Monday, November 23, 2015

சுகங்கள் நல்கும் கார்த்திகை சோமவார விரதம்!

சுகங்கள் நல்கும் கார்த்திகை சோமவார விரதம்!


 தமிழ் மாதங்களில் கார்த்திகை மாதம் சிறப்பு வாய்ந்தது. கார்த்திகையில் சுபகாரியங்கள் நடத்துவது சிறப்பாகும். விரதங்கள் கடைபிடிக்கவும் கார்த்திகை மாதம் உகந்ததாகும். சங்க இலக்கியங்களிலும் கார்த்திகை மாதம் சிறப்பித்துக் கூறப்படுகின்றது.

   கார்த்திகை மாதத்தில் வரும் திங்கட்கிழமைகள் ஈஸ்வரனுக்கு மிகவும் உகந்த நாளாகும். சோகங்களைப் போக்கி சுகங்களை தரவல்லது கார்த்திகை சோமவார விரதமாகும்.

     கார்த்திகை மாத சுக்ல பட்ச அஷ்டமி திதியில் தோன்றியவர் சோமன் எனக்கூடிய சந்திரன். இவருக்கு தட்சன் தன்னுடைய இருபத்தேழு பெண்களையும் திருமணம் செய்து கொடுத்தார். அவர்களில் ரோகிணியிடம் மட்டும் சந்திரன் அதிக அன்பு பாராட்டினான்.

   மற்ற பெண்கள் தந்தையிடம் முறையிட்டார்கள். தட்சன் வெகுண்டு போய் சந்திரனை தேய்ந்து போகும் படி சாபம் இட்டார். தன்னுடைய ஒளி தேய்ந்து போவதை கண்டு வேதனையடைந்த சந்திரன் சிவபெருமானை சரணடைந்தார். சிவபெருமானும் சந்திரனை தன்னுடைய தலையில் சூடி பாதி நாள் வளர்ந்தும் பாதி நாள் தேய்ந்தும் இருக்கும்படி சாபத்தை மாற்றி அமைத்தார்.

    இவ்வாறு சந்திரன் சிவனை சரணடைந்த நாள் கார்த்திகை சோமவாரம் ஆகும். சந்திரனின் சோகம் போக்கி சுகமருளச்செய்த சிவபெருமானிடம் சந்திரன் இந்த சோமவார விரதத்தை கடைபிடிப்பவர் வாழ்வில் சுகங்கள் பெருகவேண்டும் என்று வேண்டினான். சிவபெருமானும் அவனது வேண்டுதலை ஏற்று சோமவார விரதம் அனுஷ்டிப்பவர்களுக்கு சுகங்களை நல்குவதாக வாக்களித்தார். இதுவே கார்த்திகை சோமவார விரதக் கதையாகும்.

   கார்த்திகை மாதத்தில் நான்கு அல்லது ஐந்து சோமவாரங்கள் வரும். முதல் சோமவார தினத்தில் விரதம் துவங்க வேண்டும். அதுமுதல் தம் விருப்ப படி அந்த மாதம் மட்டுமே அல்லது 16 வாரங்கள் அல்லது ஆண்டு முழுவதும் என விரதம் இருக்கலாம்.

சோமவார விரதம் மூலம் சிவனை வழிபடுவது மிகவும் எளிதானது. உத்தமமான விரதங்களுள் ஒன்று சோமவார விரதம் என்று வேத நூல்கள் கூறும்.   அதிலும் சிவனுக்குரிய சோமவாரத்தில் கார்த்திகை மாதச் சோமவாரம் மிகவும் உத்தமம்.
கார்த்திகை சோமவார வழிபாடு பல்லாண்டுகளாக சிவாலயங்களில் சிறப்பாக நடத்தப்படுகிறது. 

கார்த்திகை சோமவார தினத்தன்று அதிகாலையில் எழுந்து நீராடி அன்றாட அனுஷ்டானங்களை முடித்து சிவ பூஜை செய்ய வேண்டும். ஓரு வேதியர் தம்பதியினரை அழைத்துவந்து உபசாரங்கள் செய்து அவர்களுக்கு தங்களால் முயன்ற அளவு தானங்கள் அளித்து ஆசி பெற வேண்டும். அன்று பகல்பொழுது உண்ணாமல் இருந்து மாலையில் சிவதரிசனம் செய்து முன்னிரவில் சிறு உணவு உண்டு உபவாசம் முடிக்க வேண்டும்.

  இவ்வாறு செய்ய முடியாதவர்கள் அன்று நீராடி சிவ ஆலயங்களுக்கு சென்று அங்கு நடைபெறும் அபிஷேக ஆராதனைகளில் கலந்து கொண்டு தங்களால் இயன்ற அபிஷேகதிரவியங்களை சமர்பித்து வழிபடலாம்.

  கார்த்திகை மாதத்தில் சிவபெருமான் அக்னிப்பிழம்பாக இருப்பதாக புராணங்களில் சொல்லப்பட்டுள்ளது. எனவே அவரை குளிர்விக்க சங்காபிஷேகம் செய்யப் படுகின்றது. 108 சங்குகளில் நீரினை நிரப்பி வாசனைத் திரவியங்களை அதில் போட்டு சந்தனம் முதலிய அலங்காரத் திரவியங்களை சமர்பித்து இறைவனை அதில் ஆகர்ஷணம் செய்து பூஜைகள் செய்து பின் அந்த நீரையும் கலச நீரையும் இறைவனுக்கு அபிஷேகம் செய்வது சங்காபிஷேகம் ஆகும்.

 ஒவ்வொருவர் வீட்டில் உள்ள நீரிலும் கார்த்திகை மாதத்தில் திருமால் குடியிருக்கிறார். சங்கு லஷ்மியின் அம்சமாகும். எனவே சங்காபிஷேகம் சிவ வைணவ ஒற்றுமையையும் பறை சாற்றுகின்றது. கார்த்திகை சோமவார  விரதத்தை கடைபிடிப்பவர்கள் எனக்கு விருப்பமானவர்கள். அவர்களை என்னோடு இணைத்துக் கொள்வேன் என்று சிவபெருமான் கூறுவதாக புராணங்களில் சொல்லப்பட்டுள்ளது.

கார்த்திகை சோமவார தினத்தில் சிவனையும் விஷ்ணுவையும் வில்வ இலைகளால் அர்சித்து வழிபாடு செய்தால் லஷ்மி கடாட்சம் உண்டாகும்.

கார்த்திகை மாதத்தில் விடியற்காலையிலும் அந்திப்பொழுதிலும் வாசல் தெளித்து கோலமிட்டு விளக்கேற்றி வழிபட துன்பங்கள் அகலும்.

பல்வேறு கிராமங்களில் பழமையான சிவாலயங்கள் வழிபாடு இன்றி புதர் மண்டிக் கிடக்கின்றது. கார்த்திகை மாத சோமவார தினத்தில் பழமையான சிவாலயங்களுக்குச் சென்று ஒருவேளை பூஜைக்கு உதவி விளக்கேற்றி வழிபடலாமே!

