Monday, March 31, 2014

யார் கடவுள்?

யார் கடவுள்?


உலகம் உதித்ததிலிருந்தே
உயிர்பெற்றிருக்கும் ஓர் கேள்வி
யார் கடவுள்?
கடவுள் உண்டென்றால்
சொல்லுங்கள் யார் கடவுள்?
பகுத்தறிவாளர்கள்
தர்க்கவியலாளர்கள்
கடவுள் மறுப்பாளர்கள்
இன்னும் பலரும் கேட்கிறார்கள்
யார் கடவுள்?
விடைதான் கிடைத்த பாடில்லை!
ஆன்மீக வாதிகள்!
ஆண்டவனைத் தொழுபவர்கள்!
இறை நம்பிக்கை மிகுந்தோர்!
சமய குருமார்கள்!
சாத்திரம் படைப்பவர்கள்!
வேதாந்திகள்! ஞானிகள் என்று
எல்லோரும் ஏதோ ஒன்றை  “கடவுள்”
என்று அறுதியிட்டு சொன்னாலும்,
அது எது? எப்படி? ஏன்? என்று
விவரம் கேட்கிறது பகுத்தறிவாளர்கள் குழு!

கடவுள்தான் மனிதனைப் படைத்தானா?
அவன் தான் எல்லோரையும் காத்தானா?
அப்படியெனில் ஏன் ஏற்ற தாழ்வு?
எதற்கு அடித்துக் கொள்ள வேண்டும்!
பஞ்சமும் பசியும், பட்டினியும்! வெள்ளமும் புயலும்!
விபத்தும் கொலையும் கொடுமையும்
ஏன் தொடர வேண்டும்!
நல்லவர்கள் கெட கெட்டவர்கள் வாழ்வது ஏன்?
இப்படியொரு கேள்வி எழுகிறது!
கடவுள் உண்டெண்றால் நீ பார்த்திருக்கிறாயா?
பார்க்க முடியாது! உணரத்தான் முடியுமென்றால்
உணர்ந்திருக்கிறாயா? இப்படி நீள்கிறது விவாதங்கள்!

கடவுளுக்கு ஏது மதம்? ஏது பேதம்? ஏது விலை?
கடவுள் பெயரால் நடக்கிறது கொள்ளை!
நாத்திகம் பேசுபவர்களும் நடத்துகிறார்கள் கொள்ளை!
ஆத்திகம் வளர்க்கிறேன் என்று அடிக்கிறார்கள் லாபம்!

இத்தனைக்கும் காரணம் கடவுள்!
கடவுளை மறுத்து ஒரு கூட்டம்!
கடவுளை நம்பும் ஒரு கூட்டம்!
இடையில் சிக்குது ஒரு கூட்டம்!


உன்னுள்ளே இருக்கிறான் கடவுள்!
அதுதான் அந்த சொல்லின் திறவுகோல்!
ஒவ்வொரு உயிரினுள்ளும் ஒரு கடவுள் இருக்கிறான்!
பிற உயிரை மதிக்கையில் பிறப்பெடுக்கிறான்!

கருணை, இரக்கம், சுரக்கும்போது அவன்
கடவுள் ஆகிறான்!
இவை வற்றிப் போகையில் வெறும்
கட்டை ஆகிறான்!

நம்மை மீறிய சக்தி ஒன்று நம்மை ஆள்கிறது!
இம்மையில் இதை கடவுள் என்று சொல்லி
கண்ணில் வைத்து போற்றுகின்றோம்!
உன்னில் என்ன தோன்றுதோ அதை படைத்து
மண்ணில் விதைக்கிறோம்!

பூசையென்பதும் படையல் என்பதும்
நேர்த்திஎன்பதும் கோவிலெடுப்பதும் கொடை கொடுப்பதும் மனிதன் படைத்தது!
இதை கொடுத்தால் இதை தருவேன் என்ற புத்தி
மனிதனுடையது!  படைத்தவனுக்கு படையல் வைப்பதெல்லாம்
மனிதன் படைப்பு!

எல்லாம் அவனே யாகில் நீயும் அவனே!
அதை உணர்ந்தால் நீயும் கடவுள்!
கடவுள் யாரென்று கேட்பவனும் கடவுள்!
கடவுள் இருக்கிறார் என்பவனும் கடவுள்!
போற்றுபவனும் கடவுள்! தூற்றுபவனும் கடவுள்!
எழுதுபவனும் கடவுள்! வாசிப்பவனும் கடவுள்!
ஆம்! நீயும் கடவுள்! நானும் கடவுள்!


