Tuesday, November 27, 2012

பேய்கள் ஓய்வதில்லை! பகுதி 16


பேய்கள் ஓய்வதில்லை! பகுதி 16

உங்கள் ப்ரிய “பிசாசு”

முன்கதை:  ராகவனின் நண்பன் வினோத் கூட்டி வரும் பெண் செல்வியின் நடவடிக்கைகள் வித்தியாசமாக இருக்கையில் அவளை ப்ரவீணா என்னும் பெண்ணின் ஆவி பிடித்துள்ளதாக கூறுகின்றனர். அதை விரட்ட மூவரும் பாயிடம் செல்கின்றனர். அந்த மசூதியின் மவுல்வி செல்வி உள்ளே நுழையும் போதே வாம்மா பிரவீணா என்று அழைக்க மூவரும் அதிர்கின்றனர். இனி

முந்தைய பகுதிகளுக்கான லிங்க்:

     வாம்மா! பிரவீணா! வா! என்று அந்த மசூதியின் மவுல்வி அழைக்கவும் சலாம் பாய் என்று கையை முகத்தில் வைத்து செல்வி முகமன் கூறவும் மிகவும் அதிசயமாக இருந்தது மணிக்கும் ராகவனுக்கும். வினோத்திற்கு வியர்த்து வாங்கியது நடப்பது எதையும் நம்ப முடியவில்லை அவனால்.
      இப்படி உக்காரும்மா! என்று செல்வியை தனது எதிரில் அமரவைத்த அந்த மவுல்வி கண்களை மூடிக்கொண்டு எதையோ ஜபித்தார். பின்னர் தன் கையில் இருந்த மயில் இறகினால் மூன்று முறை தடவினார். ஒரு கிண்ணத்தில் இருந்த நீரை கை மூடி எதையோ ஜபித்த அவர் அதையும் மயில் இறகினால் செல்வியின் முகத்தில் தெளித்தார்.
     இது எதற்கும் மறுப்பு தெரிவிக்காமல் மவுனமாக இருந்தாள் செல்வி. பின்னர் வாம்மா ப்ரவீனா என்று செல்வியை உள்ளே அழைத்துச் சென்றார். மூவரும் உடன் செல்ல முயன்ற போது தடுத்த அவர் நீங்க இங்கேயே இருங்க என்று சொல்லிவிட்டு செல்வியுடன் அந்த தர்க்காவினுள் நுழைந்து விட்டார்.
      சுமார் ஒரு அரை மணி நேரம் கடந்திருக்கும். இப்போது மவுல்வி மட்டும் திரும்பி வந்தார். மூவரை நோக்கி சைகை செய்ய மூவரும் சென்றனர். அந்த மவுல்வி நீங்க யாரு? இந்த பொண்ணுக்கு என்ன சொந்தம்? என்று கேட்டார்.
   ராகவன் பதில் சொல்ல வாயெடுக்கும் முன் வினோத் சொன்னான். இந்த பெண்ணை கூட்டி வந்தது நான் தான். இவளை நான் கல்யாணம் பண்ணிக்க போறேன்.
     மவுல்வி பெருமூச்சு விட்டார். இந்த பெண்ணோட உடம்பில ஒரு துர்மரணம் அடைஞ்ச ஆவி புகுந்துகிட்டிருக்கு! இப்ப என் முன்னாடி அது சாந்தமா இருந்தாலும் இங்கிருந்து கிளம்பியதும் அதற்கு ஆக்ரோஷம் அதிகமாகும். அது தன்னை கொன்னவங்களை பழிவாங்கிற நோக்கத்துல இருக்கு. அது நிறைவேற வரைக்கும் அந்த பெண்ணை விட்டு போகாது.
    என்ன பாய் சொல்றீங்க? உங்க மாந்தீரிகத்துல அதை விரட்டிட முடியாதா? உங்களை ரொம்பவும் தெரிஞ்ச மாதிரி அது நடந்துகிச்சே!