சிறப்பு வாய்ந்த கார்த்திகை சோமவார விரதம் அனுஷ்டித்து சிவதரிசனம் செய்து வாழ்வில் ஏற்றம் பெறுவோம்!


Sunday, November 22, 2015

தித்திக்கும் தமிழ்! பகுதி 24 தமிழர்கள் கொண்டாடிய தீபாவளி!

தித்திக்கும் தமிழ்! பகுதி 24

 தமிழர்கள் வாழ்வில் விளக்கினுக்கு பெரும்பங்கு உண்டு. எந்த ஒரு செயலைத் தொடங்கும் முன் விளக்கேற்றி வழிபடுவது தமிழர் மரபு. இருளினை அகற்றி ஒளியினை தருவது விளக்கு. பஞ்ச பூதங்களில் ஒன்றான அக்னியின் அம்சம். அந்திப் பொழுதிலும் அதிகாலையிலும் வாசல் தெளித்து கோலமிட்டு அகல் விளக்கினை ஏற்றி வைத்து வழிபட வீட்டின் இருள் அகன்று அருள் சிறக்கும் என்பது பழந்தமிழர் நம்பிக்கை.


     இன்று தீபாவளி என்று ஆயிரக்கணக்கான ரூபாய்களுக்கு பட்டாசுகள் வெடித்து இனிப்புக்கள் உண்டு மகிழ்கிறோம். பண்டைக் காலத்தில் இந்த தீபாவளிக்கு நிகராக கார்த்திகைத் திருநாள் கொண்டாடப்பட்டது. சங்க இலக்கியங்களில் கார்த்திகை திருநாள் குறித்து பல பாடல்கள் உண்டு.
    கார்த்திகை மாதத்தில் முழுநிலவு நாளன்று கிருத்திகை நட்சத்திரம் உதிக்கும் நன்னாளில் வீடுகளில் விளக்கேற்றி வழிபடுவர்.  அகநானூறில் 141ம் பாடல் இதைப் பற்றி விரிவாக கூறும்.

   இந்த வருடம் கார்த்திகை முழுநிலவு கிருத்திகை நாள் வரும் புதனன்று வருகிறது. தமிழர்களின் சிறப்பான பண்டிகையை அன்று இல்லங்கள் தோறும் அகல்விளக்கேற்றி இருளகற்றி கொண்டாடி மகிழ்வோம்.  கொண்டாடும் சமயம் இந்த நற்றினை பாடலை நினைவு கூர்வோம்.

      புலி பொரச் சிவந்த புலால்அம் செங் கோட்டு
      ஒலி பல் முத்தம் ஆர்ப்ப, வலி சிறந்து
      வன் சுவல் பராரை முருக்கி, கன்றோடு
       மடப் பிடி தழீஇய தடக் கை வேழம்,
      தேன் செய் பெருங் கிளை இரிய, வேங்கைப்
      பொன் புரை கவளம் புறந்தருபு ஊட்டும்
      மா மலை விடரகம் கவைஇ காண்வர,
      கண்டிசின் – வாழியோ, குறுமகள்!-நுந்தை,
      அறுமீன் பயந்த அறம் செய் திங்கள்
      செல் சுடர் நெடுங் கொடி போல,
      பல் பூங் கோங்கம் அணிந்த காடே,

துறை:  உடன்போகா நின்ற தலைமகன் தலைமகட்கு சொல்லிது
பாடியவர் } பாலை பாடிய பெருங்கடுங்கோ

  தலைவன் தலைவியை அழைத்துக் கொண்டு தன் நாட்டிற்கு செல்கின்றான். அவன் நாடு செல்லும் வழியில் ஓர் யானை தன் துணையோடு குட்டிகளையும் தழுவிச் செல்கிறது.

  அந்த யானை நீண்ட துதிக்கையும் முற்றிய கொம்புகள் உடைய தந்தங்களை உடையது. தந்தங்களில்முற்றிய முத்துக்கள் ஒலிக்க அது அங்கிருந்த மேடான பகுதியில் ஓங்கி வளர்ந்திருந்த வலிமையான வேங்கை மரத்தை தன்னுடைய துதிக்கையால் முறித்துப் போட்டது
.
  வேங்கை மரத்தின் உச்சியில் தேனீக்கள் பலநாட்களாக சேர்த்து வைத்திருந்த தேன்கூடு சிதறி அதிலிருந்த ஈக்கள் பறந்தோடின. யானையானது வேங்கை மரத்தின் பொன் போன்ற பூக்களை உடைய இலைத்தழைகளை தன்னுடைய துணைக்கும் குட்டிக்கும் உணவாக அளித்தது.

தானம் செய்ய சிறந்த கார்த்திகை மாதத்தில் முழுநிலவு நாளன்று கார்த்திகை நட்சத்திரம் உதிக்கும். அந்நாளன்று வரிசையாக ஏற்றிவைக்கப்படும் விளக்கில் இருந்து ஒளிக்கற்றை பரவும். அவ்விளக்குகளின் ஒழுங்கைப் போல கோங்கு மரங்களின் பூக்கள் வரிசையாக பூத்து அழகாக இந்தக் காட்டை அலங்கரிக்கின்றன. இந்த அழகான உன் தந்தையின் காட்டின் அழகை ரசித்துக் கொண்டே என்னுடன் வருவாயாக! என்கின்றான் தலைவன்.

பாட்டில் அறுமீன்  என்று சொல்லப்படுவது கார்த்திகை முழுநிலவு நாளை குறிக்கின்றது.

கன்றொடு பிடி தழுவிய வேழம் கவளம் ஊட்டும் என்ற வரிகள் தலைவன் தலைவியை மணந்து பிள்ளைகள் பெற்று இருவருக்கும் உணவளிப்பேன்! என்று காதலிக்கு மறைமுகமாக உணர்த்தும் இறைச்சிப் பொருள் ஆகும்.
  
அழகிய பாடலை ரசித்தீர்களா? கார்த்திகை நாளன்று இல்லங்களில் விளக்கேற்றி தமிழ் தீபாவளி கொண்டாடுவோம்! தமிழர் பெருமை சேர்ப்போம்!

மீண்டும் ஒரு சந்தர்ப்பத்தில் இன்னுமொரு அழகிய பாடலுடன் சந்திப்போம்!
உங்கள் கருத்துக்களை பின்னூட்டத்தில் தெரிவித்து ஊக்கப்படுத்துங்கள்! நன்றி!
   

Saturday, November 21, 2015

குள்ளநரியின் விவசாயம்! பாப்பா மலர்!

குள்ளநரியின் விவசாயம்!  பாப்பா மலர்!


