Tuesday, March 15, 2016

தளிர் ஹைக்கூ கவிதைகள்!

தளிர் ஹைக்கூ கவிதைகள்!

இரவு நேரம்
இசை இனிக்கவில்லை!
கொசு!

பற்றிக் கொண்டதும்
பற்று அறுத்தது
நெருப்பு!

விளக்கேற்றி வைத்த போதும்
சூழ்ந்து கொண்டது இருள்!
நிழல்!

ஓசையோடு வாகனங்கள்!
அமைதி தொலைத்த சாலைகள்!
நள்ளிரவு

தழுவ மறுத்ததும்
கலைந்து போனது நித்திரை!
காற்று!

வண்ணமில்லா சித்திரங்கள்!
கருவில்லாமல் உருவாகின!
நீர்ச் சிதறல்!

புரட்டிப் பார்த்தது புத்தகங்களை
படிக்கவில்லை!
காற்று!

துரத்தி வந்தன
பிடிக்க முடியவில்லை!
வாகன முகப்பில் பூச்சிகள்!


முகவரி இழக்கும் முன்
முகம் ரசித்தது
தேன் சிட்டு!

கூந்தலில் பூச்சூடின
மரங்கள்!
மின்மினி!

குறும்புகள் பூக்கையில்
குதுகலமாகிறது வீடு!
குழந்தை!


சுண்ணாம்பு கட்டியில்லை
கரும்பலகையில் வளைகோடு!
பிறை நிலவு!

சுட்டெரிக்கும் சூரியன்!
தள்ளிப்போனது
காற்று!

பெரியவர்களான குழந்தைகள்!
புரியாமல் பூரிக்கும் பெற்றோர்
குட்டி சுட்டீஸ்!

பிஞ்சுகள் நஞ்சாக
பெற்றோர்கள் கொடுக்கிறார்கள் விலை!
தொலைக்காட்சி!

தாங்கி பிடித்தும்
தவிக்கவிட்டு சென்றனர்
துணி கிளிப்!

ஓலமிட்டன வண்டுகள்!
சூழ்ந்து கொண்டது
இருள்!



டிஸ்கி} வேலைப்பளு, கணிணி பழுது காரணமாக தொடர்ந்து இணையம் வர முடியவில்லை. சிக்கல் சீரடைந்ததும் தளிர் நடை தொடரும்

தங்கள் வருகைக்கு நன்றி! பதிவு குறித்த கருத்துக்களை பின்னூட்டத்தில் தெரிவித்து ஊக்கப்படுத்துங்கள்! நன்றி!


சிறுதுளி!

சிறுதுளி!