டிஸ்கி} ஜோதிஜி அவர்கள் ஆன்மீகத்தை குறித்து எழுத மீண்டும் கடவுள் குறித்த விவாதங்கள் களை கட்டத் துவங்கி விட்டது! ஏதோ என் சிற்றறிவை தட்டியதில் விழுந்தது இந்த கவிதை! ஏதோ நம்மாலே முடிஞ்சது!

தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!


Sunday, March 30, 2014

உங்களின் தமிழ் அறிவு எப்படி? பகுதி 49

உங்களின் தமிழ் அறிவு எப்படி? பகுதி 49


வணக்கம் அன்பர்களே! சென்ற வாரம் மூவகை மொழிகள் பற்றி அறிந்துகொண்டிருப்பீர்கள். அவை மிக சுலபமான இலக்கணமாக இருந்தது என்றும் சொல்லியிருந்தீர்கள். இன்று பார்க்க போவதும் சுலபமான ஒன்றுதான். அதற்குமுன் சென்ற பகுதியை நினைவு கூற இங்கு சென்று வரவும். மூவகை மொழிகள்!

   இன்று நாம் பார்க்க போவது திணையும் பாலும்!

ஆஹா! இது ஏதோ உணவு சமாச்சாரம் என்று நினைத்து விடாதீர்கள். திணை என்பது பல பொருள்களை சொல்லும் ஒரு சொல். திணைக்கு ஒழுக்கம், குலம், இனம், என்று பல பொருள்கள் உண்டு. உலகத்து பொருட்களை எல்லாம் இனம் படுத்தி உயர்திணை, அஃறிணை என்று இருவகைப் படுத்தி உள்ளனர்.

உயர்திணை: பகுத்தறியும் திறன் படைத்த இனத்தை உயர்திணை என்று சொல்லுகிறோம். எடுத்துக்காட்டாக, மனிதர், தேவர், கடவுள், நரகர், அசுரர் போன்றோர் உயர்திணையில் வருவர்.

அஃறிணை: பகுத்தறியும் திறன் இல்லாத மற்ற பொருள்கள் உயிருள்ளவையாக இருந்தாலும் உயிரில்லாதவையாக இருந்தாலும் அவை அஃறிணை என்று வழங்கப்படும்.
எடுத்துக் காட்டாக, மயில், எருது, மண், மரம், செடி, போன்றவை அஃறிணை பொருட்களாகும்.

    இந்த இருதிணைகளில் அடங்கிய பொருட்களை ஐந்துவகை பால்களாகப் பிரிக்கிறது இலக்கணம்.
   பால் என்ற சொல்லுக்கு பகுப்பு என்று பொருள். இந்த பால் ஆண்பால், பெண்பால், பலர்பால், ஒன்றன்பால், பலவின்பால் என ஐந்து வகைப்படும்.

ஆண்பால், பெண்பால், பலர்பால் உயர்திணையில் மட்டும் வரும்.
ஒன்றன்பால், பலவின் பால் அஃறிணையில் மட்டும் வரும்.

ஆண்பால்: உயர்திணையில் ஆணைக் குறிப்பது ஆண்பால் எனப்படும்.
எ.கா} கண்ணன், ராமன், மன்னன்.

பெண்பால்: உயர்திணையில் பெண்ணைக் குறிப்பது பெண்பாலாகும்.
எ.கா} அரசி, யமுனா, இறைவி, காவேரி.

பலர்பால்: உயர்திணையில் ஒன்றுக்கு மேற்பட்ட ஆடவரையோ பெண்டிரையோ அல்லது இருபாலரையுமே சேர்த்து உரைப்பது பலர்பால் எனப்படும்.
எ.கா} ஆடவர், காளையர்- ஆண்பால் பன்மை
       பெண்டிர், தோகையர்- பெண்பால் பன்மை
        மக்கள், குழுவினர் – இருவர் பன்மை.
ஒன்றன்பால்: அஃறிணையில் ஒரு பொருளை தனியாக குறிப்பது ஒன்றன் பால் எனப்படும்.
  எ.கா} புலி, மயில்,சுவடி, புல்

பலவின்பால்:  அஃறிணையில் ஒன்றுக்கு மேற்பட்ட பொருட்களை குறிப்பதற்கு பல பொருட்களை கூட்டமாக குறிப்பதற்கு பலவின்பால் என்று பெயர்.
  எ.கா} மான்கள், நூல்கள், மாடுகள், விலங்குகள், மந்தை

அஃறிணையிலும்  களிறு, சேவல், கடுவன், எருது போன்றவை ஆண்பாலையும், பிடி, பேடை, மந்தி, பசு போன்றவை பெண்பாலையும் தெரிவித்த போதிலும் இவை சிறுபான்மை என்பதால் இலக்கண முறையில் ஒன்றன்பால் என்ற பகுப்பிலேயே அடங்கி விடுகிறது. அதே போல் தோகை விரிக்கும் மயில் ஆணாக இருந்தாலும் அவை பறவைகளில் பெண்ணாகவே கருதப்படுகிறது. ஒன்றன்பாலிலேயே கூறப்படுகிறது.