  ரொம்ப காலத்துக்கு முன்னாலே ஒரு காட்டுல குள்ள நரி ஒண்ணு வாழ்ந்து வந்துச்சு. அதற்கு அறிவு ரொம்ப அதிகம். தன்னோட அறிவாற்றலை பயன்படுத்தி கஷ்டம் இல்லாம நிறைய லாபம் சம்பாதிச்சிட்டு இருந்தது. எல்லா விலங்குகளும் அந்த குள்ள நரியை பொறாமையா பார்த்தது.  பின்னே அந்த காட்டு ராஜாவுக்கே குள்ள நரி அமைச்சரா ஆயிருச்சே!

      அமைச்சரா ஆனா பின்னாலும் நரியாலே சும்மா இருக்க முடியலை!  இன்னும் எப்படி சம்பாதிச்சு வாழ்க்கையிலே முன்னேறலாம்னு யோசிச்சுது. அப்படி அது ஒருநாள் யோசிச்சுக்கிட்டே ஆத்தங்கரையோரமா வர்றப்ப அங்கே ஒரு முதலை கரையை விட்டு மேலேறி ஓய்வெடுத்துக்கிட்டு இருந்துச்சு.

   “ என்ன அமைச்சரே? இந்த பக்கம்?” அப்படின்னு கேட்டுது முதலை.

   “ என்னத்தை பெரிய அமைச்சர் வேலை! அரசவை கூடுவதே மாதத்தில் சில நாட்கள்தான்!  அதிலும் உருப்படியாக ஒன்றும் செய்ய வாய்ப்பில்லாமல் போகிறது? ஏன் தான் அமைச்சர் ஆனோம் என்று வருத்தமாக இருக்கிறது? ஓய்வு நேரத்தில் ஏதாவது உருப்படியாக செய்து சம்பாதிக்கலாம் என்று தோன்றுகிறது!” சலித்து கொண்டது நரி.

   “ அரசாங்க உத்தியோகத்தில் இருந்தும், அரசரின் நம்பிக்கையை பெற்ற மந்திரியாக இருந்தும் உங்களுக்கு உங்கள் தொழிலின் மீதே சலிப்பாக இருக்கிறது போலிருக்கிறதே! உங்கள் ஓய்வுப்பொழுதை கழிப்பதற்கு நான் ஒரு யோசனை சொல்லவா?”

    “ சொல்! சொல்!”

 “இதோ இந்த ஆற்றங்கரைச் சமவெளி சும்மாத்தான் இருக்கிறது! காட்டு விலங்குகள் இருக்கிறது என்று மனிதர்களும் வருவது இல்லை. இந்தப் பகுதியில்   விவசாயம் செய்தால் என்ன?”

   “ நல்ல யோசனையாகத்தான் இருக்கிறது! ஆனால்..!”
     “என்ன ஆனால்?”

 “நான் வேலைக்கு போய்விட்டால் யார் கழனியை கவனிப்பது?”
  “அதற்குத்தான் நான் இருக்கிறேனே! நாம் இருவரும் சேர்ந்து விவசாயம் செய்வோம்! ஒப்பந்தம் படி மகசூலை பகிர்ந்து கொள்வோம்! சரிதானே!” என்றது முதலை.

    இப்போதே நிலத்தை சமப்படுத்துவோம்!  உடனே களத்தில் இறங்கின. நிலத்தை செப்பனிட்டு விவசாயத்திற்கு ஏதுவாக மாற்றி அமைத்தனர்.

  “ நிலம் கிடைத்துவிட்டது! எதை விதைப்பது?

  ”உருளைக்கிழங்கு கிடைத்திருக்கிறது அதை விதைப்போம்” என்றது நரி.     “விதைப்பது சரி! மகசூல் எப்படி பங்கிடுவது? ”கேட்டது முதலை.

   “நிலத்தின்  மேலே விளைவது எல்லாம் உனக்கு! அடிப்பாகம் எனக்கு!” என்று புத்திசாலித்தனமாக சொன்னது நரி.

   அப்பாவி முதலை ஏற்றுக் கொண்டது. கண்ணும் கருத்துமாக காவல் காத்தது. அறுவடைக் காலம் வந்தது. நரி கிழங்குகளை மூட்டை மூட்டையாக அறுவடை செய்து எடுத்துச் செல்ல முதலைக்கு ஒன்றும் கிடைக்கவில்லை.

    “என்ன நரியாரே! இப்படி ஏமாற்றலாமா?”

    “நான் எங்கே ஏமாற்றினேன்? ஒப்பந்தப்படி நடந்து கொள்கிறேன்! நீ வேண்டுமானால் அரசரிடம் கூட புகார் சொல்லிக் கொள் என்றது நரி.

    சரி மீண்டும் பயிரிடுகையில் ஒப்பந்தம் மாற்றிக் கொள்வோம்! எனக்கு அடிப்பகுதி உனக்கு மேல் பகுதி! அப்படியானால் நான் பயிரிட உதவுகிறேன் என்றது முதலை
.
     “அப்படியே ஆகட்டும்! உன் கஷ்டம் எனக்கு வேண்டாம்! உன்னிஷ்டம் போல நீ அடிப்பாகத்தையே எடுத்துக் கொள்!” என்று பதவிசாகச் சொன்னது நரி.

    இந்த முறை  நெல்லைப் பயிரிட்டது நரி. விளைச்சல் நன்றாக வந்தது. அறுவடையில் போது முதலைக்கு வெறும் தாள்தான் மிஞ்சியது. நரியோ மூட்டை மூட்டையாக நெல்லை அள்ளிச் சென்றது.

   முதலைக்கு கோபமாக வந்தது. “ இந்த முறையும் என்னை ஏமாற்றிவிட்டாய்?” என்றது.

   ஒப்பந்தப்படி நீ கேட்டது கிடைத்தது. நான் எங்கே ஏமாற்றினேன் என்றது நரி.
     அடுத்த போகம் பயிரிட நரி வந்த போது. முதலை சொன்னது. இந்த முறை நான் விதை போடுகிறேன். என்றது.

    நரி உஷார் ஆனது!   “ சரி நீயே விதைத்துக் கொள்! ஆனால் ஒப்பந்தம் போட்டுக் கொள்வோம்.”

    “என்ன ஒப்பந்தம்?”

   “விளைச்சலில் மேல் பகுதியும்  கீழ்ப் பகுதியும் எனக்கே வேண்டும். நடுப்பகுதியை நீ வைத்துக் கொள்!”

     முதலை கரும்பை விதைத்தது. அறுவடை காலம் வந்தது. மேல் கரும்பும் அடிக்கரும்பும் ஒப்பந்தப்படி நரிக்கு போக தண்டுக் கரும்புகள் முதலைக்கு கிடைத்தது.

       நரிக்கு ஆச்சர்யம்!  “முதலையாரே! இந்த முறை நீங்கள் ஜெயித்துவிட்டீர்கள்! ஆனால்… இதை நீங்களே யோசித்து செய்ததாக தெரியவில்லையே! “

      ”ஆமாம்…! நானாக யோசிக்கவில்லை! இந்த பக்கமாக வந்த மனிதன் ஒருவன் தான் இந்த யோசனையை சொன்னான்.”