அந்த பெரிய உணவகத்தில் உணவருந்திக் கொண்டிருந்தனர் மணிவாசகமும் அவரது மகன் கோகுலும். மணிவாசகம் இன்றைக்கு ஊரில் பெரிய செல்வந்தர். ஒரு சாதாரண பணியாளாய் வாழ்க்கையைத் துவக்கியவர் தன் அயராத உழைப்பினால் இன்று ஒரு பெரிய சோப்பு கம்பெனியை நடத்தி வருகிறார்.
    உணவருந்தியதும் சர்வர் கொண்டுவந்த பில்லை செட்டில் செய்ய எடுத்தார் மணிவாசகம். “ஐயா! என்று தலையை சொறிந்தபடி நின்றான் சர்வர்.மணிவாசகம் அவனை ஏறிட்டும் பார்க்காமல் நேரே கவுண்டரில் சென்று பணத்தை கட்டிவிட்டு மீதிச்சில்லறையை வாங்கி பையில் போட்டுக்கொண்டார். கார் பார்க்கிங்கிலும் காரை கிளப்பியதும் வந்து நின்ற சேவகனை கவனிக்காதது போல கிளம்பிவிட்டார்.
   “சரியான சாவுகிராக்கி” என்று பின்னால் அவன் முணுமுணுப்பது தெரிந்து கோகுலுக்கு அவமானமாகப் போய்விட்டது. அங்கிருந்து ஒருபழக்கடைக்குச் சென்றவர் பழங்களை பேரம் பேசி வாங்கிக் கொண்டிருந்தார். இறுதியில் ஒரு பத்து ரூபாய் குறைத்து வாங்கியதும் அவருக்கு மகிழ்ச்சி. இவர் காரில் ஏறும் பொழுது, கடைக்காரன் பெருசா வந்திருதுங்க காரை எடுத்துகிட்டு! பத்து ரூபாய்க்கு பேரம் பேசிக்கிட்டு! என்று சொல்ல மீண்டும் காரில் இருந்து இறங்கியவர், ஏன் காரில் வந்தால் பத்து ரூபாய் கூட வைச்சுத்தான் விற்பியா? என்று சண்டைக்குப் போய்விட கோகுலுக்கு மிகவும் சங்கடமாகப் போய்விட்டது.
     “அப்பா! வாங்கப்பா! ப்ளீஸ்! இதுக்கு போய் சண்டை போட்டுக்கிட்டு?” என்று அழைத்தான்.
    “இதுக்குத்தான் சண்டை போடனும்! நியாயமான விலையில விற்கணும் அவன். காரில வர்றவங்களுக்கு ஒரு விலை நடந்து வர்றவங்களுக்கு ஒரு விலையா? இது எந்த சட்டத்துல இருக்கு?” என்று கத்தினார்.
   கூடியிருந்தவர்கள் ஒரு மாதிரி பார்க்க “ஐயோ அப்பா! போய் முதல்ல காரில் ஏறுங்க! எல்லோரும் நம்மையே பாக்கிறாங்க!” என்றான்.
    “பார்க்கட்டுமே! இதுல என்ன அவமானம் இருக்கு? நானா ஏமாத்தினேன்! அவன் அந்த கடைக்காரன் தான் பத்து ரூபா அநியாயமா சுருட்ட பார்த்தான். சரியா பேரம் பேசி வாங்கினா என்னையே மட்டமா பேசறான்.”
   இதற்குள் சிலர்,  “போங்க சார்! இதையெல்லாம் பெரிசு படுத்திக்கிட்டு! சின்ன விசயம் சார் இதெல்லாம்! இந்த பத்து ரூபாய்ல அவன் கோட்டை கட்டிடப் போறானா? விட்டுத் தள்ளுங்க சார்!” என்றனர்.
    இன்னும் அவருக்கு கோபம் அதிகரித்து விட்டது.  “இப்படியே விட்டு விட்டுத்தான் எல்லாத்திலேயும் கரப்ஷன். அப்புறம் கவர்மெண்டை குறை சொல்றது”. என்று ஆரம்பித்தவர் மகன் காரினுள் சென்று அமர்ந்து விட்டதை பார்த்து இவன் ஒருத்தன்! எதுவுமே கேட்க மாட்டான். என்று தானும் சென்று காரில் ஏறிக்கொண்டார். கார் விரைந்தது.
   அடுத்த நாள் காலை வீட்டில் உணவருந்திக் கொண்டு இருந்த போது, அப்பா! நான் என் ப்ரெண்ட் மாதவனை பார்க்கணும் கார் எடுத்திகிட்டு போறேன்! என்ற மகனை நிறுத்தினார் மணிவாசகம். “ உன் ப்ரெண்ட் எங்க இருக்கான்?”  தி.நகர்லப் பா!
 நாம எங்க இருக்கோம்? இதென்ன கேள்வி என்பது போல பார்த்தவன் வட பழனிலப்பா! என்றான்.
   இந்த ரெண்டு எடத்துக்கும் அதிக பட்சம் எவ்வளவு தூரம் இருக்கும் ஒரு  ஐந்து இல்லே ஆறு கி,மீ வருமா? இதுக்கு கார் எதுக்கு? ஹெவி டிராபிக் ஏரியா?  நீ மட்டும் தானே போறே?  நீ ஒருத்தன் போறதுக்கு கார் எதுக்கு? என்றார்.
   கோகுலுக்கு எரிச்சலாய் வந்தது. “ ஐயோ! அப்பா! எதுக்கெடுத்தாலும் சிக்கனமா? நான் போகவே இல்லை விட்டுடுங்க?
   “ நான் போக வேண்டாம்னு சொல்லலை கோகுல்! கார்ல போக வேண்டாம்னுதான் சொல்றேன்”
   அதான் ஏன்னு கேக்கறேன்பா! நாம ஒண்ணும் பிச்சைகாரங்க கிடையாது. பணத்தை ஏன் இப்படி மிச்சப்படுத்தறீங்க?
   “ நாளைக்கு நாம பிச்சை எடுக்க கூடாதுன்னுதான்!”
   “என்ன சொல்றீங்கப்பா? அப்படியா இருக்குது நம்ம நிலைமை!”
   “கோகுல் நீ பணக்காரனுக்கு பிறந்தவன்! ஆனா நான் ஏழைக்கு பொறந்து இன்னிக்கு பணக்காரனா உயர்ந்து இருக்கேன்! உலகம் உருண்டைப்பா! உயர்ந்தவன் தாழலாம் தாழ்ந்தவன் உயரலாம்! இன்னிக்கு இருக்குங்கிறதுக்காக வீணா விரயம் பண்ணக்கூடாது. செல்வத்தை நாம மதிச்சா அது நம்மை மதிக்கும்! இல்லேன்னா அது நம்மல மிதிச்சி போட்டுரும்!”
    “புரியலைப்பா! சர்வருக்கு ஒரு பத்து ரூபா டிப்ஸ் தராம இருக்கிறதாலேயும் பழம் வாங்கறப்ப ஒரு பத்து ரூபா மிச்சம் பிடிக்கிறதுனாலேயும் நாம வளர்ந்திருவோமா?”
    “இங்கதான் நீ தப்பு பண்றே கோகுல்! சிறு துளிதான் பெரு வெள்ளமா மாறுது! பத்து பத்து ரூபாய் சேர்ந்தால்தான் நூறு ரூபா கிடைக்கும். இன்னிக்கு பத்து ரூபாதானேன்னு அலட்சியமா இருந்தா நாளைக்கு நூறு ரூபா! அப்புறம் ஆயிரம் பத்தாயிரம்னு வளர்ந்துட்டே போகும். நமக்கு பத்து ரூபா பெரிசா தெரியலை! ஆனா பழம் விற்கறவனுக்கு பத்து ரூபா பெரிசா தெரிஞ்சதனாலேதானே அதிகமா விக்கிறான். நியாயமா செலவு பண்ணலாம் தப்பு இல்லே! உழைக்கிறவனுக்கு ஒரு ரூபா அதிகமா கொடுக்கலாம். ஆனா இப்படி ஆளை பார்த்து ஏமாத்தறவங்க கிட்ட ஏமாந்துட கூடாது. ஒவ்வொரு ரூபாயும் நாம் உழைச்சுதான் சம்பாதிக்கிறோம்! அதை ஊதாரித்தனமா செலவு பண்ணக்கூடாதுங்கிறது என் பாலிசி. அதை நான் மாத்திக்க மாட்டேன்.   ஒரு காலத்திலே தண்ணி நிறைய இருந்தது! நிறைய செலவழிச்சாங்க! வீணடிச்சாங்க! ஆனா இன்னிக்கு தண்ணியை விலை கொடுத்து வாங்க வேண்டியதா போச்சு இல்லே! எதுக்கும் ஒரு அளவு இருக்கு. அந்த அளவோட பயன்படுத்தினா வளமா இருக்கலாம். இருக்குதுன்னு ஆட்டம் போட்டா அந்த ஆட்டம் கொஞ்ச நாள் தான் தாங்கும். நீயும் புரிஞ்சி நடந்துகிட்டா உன் வாழ்க்கை நல்லா இருக்கும்” என்றார்.

