்ய இளைஞர் பிடிவாதம்

பஞ்ச்: இதைத் தான் “சகவாச தோஷம்”னு சொல்றாங்களோ!

பஞ்ச்: வேலை செய்யறவங்களை விட பிச்சைக்காரர்களுக்கு வருமுடி அதிகம்னு நிருபிச்சிட்டார் போல!


15.செய்தி: முதலமைச்சர் எடப்பாடி பழனிசாமியுடன் நடிகர் விஜய் சந்திப்பு

பஞ்ச்: ஆளப்போறதுக்கு முந்தி “அடங்கிப் போறாரோ?”

16.செய்தி: தமிழகத்தில் பாஜக ஆட்சிக்கு வந்தால் வாய்ப்புள்ள இடங்களில் அணைகள் கட்டப்படும்: பொன். ராதாகிருஷ்ணன்

பஞ்ச்: அப்ப இது உங்க “ கனவு” திட்டம்னு சொல்லுங்க!

17. செய்தி: எடப்பாடி பழனிசாமி அரசு இந்த ஆண்டு இறுதிக்குள் கவிழும்: டிடிவி தினகரன்

பஞ்ச்: ஆடி போய் ஆவணி வந்தா நல்ல சேதி வரும்னு கீரணுர் ஜோஸ்யர் சொன்ன கதையால்ல இருக்கு!

18செய்தி: டெங்குவை சவாலாக எடுத்து கட்டுப்படுத்த நடவடிக்கை!  முதல்வர் எடப்பாடி பழனிச்சாமி.

  பஞ்ச்:  ஆட்சி அமைச்சதுலே இருந்து நீங்களும் நிறைய சவால்களை சமாளிச்சிட்டுகிட்டான் வர்றீங்க! 

பஞ்ச்: சவாலே சமாளின்னு ஆகிப்போச்சு உங்க வாழ்க்கை!

19 செய்தி: 

கொசுவை வைத்து அரசியல் செய்வது அவசியமற்றது: புதுக்கோட்டை எம்ஜிஆர் நூற்றாண்டு விழாவில் எதிர்க்கட்சிகள் மீது முதல்வர் குற்றச்சாட்டு


பஞ்ச்:  “பசுவை” வைச்சு அரசியல் செய்யலாம்! “சிசு”வை வைச்சு அரசியல் செய்யலாம்! ஆனா “கொசு” வை வைச்சி செய்ய கூடாதா?

20.செய்தி: முனைப்பான எதிர்ப்பை காட்டாமல் முனை மழுங்கிய கத்தியாக தமிழக அரசு உள்ளது: மு.க.ஸ்டாலின்


பஞ்ச்: “கூர்” தீட்டி சானைப் பிடித்துவிட பொறுப்பான எதிர்கட்சிங்க இல்லேன்னு மக்கள் பேசிக்கிறாங்களே!

21 செய்தி: அதிமுக கட்சியும் ஆட்சியும் நல்ல முறையில் வழிநடத்தப்படுகிறது – ஜெயக்குமார்

பஞ்ச்: கருப்பு- வெள்ளையை அழிச்சிட்டு காவி வர்ணம் பூசியா?

22. செய்தி: 

திமுக ஆட்சியில் சிக்குன் குனியாவுக்கு நிலவேம்பு கொடுத்தபோது கமல்ஹாசன் எங்கே போயிருந்தார்?- அமைச்சர் ஜெயக்குமார்


பஞ்ச்:  அப்ப “சினிமாவுல மட்டும்” நடிச்சிகிட்டு இருந்தாரு!

23 செய்தி: 3 தனியார் பால் நிறுவனங்கள் குறித்து பேச அமைச்சர் ராஜேந்திர பாலாஜிக்கு விதித்த தடை தொடரும்: சென்னை உயர்நீதிமன்றம்

பஞ்ச்: ராஜேந்திர”பா”லாக்”ஜி!

24. செய்தி: அரசு போக்குவரத்து கழக கட்டிடங்கள் ஆய்வு செய்யப்படும்: MR விஜயபாஸ்கர்

பஞ்ச்: “போக்கு” ஆன பின்னாடியா?