     சில ஆவிகளை கட்டுப்படுத்துவது ரொம்ப சிரமம்! இது அதுமாதிரியான ஒரு ஆத்மா! இதனோட ஆசைகள் பூர்த்தியாகாமல் இறந்ததாலே ரொம்ப ஆவேசமா இருக்கு! அந்த பொண்ணு ப்ரவீணா அடிக்கடி இந்த மசூதிக்கு வந்து போகும். இந்துவா இருந்தாலும் இங்க நடக்கிற விசேசங்களுக்கு வரும். அதனாலதான் இந்த இடத்துல அது அமைதியா இருந்துடுச்சு!
    அப்ப இதை குணப்படுத்த முடியாதுங்களா?
அந்த பொண்ணோட ஆத்மா சாந்தியடையனும்! அதுக்கு அது பலியைத்தான் கேக்குது!
  ஆனா! அதனால இந்த செல்வியோட வாழ்க்கை பாதிக்குமே பாய்!
மன்னிக்கனும்! இதை உடனடியா என்னாலே தீர்க்க முடியாது! நீங்க வேணா இந்த பொண்ணை இங்கேயே விட்டுட்டு போங்க! அதுங்கிட்ட பேசி பார்க்கலாம்! இல்லே வீட்டுக்கு கூட்டிட்டு போறதா இருந்தா ஒரு தாயத்து மந்திரிச்சு தாரேன்! அது ஒரு வாரம் வரைக்கும் காப்பாத்தும் அப்புறம் திரும்பவும் பழைய நிலைக்கு வந்திருவா! இப்ப முடிவு உங்க கையில தான் இருக்கு!
     என்ன பாய் இப்படி சொல்லிட்டீங்க! பெரிய பெரிய கேஸையெல்லாம் நொடியில தீர்த்து வைச்சிருக்கீங்க! இப்ப இப்படி சொல்லிட்டீங்களே!
  அது வேற விசயம்! இந்த பொண்ணோட உடம்பில புகுந்திருக்கிறது ஒரு ஆசை பூர்த்தியாகாத ஆன்மா! இதை குணப்படுத்துறது ரொம்ப கஷ்டம்.
    சரி பாய்! பிரவீணா இந்த ஊரு பொண்ணு! செல்வியோ தெற்கத்தி பொண்ணு! இந்த ஆவி எப்படி அவ மேல புகுந்திடுச்சி?
  ப்ரவிணா இங்கிருந்து கல்யாணம் பண்ணி குடியேறின ஊரில பக்கத்து வீட்டுல செல்வி இருந்திருக்கா! செல்வி கொஞ்சம் பலவீனமான பொண்ணு! இந்த மாதிரி அமைப்புள்ள ஆண் பெண்களை ஆவிகள் தங்கள் ஆசைகளை பூர்த்தி செய்ய பயன்படுத்திக்கும் பக்கத்து வீட்டு பெண் அதுவும் ப்ரவீணாவின் தோழியான செல்வியை பிரவீணா பிடிச்சிகிட்டா!
    சரி பாய்! இதுக்கு வழிதான் என்ன?
அந்த அல்லா கிருபையால ஏதாவது நடந்தாத்தான் உண்டு! இப்ப ப்ரவீணா தன்னோட மரணத்துக்கு காரணமானவங்களை பழிவாங்க துடிச்சிகிட்டு இருக்கா! இன்னொரு அதிர்ச்சியான விசயத்தையும் சொல்றேன் கேட்டுக்கங்க! இவ புருசனும் இப்ப ஆவி ரூபத்துல வேற ஒரு பையனை பிடிச்சிகிட்டு இருக்கான்.
   என்ன சொல்றீங்க பாய்!
ஆமா! இது எல்லாத்தையும் ப்ரவீணாத்தான் அதான் செல்விதான் சொன்னா! அவளும் அவ புருசனும் சேர்ந்து அவங்களை கொன்னவங்களை பழிவாங்க போறதா சொன்னா! அது மட்டும் இல்லாம இப்ப அவங்களை கொன்னவங்கள்ல ஒருத்தனை அவ புருசன் பழிவாங்கிட்டான்னும் அடுத்த பலிக்கு அவன் காத்துகிட்டு இருக்கிறதாவும் சொன்னா!
   என்னது பலிவாங்கறாங்களா?
ஆமாம்! இந்த பலிகளை நாம தவிர்க்கணும்னா! அவ புருசன் ஆவியை நம்ம கட்டுக்கு கொண்டு வரணும்!