திணையும் பாலும் நன்றாக அருந்தினீர்களா? மீண்டும் ஒருமுறை படித்தால் நன்கு விளங்கும்.  இனி இலக்கிய சுவைக்கு சென்று பார்ப்போம்!

அகத்திணை பாடும் நற்றிணையில் ஒரு செய்யுளை காண்போமா?
இதைப்பாடியவர் வெள்ளைக்குடி நாகனார். துறை நெய்தல்.
பொருள் தேடிச் சென்ற தலைவனைப் பிரிந்து தலைவி பாடுவதாக அமைந்தது.

பளிங்கு செறிந்தன்ன பல் கதிர்இடைஇடை,
பால் முகந்தன்ன பசு வெண் நிலவின்,
மால்பிடர் அறியா, நிறையுறு மதியம்!
சால்பும் செம்மையும் உடையை ஆதலின்,
நிற் கரந்து உறையும் உலகம் இன்மையின்,
எற் கரந்து உறைவோர் உள்வழி காட்டாய்!
நற் கவின் இழந்த என் தோள் போல் சாஅய்,
சிறுகுபு சிறுகுபு செரிஇ,
அறி கரி பொய்த்தலின், ஆகுமோ அதுவே?

விளக்கம்: பளிங்குகள் ஒன்று சேர்ந்தது போன்ற நிலாக்கதிர்கள் ஒளிவீச அவற்றின் இடையே பசுவின் பாலை முகர்ந்து வைத்தார்ப் போல பசுமையுடைய வெண்மை நிலா; மேகத்தின் பிடறியில் தோன்றி பிறர் அறியாத கலைகள் நிறைந்த திங்களே!
  நீ  அமைதியும் நேர்மையும் உடையாய். ஆதலால் உனக்கு ஒளிந்து வாழும் உலக உயிர்கள் இல்லை. ஆனால் எனக்கு ஒளிந்து வாழும் ஒரு காதலர் உண்டு. அவர் இருக்கும் இடத்தை எனக்கு காட்டுக. அவ்வாறு நீ காட்ட மாட்டாய்.
   ‘ நீ அறிந்ததை எனக்கு கூறாமல் பொய்த்திருக்கிறாய்! நல்ல அழகை இழந்த என் தோள் போல மெலிந்து சிறிது சிறிதாக குறைந்து செல்வாயாக! நீ தேய்ந்து செல்வதால் என் காதலரை காட்டுவது உனக்கு முடியாதே! என்கிறாள் தலைவி.

பொருள் தேட நெடுந்தொலைவு செல்கிறான் காதலன். அவன் இல்லாது பசலை படர்ந்து தோள் மெலிந்த தலைவி வானில் தவழும் நிலவிடம் இவ்வாறு கூறுகின்றாள். உலகம் முழுவதும் ஒளி வீசக்கூடிய நிலவிற்கு   தலைவன் எங்கிருக்கிறான் என்பது தெரியும். தெரிந்தும் அது தலைவனை காட்டவில்லை. சால்பும் செம்மையும் உடைய நிலா இவ்வாறு பொய்யுரைப்பதால் அது தன்னைப் போல மெலிந்து குறைந்து தேய்ந்து போகிறது! என்று சாபமிடுகிறாள் தலைவி.
   என்ன ஒரு அழகான கற்பனை!

மீண்டும் அடுத்த பகுதியில் சந்திப்போம்!

உங்கள் பின்னூட்டங்களை அனுப்பி ஊக்கப்படுத்துங்கள்! நன்றி!


 மேலும் தொடர்புடைய இடுகைகள்!


இதையும் படித்து பாருங்களேன்!

Saturday, March 29, 2014

வழிப்போக்கனுக்கு உதவிய விக்கிரமாதித்தன்! பாப்பா மலர்!

வழிப்போக்கனுக்கு உதவிய விக்கிரமாதித்தன்! பாப்பா மலர்!