25. செய்தி: 

விஜய்யின், மோடி வெறுப்பே மெர்சல்: எச். ராஜா குற்றச்சாட்டு


பஞ்ச்:: மோடி வெறுப்பா இல்லே “வறுப்பா” நல்லா சொல்லுங்க!

26. செய்தி: 

யுடர்ன் அடிக்க இது ரீடேக் அல்ல: கமலுக்கு தமிழிசை பதில்


பஞ்ச்: : அவர் ரீ டேக் எடுக்கலை ரீமேக் பண்ண முயற்சி பண்ணிக்கிட்டிருக்கார் மேடம்!

27. செய்தி: ஊழலை எதிர்த்து பாஜக ஆட்சி செய்து கொண்டிருக்கிறது - தமிழிசை சௌந்திரராஜன்

பஞ்ச்: அதனாலதான் மல்லையாவும் அமித்ஷாவும் ரொம்ப சந்தோஷமா இருக்காங்க போலிருக்கு!

பஞ்ச்: அதாவது எதிர்கட்சிகளின் ஊழலைன்னு சொல்லுங்க!

தங்களின் வருகைக்கு நன்றி! பதிவு குறித்த கருத்துக்களை பகிர்ந்து கொண்டால் மகிழ்வேன்! மிக்க நன்றி!

இன்றைய கவிதை மணியில் என் கவிதை!

தினமணி கவிதை மணியில் இன்று வெளியான என் கவிதை!

தொடர்ந்து ஆதரவளித்து வரும் தினமணி குழுமம்! உற்சாகமூட்டும் தமிழக எழுத்தாளர் வாட்சப் குழுமம், தமிழகவலைப்பதிவாளர் குழுமம், மற்றும் நண்பர்களுக்கு எனது மனமார்ந்த நன்றிகள்!  கவிதையை படித்து உங்கள் கருத்துக்களை பகிர்ந்து கொண்டால் மகிழ்வேன்! நன்றி!

வானவேடிக்கை!: நத்தம்.எஸ்.சுரேஷ்பாபு

By கவிதைமணி  |   Published on : 23rd October 2017 03:12 PM  |   அ+அ அ-   |  
சீறி உயரே பறக்கும் வெடிகள்
சிறு மத்தாப்புக்களாய் சிதறி கண்ணைக் கவரும்!
உயரே உயரே எழுந்து வெடித்துப் பூக்கையில்
கந்தக மணமும் கவனத்தில் ஈர்க்கும்!

சிந்தனைச் சிதறல்களை நிறுத்தி வைத்து
பட்டாசு சிதறல்களை பார்க்கையில்
பறவை போல பறக்கிறது மனசு!
தாத்தாப் பாட்டிகளைக் கூட
சிறுவயதிற்கு அழைத்துச்செல்கிறது
உயரே கிளம்பி ஒளிரும் வெடிகள்!

வான் தூவும் வண்ண பூச்சிதறல்கள்
பொறுக்கத்தான் முடிவதில்லை!
காதைப் பிளக்கும் வெடிச்சத்தம்
கண்ணைக் கவரும் ஒ(வெ)ளிச்சத்தில்
கரைந்து சந்தோஷப் பூக்களை பூக்கிறது!

கந்தக வெடிகள் காற்றில் மாசு எழுப்பினாலும்
தொழிலாளர்களின் உழைப்பு முன் தூசாகிறது!
வானில் ஓர் வர்ண ஜாலம்!
ஒளிரும் பூக்கள்! மிளிரும் அழகு!

புவியே ரசிக்கும் புதுப்புது ஜாலம்!
வாணம் வானம் சென்று காட்டும்
வண்ணமிகு கோலம் கோஷம்!
அவனியே ரசிக்கும் அழகு வேடிக்கை!

Monday, October 16, 2017

”பஞ்ச்”சர் பாபு- பகுதி 2

சென்ற மாதம் நான் எழுதிய சில பஞ்ச்களை தொகுத்து வெளியிட்டேன். தொடர்ந்து வெளியிட முடியவில்லை. தமிழ் இந்து நாளிதழ் வெளியிடும் பஞ்ச்சோந்தி பராக் பகுதிக்கு அனுப்பும் பஞ்ச்கள் சிலவற்றை இங்கே தொகுத்துக் கொடுத்துள்ளேன். இவை நாளிதழில் வெளியாகவில்லை! உங்கள் ஆலோசனைகளை கூறுங்கள் நண்பர்களே!