   அது எப்படி முடியும் பாய்? அவன் யாரை பிடிச்சிகிட்டு இருக்கானோ?
செல்வியை விசாரித்தால் அதாவது செல்வியை பிடிச்சிருக்கிற பிரவீனாவை விசாரித்தால் தெரியும். ஆனா அவ சொல்ல மாட்டான்னுதான் தோணுது. இவளும் பழிகொண்டு அலையறா?
   இவள் இங்க இருப்பதுதான் நல்லது! வெளியே போனால் பழிவாங்க ஆரம்பித்துவிடுவாள். அதனால் செல்விக்கும் ஆபத்து இருக்கும். நீங்க என்ன சொல்றீங்க?
   மூவரும் ஒருவரை ஒருவர் பார்த்துக் கொண்டனர். மணி தொண்டையை செறுமிக் கொண்டார். சாமி! இந்த பாய் சொல்றதுதான் கரெக்ட்! நாம இந்த பொண்ணை வீட்டுக்கு கூட்டிட்டு போய் சமாளிக்க முடியாது ஒரு வாரம் இங்கேயே தங்கட்டும்! வினோத்தும் இங்கேயே துணைக்கு இருக்கட்டும். இதுக்குள்ள பாய் ஒரு வழி கண்டுபிடிச்சு சுமார் பண்ணிடுவார் நாம பயப்படாம ஊருக்கு போவோம். வினோத்தம்பி என்ன நான் சொல்றது.
   வினோத் அரை மனதாய் தலையசைத்தான்! சரி ராகவா! நாங்க இங்கேயே ஒரு வாரம் தங்கறோம்! எங்களோட துணிமணிகளை அப்புறம் கொண்டுவந்து கொடுத்திரு! பாய் இங்க தங்க வசதி இருக்கா என்றான்.
   இருக்கு தம்பி! உங்களை மாதிரி சிலர் இங்கே வந்து தங்கி குணமாகி போறாங்க! அவங்க வசதிக்காக சில ரூம்களை அல்லா புண்ணியத்துல கட்டி வைச்சிருக்கேன். அதுல ஒண்ணுல நீங்க தங்கிக்கலாம்!
  ஓக்கே பாய்! நானும் செல்வியும் தங்கிக்கிறோம்! ராகவா நீ புறப்படு என்றான் வினோத்.
  இருவரும் விடைபெற்றனர். அவர்கள் வந்த கார் புழுதியைக் கிளப்பிக் கொண்டு  மறைந்ததும் வினோத் பாயை பார்த்தான்.
  என்ன வினோத்! வாங்க நாம் செல்வியை போய் பார்ப்போம் என்று அவர்கள் மசூதிக்குள் நுழைந்தனர்.
   அந்த மசூதியினுள் நடு ஹாலில் ஒரு கிழிந்த பாயாய் கிடந்தாள் செல்வி.
  செல்வி! செல்வி எழுந்திரு! என்று அருகில் சென்று தட்டி எழுப்பினான் வினோத். மெல்ல எழுந்து உட்கார்ந்த செல்வி வினோத்  இது என்ன இடம்? இங்க எதுக்கு வந்திருக்கிறோம்! நம்ம ஊருக்கு போகலாமா? என்றாள்.
  பாய் அவளிடம் செல்வி! உனக்கு ஒண்ணும் சிரமம் இல்லேயேம்மா! இது அல்லாவோட தர்க்கா! இங்க ஒரு திருவிழா நடக்க போவுது! அதுக்குத்தான் தம்பி உன்னை கூட்டி வந்திருக்காரு! நீங்க தங்கறதுக்கு ஒரு ரூம் ஏற்பாடு பண்ணிட்டேன்! வாங்க போகலாம்! என்று அழைத்து சென்று இரண்டு அறைகளை காண்பித்தார் ஒன்றில் செல்வியும் மற்றொன்றில் வினோத்தும் தங்குவதாக ஏற்பாடு.
  நீங்க ரெண்டு பேரும் சவுகர்யமாக இதில் தங்கிக்கலாம்! வேளா வெளைக்கு உணவும் வரும்! அந்த உணவு வேண்டாம்னா! நீங்க வெளியே போயும் சாப்பிட்டுக்கலாம்! ஒரே வாரம் அதுக்குள்ள இதுக்கு  ஒரு முடிவு கட்டலாம்!
  பாய்! எதுக்கு முடிவு?

