Wednesday, April 30, 2014

யார் ஜெயிப்பார்கள்? கதம்ப சோறு பகுதி 33

கதம்ப சோறு பகுதி 33

யார் ஜெயிப்பார்கள்?


தமிழகத்தில் கடந்தவாரம் அமைதியாக தேர்தல் நடந்து முடிந்துவிட்டது. ஒரு சில அசம்பாவிதங்கள் தவிர நல்ல முறையில் நடந்து முடிந்துள்ளது. அதுவும் இல்லாமல் அதிகம் பேர் வாக்களித்தனர். இளைய தலைமுறையினர் பலர் ஆர்வமுடன் வாக்களித்துள்ளனர். மலேசியாவில் இருந்து வாக்களிக்க ஒரு நண்பர் வந்து வாக்களித்துள்ளார். வாக்குப்பதிவு சதவீதம் அதிகரித்தது. ஆனாலும் சென்னையில் வழக்கம் போல வாக்குப்பதிவு சதவீதம் மிக குறைவு. அதுவும் தென் சென்னையில் மிகக் குறைவு. நிறைய படித்தவர்கள் நிறைந்த இந்த நகரத்தில் வாக்களிக்க இவர்கள் விரும்பாததன் காரணம் புரியவில்லை! ஆனால் சென்னை போன்ற நகரங்களில் வாக்குச்சாவடிகளில் வாக்காளர்பட்டியலில் பெயர் விடுபட்டு தவறான முகவரி அச்சிடப்பட்டு என்று பல்வேறு குழப்பங்கள் வேறு. இப்படி சில குழப்பங்கள் இருப்பினும் இத்தனை தேர்தல்களைவிட இந்த முறை தேர்தல் ஆணையம் சிறப்பாகத்தான் செயல்பட்டுள்ளது. ஆனால் ஆளுங்கட்சியின் பணப்பட்டுவாடாவை ஆணையத்தால் கட்டுப்படுத்த முடியவில்லை! வாக்களிப்புக்கு முந்திய நாள் இரவு ஓட்டுக்கு இருநூறு வீதம் ஆளுங்கட்சி அளித்ததாக பல்வேறு ஊர்களில், தொகுதிகளில் பேசிக்கொள்கிறார்கள். எங்கள் ஊரிலும் பட்டுவாடா நடந்தது. தாத்தா கட்சியும் பணம் கொடுத்தது. அதை நிர்வாகிகளே பிரித்துக்கொண்டுவிட்டார்கள். காங்கிரஸ் மற்றும் உதிரிக் கட்சிகள்தான் பணப்பரிவர்தனை செய்யவில்லை! அதுவும் சிவகங்கையில் ஓரளவு பணம் புரண்டதாகவே கேள்விப்பட்டேன். இதை தடுக்கமுடியவில்லை என்று தேர்தல் ஆணையரே பேட்டிக்கொடுத்ததையும் பேப்பர்களில் படித்தேன். அதுவும் இல்லாமல் இந்த முறை நோட்டா புகுத்தப்பட்டது. இளைய தலைமுறையினர் இந்த ஆப்ஷணை தேர்ந்தெடுத்து உள்ளனர். எங்கள் ஊரில் மட்டும் சுமார் 35 பேர் நோட்டா போட்டதாக என்னிடம் தெரிவித்துள்ளனர். வாக்குரிமை ரகசியம்தான்! ஆனால் என்னிடம் படித்த மாணவர்களான இவர்கள் சகஜமாக நாங்க நோட்டாவுக்கு போட்டுவிட்டோம் என்று சொன்னபோது அதிர்ச்சியாகத்தான் இருந்தது. இளைய தலைமுறை விரும்பும் வேட்பாளர்கள் இல்லாமல் போய்விட்டார்கள். இந்த காரணங்களால் ஆளுங்கட்சியே அதாவது அதிமுகவே அதிக இடங்களில் வெற்றிபெறும் என்று தோன்றுகிறது பார்ப்போம்.

முகுந்த் வரதராஜன்!

   காஷ்மீர் தீவிரவாதிகளுடனான மோதலில் பலியான தமிழக வீரர் முகுந்த் வரதராஜன். 31 வயது நிரம்பிய இந்த இளைஞர் திட்டமிட்டு வாழ்பவர். தந்தையை உடன் தங்க வைத்துக் கொள்ள வேண்டும் என்று மூன்று படுக்கையறை உள்ள வீட்டை சமீபத்தில்தான் வாங்கியுள்ளார். இளம் மனைவி, அழகான பெண் குழந்தை என்று வாழ்க்கையை துவங்க வேண்டிய காலத்தில் இப்படி அகாலமாக உயிரை விட்டுவிட்டார். நாட்டை காப்பதற்கான போராட்டத்தில் உயிரை இழப்பது சகஜம் என்றாலும் இளம் வீரரை நம்பியிருந்த குடும்பம் சோகத்தில் ஆழ்ந்துவிட்டது. நாட்டைக்காக்கும் வீரர்கள் தன்னலம் மறந்து பொது நலத்திற்காக நாட்டுக்காக இன்னுயிரையும் தருகின்றனர். கார்கில் போராட்டத்தின் போதும் ஏராளமான வீரர்கள் இப்படி உயிரைக்கொடுத்துதான் மண்ணை மீட்டனர். நாம் இங்கு சுகமாக இருக்க அங்கே கஷ்டப்படும் கண்ணியவான்கள்தான் ஜவான்கள். இவர்கள் ஜாதி,மதம் கடந்தவர்கள். நாட்டைநேசிப்பவர்கள். துரதிருஷ்ட வசமாக இறந்த முகுந்த் வரதராஜன் மரண அஞ்சலியில் ஜாதி துவேஷம் பாரட்டப்பட்டது வருந்தத்தக்கது. இறந்த பின் ஒருவரை ஜாதிக்காரன் தானே! என்று பேசுவது எந்தவிதத்தில் நியாயம். யாராக இருந்தாலும் உயிர் ஒன்றுதான். அந்த உயிரை நாட்டுக்கு அர்ப்பணித்தவர்களை நாம் தூக்கி வைத்து கொண்டாட வேண்டாம். குறைந்த பட்சம் கேவலப்படுத்தாமலாவது இருக்க வேண்டும். பேஸ்புக்கில் இந்த வீரருக்கான அஞ்சலி பதிவுகளில் நாகரீகமற்ற முறையில் ஜாதி துவேஷத்துடன் சில கமெண்ட்கள். பின்னர் அந்த கமெண்ட் போட்டவரை புறக்கணிப்போம் என்று பதிவுகளை காண முடிந்தது. இறந்தவர் உயர்ஜாதியாக இருந்தாலும் சரி! தாழ்ந்த ஜாதியாக இருந்தாலும் சரி அவரது உயிர் ஒன்றுதான்! அவர்கள் குடும்பத்திற்கு இழப்புதான்! நாட்டிற்கும் இழப்புதான்! இதை புரிந்து கொண்டு வீரர்களை கவுரவிக்க வேண்டும்.

அச்சச்சோ மும்பை இண்டியன்ஸ்!

   ஐ.பி.எல் போட்டிகளில் சூதாட்டம் என்று செய்திகளை சென்ற ஆண்டு நடந்த சில போட்டிகளின் முடிவுகள் என்னை ஐ.பி.எல் பார்ப்பதில் இருந்து விலக்கிவைத்துள்ளன. ஆனாலும் மறுநாள் தினசரிகள் மற்றும் இணையத்தில் முடிவுகளை தெரிந்து கொள்வேன்.ஒவ்வொரு வருடமும் ஒரு அணி அதள பாதாளத்திற்கு செல்லும். முதல் வருடம் கொல்கத்தா, அப்புறம் டில்லி, பஞ்சாப், கொச்சி என்று சில அணிகள் முதலில் ஆரவாரமாக கிளம்பி புள்ளிப்பட்டியலில் கடைசிக்கு தள்ளப்படும். ஆனால் இந்த வரிசையில் சென்னை, மும்பை, பெங்களூரு அணிகள் மட்டும் செல்லாமல் குறைந்த பட்சம் அரையிறுதி வரை வந்துவிடும். இந்த வருடம் அதற்கு திருஷ்டிபட்டுவிட்டது போலும். சென்றவருடம் மும்பை இண்டியன்ஸ் அடிமேல் அடி வாங்கி விளையாடிய நான்கு போட்டிகளிலும் தோல்வி கண்டு கடைசி இடத்தில் இருக்கிறது. சென்னை அணியில் இருந்தபோது கலக்கிய ஹசி, போலார்டு, ராயுடு, மலிங்கா என்று நட்சத்திர வீரர்கள் இருந்தும் ஒரு ஒருங்கிணைப்பு வீரர்களிடம் இல்லை! ஏனோ தானோ என்றுதான் ஆடுகிறார்கள் போல! மேட்ச் பார்க்காததால் சரியாக அவதானிக்க முடியவில்லை! ஆனால் இவர்கள் ஆடும் விதத்தை மாற்றி இன்றைய போட்டியில் வென்று தொடர்ந்து வெற்றிப்பாதையில் சென்றால் மட்டுமே அடுத்த சுற்றை பற்றி யோசிக்க முடியும். அதேசமயம் கிங்க்ஸ் லெவன் பஞ்சாப் இந்த சீசனில் ஆனந்த அதிர்ச்சிகளை தந்து கொண்டிருக்கிறது. மேக்ஸ்வெல்லும் மில்லரும் இரட்டைக்குழல் துப்பாக்கிகளாக இணைந்து மற்ற அணிகளை மிரட்டிக் கொண்டிருக்கின்றனர். இதை தவிர்த்து பார்த்தால் முதல் போட்டியில் தோற்றாலும் அதன் பின் நான்கு போட்டிகளில் வென்று அசத்தி வருகிறது சென்னை. இந்த அணி இந்த முறையும் அரையிறுதி வரையாவது செல்லும் என்று தோன்றுகிறது. மும்பை அணி சிம்மன்ஸை இன்று தன்னுடன் இணைத்துக் கொண்டுள்ளது. இன்றாவது வெல்லுமா பார்ப்போம்!