இந்த பஞ்ச்கள் அக்டோடபர் 4ம் தேதி முதல் அக்டோபர் 11 வரை    எழுதப்பட்டவை!

செய்தி: ரஜினி அரசியலுக்கு வந்தால் நிறைய மாற்றங்கள் நடக்கும்: லதா ரஜினிகாந்த் கருத்து

பஞ்ச்: அதனாலதான் “ஏமாற்றத்தையே ”தந்துகிட்டு இருக்கிறா மேடம்!

செய்தி: மக்கள் விரும்பினால் அரசியலுக்கு வரத் தயார்: நடிகை சுஹாசினி

பஞ்ச்: நீங்க சினிமாவுக்கு வந்த விபத்தையே தாங்கிகிட்ட மக்கள் இதையும் தாங்கிப்பாங்க!

செய்தி: கொசுக்கள் உற்பத்தியாகும் இடங்கள் கண்டறியப்பட்டால் உடனடியாக அபராதம்: அர்ஜுன்

பஞ்ச்: “ஃபைன்” நடவடிக்கைங்கிறது இதுதான்!

செய்தி: மக்கள், தொண்டர்கள் எங்கள் பக்கம் இருக்கும் வரை ஆட்சியை அசைக்க முடியாது: முதல் அமைச்சர் பழனிசாமி பேச்சு

பஞ்ச்: முக்கியமா “கரசேவகர்களை” விட்டுட்டீங்களே !

பஞ்ச்: என்னை சொல்லலீயேன்னு ஆளுநர் கோவிச்சுக்க போறாரு!

செய்தி: வரும் வெள்ளிக்கிழமை முதல் புதிய திரைப்படங்கள் வெளியாகாது : விஷால்

பஞ்ச்: தமிழ் ராக்கர்ஸிலேயுமான்னு மக்கள் கேக்கறாங்க அண்ணே!

செய்தி: நடராஜனை காப்பாற்ற செய்த அதிவேக ஏற்பாடுகளை ஜெயலலிதாவுக்கு ஏன் செய்யவில்லை?- தமிழிசை

பஞ்ச்: உயிர் பிழைக்க வைக்கத்தான் டாக்டர்களாலே முடியும்! உயிர் கொடுக்க முடியாதுன்னு உங்களுக்கே தெரியாதா மேடம்?

செய்தி: பள்ளிகளில் மரம் வளர்க்கும் மாணவர்களுக்கு 5 மதிப்பெண்கள் -செங்கோட்டையன்

பஞ்ச்:  ஸ்டூடண்ட்ஸ்களுக்கு இது தீபாவளி treet டா இருக்கும் போலிருக்கே!


செய்தி: எதிர்காலத்தில் அதிமுக எங்கே இருக்கும் என்றே தெரியாது : மத்திய அமைச்சர் பொன்.ராதாகிருஷ்ணன்

பஞ்ச்: “தாமரைக்குள்ளே மறைச்சிடுவீங்களா ஜி!

பஞ்ச்: நிகழ்காலத்திலேயே உங்களுக்கு அட்ரஸ் பி.பி யா இருக்கே ஜி!

செய்தி: 

பெரும்பான்மையை நிரூபிக்க உத்தரவிடவேண்டும்: ஆளுநரிடம் விஜயகாந்த் நேரில் கோரிக்கை


பஞ்ச்:  தோ பாருடா! நானும் ரவுடிதான்னு ஒருத்தன் வாலண்டியரா வந்து வண்டியிலே ஏறுரான்னு கவர்னர் மயங்கி விழுந்துட்டாராமேண்ணே!

செய்தி: நான் மக்களுக்கு விளம்பரம் இல்லாமல் நல்லது செய்கிறேன் - விஜயகாந்த் |

பஞ்ச்: அதான் “ பம்பரமா” சுத்தியும் அடிக்கடி “அபீட்” ஆகிடிறீங்களா கேப்டன்!

பஞ்ச்: முரசோட “வார்” அறுந்து போச்சுன்னா சத்தம் வராதுதான்!