இல்லேம்மா! ஏதோ வாய் தவறி வந்துடுச்சி! விழாவை முடிஞ்சிடும்னு சொல்ல வந்தேன்!
  என்கிட்ட ஏமாத்ததாதீங்க பாய்! என்னை விரட்ட உங்களாலேயும் முடியாது!என் நோக்கம் நிறைவேறாமல்  நான் இந்த செல்வியோட உடம்பை விட்டு போகமாட்டேன்! உங்க ஆசைப்படி நான் ஒரு வாரம் இங்கே தங்கறேன்! ஆனா இன்னிக்கு ராத்திரியே என்னை கொன்னவனோட பொணம் ஒண்ணு விழப்போவுது! ஹா!ஹா! ஹா! என்று வெறித்தனமாக சிரித்தாள் செல்வி!
                                            மிரட்டும்(16)

தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!
   

Monday, November 26, 2012

காதல் அவஸ்தை!


காதல் அவஸ்தை!

தேங்கி கிடந்த குளத்தில்
கல்லெறிந்தாற்  சிதறும் நீர்த்துளி போல
உன் பார்வை பட்டு
சிதறிக் கிடக்கிறது மனசு!

எல்லோரும் போடும் பவுடர்தான் நீ வரும்போது மட்டும்அதிகமாய் மணக்கிறது அது 
விழியாலே பேசியது
புரியாமல் நான் தவிக்கையில்
உன் புன்னகை  என்னை
மயக்கிவிடுகிறது!


நடந்து செல்லும் போது உன்
கொலுசு எழுப்பும் சத்தம்
சதா என்னை துரத்துகிறது!

விட்டு விட நினைத்தாலும்
விடாமல் துரத்தி வருகிறது
உன் நினைவுகள்!
உன் ஒவ்வொரு அசைவும் என்னை அசையவிடாமல் செய்கின்றது! 
விடை கொடுக்க நினைக்கையில்
தடை போடு என்று தவிக்கிறது
என் மனசு!
விரைவில் கை பிடிப்போம்
என்ற நம்பிக்கையில்
விடை கொடுத்து காத்திருக்கிறேன்!
நீர்த்து போகுமுன் நிற்கும்
நெருப்பாய் என் நெஞ்சை சுடாமல்
வாடிய பயிருக்கு ஊற்றும் நீராய்
விரைந்துவா!

டிஸ்கி} காதல் கவிதைகள் படிக்கிற வயதில் எழுதியது! இப்போது நண்பர் சீனி தூள் கிளப்பி வருகையில் எனக்கும் அந்த ஆசை தொத்திக் கொண்டது! நீண்ட நாளுக்குப் பின் ஒரு காதல் கவிதை! எப்படி இருக்கிறது பின்னுட்டத்தில் தெரிவியுங்கள்!

தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்!

Sunday, November 25, 2012

உங்களின் தமிழ் அறிவு எப்படி?


உங்களின் தமிழ் அறிவு எப்படி?

தமிழ் நாட்டில் பிறந்திருக்கிறோம்! தமிழை வாசிக்கிறோம், பேசுகிறோம். ஆனால் தமிழினைப் பற்றி நமக்கு எந்த அளவுக்கு விசயம் தெரியும். ? இங்கே கேட்கப்பட்டிருக்கும் கேள்விகள் எல்லாம் நாம் முதல் வகுப்பில் இருந்து படித்து வந்ததுதான்? இதற்கு விடை தெரிகிறதா என்று பாருங்கள்? குறைந்த பட்சம் பாதிக்காவது தெரிந்தால்  மீதியை அறிந்து கொள்ளுங்கள். மொத்த விடையும் தெரிந்தால் நீங்கள் தமிழன் என்று பெருமை பட்டுக் கொள்ளுங்கள்!
 மனோன்மணியம் சுந்தரம் பிள்ளை