மீண்டும் ஜுனோ!

   சுஜாதா ஆனந்த விகடனில் என் இனிய இயந்திரா எழுதிய போது எட்டாம் வகுப்பு படித்துக் கொண்டிருந்தேன். சில அத்தியாயங்கள் படித்து இருக்கிறேன். என்னை பிரம்மிப்பில் ஆழ்த்தி எங்கேயோ இழுத்துச் செல்லும் அந்த நாவல். அதை மீண்டும் படிக்க வேண்டும் என்றொரு ஆசை. இந்த நாவலின் தொடர்ச்சியை மீண்டும் ஜுனோ என்று சில வருடங்கள் கழித்து விகடனில் எழுதினார் சுஜாதா. அதில் வரும் ஜுனோ என்ற குட்டி நாயின் சாகசங்கள் அது பேசும் டயலாக்குகள் கலக்கலாக இருக்கும். இதை அப்போதே ரசித்து படிப்பேன். துரதிருஷ்டவசமாக அப்போது இந்த புத்தகம் சேகரிக்கும் பழக்கம் அப்போது என்னிடம் இல்லை. இதனால் சேகரிக்காமல் விட்டுவிட்டேன். புத்தகச்சந்தையில் கிழக்கு பதிப்பகத்தில் சுஜாதாவின் பல நாவல்கள் இருக்க இந்த புத்தகத்தை பார்த்தேன். எடுத்து பிரித்து பார்த்தேன் விலை ரூ 175. இவ்வளவு கொடுத்து வாங்க வேண்டுமா என்று யோசனை. வைத்துவிட்டு வெளியே வந்து ஒரு ரவுண்டு மற்ற பதிப்பகங்களுக்கு சென்றேன். இறுதியில் சுஜாதா என்னை ஜெயித்துவிட புத்தகத்தை வாங்கிவந்தேன். ஒரு சுபதினத்தில் புத்தகத்தை எடுத்து படிக்க ஆரம்பித்தேன். வைக்க மனம் வரவில்லை. சாப்பாட்டிற்கும் டிபனுக்கும் என்னை வேண்டி அழைக்கவேண்டியதாயிற்று. அவ்வளவு இண்ட்ரஸ்டிங். எப்போதோ படித்தது என்பதால் கதை மறந்து போயிருந்ததால் அடுத்து என்ன நடக்கும் என்று ஆர்வம். ஜுனோவின் சாகஸங்கள். சுஜாதாவின் சுவையான வசனங்கள், கதாபாத்திரங்கள் மனதை கவர்கிறார்கள். மூன்று முறை உயிர் தப்பிய ஜுனோ இறுதியில் கவிதை சொல்லி இறக்கும் போது அதாவது செயலிழக்கும் போது என்னை அறியாமல் கண்களில் ஒரு நீர்த்துளி வந்தது. என்னதான் அறிவியல் வளர்ந்தாலும் மனித மூளையின் முன் அவை உன்னதமல்ல என்று சொல்லும் நாவல். எத்தனை முறை படித்தாலும் சலிக்காத ஒன்று.
மீண்டும் ஜீனோ , பக்கங்கள் 312, விலை ரூ 175, கிழக்குப்பதிப்பகம் ராயப்பேட்டை, சென்னை.

கிச்சன் கார்னர்!

வெஜிடபிள் வடை!
 என்னுடைய சகோதரியிடம் இந்த பகுதிக்கு ஒரு ரெசிபி கேட்டேன்.அவர்கள் சொன்ன சிம்பிளான ரெசிபி இது. மாலையில் காபி அல்லது டீக்கு முன் சாப்பிட வசதியாக இருக்கும்.
  தேவையான பொருட்கள்:
   கடலைபருப்பு 1 கப், கோஸ் துறுவியது 1 கப்
  கேரட் துருவியது 1 கப், பீன்ஸ் நறுக்கியது 1 கப். வரமிளகாய் 4 சோம்பு 2 டீஸ்பூன் (அரைத்தது) வெங்காயம் 1 1\2 கப் (நறுக்கியது)
இஞ்சி, பூண்டு விழுது தேவையான அளவு. மிளகாய்த் தூள், உப்பு, எண்ணெய். தேவையான அளவு.
  செய்முறை: முதலில் கடலைப்பருப்பை சிறிது உப்பு சேர்த்து கரகரப்பாக அரைத்துக் கொள்ளவும். பின் அதனுடன், கோஸ், கேரட், பீன்ஸ் வெங்காயம், சோம்பு, மிளகாய் சேர்த்து அரைக்கவும். மிளகாய்த்தூள் உப்பு சேர்த்து பிசையவும். தண்ணீர் விட வேண்டாம். உருண்டைகளாக பிடித்து பின் வடைகளாக தட்டி எண்ணெயில் பொறித்தெடுக்கவும். தேங்காய் சட்னியுடன் தொட்டுக்கொண்டு சாப்பிட்டால் சுவையாக இருக்கும். இன்னிக்கு ஈவ்னிங் செஞ்சு பாருங்க!

டிப்ஸ்! டிப்ஸ்! டிப்ஸ்!


அதிகமாய் காபி, டீ குடித்து வயிற்றுப்பிரச்சனை ஏற்பட்டால் கொஞ்சம் ஜீரகத்தை எடுத்து கொதிநீரில் போட்டு கஷாயமாக இரண்டு வேளை குடித்து வர நிவாரணம் தெரியும்.

இட்லி மிளகாய்பொடியை மிக்ஸியில் நைஸாக திரித்து மிளகுப்பொடி போடும் குப்பியில் கொட்டி வைத்துக் கொண்டால் பொடி தோசை ஊற்றும் போது தூவ சமமாக பரவி காரம் கம்மியாக இருக்கும்.

பசும்பாலை சிறிது ஓமம் கலந்து நன்றாக கொதிக்கவிட்டு வடிகட்டி சாப்பிட சளி, வறட்டு இருமல், காணாமல் போய்விடும்.

சர்க்கரை நோயால் பாதிக்கப்பட்டவர்கள் வாழைப்பூவை சுத்தம் செய்து சிறிது சிறிதாக நறுக்கி சின்ன வெங்காயம் பூண்டு மிளகு சேர்த்து பொரியல் செய்து சாப்பிட்டு வந்தால் கணையம் வலுப்பெற்று இன்சுலின் சுரக்கும். சர்க்கரை நோயும் காணாமல் போகும்.

வெளியூர் செல்லும் போது தோசை ஊத்தப்பம் போன்றவற்றை இலேசாக தண்ணீர் தடவி பிறகு பேக் செய்தால் வறண்டுபோகாமல் மிருதுவாக இருக்கும்.

குழந்தைகளுக்கு தடுப்பூசி நண்பகல் 1.30 மணிக்கு பின் போட வேண்டும். குட்டிக்குழந்தைகள் சாதரணமாக அதிக நேரம் தூங்கும். தடுப்பூசி போடப்பட்ட 24 மணி நேரத்தில் அவர்களுடைய உடல் வெப்ப நிலை இலேசாக அதிகரிக்கும். நண்பகலில் தரப்படும் தடுப்பூசிக்கு பிறகு குழந்தைகளுக்கு நல்ல தூக்கம், சிறிதளவு உஷ்ண உயர்வு தடுப்பூசியால் கிடைக்கும் முழு பலன்களையும் பெறச்செய்யும் என்று பேட்ரியாடிக்ஸ் என்னும் அமெரிக்க பத்திரிக்கை கருத்து கணிப்பு சொல்கிறது.

ஜோக்கு!

   ஒரு ரூம்ல மூணு டீச்சர் உட்கார்ந்திட்டிருக்காங்க. ஒருத்தர் தமிழ் டீச்சர். இன்னொருத்தர் இங்கிலிஷ் டீச்சர், இன்னொருத்தர் கணக்கு டீச்சர்.
  அப்ப திடீர்னு அந்த ரூம்ல திருடன் புகுந்திட்டான்.
இங்கிலீஷ் டீச்சர்,  ‘தீஃப் தீஃப்’னு கத்தினாங்க.
  தமிழ் டீச்சர் “திருடன் திருடன்”னு கத்தினாங்க!
மேத்ஸ் டீச்சர் எப்படி கத்துவாங்க?
  தெரியலையே!
 “420! 420!”னு தான் கத்துவாங்க!

(படிச்சதில் பிடிச்சது)


தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!