ஒரு சமயம் விக்கிரமாதித்த மஹாராஜா அயல் நாடுகள் எல்லாம் பயணம் செய்துவரக் கிளம்பினார். பல்வேறு நகரங்களையும் புனித ஸ்தலங்களையும் கண்டுகளித்துவிட்டு, மலைகள், நதிகள் பல கடந்து ஒரு நகரத்தினை அடைந்தார் விக்கிரமாதித்தன்.
  அந்த நகரத்தில் ஆகாயம் தொடும் அளவிற்கு உயர்ந்த மாளிகைகளும் கோபுரங்கள் உடைய கோவில்களும் நிறைந்திருந்தன. விக்கிரமாதித்தன் நகரின் வெளியே இருந்த ஒரு விஷ்ணு கோவிலின் குளத்தில் இறங்கி நீராடிவிட்டு பிறகு கோவிலுக்குள் சென்றார்.இறைவனை வணங்கினார்.
  “ பிரபோ! உன்னைப் போற்றுவதற்கு மௌனமாக இருப்பதொன்றே சிறந்தவழி என்பதை அறிவேன்; வார்த்தைகளுக்கு அப்பாற்பட்ட விஷ்ணுவை பிரம்மாவினால் கூட சரியாக அறிய முடியாது. உன்னையன்றி வேறு எதைப்பற்றியும் சிந்திப்பது இல்லை. நான் உன்னை எப்போதும் பூஜித்து வர அருள் புரியவேண்டும். கைகளாலோ,கால்களாலோ, செயல்,வாக்கு உடல் ஆகியவற்றால் தெரிந்தோ தெரியாமலோ ஏற்பட்ட என்னுடைய பாவங்கள் அனைத்தையும் மன்னித்துவிடு இறைவா! கருணைக்கடலே என்னை வாழ்த்தி அருளுவாய்!” இவ்வாறு இறைவனை வணங்கிய விக்கிரமாதித்தன் கோவில் பிரகாரத்தை வலம் வந்து மண்டபத்தில் அமர்ந்தார்.
   அப்போது அந்த வழியே வழிப்போக்கன் ஒருவன் அங்கு வந்து சேர்ந்தார். அவரிடம், ஐயா, தாங்கள் யார் எங்கிருந்து வருகிறீர்கள் என்று கேட்டார் விக்கிரமாதித்தன்.
   ஐயா! நானோர் தேசாந்திரி! உலகம் முழுவதும் சுற்றி வருபவன். நீங்கள் யார்? உங்களை இதற்கு முன் பார்த்தது இல்லையே? என்று அரசனைக் கேட்டார் வழிப்போக்கன்.
    “நானும் உன்னைப்போன்று ஓர் வழிப்போக்கன் தான்! என்றார் விக்கிரமாதித்தன்.
   இதை அந்த வழிப்போக்கன் நம்பவில்லை! விக்கிரமாதித்தனை கூர்ந்து நோக்கிய அவன், தங்களைப் பார்த்தால் சர்வ லட்சணங்களும் பொருந்திய அரசகுமாரன் போலத் தெரிகிறது! நீங்கள் ஓர் அரசனாகத்தான் இருக்க வேண்டும். தலையில் எழுதி வைத்த எழுத்தை யாராலும் மாற்றமுடியாது என்று சொல்லியிருக்கிறார்கள். என்ன காரணமோ தாங்கள் இந்த வேடத்தில் இருப்பதற்கு? என்றான்.
    விக்கிரமாதித்தன், ஆம்! ஐயா! நீங்கள் சொல்வது உண்மைதான்! நான் உஜ்ஜைனி தேசத்து அரசன் விக்கிரமாதித்தன். “விவேகமுள்ள உபதேசம் சிறு குழந்தையிடம் இருந்து வந்தாலும் ஏற்க வேண்டும்.கெடுதலான யோசனைகள் நல்ல வயிற்றில் உதித்தவனிடம் இருந்து வந்தாலும் நிராகரிக்க வேண்டும் என்று நீதிநெறி சொல்லுகிறது. நீங்கள் மிகவும் வருத்தமாக இருக்கிறீர்களே என்ன காரணம்? என்று கேட்டார்.
    “என்னுடைய வருத்தத்தை சொல்வதால் என்ன பிரயோசனம் ஏற்படப் போகிறது? நான் மிகவும் கஷ்டத்தில் இருக்கிறேன்!” என்று அலுத்துக் கொண்டார் வழிப்போக்கன்.
   “ உங்கள் வருத்தம் என்னவென்று சொன்னால் என்னாலான உதவியை செய்கிறேன்!” என்றார் விக்கிரமன்.
   “அரசே! பக்கத்தில் நீலம் என்றொரு மலை இருக்கிறது. அங்கு காமாட்சி தேவி வசிக்கிறாள். கோவிலின் அருகே பூமிக்குள் செல்லும் சுரங்கம் ஒன்று இருக்கிறது. அதன் வாயில் மூடப்பட்டு உள்ளது. காமாட்சி மந்திரத்தை ஜெபித்தால் அச்சுரங்கத்தின் வாயில் திறக்கும். அதனுள் எட்டுவித உலோகங்களை தங்கமாக்கும் பாதரசமுள்ள பாத்திரம் இருக்கிறது. பன்னிரண்டு வருஷங்களாக நான் தேவியை பிரார்த்தித்து வருகிறேன்! சுரங்க வாசல் திறக்கவில்லை.” என்றான் வழிப்போக்கன்.