 கனியன் பூங்குன்றனார்
1.   தமிழ்த்தாய் வாழ்த்து எழுதியவர் யார்?
2.   தாயுமானவர் பிறந்த ஊர் எது?
3.   யாதும் ஊரே யாவரும் கேளீர் யார் கூற்று?
4.   தமிழ் இலக்கணம் எத்தனை வகைப்படும்?
5.   தமிழ்த்தாய் வாழ்த்து எந்த நூலில் இடம்பெற்றுள்ளது?
6.   கம்பர் பிறந்த ஊர் எது?
7.   குறிஞ்சி பாட்டு எழுதியது யார்?
8.   தமிழ் நாடகத்தந்தை  என்று அழைக்கப்பட்டவர் யார்?
9.   சைவத் திருமறைகள் எத்தனை?
10. குறிஞ்சிமலர் எழுதியவர் யார்?
11. சீத்தலை சாத்தனார் எழுதிய காப்பியம் எது?
 கம்பர்
12. கல்வியில் பெரியவன் யார்?
13. நுணல் என்று அழைக்கப்படும் விலங்கினம் எது?
14. செந்நாப் போதார் என்று அழைக்கப்படுபவர் யார்?
15. நாடகக் காப்பியம் என்று அழைக்கப்படுவது எது?
16. மூன்று நாடுகளின் பெருமை கூறும் நூல் எது?
17. உத்தம சோழ பல்லவராயன் என்று அழைக்கப்பட்ட புலவர் யார்?
18. பாரதி என்பதன் பொருள் என்ன?
19. திருவிளையாடல் புராணத்தில் உள்ள படலங்கள் எத்தனை?
20. கவிமணி என்று அழைக்கப்பட்டவர் யார்?
விடைகள்:
  1.மனோன்மணியம் சுந்தரம் பிள்ளை
  2.திருமறைக்காடு
  3.கனியன் பூங்குன்றனார்
 கவிமணி தேசிகவிநாயகம் பிள்ளை
  4. ஐந்துவகைப்படும். எழுத்து, சொல், பொருள், யாப்பு, அணி
   5.மனோன்மணியம்


 6 சோழ நாட்டில் உள்ள திருவழுந்தூர்
7. கபிலர்
8 சங்கரதாஸ் சுவாமிகள்
9 பன்னிரண்டு
 சேக்கிழார்
10  நா. பார்த்த சாரதி
11  மணிமேகலை
12. கம்பர்
13 தவளை
14 திருவள்ளுவர்
15 சிலப்பதிகாரம்
16. சிலப்பதிகாரம்
 17 சேக்கிழார்
18 கலைமகள்
 19. 64
 20. தேசிகவிநாயகம் பிள்ளை.

 சங்கரதாஸ் சுவாமிகள்
தெரிந்தவர்கள் மீண்டும் ஒருமுறை ஞாபகப்படுத்திக் கொள்ளுங்கள்! தெரியாதவர்கள் அறிந்து கொள்ளுங்கள்! அவ்வப்போது இது மாதிரியான பதிவுகளை எழுதலாம் என்று உள்ளேன். உங்களது கருத்துக்களை பின்னூட்டம் வாயிலாக அறிவியுங்கள்! நன்றி!
 படங்கள் உதவி} கூகுள் இமேஜஸ்
தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!

Saturday, November 24, 2012

தகுதிக்கு மீறினால்! பாப்பா மலர்!


தகுதிக்கு மீறினால்!  பாப்பா மலர்!