  தந்தையின் பேச்சில் இருக்கும் நியாயத்தை புரிந்து கொண்ட கோகுல் நான் பஸ்ஸிலேயே போய் வரேன்பா! என்றான்.
   மகிழ்வுடன் புன்னகைத்தார் மணிவாசகம்.

(மீள்பதிவு)
தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!

Tuesday, March 1, 2016

ஸ்ரீ லலிதாம்பிகை கோயிலில் அன்னப்பாவாடை மகோற்சவம்!

ஸ்ரீ லலிதாம்பிகை கோயிலில் அன்னப்பாவாடை மகோற்சவம்!


திருவாரூர் மாவட்டம் நன்னிலம் வட்டத்தில் அமைந்துள்ளது திருமீயச்சூர் என்னும் அழகிய தலம். உலகை எல்லாம் கட்டி ஆளும் அன்னை ஸ்ரீ லலிதாம்பிகை ராஜ தர்பாரில் அமர்ந்து ஆட்சி செலுத்தும் அற்புதமான திருக்கோயில்.

  பேரளம் ரயில் நிலையத்தில் இருந்து மேற்கே இரண்டு கிலோமீட்டர் தொலைவில் இத்திருக்கோயில் அமைந்துள்ளது.  திருவாரூர் செல்லும் சாலையில் கும்பகோணத்தில் இருந்து காரைக்கால் செல்லும் சாலையில் பேரளம் என்னும் இடத்தில் இருந்து மேற்கே இரண்டு கிலோமீட்டர் சிறிய சாலையில் சென்றால் திருமீயச்சூரை அடையலாம்.