      “அதானே பார்த்தேன்! ஆனால் நாம் மோசம் போனோம்! முதலையாரே! இதுவரை இங்கே மனித தடமே இல்லை! நாம் சந்தோஷமாக இருந்தோம். இன்று இந்த இடத்தை மனிதனுக்கு காட்டிக் கொடுத்துவிட்டீர்கள் நம்மை அவன் சந்தோஷமாக இருக்க விடமாட்டான். அவன் தொல்லை தர ஆரம்பித்துவிடுவான். இந்த இடம் மட்டுமல்ல கானகத்தையே அவன் அழிக்க ஆரம்பிக்க போகிறான். ஒருவிதத்தில் என் பேராசையும் இதற்கு காரணம் ஆகிவிட்டது நான் மட்டும் உங்களுக்கு சரிபாதி விளைச்சலை தந்திருந்தால் இந்த நிலை வந்திருக்காது! நானே குற்றவாளி!” என்றது வருத்தமாய்.

      முதலை சொல்வதறியாமல் முழிக்க ஒரு மனிதக் கூட்டம் அங்கே வந்து நரியையும் முதலையையும் விரட்டி விட்டு கரும்புகளை அள்ள ஆரம்பித்தது.  
     காடுகள் இப்படித்தான் கொஞ்சம் கொஞ்சமாக கொள்ளை போக ஆரம்பித்தது. அதற்கு காரணமான நரி இன்னும் வயல்வெளிகளில் இரவுப் பொழுதில் ஊளையிட்டு அழுது கொண்டிருக்கிறது.

 (செவிவழிக்கதை என்பாணியில் கொஞ்சம் மாற்றிக் கொடுத்துள்ளேன்)

தங்கள் வருகைக்கு நன்றி! பதிவு குறித்த கருத்துக்களை பின்னூட்டத்தில் தெரிவித்து ஊக்கப்படுத்துங்கள்! நன்றி!

   

Friday, November 20, 2015

ஆனந்தவிகடன் தலையங்கமும் எனது கேள்வியும்!

ஆனந்தவிகடன் தலையங்கமும் எனது கேள்வியும்!


தமிழ்நாட்டை வெள்ளக்காடாக்கிய பெருமழை சிலநாட்களாக ஓய்ந்த நிலையில் இன்று ஆனந்தவிகடன் வார இதழை வாசிக்க நேர்ந்தது. முதல்வரைப் பற்றி ஒரு பெருங்கட்டுரை இந்த நாலரை ஆண்டு ஆட்சியின் அவலங்களை பட்டியலிடுகிறது ஓர் கட்டுரை. அனைத்தும் நிஜங்களாக சுடுகிறது. இவ்வளவு தைரியமாக விமரிசித்து எழுதிய நிருபர் குழுவினருக்கு முதலில் பாராட்டுக்கள். மற்றபடி விகடன் பழைய விகடன் வாசித்த எனக்கு கொஞ்சமும் பிடிக்கவில்லை! இதழ் முழுக்க சினிமா செய்திகள், பேட்டிகள், துணுக்குகள்தான்.

   அஞ்ஞான சிறுகதை, பாரதிதம்பி கட்டுரை, பத்து செகண்ட் கதைகள் கொஞ்சம் கவர்கிறது. அதெல்லாம் இருக்கட்டும் நான் சொல்ல வந்தது விகடனின் இந்தவார தலையங்கம் பற்றி.

    வெள்ளக்காடான தமிழகத்தை மீட்க அரசு நடவடிக்கை அவசியமாக தேவைப்படும் நேரத்தில் தேவை மக்கள் நடவடிக்கை என்று தலைப்பில் தொடங்குகிறது தலையங்கம்.
பேரழிவை விளக்குகிறது முதல் பத்தி. அடுத்த பத்தி அரசின் முன்னெச்சரிக்கை நடவடிக்கை இல்லாததை செல்லமாக கண்டிக்கிறது.

   அதற்கப்புறம் விகடன் சொல்லுவதைத்தான் என்னால் ஏற்க முடியவில்லை! அரசே செய்யவேண்டும் என்று காத்திராமல் மக்களே மழைநீர் சேகரிக்க வேண்டுமாம். மக்கள் மட்டும் இதைச் செய்திருந்தால் இத்தனை வெள்ளம் வந்திருக்காதாம்.

  சிமெண்ட் கொட்டி எங்கும் மூடுவது, ப்ளாஸ்டிக் கழிவுகள்கொட்டுவது போன்றவற்றை தவிர்க்க வேண்டும் என்று சொல்லுகிறது ஏற்றுக்கொள்ளலாம். ஒவ்வொரு வீதியிலும் மழைநீர் கழிவுநீர் கால்வாய் இருக்க வேண்டும் என்பது அரசு விதியாம். அவ்வாறு இருக்கிறதா என்று கல்லூரிமாணவர்களும் இளைஞர் அமைப்புக்களும் பரிசோதிக்க வேண்டுமாம். இல்லையென்றால் மீட்டெடுக்க போராட வேண்டுமாம்.

   கடைசியாக சொல்வது நீர்நிலை ஆக்ரமிப்பை யாரோ செய்ய வில்லை! நம் கண் முன்னேயேதான் அநீதிகள் நடக்கிறது. நம் ஊரில் ஓடும் வாய்க்காலை நம்மில் ஒருவர்தான் ஆக்ரமிப்பு செய்கிறார். அப்படி செய்யும்போதே தட்டிக் கேட்க வேண்டுமாம். எதிர்த்து போராட வேண்டுமாம். ஒதுங்கிச் செல்வதால்தான் அவர்களுக்கு பலம் அதிகரித்துவிடுகிறதாம். ஒதுங்கிச்செல்லாமல் எதிர்த்து நின்றால் அவர்கள் ஒதுங்கி போய்விடுவார்களாம். அத்தகைய மக்கள் நடவடிக்கை தேவை என்கிறது தலையங்கம்.

  எல்லாம் சரிதான்! ஒத்துக் கொள்கிறேன்! எதிர்த்து போராட எதிரிகள் என்ன குப்பன் சுப்பன்களாகவா இருக்கிறார்கள்? பெரும் பண முதலைகளும் அரசியல்வாதிகளும்தானே ஆக்ரமிப்பில் இறங்குகிறார்கள். சாதாரண ஒருவிவசாயியோ இல்லை ஒரு குடிமகனோவா பெரிய கல்லூரிகளையும் வணிக வளாகங்களையும் கட்டுகிறார்கள். பெரும் வணிகர்களும் அரசியல் தலைகளும் கட்டுகிறார்கள். அவர்களை எதிர்க்க சாமான்ய மக்களால் முடியுமா? சரி! அப்படியே முடியும் என்றாலும் முளையிலே கிள்ளி எறிய சொல்கிறீர்கள். ஆனால் சென்னையில் நடந்திருப்பது முடிந்து போன ஆக்ரமிப்பு. தாம்பரம், முடிச்சூர், அம்பத்தூர், கொரட்டூர், அண்ணாநகர், கோயம்பேடு, என அனைத்து நகரங்களில் ஆக்ரமிப்புகள் சூழ்ந்துவிட்டன. நீர் செல்ல தடையாக இருப்பது குடியிருப்புகள் கூடத்தான்.