   “ ஐயா! நான் உங்களுடன் வந்து காமாட்சி மந்திரம் உச்சரித்து சுரங்கத்தை திறந்து உங்கள் விருப்பத்தை பூர்த்தி செய்கிறேன்!” என்றார் விக்கிரமன்.
  இருவரும் புறப்பட்டு நீலமலை சென்று அங்கிருந்த காமாட்சி தேவியின் சன்னதியை அடைந்தனர். இருட்டிவிட்டதால் மண்டபத்தில் படுத்து உறங்கினர்.
   விக்கிரமாதித்தன் கனவில் தேவி தோன்றி, விக்கிரமா! நீ ஏன் இங்கு வந்தாய்? இந்த சுரங்கம் திறக்க வேண்டுமானால் 32 லட்சணங்கள் பொருந்திய ஒரு ராஜனின் இரத்தத்தை கதவில் தெளிக்க வேண்டும்!” என்று சொல்லி மறைந்தாள்.
   பொழுது விடிந்தது! விக்கிரமன் குளித்து முடித்து தேவியை துதித்துவிட்டு சுரங்கத்தின் அருகே சென்றான். காமாட்சி மந்திரத்தை உச்சரித்து,  “தேவி! முப்பத்திரண்டு லட்சணங்களும் பொருந்திய ஒருவனின் இரத்தத்தை நீ விரும்பும் பட்சத்தில் இதோ என்னுடைய இரத்தத்தை பெற்றுக்கொள்!”என்று தன் கழுத்தை துண்டித்துக் கொள்ள வாளை ஓங்கினான்.
   அப்போது, தேவி பிரத்யட்சமாகி,விக்கிரமாதித்தனை தடுத்து, மன்னா! உன் செய்கை என்னை மகிழ்ச்சிக் கடலில் ஆழ்த்தியது! உனக்கு விருப்பமானதை கேள்! தருகிறேன்!” என்றாள்.
   “தேவி! எனக்கு உன் அருள் கிடைத்தால் போதும்! இதோ இந்த சுரங்கத்தில் இருக்கும் பாதரசமுள்ள பாத்திரம் இந்த வழிப்போக்கருக்குத் தேவைப்படுகிறது! பன்னிரண்டு வருஷ காலமாக இதற்காக உன்னைத் துதித்து வருகிறார்! அவர் விருப்பத்தை நிறைவேற்றுவாயாக! அதுவே என் விருப்பம்!” என்றான் விக்கிரமாதித்தன்.
    “மன்னா! சுயநலமற்ற உன் கருணை மனம் போற்றத் தக்கது! முன் பின் தெரியாத ஒரு வழிப்போக்கருக்காக உன் உயிரையும் கொடுக்கத் துணிந்தாய்! நீ நீடுழி வாழ்வாய்!  உன் விருப்பப்படியே ஆகட்டும்! என்ற காமாட்சி தேவி பாதரச பாத்திரத்தை எடுத்து வழிப்போக்கனிடம் கொடுத்து மறைந்தாள்.
  வழிப்போக்கனும் விக்கிரமாதித்தனின் கருணை மனம் கண்டு நெகிழ்ந்து அவனை பலவாறு புகழ்ந்து விடைபெற்றான். விக்கிரமாதித்தனும் நாடு திரும்பினான்.
   பிறருக்கு உதவும் தயாள குணம் படைத்த விக்கிரமன் போன்ற மன்னர்கள் அந்த காலத்தே வசித்தார்கள் என்பது பெருமைக்குரியதாய் உள்ளதல்லவா? நாமும் நம்மாலான உதவிகளை பிறருக்கு செய்ய வேண்டும். நம்மை ஆள்பவர்களையும் நல்லவர்களாய் தேர்ந்தெடுத்தல் வேண்டுமல்லவா?