செய்தி: ஆட்சி பொறுப்பேற்றது முதல் மக்களுக்கு உழைத்துக்கொண்டிருக்கிறோம்: எடப்பாடி பேச்சு

பஞ்ச்: இரட்டை இலைக்கு காவி பூசி
பிழைத்துக்கொண்டிருப்பதாக மக்கள் பேசிக்கிறாங்களே!

செய்தி: ஏடிஎம் கார்டு முடங்கியதால் காஞ்சி கோயிலில் யாசகம் கேட்ட ரஷ்ய இளைஞர்

பஞ்ச்: வழிப்போக்கர்களுக்கு கூட நம்ம ஊர் வழிகாட்டியா அமைஞ்சிருது!

பஞ்ச்: கார்டு காட்டாத வழியை “காட்” (god) காட்டியிருக்கார் போல!


செய்தி: எடப்பாடி தொப்பி போடாத எம்ஜிஆர் -அமைச்சர் தங்கமணி

பஞ்ச்: விட்டா நீங்க எல்லோரும் சேர்ந்து அவருக்கு “தொப்பி” போட்டுருவீங்க போலிருக்கே!

செய்தி: 
மூன்று தலைமுறையாக அமேதிக்கு என்னதான் செய்தீர்கள்? ராகுலுக்கு அமித் ஷா கேள்வி! 

பஞ்ச்: சுவரெல்லாம் “காவி” அடிக்காம பார்த்துக்கிட்டாங்களாம் ஜி!

செய்தி: 
டெ‌ங்கு கா‌ய்‌ச்​ச‌ல் க‌ட்​டு‌ப்​பா‌ட்​டி‌ல் உ‌ள்​ள​து: துணை முத‌ல்​வ‌ர் ஓ.ப‌ன்​னீ‌ர்​செல்​வ‌ம்

பஞ்ச்:  நீங்க “சின்னம்மா” கட்டுப்பாட்டில் இருந்த மாதிரியா?

செய்தி: 'டெங்கு' பாதித்தோருக்கு ரூ.2 ,000 : சுகாதார அமைச்சர் தகவல்

பஞ்ச்:  கொசுவையும் “பணம்” கொடுத்தே விரட்டிடுவீங்க போலிருக்கே!

பஞ்ச்: அப்புறம் நிறைய பேருக்கு “பணக்காய்ச்சல்” வந்திரும் போலிருக்கே!


செய்தி: 
நாட்டின் வரா கடன் அளவு ரூ. 9. 53 லட்சம் கோடி


பஞ்ச்:   பண முதலைகள் விழுங்கிய கோடிகள்!  ஏழை ஆடுகள் இழந்த வருமானங்கள்!

செய்தி: அரசு ஊழியர்கள் சம்பளம், மதுபான விலை உயர்கிறது : தமிழக அமைச்சரவை ஒப்புதல்

பஞ்ச்:  இப்படிக் கொடுத்து அப்படி வாங்கிடறாங்க போலிருக்கே! பேஷ்! பேஷ்!



தங்களின் வருகைக்கு நன்றி! பதிவு குறித்த கருத்துக்களை பகிர்ந்துகொள்ளுங்கள் நண்பர்களே! நன்றி!

இன்றைய கவிதை மணியில் என் கவிதை!

இன்றைய கவிதை மணியில் என் கவிதை!

தினமணி கவிதை மணி இணையதளத்தில்   நிசப்த வெளியில் என்ற தலைப்பில் இன்று என் கவிதை வெளியாகி உள்ளது. தொடர்ந்து ஆதரவளித்து வரும் தினமணி குழுமத்திற்கும் எழுத உற்சாகமூட்டும் தமிழக எழுத்தாளர் வாட்சப் குழுமத்திற்கும் தமிழக வலைப்பதிவாளர்கள் குழுமத்திற்கும் நண்பர்களுக்கும் மனமார்ந்த நன்றிகள்!

பதிவினை படித்து கருத்தினை பகிர்ந்து கொள்ளுங்கள் நண்பர்களே! நன்றி!