    இதற்கெல்லாம் அனுமதி வழங்கியது யார்? அரசாங்கங்கள்தானே! அவர்கள்தானே இப்போது ஆக்ரமிப்புக்களை அகற்றவேண்டும்? வேண்டுமானால் இந்த இடம் ஆக்ரமிக்கப்பட்டுள்ளது என்று சுட்டிக்காட்டலாம். அப்படி காட்டுபவரின் உயிர் மறுநாள் இருக்குமா? என்று சந்தேகமாக இருக்கிறது. இங்கு சாமான்யர்களின் உயிரைப் பற்றி அரசு கண்டு கொள்வதே கிடையாது.

    அடுத்தவரின் ஆக்ரமிப்பை தடுக்கும் முன் தன்னுடைய நிலையை ஒவ்வொருத்தனும் எண்ணிப்பார்க்க வேண்டும் இல்லையா? இன்று சென்னையில் புறநகர்களில் இருக்கும் குடியிருப்புக்களில் பெரும்பாலும் நீர்நிலைக் கால்வாய்களை ஆக்ரமித்து கட்டப்பட்டவைதான்!
   ஏன்? அரசாங்கத்தால் உருவாக்கப்பட்ட தியாகராயநகரும், அண்ணாநகரும் கூட ஏரிகளை அழித்து உருவாக்கப்பட்டவைதான்!  தானே குற்றவாளியாக இருக்கும் ஒருவன் அடுத்தவனை குற்றம் சாட்ட முடியுமா?

  ப்ளாஸ்டிக் பொருட்களை வாங்காதீர் என்று கூவுகிறது அரசு! வாங்காமல் இருக்கிறார்களா மக்கள்? விற்றுக்கொண்டு இருக்கிறார்கள் வாங்குகிறார்கள்? உற்பத்தி இருக்கும் வரை விற்பனை இருக்கும். முதலில் உற்பத்தியை அல்லவா தடை செய்யவேண்டும். இதை செய்ய வேண்டியது அரசா மக்களா?

வெள்ளம் பற்றிய விழிப்புணர்வை மக்களிடம் ஏற்படுத்த வேண்டியதும், முறையான வடிகால் வசதிகளை அமைத்து கொடுத்து ஏரி குளங்களை தூர்வார வேண்டியது மக்களா அரசா?

 மக்கள் உழைக்கிறார்கள் வரிசெலுத்துகிறார்கள் உண்ணும் இட்லி போண்டாக்களுக்கு கூட சேவை வரி கொடுக்கிறார்கள். அரசு விரித்த மாயவலையில் விழுந்து டாஸ்மாக்கின் வியாபாரத்தை உயர்த்தி நிறுத்துகிறார்கள்  இப்படிப்பட்ட  அப்பாவி மக்கள் இன்னும் என்னத்தான் செய்வார்கள்?

   வெள்ளம் வந்தாலும் ஏற்றுக் கொண்டு அரசு கொடுக்கும் நிவாரணங்களை வாங்கிக்கொண்டு ரொட்டி தின்று போர்வை போர்த்தி கொசுக்கடியில் சுகாதாரமில்லா குடிநீர் குடித்து இன்னும் ஜனநாயகத்தின் மேல் நம்பிக்கை வைத்துக்கொண்டிருக்கும் மக்கள் நடவடிக்கை எடுக்க வேண்டியதெல்லாம் தேர்தல் நேரத்தில் மட்டுமே!

  அப்போது அவர்கள் எடுக்கும் நடவடிக்கையை அடுத்து வரும் அரசும் உணர்ந்துகொள்ளாமல் அவர்களோடு விளையாடுவதுதான் இன்னும் பரிதாபமான விஷயம்.

 அதைவிடுத்து ஆக்ரமிப்புகளை அகற்ற மக்கள் நடவடிக்கை அவசியம் என்பதெல்லாம் சும்மா…! ஆனந்தவிகடன் தலையங்கம் என்னைப் பொறுத்தவரையில் அரசுக்கு கொடுக்கும் உம்மா!

தங்கள் வருகைக்கு நன்றி! பதிவு குறித்த கருத்துக்களை பின்னூட்டத்தில் தெரிவித்து ஊக்கப்படுத்துங்கள்! நன்றி!




Thursday, November 19, 2015

கொஞ்சம் சிரியுங்க பாஸ்! பகுதி 55

கொஞ்சம் சிரியுங்க பாஸ்! பகுதி 55


1.   இப்ப எந்த குடி முழுகி போவுதுன்னு இவ்ளோ கூட்டம் வாசல்ல வந்து நிற்குது…!
பெய்ஞ்ச மழையிலே குடிசை முழுகிப்போனவங்க கூட்டம் தலைவரே…!

2.   தலைவர் வெள்ளப்பாதிப்புல இருந்தாராமே…!
”நிவாரண நிதி’ வந்ததும் பாதிப்பெல்லாம் பாதியா குறைஞ்சிருச்சாம்!

3.    “வடிகாலா” இருப்பேன்னு சொன்ன தலைவரை உடனே திருப்பி அனுப்பிச்சிட்டாங்களாமே மக்கள்..?
  அப்ப இடத்தை அடைச்சிக்கிட்டு நிக்காதீங்கன்னு சிம்பாலிக்கா சொல்லிட்டாங்களாம்!

4.   எவ்வளவோ முயற்சி பண்ணியும் பஸ்ஸை பிடிக்க முடியலை..!
   ஏன் லேட்டாயிருச்சா…?
வெள்ளத்திலே அடிச்சிக்கிட்டு போயிருச்சு!


5.   தலைவர் வெள்ளத்திலே பாதிக்கப்பட்ட மக்களுக்கு பாயும் போர்வையும் தர்றாராமே…!
  ஆமாம்! எல்லா வாக்குகளையும் வாரிச்சுருட்டிடலாங்கிர நினைப்புல இருக்காரு!

6.    என் வொய்ஃபோட பலவருஷ ஆசை இன்னிக்கு பத்து பைசா செலவில்லாம் நடந்துருச்சு…!
   எப்படி…! எந்த ஆசை..?
போட்டுல போகணுங்கிற ஆசைதான்!

7.   பொண்ணு வீட்டுக்காரங்க வேளச்சேரிதான்…! அதுக்காக வரதட்சணையா ஒரு போட் கேக்கறது எல்லாம் ரொம்ப
ஓவரா இல்லையா?