 
தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!
  

  

Friday, March 28, 2014

சகல சௌபாக்கியம் தரும் ஸ்ரீ லலிதா சஹஸ்ரநாம பாராயணம்!

சகல சௌபாக்கியம் தரும் ஸ்ரீ லலிதா சஹஸ்ரநாம பாராயணம்!


எப்பொழுது உதித்தது என்று காலத்தால் அறியப்படாத தொன்மை வாய்ந்த மதம் இந்துமதம். பல்வேறு காலத்தில் பல்வேறு ஞானியர்கள் தோன்றி இந்து மதத்தில் சீரிய மாற்றங்கள் புகுத்தினர். அப்படி ஆதி சங்கர பகவத் பாதர் உருவாக்கியது ஷன்மத வழிபாடு.
   இந்து சமயத்தில் காணாபத்யம் என்னும் கணபதி வழிபாடு,கௌமாரம் எனப்படும் முருகர் வழிபாடு, சைவம் எனப்படும் சிவ வழிபாடு, சாக்தம், எனும் சக்தி வழிபாடு, வைஷ்ணவம் எனும் நாராயணர் வழிபாடு, சௌரவம் என்னும் சூரியர் வழிபாடு. என ஆறு வகையான வழிபாடுகள் உருவாக்கினார்.
   இத்தகைய ஆறுவகை வழிபாட்டில் சிறப்பானதாக போற்றப்படுவது சாக்தம் என்னும் சக்தி வழிபாடு. சக்தியைப் பல உருவங்களில் பலவிதமாக வழிபடுவதே இந்த சமயம் காட்டும் நெறி. ஆனால் சக்தி வழிபாடு மிக மிகப் பழமையானது. ஒரு காலத்தில் உலகெங்கும் பரவியிருந்தது.

ஸ்ரீவித்யா எனப்படும் சக்தி வழிபாடு   

    இதன் மிக முக்கிய அங்கம் ஸ்ரீவித்யா மார்க்கம். இந்த மார்க்கத்தில் ஜகத்ஜனனியாகிய அம்பிகையைத் திரிபுரசுந்தரியாக வழிபடுகிறோம், ஸ்ரீலலிதா, காமாட்சி, ராஜராஜேஸ்வரி, புவனேஸ்வரி என்ற பெயர்களில் திரிபுரசுந்தரியை வணங்குகிறோம். 

        இந்தப் பிரபஞ்சத்தின் தாயாக விளங்கும் அம்பிகையை வழிபடுவதற்குப் பலவழிகள் இருக்கின்றன. அவளுக்கு மிகமிகப் பிரியமான பெயரால் அவளை அழைப்பதேகூட ஒரு வழிதான். அம்பிகைக்குப் பிரியமான மந்திரங்கள் பல இருக்கின்றன. 
    ஆயிரம் மந்திரங்கள் கொண்ட தொகுப்பை சஹஸ்ரநாமம் என்று கூறுகிறோம். முன்னூறு மந்திரங்களைத் திரிசதி என்னும் நூற்றெட்டை அஷ்டோத்தர சதம் என்றும், பதினாறை சோடசம் என்றும் அழைக்கிறோம். 
    
    முக்கியமான பெரிய தெய்வங்களுக்கெல்லாம் சஹஸ்ரநாமம் உண்டு. அம்பிகைக்கே ஒன்றுக்கு மேற்பட்ட சஹஸ்ரநாமங்கள் இருக்கின்றன. லலிதா, புவனேஸ்வரி, மஹாலக்ஷ்மி, சரஸ்வதி, துர்க்கை, பாலா போன்றவை அவை.

லலிதா சஹஸ்ரநாமம்
    

    அம்பிகையின் வடிவங்களில் முக்கியமானது ராஜராஜேஸ்வரி எனப்படும் லலிதா. அந்த வடிவத்துக்குரியதுதான் லலிதா சஹஸ்ரநாமம்.   
    
    இந்து சமயத்தில் பதினெட்டுப் புராணங்கள் உள்ளன. இவை பெருங்கதைகள். இந்தப் புராணங்களில் ஒன்று பிரம்மாண்ட புராணம். அதன் பின்பகுதியில் இருக்கும் உத்தரகாண்டத்தில் லலிதா உபாக்கியானம் என்னும் அத்தியாயத்தில் லலிதா சஹஸ்ர நாமம் விளங்குகிறது. பண்டாசுரன் என்னும் அசுரனை வதைப்பதற்காக அம்பிகை தோன்றி லலிதாவாக வருகிறாள். அவளுடைய வெற்றி விழாவின் போது தன்னுடைய கணவர் காமேஸ்வரருடன் வீற்றிருக்கிறாள். அவளுடைய விருப்பத்தின்பேரில் அப்போது வசினி என்னும் தேவதையின் தலைமையில் பதினொரு வாக்தேவிகள் அவளுடைய புகழை மந்திரங்களின் வாயிலாகப் பாடுகின்றனர்.