நிசப்த வெளியில்: நத்தம். எஸ்.சுரேஷ்பாபு

By கவிதைமணி  |   Published on : 14th October 2017 06:27 PM  |   அ+அ அ-   |  
ஓயாத சப்தங்கள்!
வாகன இரைச்சல்கள்!
ஒலிப்பெருக்கியின் அலறல்கள்!
தொலைக்காட்சியின் அழுகைகள்!
குழாயடிச் சச்சரவுகள்!
சந்தை இரைச்சல்கள்!
இவையெல்லாம் தாண்டி
ஒர் வெளி! அது நிசப்த வெளி!
நிசப்த வெளியில் அமருங்கள்!
வெளிச்சத்தத்தை வாங்காது உள் ச(சு)த்தத்தை 
எழுப்பும் உன்னத வெ(ஓ)ளி
உங்களைச்சுற்றி ஆயிரம் நடப்பினும்
காதில் வாங்காதீர்கள்!

காதினை அடைத்துவிடுங்கள்!
மனதினை திறந்து வையுங்கள்!
மனம் முழுதும் ஒளி பரவட்டும்!
ஒளிவீசி வெளிச்சம் பரவுகையில்
நிசப்த வெளியில் நிச்சலமாய்
தோன்றுவார் கடவுள்!
ஆம்! ஆயிரம் ஓசைகள்
அலைகழிக்கையில் அதையெல்லாம்
கடந்து அமைதியாக தியானிக்கையில்
நம்முள் அமர்கிறார் கடவுள்!
மனம் லேசாகும்!

அழுக்குகள் விலகும்!
அமைதி பிறக்கும்!
சத்தங்கள் ஓயாத பூமியில்
நிசப்தம் ஏது? நீ நினைத்தால்
உருவாக்கலாம் நிசப்தவெளி!
அது உன் மனதைக் கட்டுவது!
மனம் கட்டுண்டால் உண்டாகும்
நிசப்தவெளி!
நிசப்தவெளியில் பயணித்தால்
நிச்சயம் கிடைக்கும் மகிழ்ச்சி!

Friday, October 13, 2017

கொஞ்சம் சிரியுங்க பாஸ்! பகுதி 94

கொஞ்சம் சிரியுங்க பாஸ்! பகுதி 94


1, தலைவரே கட்சியிலே நிறைய ஸ்லீப்பர் செல்கள் சேர ஆரம்பிச்சிட்டாங்க!
   அதுக்கென்னய்யா இப்ப?
தூங்கறதுக்கு வசதியா பாயும் தலையணையும் கேக்கறாங்க!

2. கட்சி இப்படி பல அணியா உடையும்னு தலைவருக்கு அப்பவே தெரிஞ்சிருக்கும் போலிருக்கு!
   எப்படி சொல்றே?
கட்சியோட சின்னமா கண்ணாடியைத் தேர்வு செய்து இருக்காரே!


3.  எதுக்காக எம்.எல்.ஏக்களை ரிசார்ட்ஸ்ல அடைச்சு வைக்கிறீங்க?
    ஆட்சியை ரீ_ ஸ்டார்ட் பண்ணனுங்கிறதுக்காகத்தான்!

4. மேடையிலே பேசும் போது நம்ம தலைவர் நிறைய “அப்ளாஸ்” வாங்கினாராமே! அப்படி என்ன பேசி வாங்கினார்?
  நீ வேற ராத்திரி சாப்பாட்டு பொறிச்சு தின்ன அப்பளம் வாங்கினதைத்தான் அப்படிச் சொல்லிக்கிட்டு திரியறார்!

5. தலைவர் கண்ணசைவிலே கட்சியை நடத்திக்கிட்டு இருந்தார்!
    அப்புறம்?
இப்போ கண்ணைக் கட்டி காட்டில் விட்டது போல தவிக்கிறார்!

6. எந்த விஷயத்தையும் அவசரப்படாம ஆறப்போடறதுல என் மனைவி ஸ்பெஷலிஸ்ட் தெரியுமா?
  அதான் உன் வீட்டு டிபனும் காபியும் இவ்வளோ ஆறிப் போயிருந்துதா?

7. சில்லறை விஷயத்துக்கெல்லாம் கோவிச்சுகிட்டு அம்மா வீட்டுக்கு போயிட்டிருந்த உன் பொண்டாட்டிக் கிட்டே இப்ப முன்னேற்றம் இருக்கா?
  இப்பல்லாம் “கட்டுக்கட்டா” என் மேல புகார் எடுத்துக்கிட்டு போறா!