Tuesday, April 29, 2014

பொய்மை!

பொய்மை!


தொழிலதிபர் மாணிக்க வேல் என்றால் அந்த ஊரில் அறியாதவர்கள் யாரும் கிடையாது. ஒரு காலத்தில் சிறிய கூலித்தொழிலாளியாக இருந்து படிப்படியாக முன்னேறி இன்று ஒரு சிறு தொழிலதிபராக உருவெடுத்து வந்துள்ளார். வளர்ந்தவுடன் பழசை மறந்து விடும் இன்றைய உலகில் இன்னும் பழைய நண்பர்கள், ஊர், என்று எதையும் மறக்காது இருப்பவர்.  எவர் வந்து எந்த உதவி கேட்டாலும் தன்னால் இயலுமாயின் தயங்காது செய்து கொடுப்பவர். கல்லூரிகளை நடத்தி காசு பார்த்துக்கொண்டு கல்வித்தந்தை என்று பட்டம் போட்டுக்கொள்பவர் மத்தியில் தன்னுடைய சொந்த ஊரில் இலவசமாக பள்ளிக்கூடம் நடத்துபவர். இப்படி இவரைப்பற்றி சொல்லிக்கொண்டே போகலாம்.
  அந்த தொழிலதிபர் மாணிக்க வேலின் இல்லத்தில் தான் நான் அமர்ந்து இருந்தேன். என் கையில் சற்று முன் தொழிலதிபரின் மனைவி தந்துவிட்டு போன குளிர்பானம் இருந்தது. எதிரே மாணிக்க வேல் அமர்ந்திருந்தார்.  “கூச்சப்படாம சாப்பிடுங்க! இது நம்ம வீடு மாதிரி” என்றார்.
   நான் ஒரு சமூக சேவகன். ஒரு பள்ளிக்கூடத்தில் வாத்தியார் பணி செய்து ஓய்வு அடைந்தபின் சமூக பணிகளில் அக்கறை செலுத்தி என்னால் முடிந்த உதவிகளை செய்து வருகிறேன். இன்னும் சொல்லப்போனால் இந்த மாணிக்க வேலும் நானும் ஆரம்பப் பள்ளியில் ஒன்றாய் படித்தவர்கள். அவர் ஆரம்பப்பள்ளியோடு நின்றுவிட நான் மேலும் படித்து ஆசிரியர் ஆகி இன்று ஓய்வு பெற்றுவிட்டேன். ஆனால் பள்ளிப்படிப்பை இடையில் நிறுத்திய மாணிக்க வேல் கூலிவேலைக்கு போய் பின் படிப்படியாக உயர்ந்து இன்று ஒரு தொழிலதிபர் ஆகிவிட்டார்.
   என்னை அவருக்கு நினைவிருக்குமோ என்னமோ என்றுதான் எண்ணியபடி இந்த வீட்டிற்கு வந்தேன். கேட்டில் காவலாளியிடம் முதலாளியுடைய ஊர்க்காரன் வந்திருக்கிறேன் பேரு எத்திராஜுன்னு சொல்லு என்று சொல்லி அனுப்பினேன். சற்று நிமிடத்தில் அவரே வந்து வாங்க! வாங்க! நீங்க டீச்சரா இருக்கீங்க இல்லே! என்று வரவேற்றார்.
     பழைய கதைகள் பேசிய பின் என்ன விசயம் சொல்லுங்க! என்றார்.
   என்னிடம் படித்த பையன் ஒருவனின் மேல்படிப்புக்கு தேவையான பண உதவியை கேட்டேன்.
  பையன் ப்ளஸ் டூ வில ஆயிரம் மார்க் எடுத்திருக்கான். மெடிக்கல் படிக்கணும்னு ஆசைப்படறான். ஏழ்மையான பையன்.இதுவரைக்கும் என்னால முடிந்த உதவியை செய்து கொடுத்திட்டு இருக்கேன். ஏதேச்சையா உங்க ஞாபகம் வந்துது! நீங்களும் நிறைய உதவிகள் செய்யறதா கேள்விப்பட்டேன்! இந்த உதவியை நீங்க செஞ்சா ஒரு ஏழைப் பையனுக்கு கல்விக்கண் திறந்ததா இருக்கும் என்றேன்.
   ஒன்றுமே யோசிக்கவில்லை!  “என்ன வருஷத்துக்கு ஒரு லட்சம் ஆகுமா? செஞ்சிட்டா போச்சு! படிச்சு முடிக்கிறவரைக்கும் அவனோட செலவு என்னோடது! ஆனா பதிலுக்கு அவன் ஒரு உதவி பண்ணனும்.”
   “இப்ப படிக்கிறவங்க எல்லோரும் வெளிநாடு வெளிநாடுன்னு நம்ம நாட்டை மறந்துடறாங்க! நம்ம நாட்டு காசுல நம்ம நாட்டில படிச்சு நம்ம மக்களுக்கு இல்லே அந்த படிப்பு பயன்படனும். நானே ஒரு ஹாஸ்பிடல் கட்டலான்னு இருக்கேன். அதுலேயே அந்த பையனுக்கு வேலை போட்டு கொடுத்திடறேன். இங்கேயே இந்த மக்களுக்கு அவன் படிப்பு பயன்படனும். இதை கேட்டு சொல்லுங்க! இதை உதவியாத்தான் கேக்கறேன்! கட்டாயப்படுத்தலை! கண்டிப்பா அவன் மேல் படிப்புக்கு உதவி செய்யறேன்” என்றார்.
    ‘ரொம்ப நன்றிங்க ஐயா! உங்க கோரிக்கை நியாயமானதுதான்! இந்த பையன் அதை கட்டாயம் நிறைவேத்துவான்னு நம்பறேன்! அப்ப நான் வரட்டுங்களா?”
  அப்போது காவலாளி உள்ளே வந்து வணக்கம் தெரிவித்து விட்டு ஐயா! உங்களை பார்க்க உங்க பழைய நண்பர் வேதாசலம் வந்திருக்காரு! என்றார்.
  நான் இருக்கேன்னு சொல்லிட்டியா?
     “இல்லீங்க ஐயா! நீங்க ஏற்கனவே சொல்லி வச்சிருக்கிறதாலே வாசல்லேயே நிக்க வச்சிட்டேன்! நீங்க உள்ளே இல்லைன்னு சொல்லிட்டேன்! அவர் நம்பலை! சத்தம் போட்டுக்கிட்டிருக்கார்”
  “ நல்ல வேளை செஞ்சே! அப்படியே சத்தம் போட்டுட்டு போகட்டும்! நான் இல்லேன்னு போய் சொல்லிடு!”
    “அம்மாவையாவது பாக்கணும்னு சொல்றாருங்க!”
“யாரும் இல்லைன்னு சொல்லி அனுப்பிடு!”

நான் வித்தியாசமாக அவரை பார்த்தேன். “ என்ன ஐயா! வீட்ல இருந்திட்டே இல்லைன்னு சொல்றான்னு பாக்கறீங்களா?” என்றார்.
 ஆம் என்பது போல தலையசைத்தேன்.
   “என்ன பண்றது ஐயா! இவன் வேதாசலம் என் கூட ஒண்ணா கூலி வேலை செஞ்சவன். அப்பவே என் கிட்ட கடன் வாங்குவான்! நான் பலமுறை கண்டிப்பேன். காதிலேயே வாங்க மாட்டான். நிறைய கடனாளி ஆகி தற்கொலைக்கே கூட முயற்சி செஞ்சான். எப்படியோ பிழைச்சு எழுந்தான். அந்த சமயத்துல நான் உதவி பண்ணி பழைய கடனை எல்லாம் அடைச்சேன். அவன் பிழைக்க ஒரு வழி பண்ணி ஒரு கடை வச்சிக் கொடுத்தேன்.”
     அவர் தொடர்ந்தார்.  “பாவி! அப்பவும் அவன் திருந்தலை! வியாபாரத்தை ஒழுங்கா பார்க்காம அதையும் தொலைச்சுட்டு வந்து நின்னான். சரி! போகட்டும்னு இந்த முறை திரும்பவும் உதவி பண்ணி ஒரு வேலையிலே சேர்த்துவிட்டேன். அங்கேயும் நிலைகலை! எனக்கே அலுப்பா போயிருச்சு!”
   போன தடவை இங்க அவன் வந்தபோது, என்னடா இப்படி எல்லாத்தையும் வீணடிச்சுட்டு பொருப்பில்லாம இருக்கியேன்னு கேட்டா சிரிக்கிறான். மரத்தை வச்சவன் தண்ணி ஊத்துவான்!னு தத்துவம் பேசறான். திருந்தறமாதிரி தெரியலை. ஒருத்தன் தடுமாறி கீழே விழுந்தான்னா தூக்கி நிறுத்தி உதவி செய்யலாம்.ஆனா வேணுமின்னே குடிச்சிட்டு விழறவனை தூக்கி நிறுத்தினா என்ன பிரயோசனம்? அப்படியும் ரெண்டுமுறை உதவி செஞ்சேன். அவன் பயன் படுத்திக்கலை! யாராவது உதவறாங்கன்னு அவன் இப்படி பொறுப்பில்லாம இருக்கான். உதவி கிடைக்கலைன்னு தெரிஞ்சுதுன்னா அப்புறம் தானா முயற்சி பண்றானான்னு பார்ப்போம். அப்ப அவனுக்கே தெரியாம உதவி பண்ணலாம்!”
   இப்ப அவனுக்கு என் மேல கோபம் வரத்தான் செய்யும். ஆனா அந்த கோபமே அவனை மாத்திறதுக்கு ஒரு தூண்டு கோலா மாறும்னு நினைக்கிறேன்! மாறினா சந்தோஷம்! நான் செய்யறது சரிதானே! என்றார்.
      “சரிதான் சார்! ஆனா  அவர் திருந்தனுமே! உங்களை மாதிரி இன்னொருத்தர் கிடைச்சா அவர் முதுகிலே சவாரி செய்யாம இருக்கணுமே!”
   “இவனை பத்தி எல்லோருக்கும் தெரிஞ்சி யாரும் சேர்க்கறது இல்லே! நான் மட்டும்தான் ஏதோ உதவிகிட்டு இருந்தேன் அதனால யாருகிட்டேயும் போக முடியாது.”
    “ஆனா தற்கொலைக்கு முயற்சி செஞ்சாருன்னு சொல்றீங்களே! திரும்பவும் அதுமாதிரி செஞ்சிட்டாருன்னா!”
   “அப்ப யாருமே இல்லைன்னு அந்த முடிவு எடுத்தான். இப்ப பொண்டாட்டி பிள்ளைங்க இருக்குது இல்லே அவங்க பார்த்துப்பாங்க! மறைமுகமா அவங்க கிட்டே சொல்லி வச்சிருக்கேன்!”
     “ஒரு நல்ல காரியத்துக்கு பொய் சொல்லலாம்னு வள்ளுவரே சொல்லியிருக்கார். இவன் திருந்தனும்னா இப்ப நான் இல்லேன்னு பொய் சொல்றதை தவிர வேற வழி இல்லை!”
    “கரெக்ட் சார்! உங்க பொய்மையில் ஒரு வாய்மை இருக்கு! உங்க நண்பர் திருந்த வாய்ப்பும் இருக்கு” என்றேன்.
 அவர் முகத்தில் மகிழ்ச்சி குடிகொண்டது.


தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!

Monday, April 28, 2014

புகைப்பட ஹைக்கூ 73

புகைப்பட ஹைக்கூ 73


வெடித்து
கூடியது வானம்!
மின்னல்!

வெளிச்சக் கீற்றுக்கள்
விதைத்தது மழை!
மின்னல்!

உடைத்து பார்த்ததும்
ஒளிவிட்டது
மின்னல்!

வேர்விட்டது வானம்
விரவி வந்தது மழை!
மின்னல்!

வான்மகளை தழுவ
வானத்தில் மேகமோதல்!
மின்னல்!

கீறல் விழுந்த வானம்
தூறலாய் மழை!
மின்னல்!

வேர்பிடித்தும்
கொடிபிடிக்கவில்லை
மின்னல்!

வெளிச்சச் சிதறல்கள்
ஒளிந்துகொண்டன
மின்னல்!

மேக இருளை
மோகித்தது
மின்னல்!

கண்ணொளி பறித்தது
மின்னொளி
மின்னல்!

வெள்ளம் பாய்ந்தது
விபத்து இல்லை!
மின்னல்!

மின் வெட்டில்
ஒளிர்ந்தது
மின்னல்!

கிளைவிட்டது
இலைவிடவில்லை!
மின்னல்!

வெளிச்சக் கீற்றை
விழுங்கியது வானம்!
மின்னல்!

மேகம் பிரசவித்த
மோகினி
மின்னல்!

ஒளிவெள்ளம்
ஒளிந்து விளையாடியது!
மின்னல்!

தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!


Sunday, April 27, 2014

உங்களின் தமிழ் அறிவு எப்படி? பகுதி 53

உங்களின் தமிழ் அறிவு எப்படி? பகுதி 53

வணக்கம் வாசகர்களே! சென்ற வாரம் அன்மொழித்தொகை குறித்து படித்தோம். இது கொஞ்சம் இலக்கணத்தின் உள்ளே சென்று படிப்பதாக பலருக்கு தோன்றியிருக்கிறது. பலருக்கு கொஞ்சம் கடினமாகக் கூட இருந்திருக்கிறது என்று அறிகிறேன். இதை வாசித்தவர்களும் குறைவே! நாம் வரிசையாக இந்த இலக்கணங்களை கற்காமல் அவ்வப்போது ஒன்று என்று முன்னுக்கு பின்னாக கற்று வருவதும் புரியாமல் போக வாய்ப்பு இருக்கிறது என்று தோன்றுகிறது. இதுவரை 52 பகுதிகள் வந்து பல இலக்கணங்கள் அறிந்து வருகிறோம். இவற்றை வரிசைப்படுத்த முடியாது என்றே தோன்றுகிறது. இனி வரிசையாக தொடர்ச்சியாக சில இலக்கணங்களை சொல்லலாம் என்று முடிவு செய்துள்ளேன். அதற்கு முன் நாம் பார்த்த தொகைகள் உவமைத்தொகை, உம்மைத்தொகை, அன்மொழித்தொகை இவற்றை தவிர்த்து வினைத்தொகை, பண்புத்தொகை, வேற்றுமைத்தொகை முதலியனவும் உள்ளன. அவற்றை இன்று பார்க்க இருக்கிறோம். அதற்கு முன்பு சென்ற வாரம் கற்றதை நினைவு கூற இங்கு செல்லவும். அன்மொழித்தொகை

தொகை என்றால் என்ன?
    சொற்கள் தனித்து நின்றும் மற்ற சொற்களோடு சேர்ந்து நின்றும் பொருள் தரும்.புலவர்கள் இரண்டு சொற்களை இணைத்து சொற்றொடர் அமைக்கும் போது பொருள் தருவதற்காக அவற்றின் இடையே சில சொற்களை சேர்ப்பர். சில சமயம் சேர்க்காமலும் விடுவர். இச்சொற்களை சேர்க்காவிடினும் இச்சொற்களை இருப்பதாக கருதி பொருள் கூறுவர். இவ்வாறு  சொற்கள் சேர்க்கப்படாது மறைந்து நின்று பொருள்  கொடுப்பது தொகை எனப்படும். இந்த தொகையினை கொண்ட தொடருக்கு தொகை நிலைத்தொடர் என்று பெயர்.
பெயர்ச்சொல்லோடும் வினைச்சொல்லோடும் ஏதாவது உருபு மறைந்து இரண்டு சொற்கள் முதல் பலசொற்கள் தொடர்ந்து அமைந்து ஒரு சொல்போல நடப்பவை தொகைநிலைத் தொடர்கள் எனப்படும்.

பெயர்ச்சொல்லோடு பெயர் சொல் சேர்ந்து தொகை நிலைத்தொடர் அமையும்.

பெயர்சொல்லோடு வினைச்சொல் சேர்ந்து தொகை நிலைத்தொடர் அமையும்.

வினைச்சொல்லும் வினைச்சொல்லும் சேர்ந்து தொகைநிலைத்தொடர் அமையாது.

இவ்வாறு தொகைநிலைத்தொடர்கள் ஆறு வகைப்படும்.

அவை 1. வேற்றுமைத்தொகை 2.வினைத்தொகை 3.பண்புத்தொகை 4.உவமைத்தொகை 5. உம்மைத் தொகை 6. அன்மொழித்தொகை.

இதில் இறுதி மூன்றினை சென்றவாரங்களில் படித்தோம். முதல் மூன்று தொகைகளை இப்போது படிப்போம்.

வேற்றுமைத்தொகை: இரண்டு சொற்களுக்கு இடையே வேற்றுமை உருபுகள் மறைந்து சொற்கள் தொடர்ந்து வந்தால் அவை வேற்றுமைத் தொகை எனப்படும். முதல் வேற்றுமை மற்றும் எட்டாம் வேற்றுமை தவிர்த்து பிற ஆறு வேற்றுமைகளிலும் இந்த வேற்றுமைத் தொகை அமையும்.

வேற்றுமை உருபுகளை தெரியுமா? ஐ, ஆல், கு, இல், அது, கண். இவையே இரண்டாம் வேற்றுமை முதல் ஏழாம் வேற்றுமை வரையிலான வேற்றுமை உருபுகள்.

மொழி கற்றான் இந்த தொடரில் ஐ என்னும் இரண்டாம் வேற்றுமை உருபு மறைந்து வந்துள்ளது. மொழியைக் கற்றான் என்று புரிந்து கொள்ள வேண்டும்.

விழியழகி- விழியால் அழகி-  ஆல் என்னும் மூன்றாம் வேற்றுமை
கல்லூரி சென்றான்  - கல்லூரிக்குச் சென்றான்  - கு என்னும் நான்காம் வேற்றுமை உருபு

மலையருவி – மலையில் அருவி – இல் என்னும் ஐந்தாம் வேற்றுமை உருபு.

கண்பார்வை  - கண்ணினது பார்வை – அது என்னும் ஆறாம் வேற்றுமை

பாற்சுவை- பாலின் கண் சுவை- கண் என்னும் ஏழாம் வேற்றுமைத் தொகை.