8.   வெளிநாட்டில் எல்லாம் நதிகளில்தான் நகரம் அமைக்கின்றனர்…! நமது தலைவர் வித்தியாசமாய் சிந்தித்தார் அதற்காகத்தான் இப்படி நதியை நகருக்குள் கொண்டுவந்திருக்கிறார்.. இத்தகு புரட்சியை செய்த தலைவரை பாராட்டாமல்…. இகழ்கிறீர்களே…!

9.   ஏரிக்கும் ஏரியாவுக்கும் என்ன வித்தியாசம்?
தண்ணியே நிறையாம இருக்கறது ஏரி! முழுக்க தண்ணி நிறைஞ்சி இருக்கறது ஏரியா!


10. நம்ம தலைவர் எதையும் வித்தியாசமாத்தான் செய்வாரு…!
  என்ன செஞ்சாரு…?
வெள்ளத்தால் பாதிக்கப்பட்ட மக்களுக்கு மீன்பிடிக்க தூண்டில் இலவசமா கொடுத்திருக்காரு…!

11. இந்த தடவை ரமணன் மேல மக்கள் ரொம்ப கோபமா இருக்காங்களா ஏன்?
அவர் சொல்படி மழை பேய்ஞ்சிருச்சே!

12.  வானிலை அறிக்கை சொல்லியும் ஏன் முன்னெச்சரிக்கை நடவடிக்கை எடுக்கலை..?
ரமணன் சொல்லி என்னிக்கு மழைபேஞ்சிருக்குன்னு நினைச்சிட்டோம் சார்!

13.  மழையிலே பாதிக்கப்பட்ட மக்களை பார்க்க பள்ளிக்கூடத்துக்கு போன தலைவர் ஏன் கண் கலங்கிறார்…?
  வாழ்க்கையிலே முத முறையா இப்பத்தான் பள்ளிக்கூடத்துக்குள்ளே நுழையறாராம்!

14.  நம்ம தலைவர்  ‘பச்சை மண்ணு’ன்னு சொன்னா ஒத்துக்கலையே இப்ப பார்..!
   என்ன செஞ்சார்?
மக்கள் நல கூட்டணின்னு சொல்றாங்களே அவங்களுக்கு எத்தனை மக்கள்னு கேக்கிறாரு!

15.  எண்ணெய் கம்பெனியிலே ரெய்டுக்கு போனாங்களே என்ன ஆச்சாம்?
  கசக்கி பிழிஞ்சிட்டாங்களாம்!

16. தலைவரே ஊரே வெள்ளக் காடா இருக்குது…!
   எங்க இருக்குது? அழிச்சி ப்ளாட் போட்டுடலாம்!


17.  பேட்டாவுக்கும் டேட்டாவுக்கும் என்ன வித்தியாசம்?
  கல்யாண ,மண்டபத்துல பேட்டாவை திருடுவாங்க! நெட்வொர்க் கம்பெனிக்காரங்க டேட்டாவை திருடுவாங்க!

18. கோட்டைக் காவலில் காவலர்கள் தூங்கிவிட்டார்களாம்!
  அப்புறம் என்ன?
எதிரி அடித்த அடியில் மன்னரிம் முகம் வீங்கிவிட்டது!

19.  அந்த தலைவர் இந்தியக் குடிமகன் இல்லைன்னு எப்படி சொல்றீங்க?
  அவரு எப்பவு ஃபாரின் சரக்குத்தான் அடிப்பாராம்!

20.   உங்க தலைவர் எப்பவும் அடிச்சிகிட்டே இருப்பாரா?
   ஆமாம் சரக்கும் அடிப்பார் அப்பப்ப மாட்டிறவங்களையும் அடிப்பார்!



தங்கள் வருகைக்கு நன்றி! பதிவு குறித்த கருத்துக்களை பின்னூட்டத்தில் தெரிவித்து ஊக்கப்படுத்துங்கள்! நன்றி!




Wednesday, November 18, 2015

பார்வை!

பார்வை!


அந்த கல்லூரி பேருந்து நிறுத்தம் முன் கல்லூரிப் பெண்களின் கூட்டம் குவிந்துகிடந்தது. தற்கால பேஷணுக்கு ஏற்ப விதவிதமான ஆடைகளில் விதவிதமான சிகை, முக அலங்காரத்துடன் ஏகப்பட்ட கனவுகளை சுமந்த அந்த இளம்பெண்கள்களின் கண்கள் எதையோ மேய்ந்து கொண்டிருந்தன.

   சற்றுத்தள்ளி எதிர் பேருந்து நிறுத்தத்தில் சில கல்லூரி மாணவர்கள் இந்த பெண்களை பார்ப்பதற்கென்றே காத்துநின்றார்கள். “ என் ஆளையே காணலையேடா!” ”பார்த்தும் பாக்காத மாதிரி இருக்கா பாரு எவ்வளோ திமிரு!” “ ஒரு தடவை கூட திரும்பி பார்க்க மாட்டேங்கிறாடா! என்று கலவைகளாய் அவர்கள் தங்கள் செல்போன்களை தடவியபடியே பேசிக்கொண்டு இருந்தனர்.

   “ விட்டா அப்படியே ஆளையே கடிச்சு சாப்பிட்டுருவானுங்க!” அவனுங்க பார்வையே சரியில்லை! நம்ம பஸ் ஏறற வரைக்கும் பார்வையிலேயே கற்பழிச்சிருவானுங்க! இதொ பாருடி இவனுக்கு பெரிய சிவகார்த்திகேயன்னு நினைப்பு!  ஒண்ணு பாரு எப்படி பேண்ட்டை கிழிச்சிக்கிட்டு நிக்குது! பெண்களும் அவர்களுக்கு சளைக்காமல் கமெண்ட்களை அள்ளி வீசிக்கொண்டு காதில் இயர்போனில் பாட்டுக் கேட்டுக் கொண்டிருந்தனர்.

   “ ஏய் லீலா! அதோ பாருடி ஒரு பெருசு உன்னையே வைச்ச கண்ணு வைக்காம பார்க்குது!”

    “ உன் அழகு அந்த பெருசையும் சுண்டி இழுக்குது பார்த்தியா!”
    “ விட்டா அதுங்கூட டூயட் பாட சொல்லுவீங்க போல இருக்கே!”

   “இல்லைடி இத்தனை பேர் இருக்கோம்! அது உன்னையே முறைச்சு முறைச்சு பார்க்குது! அதும் பார்வையே சரியா இல்லையேடி!”

      ”இத்தனை பசங்க நிற்கறானுங்க! அவனுங்களுக்கு வராத தைரியம்! இந்த பெருசுக்கு எப்படி? எல்லாம் முன் அனுபவமா இருக்குமோ? “

  கூட இருந்த லீனாவின் தோழிகள் கிண்டல் செய்ய ,  “என்னடி! ரொம்பத்தான் ஓட்டறீங்க! இப்ப பாருங்க அந்த பெரிசை நான் என்ன செய்ய போறென்னு!”
   அதற்குள் அந்த பெரியவரே இவர்களை நோக்கி வந்தார்.