8. கல்யாண நாளுக்கு “ரிங்” போடறேன்னு சொன்னிங்களே எங்க?
   காலையில இருந்து உன் போனுக்கு எத்தனை ரிங் விட்டிருக்கேன் பாரு நீதான் எடுக்கலை!

9.  என் பொண்டாட்டி எப்பவும் “தட்டிக்கொடுத்து” வேலை வாங்கறதிலே சமர்த்து!
   அதான் உன் முதுகு இப்படி வீங்கிப் போயிருக்கா?

10. வேலை நேரத்துல வாட்சப் பார்த்தா என் பொண்டாட்டிக்கு கொஞ்சம் கூட பிடிக்காது!
    நியாயம் தானே!
நீ வேற வீட்டு வேலை செய்யற நேரத்துலன்னு சொல்ல வந்தேன்!

11.  பயிர்க் கடன் வாங்கி அடைக்க முடியலேன்னு புலம்பறீங்களே என்ன பயிர் வைச்சீங்க?
  என் பொண்ணு கல்யாணத்துக்கு வாங்கின கடனத்தான் சொல்றேன்! அது ஆயிரங்காலத்து பயிர்தானே!

12. மாப்பிள்ளை பெரிய ரிசார்ட்ஸ் ஓனர்!
    அரசியல்வாதிங்க சகவாசம் அதிகமா இருக்கும் வேணாம் வேற வரனைப் பாருங்க!

13. பையன் இஷ்டப்பட்டானேன்னு எஞ்ஜினியரிங் படிக்க வைச்சேன்!
    அப்ப இப்ப கஷ்டப்பட்டுக்கிட்டு இருக்கேன்னு சொல்லுங்க!  

14. எவ்வளவு பெரிய பிரச்சனை வந்தாலும் அவர் ஊதித் தள்ளிடுவாராமே அவ்வளவோ செல்வாக்கானாவரா?
  ஊகும்!  நாதஸ்வர வித்வானா இருக்கார்!

15. அந்த பவுலரை டீம்ல சேர்க்க கூடாதுன்னு ஏன் கலாட்டா பண்றாங்க?
   அவர் “சைனாமேன் பவுலராம்”!

16.  எதிரியின் நாட்டுச்சிறையில் ஏதோ வசதி இருக்கிறதாமே அமைச்சரே!
       ஆம் மன்னா!
    ஸ்பெஷலாக கவனித்தால் ஷாப்பிங் போய் வர அனுமதிப்பார்களாம்!

17.   இளவரசரை  காவலர்கள் குதிரையேற்றத்தின் போது தடுத்து விட்டார்களாமே!
   ஆம்! ஒரிஜினல் லைசென்ஸ் கொண்டு வரவில்லை என்று தடுத்து விட்டார்களாம்!

 18. இளவரசியின் சுயம்வரத்துக்கு எல்லா ஏற்பாடுகளும் தயாராகி விட்டதா மந்திரியாரே!
   தற்கொலைக்குத் தூண்டுவதாக யாரோ நீதிமன்றத்தில் வழக்குத் தொடர்ந்து விட்டார்கள் பிரபு!

19;  எதிரியுடன் இனி என் வாள் பேசும்! வாய் பேசாது! என்று சொன்னாரே மன்னர்
   அப்புறம் என்ன ஆயிற்று!
மவுனமாய் வாளை எதிரியின் பாதங்களில் வைத்து சரணாகதி ஆகிவிட்டார்!

20. கொடி அசைந்ததும் காற்று வந்தது!
      எப்படி?
எதிரியிடம் சமாதானக் கொடியை ஆட்டியதும்தாம் மன்னருக்கு மூச்சே விட முடிந்தது என்று சொன்னேன்!

பின் குறிப்பு: நீண்ட நாட்களுக்குப் பிறகு மீண்டும் ஜோக்ஸ் எழுத ஆரம்பித்துள்ளேன்! குறையிருந்தால் சுட்டுங்கள்! நிறையிருந்தால் பாராட்டுங்கள்!


தங்கள் வருகைக்கு நன்றி! பதிவு குறித்த கருத்துக்களை பின்னூட்டத்தில் தெரிவித்து ஊக்கப்படுத்துங்கள்! நன்றி!
Related Posts Plugin for WordPress, Blogger...