இப்படி நாம் பேசும் சொற்களில் வேற்றுமை உருபுகள் மறைந்து கிடக்கின்றன. இன்னும் சில சொற்களை எடுத்தால் வேற்றுமை உருபை சேர்த்தாலும் பொருள் வராது. இன்னும் அவ்வுறுப்போடு தொடர்புடைய சொற்களை சேர்த்தாலே பொருள் தரும். இந்த சொற்களும் உருபுகளோடு மறைந்து வரும். உருபுகளோடு வெளிப்பட்டு பொருள் தரும். இவ்வாறு சொற்களின் இடையில் உருபுகளும் அதன் பொருளை விளக்க வரும் சொல்லும் மறைந்து வரும் தொகை உருபும் பயனும் உடன் தொக்க தொகை எனப்படும்.

பொற்குடம்- பொன்னால்குடம்- ஆல் என்னும் மூன்றாம் வேற்றுமை உருபு மறைந்து வருகிறது. ஆனால் முழுமையான பொருளைத் தரவில்லை. இதையே பொன்னால் செய்த குடம் என்னும் போது பொருள் விளங்குகிறது. இந்த செய்த என்பது உருபின் பயனை விளக்க வருகிறது. இது இரண்டாம் வேற்றுமை உருபும் பயனும் உடன் தொக்க தொகை என்று சொல்லப்படுகிறது.

கைவிரல் –கையில்விரல்- கையில் உள்ள விரல்- ஐந்தாம் வேற்றுமை உருபும் பயனும் உடன் தொக்க தொகை.
ஓரளவேனும் புரிந்ததா? மீண்டும் படித்துப்பாருங்கள்! அடுத்த வாரம் வினைத்தொகை படிக்க தயாராக இருங்கள்.

இனிக்கும் இலக்கியம்.

நற்றிணை

மருதத்தினை

பரத்தையரிடம் இருந்து பிரிந்து வந்த தலைவனிடம் தலைவி கூறுவதாக பரணர் பாடிய செய்யுள்.

கழுநீர் மேய்ந்த கருந்தாள் எருமை
பழனத் தாமரைப் பனிமலர் முனைஇ,
தண்டு சேர் மள்ளரின் இயலி, அயலது
குன்று சேர் வெண் மணல் துஞ்சும் ஊர!
வெய்யை போல முயங்குதி: முனை எழத்
தெவ்வர் தேய்த்த செவ் வேல் வயவன்
மலி புனல் வாயில் இருப்பை அன்ன, என்
ஒலி பல் கூந்தல் நலம் பெற புனைந்த
முகை அவிழ் கோதை வாட்டிய
பகைவன் மன்? யான் மறந்து அமைகலனே!

விளக்கம்: வலிமையான கால்களை உடைய எருமை குட்டைகளில் மலரும் கழுநீர் மலரை மேய்ந்து பொய்கையில் உள்ள குளிர்ந்த தாமரை மலர்களை வெறுக்கும். கையில் பெரிய தடியை ஏந்தி பெரும் வீரரைப்போல நடந்து சென்று பக்கத்தில் குன்றுபோல் சேர்ந்து கிடக்கும் வெள்ளையான மணலில் படுத்து உறங்கும் வீரனே!

   நீ இப்போது என் மீது மிகுந்த காதல் உள்ளவன் போல நெருங்குகிறாய்!. ஆனால், போர் எழுந்தால் பகைவர்களை தொலைப்பவனும் சிவந்த வேற்ப்படைகளை உடையவனுமான வயவன் என்பவனுக்கு உரிமையானது நீர்வளம் மிக்க இருப்பையூர். அவ்வூரைப் போலவே என்னுடைய தழைத்த பல்கூந்தல் அழகு பெற சூட்டிய அரும்புகள் மலர்ந்த பூச்சரத்தை வாடும்படி செய்த பகைவன் நீ. நான் உன்னுடைய செய்கையை மறந்து விடவில்லை. ஆகவே நீ என்னை நெருங்காதே என்கிறாள் தலைவி.

உள்ளுறை உவமம். எருமை தாமரையை வெறுத்து கழுநீரை மேய்ந்து மணற்குன்றில் சென்று தூங்கும் என்று சொன்னது தலைவன் தலைவியை விரும்பாது பரத்தையின் இன்பத்தை நாடி சென்று அங்கு படுத்து உறங்குகிறான் என்பதை குறிப்பதாகும்.
சுருக்கமாக கிளி போல பொண்டாட்டி இருந்தாலும் குரங்கு போல வைப்பாட்டி என்று பழமொழி சொல்வார்களே அதை சொல்லி தலைவனை விரட்டுகிறாள் தலைவி.

என்ன அழகானதொரு உள்ளுரை உவமம். சிறப்பான பாடல் அல்லவா?

இந்த கவிதைக்கான படம் நண்பர் வெங்கட நாகராஜ் கவிதை எழுதச்சொல்லி பதிவிட்டது. பொருத்தமாக இருப்பதால் எடுத்துக்கொண்டேன்! நன்றி!

மீண்டும் அடுத்த வாரம் சந்திப்போம். உங்கள் கருத்துக்களை பின்னூட்டத்தில் தெரிவித்து ஊக்கப்படுத்துங்கள்! நன்றி!.

மேலும் தொடர்புடைய இடுகைகள்:

உங்களின் தமிழ் அறிவு எப்படி? பகுதி 50


உங்களின் தமிழ் அறிவு எப்படி? பகுதி 51

இத்தொடரின் அனைத்து பகுதிகளையும் படிக்க.

எளிய இலக்கணம் இனிய இலக்கியம்

Saturday, April 26, 2014

பணியார மழை! பாப்பா மலர்!

பணியார மழை!  பாப்பா மலர்!


 ஒரு ஊர்ல அஞ்சு அண்ணன் தம்பிங்க இருந்தாங்க. அவங்க அஞ்சு பேர்ல கடைசியா பிறந்த பையன் அப்பாவியான மனுசன். அஞ்சு பேருக்கும் கல்யாணம் முடிச்சப்பறம் குடும்ப சொத்தை பாகம் பிரிச்சிக்கிட்டாங்க.
  அப்போ மத்த நாலு அண்ணன்களும் இந்த கடைசித் தம்பியை  ஏமாத்த முடிவு பண்ணிட்டாங்க. சொத்து எதையும் இவனுக்கு கொடுக்காம ஒரு கிழட்டு எருமை மாட்டை மட்டும் கொடுத்து அவனையும் அவன் மனைவியையும் வீட்டை விட்டு விரட்டிட்டாங்க. அவனோட மனைவியாலேயும் எதுவும் எதிர்த்து பேச முடியலை. இதெல்லாம் நாங்க சொந்தமா சம்பாரிச்சது உன் புருஷனுக்குத்தான் ஒண்ணும் தெரியாதே!  ஏதோ பாவம் பார்த்து இந்த எருமை மாட்டை தர்றோம் பார்த்து பிழைச்சிக்குங்கன்னு சொல்லிட்டாங்க. இதுக்கு மேல எதிர்த்து பேசினா வீணா பிரச்சனைதானேன்னு  அந்தம்மாவும் அந்த அப்பாவியும் தனியா ஒரு குடிசை போட்டு தங்கிக்கிட்டாங்க.
    ஒரு நாள் ரொம்பவும் பணமுடையா ஆகிப்போச்சு. அப்பாவியோட மனைவி வீட்டுக்காரர் கிட்டே சொன்னாங்க இந்த கிழட்டு எருமையை எதுக்கு இன்னும் வெச்சிக்கிட்டு யாருகிட்டயாவது வித்துட்டு பணத்தோட வாங்க!ன்னு.
   அப்பாவி புருசனும் அந்த எருமையை ஓட்டிக்கிட்டு ஊர் ஊராப் போனாரு. யாருமே கிழட்டு மாடா இருக்குதுன்னு வாங்கலை! அடிமாட்டுக்கு விக்க இந்த அப்பாவிக்கு மனசு வரலை! அப்பாவிங்கிறதாலே இவரு உண்மையையும் சொல்லிடுவாரு. அய்யா! இது கிழட்டு மாடு! பாலெல்லாம் கொடுக்காது கன்னும் போடாது!ன்னு இப்படி சொன்னா எவன் அந்த கிழட்டு மாட்டை வாங்குவான். யாரும் வாங்கலை!
   இப்படியே ஊர் ஊரா அலைஞ்ச அந்த அப்பாவி ஒரு மத்தியான நேரத்துல ஓரு கருவேல மரத்து அடியிலே மாட்டை கட்டிவிட்டு களைச்சு போய் உக்காந்தாரு. அந்த மரத்து பொந்துல ஒரு ஓணான் படுத்துக்கிட்டு இவரை பார்த்து தலையை ஆட்டிக்கிட்டே இருந்துச்சு. இந்தாளு இன்னும் மாடு விக்கலையேங்கிற யோசனையிலே இருந்தாரா இந்த ஓணான் தலையை ஆட்டறதை பார்த்ததும் அது மாட்ட விலைக்கு கேக்குதுன்னு முடிவு பண்ணிக்கிட்டாரு.
   “ ஆமாமா! விலைக்கு கொடுக்கிற மாடுதான்! உனக்கு ஓணுமா?”ன்னு கேட்டாரு.