     “என்னடி தைரியமா நம்மளை நோக்கி வருது!”

    “முறைச்சு முறைச்சு பார்த்ததும் இல்லாம கிட்டவே வருதா இன்னிக்கு ஒரு கை பார்த்துடலாம்!”

      அந்த பெரியவர், இவர்களிடம் வந்தார், “அம்மா!” என்று லீனாவை கூப்பிட்டார்.

    “ யோவ்! உனக்கென்ன நான் அம்மாவா?”

    அவர் சற்று அதிர்ந்துதான் போனார். கொஞ்சம் தயங்கி நிற்க,

   “என்னய்யா? என்ன வேணும்! நானும் பார்த்துக்கிட்டுதான் இருக்கேன்! அப்போதிலிருந்து!”

      “பார்த்தா மாதிரி தெரியலையே மா! “

  “ என்ன பெரிசு நக்கலா!”

   “ நான் ஏன் நக்கல் பண்ணப் போறேன்! நீங்க பாத்திருந்தா நான் ஏன் இங்க நிக்கப் போறேன்!”

      “யோவ்! வயசுல பெரியவனா இருக்கேயின்னு பார்க்கறேன்! அங்க இருந்து முறைச்சு முறைச்சு பார்த்துட்டு இப்ப கிட்டவே வந்து கிண்டல் பண்றியா?”

      “ ஆமாம்மா! நான் பார்த்தேன்! அதனாலதான் கிட்ட வந்தேன்!
  லீனா கோபத்தில் கையை ஓங்க….

    “ இதாம்மா… இப்ப ஓங்கினீங்க பாருங்க! அங்க சட்டை தையல் பிரிஞ்சிருக்கு! அதை கவனிக்காம நீங்க பாட்டுக்கு பேசிக்கிட்டு இருக்கீங்க! எல்லோரும் ஒரு மாதிரி பேசிக்கறாங்களே தவிர உங்க கிட்ட வந்து சொல்ல மாட்டேங்கிறாங்க! எனக்கும் தயக்கம்தான்! நான் கிராமத்தான்! நம்ம ஊட்டு புள்ளை மாதிரி நினைச்சி உங்க கிட்ட சொல்ல வந்தா…!”

  அப்போதுதான் சட்டைத்தையல் அக்குளில் பிரிந்திருப்பதை லீனா பார்த்தாள். தலை கவிழ்ந்தாள்.

     “சாரி! சாரி !...”

 பராவாயில்லைமா! சீக்கிரமா போய் உடையை மாத்திக்க!  முதல்ல இதை போர்த்திக்க என்று தன் பையில் இருந்து ஒரு துண்டை எடுத்து நீட்ட

லீனாவின் கண்களில் நீர் துளிர்த்தது!

தங்கள் வருகைக்கு நன்றி! பதிவு குறித்த கருத்துக்களை பின்னூட்டத்தில் தெரிவித்து ஊக்கப்படுத்துங்கள்! நன்றி!

      

Tuesday, November 17, 2015

கடவுளைக் கண்டேன்!

கடவுளைக் கண்டேன்!


மழை இரவு! விட்டு விட்டு வலுத்த மழையின் சிதறல்கள் நாட்டு ஓடுகளின் மீது விழுந்து தெறித்து ஓடிக்கொண்டிருந்தது. மழையின் காரணமாக எந்த நேரமும் மின்சாரம் தடைபடும் என்பதால் சீக்கிரமே சாப்பிட்டு படுத்த நான் ஒரு தூக்கம் தூங்கி முழித்து அடுத்த தூக்கத்திற்கான ஆயத்தத்தில் இருந்தேன்.

    வெளியே மழையின் சத்தத்தோடு வயல்களில் தவளைகளின் குறட்டை ஒலியும் சேர்ந்து ஓர் மாதிரி இசையை ரீ-ரிகார்டிங்காக தர தூக்கம் கண்ணைச் சொக்கியது.

     அதிகாலை! எழுந்து குளித்து கோயிலுக்குள் பூஜை செய்யச் செல்கிறேன். பிள்ளையார் அப்படியே தும்பிக்கை நீட்டி வரவேற்க ஒரு நிமிடம் அதிர்ந்து, பிள்ளையாரப்பா! நீங்க சிலையா இருப்பீங்க! இப்ப உயிரோட நிஜமா வந்து காட்சி தர்றீங்களே! இது என்னோட பாக்கியம்! கணபதியே சரணம்!  சரணம்!

   “ என்னப்பா சுரேஷா! ஒருவாரமா தொடர்ந்து மழை கொட்டிக்கிட்டு இருக்கு! என்னோட கோயிலும் ஒழுகுது! நீ என்னடான்னா! அதிகாலையிலே நல்ல பச்சைத் தண்ணியிலே என்னை குளிப்பாட்டிடறே! கூட ஒழக்கு பாலையும் வேற என் தலையிலே கவிழ்க்கிறே! எனக்கு ஜலதோஷம் பிடிக்காதா? ஜுரம் வராதா? ஏம்ப்பா இப்படி என்னை சாவடிக்கிறே?

   “ அபச்சாரம்! அபச்சாரம்! நீங்க இப்படி சொல்லலாமா பிள்ளையாரே! நாள் தவறினாலும் உங்களுக்கு பூஜை தவறலாமா?”

   அதுக்காக இப்படி பச்சைத் தண்ணியை என் தலையிலே கொட்டுவியா? இப்படியே போச்சுன்னா நான் கோவிலை விட்டே கிளம்பிருவேன்! நீ காலையிலே அடுப்பை பத்தவைச்சு வெந்நீர் போட்டு குளிக்கிறே இல்லை! எனக்கும் வெந்நீராலா அபிஷேகம் பண்ணு. துவட்டி விட்டு புது வஸ்த்திரம் சாத்து…!

      ஆவட்டும் சாமி! அப்படியே செய்துடலாம்! அப்புறம் ஒரு விண்ணப்பம்!

        என்ன..?

  நம்ம கில்லர்ஜி நண்பர் ஒரு தொடர்பதிவு போட்டு நம்ம சகோதரி கீதா என்னை தொடர சொல்லி இருக்காங்க! கடவுள் கிட்ட எங்களோட ஆசைகளை நிறைவேத்த சொல்லனும்னு.. எல்லோரும் அவங்கவங்க ஆசைகளை நியாயமா கடவுள் கிட்டே கேக்கறதா பதிவுல சொல்லி இருக்காங்க! நானும் எழுதனும்னு இருந்தேன்.. நீங்களே நேரிலே வந்துட்டீங்க… என்னோட ஆசைகளை சொல்றேன்… நிறைவேத்தி வைப்பீங்களா…?

      ஓ உன் பதிவுலக ஆசையை என் கிட்டேயும் காட்டறியா?