    அவ்வாறு பாடப்பட்டதுதான் லலிதா சஹஸ்ரநாமம். இந்த ஆயிரம் மந்திரங்களும் அம்பிகை லலிதாவுக்கு மிகவும் பிரியமானவை. இவற்றை யார் கூறுகிறார்களோ அவர்கள் அம்பிகையின் முழுப் பேரருளுக்குப் பாத்திரமாவார்கள். இதனை சஹஸ்ரநாமத்தின்பல சுருதிஎன்னும் பகுதி கூறுகிறது.

        ஆகையினால்தான் தீவிரமான சாக்தராக விளங்கி அம்பிகையின் பேரருளுக்குப் பாத்திரமாக விளங்கவேண்டும் என்று யாரெல்லாம் விரும்புகிறார்களோ அவர்களெல்லாம் லலிதா சஹஸ்ரநாமத்தைக் கூறவேண்டியது அவசியமாகிறது. சக்தியின் ஆலயங்களிலெல்லாம் இது சொல்லப் படவேண்டும். 

    
    இதனை யார் வேண்டுமானாலும் சொல்லலாம். ஜாதியோ மரபோ சக்தி வழிபாட்டில் தடையாக விளங்குவதில்லை. போதிய பயிற்சி இருந்தால் இருபதே நிமிடங்களில் இதனைச் சொல்லி விடலாம். 

    

    ராஜராஜேஸ்வரியின் அம்சமாகிய லலிதாவின் பெயரில் இந்த சஹஸ்ரநாமம் விளங்கினாலும்கூட எந்த அம்பிகையின் கோயிலிலும் இதனைச் சொல்லலாம். எந்த வகையான அம்பிகைக்கும் அர்ச்சனையாக இதன் நாமாவளியைச் சொல்லலாம். எந்த அம்பிகைக்கும் இந்த சஹஸ்ரநாமம் ஏற்றதே. எந்த அம்பிகையாக இருந்தாலும் இதனால் மிகவும் பெருமகிழ்ச்சி அடைந்து அருள் புரிவாள்.
    
    ஸ்ரீசக்ரம் அல்லது அம்பிகையின் உருவப் படம், ஸ்ரீசக்ர மஹாமேரு ஆகியவற்றின் முன்னிலையில் சஹஸ்ரநாமத்தைச் செய்யலாம். 
    அல்லது சும்மா அமர்ந்து கொண்டு வெறும் பாராயணமாகவும் கூட செய்யலாம். சற்றுப் பயிற்சி வந்த பிறகு எந்த நேரத்திலும் மனதிற்குள் அந்த மந்திரங்களை ஓடவிடலாம். வேறு ஏதாவது செய்துகொண்டிருக்கும் போதுகூட அந்த மந்திரங்களில் சிலவற்றையாவது தோன்றுகிற இடத்திலிருந்து சொல்லிக்கொண்டிருக்கலாம்.
    
    செவ்வாய், வெள்ளி, நவமி, சதுர்த்தசி, பௌர்ணமி ஆகிய நாட்களில் செய்வது சிறப்பு. 


   ஸ்ரீ லலிதா சகஸ்ர நாமத்தை ஸ்தோத்திரமாகவும் பாராயணம் செய்யலாம். அல்லது நாமாவளியாகவும் அர்ச்சனை செய்யலாம்.
   கலியுகத்தில் நாமஜெபம், நாமஸ்மரணை, நாமலிபி மகத்தான பலனைத் தரவல்லது. இந்த லலிதாம்பிகையின் ஆயிரம் நாமங்களும் அபாரமான நல்ல வாழ்வினை தரவல்லன. இந்த மந்திரங்கள் அடங்கிய ஸ்லோக புத்தகம் கடைகளில் கிடைக்கின்றன. ஸம்ஸ்கிருத மொழியில் இல்லாமல் தமிழில் படிக்கவும் கிடைக்கிறது. வடமொழி எழுத்துக்கள் இருப்பதால் உச்சரிப்பு தவறாகிவிடுமோ தவறாக சொல்லிவிடுவோம் என்று அஞ்ச வேண்டாம். அன்னை நம்மை குழந்தையாக பாவித்து நம் உச்சரிப்பை ஏற்றுக்கொள்வாள். பழக பழக உச்சரிப்பு கை கூடும்.