  ஓணான் எப்பவும் போல தலையை ஆட்டிச்சு. உடனெ இவரு விலை பேச ஆரம்பிச்சிட்டாரு. அவரோட மனைவி விலை எப்படி பேசனும்னு சொல்லிக் கொடுத்து அனுப்பிச்சிருந்தாங்க. அவங்க சொன்ன மாதிரியே இவரு மாட்டோட விலை நூறு ரூபாய்!னு சொன்னாரு.
  ஓணான் தலையை ஆட்டாம இருந்துச்சு. சரி விலை அதிகம்னு தலையை ஆட்டலை போலன்னு பத்து ரூபாய் கொறச்சு சொன்னாரு. அப்பவும் ஓணான் தலையை ஆட்டலை. இன்னுமா கொறைச்சு கேக்கறன்னு திரும்பவும் பத்து ரூபா கொறச்சாரு.
 அப்பவும் ஓணான் தலை அசைக்கவே இல்லை. ஒரு வழியா இவரு ஐம்பது ரூபான்னு சொல்லவும் அந்த நேரம் பார்த்து ஓணான் தலை அசைக்கவும் சரியா இருந்துச்சு.
  அட இதை முதல்லேயே கேட்டு இருக்கலாம்ல! சரி ஐம்பதுக்கு கொடுத்திடறேன்! இந்த மாட்டை இங்கேயே விட்டுடறேன் ஐம்பதுரூபா கொடுன்னு கேட்டாரு. ஓணான் தலையை அசைச்சது.
  ஓ! நாளைக்கு வந்து வாங்கிக்க சொல்றியா சரி! என்று சொல்லிவிட்டு மாட்டை அங்கேயே விட்டுவிட்டு கிளம்பி விட்டார் அந்த அப்பாவி. மறுநாள் காசு வாங்க அந்த மரத்து கிட்ட போயி பார்த்த  மாட்டை காணோம். ஓணான் மட்டும் தலையை ஆட்டிக்கிட்டு படுத்துகிடந்துச்சு.
  “என்னோட பணத்தை கொடுன்னு இவரு கேட்க ஓணான் தலையை ஆட்டுச்சு. என்ன தலையை ஆட்டறே! என்னோட பணத்தை கொடுன்னு திரும்பவும் அப்பாவி கேட்டாரு! ஓணான் அசையாமல் இருக்கவே அப்பாவிக்கு கோவம் வந்துருச்சு.
“மரியாதையா பணத்தை கொடு! இல்லேன்னா என்னோட மாட்டைத் திருப்பிக்கொடு!”ன்னு சத்தம் போட்டு கையை ஓங்கினாரு.
     ஓணான் பயந்து போய் மரத்து உச்சிக்கு ஏறிப்போச்சு. இவரும் விடாம துரத்திக்கிட்டு மரத்துல ஏறினாரு. ஓணான் கிளைக்கு கிளை தாவ இவருக்கு கோவம் அதிகமாயிருச்சு. மரத்தை பிடிச்சு உசுக்கினாரு. ஓணான் பொத்துன்னு கீழே விழுந்து ஒரு வெடிப்புல போய் புகுந்துகிச்சு. இவரு விடறதாவே இல்லை. என்கிட்டேயே ஏமாத்தறே! அப்படின்னு சொல்லிக்கிட்டு ஒரு காஞ்சிப்போன குச்சியை எடுத்து அந்த வெடிப்பை நோண்டி ஓணானை பிடிக்க முயற்சி பண்ணாரு. ஓணான் இவரு தோண்ட தோண்ட உள்ளே போய் புகுந்துச்சு! ஆனாலும் இவரு விடாம தோண்ட ஒரு குடம் ஒண்ணு தென்பட்டுச்சு. அத எடுத்து அதன் மூடியை திறந்து பார்த்தாரு அப்பாவி. உள்ளே நிறைய தங்க காசுகள் இருந்துச்சு.
   அட ஓணானே! இதை கொடுக்கத்தான் இம்புட்டு ஆட்டம் காட்டினியா? அப்படின்னு சொல்லிட்டு அந்த குடத்தை எடுத்துட்டுப் போய் தன் மனைவிகிட்ட கொடுத்தாரு.
  அவங்க மனைவிக்கு ஒரே ஆச்சர்யம்! “ ஏதுங்க இவ்வளவு பணம்?” எப்படி கிடைச்சதுன்னு கேட்டாங்க! இந்த அப்பாவி ஓணானுக்கு மாடு வித்த கதையை சொல்லி முடிச்சாரு.
  அந்தம்மாவுக்கு சிரிப்பா வந்துச்சு! இருந்தாலும் அந்த அம்மா புத்திசாலியாச்சே! இது புதையல்! எதேச்சையா இவருக்கு கிடைச்சிருக்கு! இது வெளியே தெரிஞ்சா அரசாங்கத்துக்கு தெரிஞ்சி பொருளும் போயிடும் தண்டணையும் கிடைக்கும். கடவுளா பார்த்து கொடுத்த இந்த காசை காப்பாத்திக்கணுமே என்ன செய்யலாம்னு யோசிச்சாங்க!.

    அன்னிக்கு ராத்திரி புருசன் தூங்கினப்புறம் நிறைய பணியாரம் சுட்டு முடிச்சாங்க. புருசன் வாசத்திண்ணையிலே தூங்கிட்டு இருந்தாரு. இவங்க மறைஞ்சி நின்னுக்கிட்டு தன்னோட புருசன் மேல பணியாரங்களை அள்ளி அள்ளி வீசீனாங்க!
    அந்த ஆளு திடுக்குன்னு முழிச்சிக்கிட்டான். இது என்னடா மேல வந்து விழுதுன்னு பார்த்தா பணியாரம்! ஆச்சர்யம் தாங்கலை அவனுக்கு. தன்னை சுத்திக்கிடந்த பணியாரங்களை பொறுக்கி எடுத்துக்கிட்டு மனைவியையும் கூப்பிட்டு இதோ பாரு பணியார மழை பேஞ்சிருக்கு இந்தா நீயும் சாப்பிடுன்னு ஒண்ணை எடுத்து கொடுத்தாரு.
 அவங்க மனைவியும் ஆமாங்க! பணியார மழை! பணியார மழை பொழிஞ்சிருக்கு!ன்னு சொல்லி பணியாரங்களை பொறுக்கி எடுத்து கூடையிலே போட்டுக்கிட்டாங்க. அன்னிக்கு ராத்திரி முழுக்க பணியார மழையை பத்தி புருஷன் பேச இவங்க நமட்டு சிரிப்பு சிரிச்சிக்கிட்டாங்க.
   பொழுது விடிஞ்சது! இந்த அப்பாவி கிட்ட அவங்க அண்ணன் காரனுங்க எங்கடா உன் மாடுன்னு கேக்க இவரு ஓணானுக்கு மாடு வித்த கதையை சொல்லி பொற்காசு கிடைச்சதை சொன்னாரு.
  அவனுங்களுக்கு பொறுக்கலை! நம்மளவிட தம்பி பணக்காரன் ஆயிருவான் போல இருக்கேன்னு ராஜா கிட்ட போய் சொல்லிட்டாங்க!
   ராஜாவும் இவங்களை விசாரணைக்கு கூப்பிட்டு அனுப்பினாரு. இந்தம்மா பொற்காசுகளை எல்லாம் பத்திரமா ஒரு இடத்திலே பதுக்கி வைச்சிட்டாங்க! அப்புறம் அரண்மனைக்கு கணவரை கூட்டிக்கிட்டு போனாங்க.
  விசாரணை துவங்கிச்சு. பொற்காசுகளை பத்தி ராஜா கேள்வி கேட்க அந்த அப்பாவியோட மனைவி தைரியமா பதில் சொன்னாங்க. “மகாராஜா! நாங்க ஏழை! எங்களுக்கு ஏதுங்க பொற்காசு! இவரு ஒரு அப்பாவிங்க! இவங்க அண்ணன் மாருங்க ஏமாத்தி விரட்டி அடிச்சதும் இல்லாம இப்ப அபாண்டமா இப்படி பழி சுமத்தறாங்க! அவரு பேசுறது எல்லாம் வேடிக்கையா பைத்தியக்காரத்தனமா இருக்கும்! இருக்கிற ஒரு கிழமாட்டை வித்து வரச்சொன்னா அதை தொலைச்சுட்டு இப்படி சொல்லிக்கிட்டு திரியறாரு! நீங்களே கேளுங்கன்னு” சொன்னாங்க.
  ராஜா கேட்டாரு!  ‘ஏம்பா! உனக்கு பொற்காசுங்க எப்படி கிடைச்சுது!”
  அப்பாவி சொன்னான்.  “ஓணாணுக்கு என்னோட மாட்டை வித்தேனுங்க! அதுதான் விலையா கொடுத்துதுங்க”
   ராஜாவுக்கு குழப்பம் ஆகிருச்சு! ”ஓணானாவது பொற்காசு கொடுத்து மாடு வாங்குவதாவது! என்ன இது வேடிக்கையா இருக்கே!”
    “ஆமாங்க! ஓணான் தான் கொடுத்தது!
என்னைக்கு கொடுத்தது!”
  அன்னிக்கு ராத்திரி ஊரெல்லாம் பணியார மழை பேய்ஞ்சுதுங்களே! அன்னிக்குதாங்க!
   “என்னது பணியார மழையா!”
 “ஆமாங்க! பணியார மழை பேஞ்சுதுங்க! நானும் என் பொஞ்சாதியும் கூட பொறுக்கி சாப்பிட்டோமுங்க!”
 இதைக்கேட்ட மாத்திரத்தில் அரசவையே சிரித்தது. இவன் ஒரு அப்பாவி மட்டுமல்ல முட்டாளும் கூட. என்று ராஜா முடிவு கட்டினார்.
   விசாரணையை தள்ளுபடி செய்து இவர்களை அனுப்பி விட்டார்.