    மன்னிக்கணும் பிள்ளையாரப்பா? என்னோட ஆசை மட்டும் இல்லே எங்க பதிவுலக நண்பர்கள் எல்லோரோட ஆசையும் கூட!

   “ ஆசையே துன்பத்திற்கு காரணம்னு சொல்லிட்டு போயிருக்காரு ஒரு மகான்! ஆனாலும் நீங்க திருந்தவே இல்லையே!

   இன்னொருத்தர் ‘ அத்தனைக்கும் ஆசைப்படு!ன்னு சொல்றாரே! நாங்க யாரை பின்பற்றரது பிள்ளையாரப்பா!

      இப்படி தர்க்கம் பண்ணித்தான் நாட்டையே குட்டிச்சுவராக்கிட்டு இருக்கீங்க!

   சரி உன்னோட பத்து ஆசைங்களை சட்டுன்னு  சொல்லு! நான் நிறைவேத்த முடியுமான்னு பார்க்கறேன்!
   எனக்குன்னு தனிப்பட்ட ஆசைங்க எதுவும் இல்லே! எல்லாம் பொதுவுடைமை ஆசைதான்! அதுவும் பதிவர்களோட ஆசைகள்தான்!
  சரிசரி! அதுதான் என்ன?


1.   நாட்டிலே நேர்மையான மக்களுக்கு சேவை செய்யற தலைவர்கள் பதவிக்கு வரணும். ஊழல், சொத்துக்குவிப்பு, லஞ்சம், திருட்டு, வன்முறை, தீவிரவாதம் இதெல்லாம் இல்லாத இந்தியா உருவாகணும்!

2.   ஆறுகள்ல எப்பவும் தண்ணி ஓடணும்  தண்ணிக் கஷ்டமே இருக்க கூடாது! மணல் அள்ள கட்டுப்பாடு விதிக்கணும்! நதிகளை இணைக்கணும்.

3.   கல்வி இலவசமா இருக்கணும்! அவங்கவங்க விருப்பபட்ட கல்வியை கத்துக்கணும்! கல்வி அரசுடைமையா இருக்கணும்!

4.   ஜாதிமுறை.மதம் இதெல்லாம் ஒழியனும்! எல்லோரும் சமம்னு எல்லோரும் உணரணும்!

5.   போதுமான மழை பெய்யணும்! மழைத் தண்ணி ஊருக்குள்ளே புகக் கூடாது!

6.   மருத்துவம் விலை போகக் கூடாது! ஏழை எளியவங்களுக்கும் நல்ல தரமான மருத்துவமும் மருந்தும் கிடைக்கணும்!

7.   பெண்களுக்கு எதிரான பாலியல் வன்முறைகள் மறையனும்! பெண்கள் முன்னேற்றத்தை ஏற்படுத்தனும்!

8.   பொருளாதார ஏற்ற தாழ்வு இருக்க கூடாது! எல்லோருக்கும் எல்லா பொருளும் கிடைக்கணும்!  

9.   கிருமித் தாக்குதல்,தொற்றுநோய் போன்ற கொடிய நோய்கள் பரவாத சுத்தமான சுகாதாரமான தமிழகம் உருவாகணும்!

10. தாய்மொழியை எல்லோரும் நேசிக்கணும்! அது எங்கும் உயர்வா உயர்ந்து நிற்கணும்!

  அவ்வளவுதானாப்பா! உன்னோட ஆசை?

இன்னும் எவ்வளவோ இருக்கு! ஆனா பத்து ஆசைகளை மட்டும்தான் கேக்கணும்னு நண்பர் கில்லர்ஜி சொல்லி இருக்காரே!

உங்க எல்லா ஆசையும் நிறைவேற நான் வேண்டாம் நீங்களே முயற்சி பண்ணா போதும்! நான் உலகை படைச்சேன்! உயிர்களை படைச்சேன்!

   ஜாதியும், மதமும், ஏழை, பணக்காரன், மொழிகள், வன்முறை, கல்வி, ஊழல், இயற்கை அழிப்பு… இதெல்லாம் நானா படைச்சேன்? எல்லாம் நீங்களே உருவாக்கிட்டது! நான் படைச்சது ஆண்- பெண் இரு ஜாதிகளைத்தான்! அது ஓரறிவு  உயிரா இருந்தாலும் சரி ஆறறிவு உயிரா இருந்தாலும் சரி! இனப்பெருக்கத்துக்கு மட்டும் இந்த ரெண்டு ஜாதிகளை படைச்சேன்! அதுக்குள்ளே ஆயிரம் ஜாதிகளை படைச்சு, ஏன் கடவுளைக்கூட ஜாதிக்குள்ளே படைச்சுது நீங்கதானே?

   நான் செய்த ஒரே தப்பு? உங்களுக்கு ஆறறிவு கொடுத்ததுதான்! ஆறாவது அறிவு உங்கள் சிந்தனையை தூண்டத்தான்! ஆனா உங்க சிந்தனை எல்லாம் நன்மைக்கு பயன்படுத்தாம இப்படி தீமைக்கு பயன்படுத்தி உலகத்தையே சீரழிச்சு வைச்சிருக்கீங்க

     இதெல்லாம் சரியாகணும்னா… நான் உங்களோட ஆறாவது அறிவை பறிச்சிக்கிட்டா சரியாயிரும்னு தோணுது… ஆறாவது அறிவுதான் இத்தனை சீர்கேட்டுக்கும் காரணம் …அதை பறிச்சிடறேன்!

   அப்புறம் சுத்தமான ஊர்! சுத்தமான தமிழகம்! சுத்தமான இந்தியா உருவாகிடும்! என்ன ஒண்ணு உங்களாலே சுத்தமா சிந்திக்க முடியாது! செயல்பட முடியாது அவ்வளோதான்…! பண்ணிடுவோமா?....!
   
     மரம் போல மனிதர்களை கற்பனை செய்து பார்க்கவே முடியலையே! வேண்டாம் பிள்ளையாரப்பா! நாங்களே திருந்திடறோம்! முதல்ல பதிவர்கள் நாங்களெல்லோரும் அதுக்கு பிள்ளையார் சுழி போடறோம்… ஆறாவது அறிவை பறிச்சிடாதே…!


   “ அது…!” 

பிள்ளையார் மறைய…

  மணி ஆறு ஆகுது….! கோயிலுக்கு போக வேணாமா? எவ்வளோ நேரம் தூங்குவீங்க?  மனைவி எழுப்ப திடுக்கிட்டு எழுந்தேன்.

  அட எல்லாம் கனவா? ஆனாலும் பிள்ளையார் சொன்னதுதான் தீர்வா?
   யோசியுங்களேன்!


தங்கள் வருகைக்கு நன்றி! பதிவு குறித்த கருத்துக்களை பின்னூட்டத்தில் தெரிவித்து ஊக்கப்படுத்துங்கள்! நன்றி!
Related Posts Plugin for WordPress, Blogger...