  ஸ்ரீ லலிதாம்பிகை சமேத ஸ்ரீ மேகநாத சுவாமி திருக்கோயிலும் மற்றும் அதனுள்ளேயே ஸ்ரீ மின்னும் மேகலை சமேத ஸ்ரீ சகல புவனேஸ்வரர் என்னும் இளங்கோயிலும் சேர்ந்து அமையப்பெற்றுள்ளது. சோழர் கால கற்கோயிலான இது கலையழகும் சிற்ப நயமும் கொண்டது. இராசேந்திர சோழன், செம்பியன் மாதேவி போன்றோர் திருப்பணி செய்துள்ளனர். கஜப்பிரஷ்ட விமான அமைப்பு உடையது.

சூரியன் பார்வதி பரமேஸ்வரரை கஜவாகன ரூபராய் வைத்து  பூஜித்தமையால் விமானம் இவ்வாறு அமைந்து உள்ளது. ஸ்ரீ பரமேஸ்வரரால் சாபம் பெற்று கருமை நிறம் அடைந்த சூரியன் இங்குள்ள இறைவனை வழிபாடு செய்து சாபம் நீங்கப் பெற்றான், சூரிய புஷ்கரணி இங்கு அமைந்துள்ளது.

  சூரியன் சாபவிமோசன காலம் முடிந்தும் கருமை நிறம் மாறவில்லையே என்று வருந்தி ஸ்ரீ லலிதாம்பிகையும் ஸ்ரீ மேகநாதரும் தவத்தில் இருக்கும் சமயம் “ஹேமிகுரா” என்று எனது கருமை நிறம் நீங்கவில்லையே என்று கதறுகிறார். இதனால் அம்பாளின் தவம் கலைந்து சூரியனுக்கு சாபம் கொடுக்க வருகிறார். சிவபெருமான் தடுத்து நிறுத்தி சாந்தப்படுத்துகின்றார். இது ஷேத்ரபுராணேச்வரர் சிற்பம் வடிவத்தில் ஆலயத்தில் காணப்படுகின்றது.

ஸ்ரீ லலிதாம்பிகை பண்டாசுரனை சம்ஹாரம் செய்து கோபாவேசம் தனிய தெற்கு முகமாக பஞ்சாசன பீடத்தில் ஸ்ரீ மேருவின் மீது அமர்ந்து தவக்கோலத்துடன் ஸ்ரீ மனோன்மணி சொரூபமாக  காட்சி தருகின்றார். அம்பாளை சாந்திப்படுத்த அம்பாளின் முகத்தில் இருந்து தோன்றிய வசின்யாதி வாக் தேவதைகள் மூலம் மிக உயர்ந்த ஸ்தோத்திரமான ஸ்ரீ லலிதா ஸஹஸ்ர நாமம் முதன் முதலில் உலகிற்கு தோன்றிய தலம் இது. அது ஸ்ரீ ஹயக்கிரிவரால் ஸ்ரீ அகஸ்தியருக்கு உபதேசிக்கப்பட்டு  ஸ்ரீ அகஸ்தியர் மூலம் உலகில் அனைவராலும் பாராயணம் செய்யப்பட்டு வருகின்றது. அனைத்து அம்மன் ஆலயங்களில் லலிதா சகஸ்ரநாமம் அர்ச்சனை செய்விக்கப்படுகின்றது. இதை பாராயணம் செய்து பலனடைந்தோர் ஏராளம். அப்படி பாராயணம் செய்பவர்கள் வருஷம் ஒரு முறையாவது ஸ்ரீ லலிதையின் சந்நிதியில் வந்திருந்து பாராயணம் செய்து மனநிறைவு அடைகின்றனர்.

  சர்வலாங்கார பூஷிதையாக கைகளில் வளையல்களும் அமர்ந்த நிலையில் கால்களில் கொலுசும் இடுப்பில் ஒட்டியானமும் கழுத்தில் சகல விதமான ஆபரணங்களும் அணிந்து அற்புதமாக காட்சி அளிக்கின்றாள் அன்னை ஸ்ரீ லலிதாம்பிகை.

  இத்தகு சிறப்பு வாய்ந்த ஸ்ரீ லலிதாம்பிகைக்கு மாசி மாத அஷ்டமி நவமி இணைந்த நாளில் ஆதி சைவ சிவாச்சார்யர்களும் அன்னையின் பக்தர்களும் அம்பாள் உபாசகர்களும் கூடி இணைந்து ஏகதின லெட்சார்ச்சணை, மற்றும் ஹோமம் பள்ளயம் எனப்படும் அன்னப்பாவாடை மகா நைவேத்தியம் போன்ற வழிபாடுகளை கடந்த பத்து வருஷங்களாக மிகச்சிறப்பாக செய்து வருகின்றனர்.