அந்த அம்மா தன்னோட புத்தி சாதுர்யத்தால புருஷனை காப்பாத்துனது மட்டுமில்லாம நீண்ட காலம் சந்தோஷமா வாழ்ந்தாங்க.

(செவிவழிக்கதை)

தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!

Friday, April 25, 2014

சுகப்பிரசவம் அருளும் திருச்சிராப்பள்ளி தாயுமானவர்!

சுகப்பிரசவம் அருளும் திருச்சிராப்பள்ளி தாயுமானவர்!


 திருச்சி என்றாலே நினைவுக்கு வருவது நகரின் மையத்தில் ஓங்கி உயர்ந்து நிற்கும் மலைக்கோட்டை உச்சிப்பிள்ளையார் கோயில்தான். நகரில் நுழையும் போதே குன்றின் மேல் காட்சி தரும் உச்சிப்பிள்ளையார் கோவில்.
   உச்சிப்பிள்ளையாரை வணங்கும் முன் அந்த கோட்டையில் எழுந்தருளி இருக்கும் தாயுமானவ சுவாமிகளையும் மட்டுவார் குழலி அம்மையையும் தரிசிப்பது மரபு.

தென்கைலாயம் என்று வழங்கப்படும் இந்த தலத்தில் திரிசரன் என்ற மூன்று முகமுடைய அசுரன் வழிபட்டு பேறு பெற்றதாக கூறப்படுகிறது. இந்த மலையில் சுவாமி, அம்மன், விநாயகர் மூவரும் மூன்று சிகரங்களில் அமர்ந்த படியால் திரிசிரம் எனப்பட்டது.
  பிரம்மகிரி என்றும் வழங்கப்பட்ட இந்த மலை பார்ப்பதற்கு நந்தி அமர்ந்திருப்பது போல காட்சி தருவதால் ரிஷபாசலம் என்றும் பெயர் பெற்றது.


  இந்த மலைமேல் எழுந்தருளி இருக்கும் ஈசனுக்கு செவ்வந்தி நாதர், திருமலைக்கொழுந்தர், தாயுமானவர் என்றெல்லாம் அன்பர்களால் அழகிய தமிழில் வழங்கப்படுகிறார். அன்னை சுகந்த குந்தளாம்பிகை என்றும் மட்டுவார் குழலம்மை என்றும் விளிக்கப்படுகிறார். சாரமா முனிவர் இந்த இறைவனை செவ்வந்தி மலர்களால் பூஜை செய்தமையால் செவ்வந்தி நாதர் என்று வழங்கப்படுவதாகவும் மலைமீது அமர்ந்திருப்பதால் திருமலைக்கொழுந்தர் என்று அழைக்கப்படுவதாகவும் சொல்கின்றனர்.


இரத்தினாவதி என்ற பெண் இங்கு கோயில் கொண்டுள்ள இறைவன் மீது கொண்ட பக்தி காரணமாக அவளின் மகப்பேறு காலத்தில் இறைவனே தாயாக வந்து பிரசவம் பார்த்து தொண்டு செய்தார். இதனால் தாயுமானவர் என்றும் மாத்ருபூதேஸ்வரர் எனவும் இறைவன் அழைக்கப்படுகிறார்.
  இந்த நிகழ்ச்சியை எடுத்துக்காட்டும் ஓவியமும் சிற்பங்களும் இந்த ஆலயத்தில் காணப்படுகிறது அப்பர், சம்பந்தர், மாணிக்கவாசகர் அருணகிரி நாதர் ஆகியோர் இத்தலத்து இறைவனைப் பாடி உள்ளார்கள்.


   கடைவீதியில் இருந்து மலைக்குச் செல்லும் வழியில் அமைந்திருப்பது மாணிக்க விநாயகர் சன்னதி. கேட்டவரம் தரும் பிள்ளையாரான இவரை சுற்றி எப்போதுமே பக்தர்கள் கூட்டம். இவரை வணங்கியதும் மலையேறத் துவங்க வேண்டும். மொத்தம் 273 அடி உயரமுள்ள குன்று இது. 417 படிகள் உள்ளன. கோவிலில் கேமரா, செல்போன் அனுமதி இல்லை. எனவே பக்தர்கள் கொண்டு சென்றிருந்தால் வழியிலேயே பிடுங்கி வைத்துக் கொள்கிறார்கள். மலைப்படிகளை கடந்து உள்ளே சென்றால் மேற்கு நோக்கி இறைவன் லிங்க வடிவில் எழுந்தருளி இருக்கிறார். பெரிய வடிவில் அழகுற அமைந்துள்ள இவர் மீது பங்குனி மாதத்தில் 23,24, 25 தேதிகளில் சூரியனின் ஒளிக்கதிர்கள் படும் அற்புதக் காட்சியை கண்டு மகிழலாம்.
   
தாயுமான சுவாமியின் தெற்கு கோட்டத்தில் தட்சிணா மூர்த்தி எழுந்தருளி உள்ளார். ஞான வடிவான இவரை வழிபட்டு மௌன குரு சாமிகள் என்னும் தாயுமான அடிகள் ஞானம் பெற்றார். இந்த தட்சிணா மூர்த்தியின் பின்புறம் ஆலமரம் இல்லை. தனது மேற்கரங்களில் நாகமும் தீச்சுடரும் தாங்கியுள்ளர். முன் கைகளில் இடது கை சுவடியை தாங்கியுள்ளது. வலது கை சின் முத்திரையுடன் தர்ப்பை மீது அமர்ந்துள்ளது அற்புதக் கோலமாகும்.

    சுகந்த குந்தளாம்பிகை என்னும் மட்டுவார் குழலி  தனது நான்கு கரங்களில் மேலிரு கரங்களில் அங்குசம் பாசம் தாங்கியும் கீழிரு கரங்கள் அபயவரத முத்திரைகளுடனும் அருள்பாலிக்கின்றாள். இந்த கருவறையின் வெளிப்புறச்சுவர்களில் ஆதிசங்கரரின் ஸ்ரீ சௌந்தர்ய லஹரி பாடல்கள் கல்வெட்டாக பொறிக்கப்பட்டுள்ளன.
  இறைவனையும் அம்பாளையும் தரிசித்து வெளியே வருகையில் மண்டபத்தில் 63 நாயன் மார்கள் உள்ளார்கள். அவர்களை கண்டு வழிபட்டு நவக்கிரக சன்னதிக்கு வந்தால் இங்குள்ள நவகிரகங்கள் அனைத்தும் சூரியனை பார்த்த முகமாக இருக்கின்றன. இங்கு நவகிரகங்களை வழிபட்டால் எல்லாவிதமான நவகிரக தோஷங்களும் விலகும் என்கின்றனர்.

   உச்சிப்பிள்ளையாரை வழிபட செல்லும் வழியில் முதலில் காண்பது பல்லவர் கால குடைவரை கோயில். சிவபெருமானுக்காக பல்லவன் மகேந்திரவர்மனால் ‘லலிதாங்குர பல்லவேஸ்வர கிருஹம்’ என்ற இந்த கோயில் அமைக்கப்பட்டது.  இங்கு மேற்குச்சுவரில் கங்கையை தன் சடையில் தாங்கிய கோலத்தில் சிவபெருமானின் கங்காதர வடிவினை காணலாம். இந்த அழகிய காட்சி வேறு எங்கும் காணக் கிடைக்காது. இந்த சிற்பத்துக்கு அருகில் கல்வெட்டுக்கள் குணபதி என்ற மன்னனால் இந்த கோயில் தோற்றுவிக்கப்பட்டது பற்றியும் காவிரி நதியின் அழகையும் வர்ணிக்கின்றன.
   நதிப்பிரியனான சிவபெருமான் காவிரியின் அழகை பார்த்து அவள் மீது காதல் கொண்டுவிடுவானோ என்று பார்வதி சிவனருகில் நீங்காமல் அமர்ந்து கொண்டு இந்த காவிரி ஆனவள் பல்லவ மன்னனுக்குரியவள் என்று சொல்லிய வண்ணம் இருக்கிறாள் என்று கல்வெட்டுக்கள் கூறுகின்றன.