   இந்த சகஸ்ர நாமத்தை   ஸ்ரீ கணபதியை தியானித்து ஸ்ரீ குருவை வேண்டி சங்கல்பம் செய்து கொண்டு, சங்கல்பம் என்பது நமது வேண்டுதல்களை நிறைவேற்றித்தருமாறு அம்மனை வேண்டுதல் ஆகும். பாராயணம் அல்லது அர்ச்சனை செய்ய வேண்டும். அர்ச்சனை செய்வதாக இருந்தால் அம்மன் படம் முன்பு ஒரு தாம்பாளத்தில் தொன்னை அல்லது சிறு கிண்ணம் வைத்து அதில் கட்டைவிரல் மோதிரவிரலால் குங்குமம் எடுத்து நம: என்று முடியும் போது அம்மனின் பாதங்களில் சமர்ப்பிக்க வேண்டும்.

   பாராயணம் அல்லது அர்ச்சனை செய்து முடித்தவுடன் தங்களது பாராயணத்தின் பலன்முழுவதையும் தந்தருளி ஏற்றுக்கொள் என்று அன்னைக்கே சமர்ப்பணம் செய்ய வேண்டும். நமது அர்ச்சனையிலோ பாராயணத்திலோ பிழைகள் இருந்தால் மன்னித்தருள வேண்டி  இதை சொல்லி முடிக்க வேண்டும்.
   பாராயணம் செய்யும் காலத்திலோ அர்ச்சனை செய்யும் காலத்திலோ என்னை அறியாமல் எழுத்தின் பிழையோ, பதங்களின் பிழையோ ஏற்பட்டிருந்தால் அவற்றை மன்னிக்க வேண்டுகிறேன் ஸ்ரீ லலிதாம்பிகையே! உச்சரிப்பில் நீண்டு உச்சரித்திருந்தாலும் குறைந்து உச்சரித்து இருந்தாலும் நிறுத்தி பாராயணம் செய்ய வேண்டியதை நிறுத்தாமல் இருந்தாலும் பதங்களை மாற்றி உச்சரித்து இருந்தாலும் ஏற்பட்ட பிழையை மன்னிக்க வேண்டுகிறேன் ஸ்ரீ பரமேஸ்வரியே
  எனக்கு என்னென்ன தெரியும் என்று நீ அறிவாய்! உன்னைத் தவிர எனக்கு வேறு யார் உளர். உன்னையே முழுமையாக சரணடைந்துவிட்டேன். எனவே என்னை மிகுந்த கருணையுடன் காப்பாற்றி அருள வேண்டும் அகில உலகத்திற்கும் ஸ்ரீ மாதாவாக விளங்கும் அம்பிகையே!
  இதை சொல்லி பாராயணத்தை அம்பிகைக்கு சமர்ப்பணம் செய்து முடிக்க வேண்டும்.


 இந்த பாராயணம் செய்பவர்கள் வெள்ளிக்கிழமைகளில் அம்மன் ஆலயத்திற்கு சென்று அம்மனை வழிபடுதல் சிறப்பு. மேலும் இந்த சஹஸ்ர நாமம் தோன்றிய இடமான திருவாரூர் மாவட்டம் பேரளம் அருகே உள்ள திருமீயச்சூர் லலிதாம்பிகை ஆலயத்திற்கு ஒரு முறையாவது சென்று தரிசனம் செய்து வந்தால் மிகச்சிறப்பு ஆகும்.
   அம்மனுக்கு இனிப்பு மிகவும் பிடிக்கும் என்பதால் சர்க்கரைப்பொங்கல், பாயாசம், சர்க்கரை கலந்த பால் போன்றவை நிவேதனம் செய்து வழிபடுதல் சிறப்பு ஆகும்.
   ஒவ்வொரு வெள்ளிக்கிழமை அன்றும் இந்த சகஸ்ரநாம பாராயணம் செய்து வருகையில் நம்முடைய முன்னேற்றம் நம் கண் கூடாகத் தெரியவரும்.


   எல்லாம் வல்ல அம்பிகைக்கு பிரியமான ஸ்ரீ லலிதா சஹஸ்ரநாம பாராயணம் செய்து சகல சௌபாக்கியங்களையும் அடைவோமாக. 

தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!
Related Posts Plugin for WordPress, Blogger...