   இந்த வருஷமும் நாளை 2-03-2016 மன்மத வருஷம் மாசி மாதம் 19ம் தேதி புதன் கிழமை அஷ்டமி நவமி இணைந்த நாளில் ஏகதின லெட்சார்ச்சணையும் மற்ற நிகழ்வுகளும் நடைபெற உள்ளது.
லெட்சார்ச்சணையின் போது பத்து காலத்திற்கும் பத்துவிதமான பிரசாதங்கள் காலம் ஒன்றிற்கு பத்துகிலோ வீதம் நூறு கிலோ பிரசாதம் நைவேத்தியம் செய்யப்படுகின்றது. உச்சிகாலத்தில் விஷேசமாக பிரண்டை சாதம் பத்துகிலோ நைவேத்தியம் செய்யப்படுகின்றது.

 அர்ச்சனையின் போது காலை முதல் மாலைவரை 10 ஆயிரம் ஆவர்த்தி ஹோமமும் அதன் அங்கமாக ஆயிரம் ஆவர்த்தி தர்ப்பணமும் நடைபெற்று அம்பிகைக்கு மஹா அபிஷேகமாக  பால் பழம் பஞ்சாமிர்தம், மஞ்சள், சந்தனம், பன்னீர் போன்றவை செய்விக்கபட்டு கலசாபிஷேகம் செய்விக்கப்பட்டு சர்வாலங்கார பூஷிதையாக அலங்காரம், மலர் கிரீடம் தரித்து காட்சி தரும் அம்பிகைக்கு மஹா நைவேத்தியம் செய்விக்கப்பட உள்ளது.

  அன்னப்பாவாடை என்னும் இந்த நைவேத்தியத்தில் 50 கிலோ சர்க்கரை பொங்கல், 50 கிலோ புளியோதரை மற்றும் 50 கிலோ தயிர்சாதம் படைக்கப்படும் மற்றும் பஞ்ச பட்சணங்களான அதிரசம், முறுக்கு, லட்டு, வடை, பாயாசம் போன்றவையுடன் இளநீர், பழங்கள் படைக்கப்படும்.

  சர்க்கரை பொங்கலில் நெய் ஊற்றி நெய்க்குளம் உருவாக்கி அதில் அம்பாளின் பிம்பத்தை விழ வைத்து தரிசனம் செய்து வைக்கப்படும். இந்த காட்சியை காண பல்லாயிரக் கணக்கான மக்கள் காத்திருந்து கண்டு களித்து மீண்டும் மீண்டும் தரிசித்து இன்புறுவர்.

இத்தகைய  சிறப்பு வாய்ந்த விழாவினை வேளாக்குறிச்சி ஆதின கர்த்தரும் பரம்பரை அறங்காவலருமான  ஸ்ரீலஸ்ரீ சத்யஞான மகாதேவ தேசிக பரமாச்சார்ய சுவாமிகள் முன்னின்று நடத்திக் கொடுக்க இசைந்துள்ளார்கள்.

  எங்கும் காணக்கிடைக்காத இந்த அற்புத  காட்சியை தரிசனத்தை கண்டு அன்னை லலிதாம்பிகையின் அருளுக்கு பாத்திரர்கள் ஆகி அனைத்து நற்பலன்களையும் பெற்றுய்யுவோமாக.

நிகழ்ச்சி ஏற்பாடுகள் : தொடர்பு கொள்ள

  சிவஸ்ரீ கடலூர் டி. சரவண சிவாச்சார்யார்  செல்: 9786907954
 சிவஸ்ரீ கடலூர் எஸ். கைலாச சிவாச்சார்யார்  செல். 9443189253
சிவஸ்ரீ டி.வி. ரவிச்சந்திர சிவாச்சார்யார்  செல் 9440180621
சிவஸ்ரீ  பி. சதீஷ் குருக்கள், மாங்காடு  செல்: 9444701732

டிஸ்கி} இந்த விழாவில் கலந்து கொள்ள திருமீயச்சூர் செல்கிறேன். அருகில் உள்ள பதிவர்கள் நாளை ஆலயத்திற்கு வந்தால் என்னை சந்திக்கலாம். அல்லது என்னை செல்லில் (9444091441 ) தொடர்பு கொண்டால் என்னால் இயன்றால் சந்திக்க முயல்கிறேன். நன்றி!
தங்கள் வருகைக்கு நன்றி! பதிவு குறித்த கருத்துக்களை பின்னூட்டத்தில் தெரிவித்து ஊக்கப்படுத்துங்கள்! நன்றி!

  
Related Posts Plugin for WordPress, Blogger...