      இதைக் கடந்து சென்று  படியேறிச் சென்றால் உச்சிப்பிள்ளையாரை தரிசிக்கலாம். அரங்கத்துப் பெருமான் திருவரங்கத்தில் கோயில் கொள்ள விரும்பிய பொழுது பிள்ளையாரே சிறுவனாக தோன்றி உதவி செய்ததாகவும் அதனால் விபிஷணன் கோபம் கொண்டு சிறுவனை துரத்த அந்த சிறுவன் மலைமீது ஏறி உச்சிப் பிள்ளையாராக ஆனதாக கதை ஸ்தல வரலாறு கூறப்படுகிறது. வீபிஷணன் ரங்க விமானத்தை தூக்கி வரும் காட்சியை சித்தரிக்கும் சிற்பம் ஒன்றும் இங்குள்ள ஊஞ்சல் மண்டபத்தில் காணப்படுகிறது. உச்சிப்பிள்ளையார் கருணை வடிவாக காண்பவர்களுக்கு வரம் வழங்க அவரை தரிசித்து முடித்து  வெளிவரும் போது அங்கிருந்து பார்க்கையில் காவிரியின் அழகும் திருவரங்க கோயிலையும் திருவானைக்கா கோயிலையு திருச்சி நகர அழகினையும் காண முடிகிறது.

  ஹே சங்கர ஸ்மஹர! பிரமாதிநாத
  மன்னாத! ஸாம்ப! சசிசூட! ஹர! திரிசூலின்
  சம்போ! சுகப்பிரசவகிருத்! பவ! மே  தயாளேச
  ஸ்ரீ மாத்ரு பூத! சிவ! பாலய மாம் நமஸ்தே!

பெண்கள் சுகப்பிரசவம் அடைய இந்த ஸ்லோகத்தை சொல்லி தாயுமானவ சுவாமிகளை வேண்டிக் கொள்வதும். பிரசவம் சிறப்பாக நடைபெற்றதும் வாழைத்தார் படைப்பதும் இன்றும் இந்த கோவிலில் வழக்கத்தில் உள்ளது.


சிராப்பள்ளி மேவிய சிவனே போற்றி என்று மாணிக்கவாசகர் போற்றிய இத்தலத்து இறைவனுக்கு சித்திரை மாதத்தில் தேர்த்திருவிழா சிறப்பாக நடைபெறும். பங்குனியில் தெப்பத் திருவிழாவும். விநாயகசதுர்த்தி, ஆடிப்பூரம், நவராத்திரி விழாக்களும் சிறப்பாக நடைபெறும்.

 கர்ப்பிணிகள் மட்டுமின்றி அனைவரும் சென்று தரிசித்து வர வேண்டிய அற்புதமான ஆலயம் திருச்சிராப்பள்ளி உச்சிப் பிள்ளையார் கோவில். நான் இரண்டு வருடங்கள் முன் சென்று வந்தேன். நீங்களும் சென்று தரிசித்து வாருங்கள்!
 (படங்கள்: இணையத்திலிருந்தும்  தகவல்கள் ஆன்மீக இதழ்களில் இருந்து தொகுத்தது)
தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!



Thursday, April 24, 2014

தண்ணி இல்லா காட்டுக்கு மாத்திருவேன்னு இனிமே சொல்ல முடியாது ஏன்? ஜோக்ஸ்

ஜோக்ஸ்!


1.      அந்த நடிகை ஏன் திடீர்னு தேர்தல்ல போட்டியிடறதுல்ல இருந்து வாபஸ் வாங்கிட்டாங்க?
‘இடைத்தேர்தல்’னு சொன்னதை தப்பா புரிஞ்சிகிட்டாங்களாம்!

2.      இன்கம்டாக்ஸ் ரெய்ட் வந்ததுலேர்ந்து தலைவர் ரொம்ப பயந்து போயிட்டார்?
அப்படியா?
ஆமாம்! ‘டிஸ்கவரி சேனல் கூட பார்க்கறதில்லேன்னா பார்த்துக்கோயேன்!

3.      தலைவர் நிறைய வாக்குறுதிகளை அள்ளி வீசறாரே! எந்த தைரியத்துல வீசறார்?
ஜெயிக்கமாட்டோங்கிற தைரியத்துலதான்!

4.      ஓட்டுப்போடப் போன தலைவர் ஏன் போடாமேயே திரும்பிட்டார்!
அவர் கையில கறை படறத விரும்ப மாட்டாராம்!

5.      என்னது மன்னர் தனக்குத்தானே குழிப்பறித்துக் கொண்டாரா?
ஆம் தன் கையாலேயே பதுங்குகுழி தோண்டிக்கொண்டார் என்று சொன்னேன்!

6.      அந்த டாக்டர் விவரமானவருன்னு எப்படி சொல்றே?
பல்ஸ் பிடிச்சு பார்க்கிறதுக்கு முன்னாடி பர்ஸை பிடிச்சு பார்க்கிறாரே!


7.      மக்களின் இதயங்களில் நான் குடியிருக்கிறேன்னு தலைவர் சொன்னது தப்பா போச்சா ஏன்?
மக்கள் வாடகை கேட்டு வர ஆரம்பிச்சுட்டாங்க!

8.      அந்த ஆள் முகத்துலேயே முழிக்க கூடாதுன்னு உங்க தொகுதிக்காரங்க சொன்னாங்களே என்ன பண்ணாங்க?
தொகுதி வேட்பாளரா நிக்க வைச்சு ஜெயிக்க வச்சிட்டாங்க!


9.      எதிரி நாட்டு மன்னன் அறைக்கூவல் விடுத்தும் மன்னர் சும்மா இருந்துவிட்டாரா ஏன்?
மன்னருக்கு எந்த ஒரு விசயமும் முழுசாய் இருக்க வேண்டுமாம்! முழுகூவல் விடட்டும் பார்த்துக்கொள்ளலாம் என்று சும்மா இருந்துவிட்டார்!

10.  ஐ.பி. எல் பார்த்ததுலே இருந்து தலைவர் அதே ஞாபகமா இருக்கார்?
ஏன்?
ப்ளேயர்களை ஏலத்தில எடுக்கிறமாதிரி தொகுதிகளையும் ஏலத்திலே எடுத்தா என்னன்னு கேட்டுக்கிட்டு இருக்கார்.

11.  டீ.வி பார்க்கறதுல எனக்கும் என் ஹஸ்பெண்டுக்கும் சண்டையே வந்துருச்சு?
அப்புறம்?
அவரு சமைக்கறப்ப நான் பாக்கிறதுன்னும் நான் சாப்பிடறப்ப அவரு பாக்கிறதுன்னும் ஒரு ஒப்பந்தம் போட்டுக்கிட்டோம்!

12.  ஏடிஎம் மிசின் மேலே ஏன் ஏறி நிக்கறீங்க!
அதுதாங்க பேலன்ஸ் சரியா இருக்கான்னு பாக்க சொல்லுச்சு!

13.  நம்ம தலைவர் தன்மான சிங்கம்!
எப்படி சொல்ற?
எந்த கட்சியும் ஆதரவு கேட்டு வராததாலே தன்னோட ஆதரவை நோட்டாவுக்கு கொடுக்கிறதா அறிக்கை விட்டிருக்காரே!

14.  அந்த நடிகைக்கும் டைரக்டருக்கும் லவ் பத்திக்கிச்சாமே!
கல்யாணம் பண்ணிக்கிறதா சொல்லி அதை அணைச்சி வச்சிருக்காங்க!


15.  மகளிர் அணித்தலைவி எதுக்கு தலைவரோட கோச்சுக்கிட்டு போறாங்க?
தலைவரோட வீட்டுல 33 சதவீத இட ஒதுக்கீடு கேட்டாங்களாம்!

16.  செயினை அறுத்துட்டு ஓடினவனை இன்ஸ்பெக்டர் விடாம துரத்திக்கிட்டு போய்…
மடக்கி பிடிச்சு செயினை வாங்கிட்டாரா?
ஊகும்.. மாமூலை வாங்கிட்டார்!

17.  அந்த  ஜெயிலிலே பணப்புழக்கம் அதிகம்னு எப்படி சொல்றீங்க!
எல்லா செல்லிலேயும் ‘செல்லு’ சுத்திவருதே!

18.  தண்ணி இல்லாத காட்டுக்கு மாத்திருவேன்னு சொன்னதும் வருத்தப்படாம ஏன் சிரிக்கிறீங்க?
தமிழ்நாடு முழுக்க டாஸ்மாக் இல்லாத இடம் எது? இன்னும் எத்தனைநாளைக்கு இந்த டயலாக்கை சொல்லிக்கிட்டிருப்பீங்க!

19.  அந்த பேச்சாளர் ஏன்  இன்னிக்கு பேச மறுக்கிறார்?
இன்னோவா வரும்னு பேசி பேசி இன்னிக்கு வாயெல்லாம் நோவா ஆயிருச்சாம்!

20.  மன்னருக்கு படை என்றாலே அலர்ஜிதான்!
ஓகோ! அதனால் அடிக்கடி முதுகை சொறிஞ்சிக்கிறாரோ!


21.மன்னர் வாரிக் வாரிக்கொடுத்துவிட்டு இளைப்பாறுகிறாறா? யாருக்கு!
வேறு யாருக்கு ராணியாருக்குத்தான் தலைவாரிக்கொடுத்துவிட்டு இளைப்பாறுகிறார்!

22. எலக்‌ஷன் ட்ரெண்ட் மாறிப்போச்சா எப்படி?
  அப்போ வாக்குறுதியை  வாரி இறைப்பாங்க! இப்ப நோட்டை வாரி இறைக்கிறாங்க!

தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!

   
Related Posts Plugin for WordPress, Blogger...