ஓர் மலை சூழ் அடர்ந்த கானகத்தில் ஒரு காட்டு பூனை தன் வழியே நடந்து சென்று கொண்டிருந்தது. மிகவும் பருத்து புலி போன்ற வரிகளுடன் உரோமங்கள் அடர்ந்து காணப்பட்ட அது தான் புலியின் இனம் என்று எண்ணி மகிழ்ந்து கொண்டது. தனது மீசையை முன்னங்கால்களால் நீவி விட்டுக் கொண்டு சுற்றும் முற்றும் பெருமையுடன் பார்த்தது. அதைக்கண்டு சிறிய பறவையினங்கள் “கீச்கீச்” என்று கத்திக் கொண்டு ஓடியதும் அதன் கர்வம் அதிகமானது.
   ஆகா! நம்மைக் கண்டு இத்தனை பேர் பயப்படுகின்றனரே! நாமும் புலிதான்! என்று மேலும் ஆனந்தம் அடைந்து கொண்டது. அங்கேயே அமர்ந்து தனது உடலை நாவால் நக்கிக் கொண்டே சுற்றும் முற்றும் இரை ஏதும் சிக்காதா என்று பார்த்துக் கொண்டிருந்தது. அப்போது அங்கே நிலவிய நிசப்தத்தை கலைத்தவாறே மான் ஒன்று சரசரவென ஓடிவந்து கொண்டிருந்தது.
  மான் ஓடிவருவதை கண்ட  காட்டுப் பூனை, என்ன மானாரே! ஏன் இவ்வாறு தலை தெறிக்க ஓடிவருகிறீர்கள்!அப்படி என்ன தலை போகிற விசயம்? என்று கேட்டது.
  உயிர் போகிற விசயம் பூனையாரே! புலி ஒன்று இந்த பக்கமாக வருகிறது! ஓடி தப்பித்துக் கொள்ளும்! என்று போகிற வேகத்தில் சொல்லி மறைந்து விட்டது மான்.
   அட புலியும் என் இனம் தானே! இதற்கெல்லாம் பயப்படலாமா? நீ வேண்டுமானால் ஓடு நான் அசைய மாட்டேன். என்று இருந்த இடத்திலேயே சவுகர்யமாக படுத்துக் கொண்டது காட்டுப்பூனை.சற்று நேரத்தில் அங்கே புலி வேகமாக வந்து வழியில் படுத்துக்கிடக்கும் பூனையை கண்டது.
   என்ன தைரியம்! என் வழியை மறித்து படுத்துக் கிடக்கிறாயே! மரியாதையாக ஒதுங்கி வழிவிடு! என்று கர்ஜித்தது புலி!
   காட்டுப்பூனையோ! நிதானமாக எழுந்து சோம்பல் முறித்தபடி. புலியே நான் ஏன் உனக்கு வழிவிட வேண்டும்? நீயும் நானும் ஒரே இனம்! சொல்லப் போனால் என்னில் இருந்து உருவானவன் தான் நீ! எனவே நீதான் என் வழியில் குறுக்கிடக் கூடாது. மரியாதையாக நீ ஒதுங்கிச் செல்! என்றது
   ஏய்! அற்ப பூனையே! வீணாக எரிச்சலைக் கிளப்பாதே! நீ என் இனமா? இப்படி சொல்ல உனக்கு என்ன தைரியம் இருக்க வேண்டும். உனக்கும் எனக்கும் எத்தனை வித்தியாசங்கள்! மரியாதையாக வழியைவிடு என்று கர்ஜித்தது புலி.
  முடியாது! முடிந்தால் என்னை வென்றுவிட்டு பின்னர் செல் என்றது கர்வம் பிடித்த பூனை!
ஒஹோ! நீயாக வந்து உயிரை கொடுக்கிறாய்! விதி யாரை விட்டது! வேண்டாம் இப்போதும் உன்னை மன்னித்துவிடுகிறேன். என் தகுதிக்கு உன்னை போன்ற அற்ப பிராணிகளுடன் மோதுதல் குறைவானது என்று சொன்னது புலி.
  பார்த்தாயா! என்னை கண்டு நீயே பயப்படுகிறாய்! தைரியம் இருந்தால் மோது! என்று கர்வத்துடன் சவால் விட்டது பூனை!
  உம்! விதி வலியது! என்று கூறிவிட்டு தன் முன்னங்காலால் ஒரே அடி வீசியது புலி! அந்த பூனை வலி தாளாமல் அலறியபடியே தொலைவில் பறந்து விழுந்தது. ஐயோ அம்மா! என்று அலறியது.
 புலி, நிதானத்துடன் சொன்னது! பூனையே உன்னை கொன்றிருப்பேன்! ஆனால் அது என் தகுதிக்கு அழகல்ல! பிழைத்துப் போ! இனியாவது உன் தகுதிக்கு ஏற்றவருடன் மோது! என்று சொல்லிவிட்டு சென்றது.
   காட்டுப்பூனை அதன் பின் யாருடைய வம்புக்கும் போவதே இல்லை!

நீதி: தகுதியறிந்து மோத வேண்டும்.

தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!

Friday, November 23, 2012

சாலை நடுவே வீடு! ஐந்து நாள் வாரம்! அம்சமான ஹன்சிகா! கலக்கல் கதம்பம்!


 சீனாவின் ஜெஜியாங் மாகாணத்தில் உள்ள வென்லிங் என்ற நகரில் வசித்து வரும் வயதான சீனத் தம்பதி தாங்கள் வசித்து வந்த வீட்டை சாலைப் பணிக்குத் தர மறுத்து விட்டதால், வேறு வழியின்றி அவர்களது வீட்டை மட்டும் விட்டுவிட்டு, அந்த வீட்டைச் சுற்றிலும் பிரமாண்ட ரோட்டைப் போட்டுள்ளனர் அதிகாரிகள். இதனால் பிரமாண்ட சாலைக்கு மத்தியில் தனியாக அந்த வீடு மட்டும் வித்தியாசமாக காட்சி அளிக்கிறது.
லூ பகோன் மற்றும் அவரது மனைவி மட்டும் இந்த வீட்டில் வசித்து வருகின்றனர். இந்த வீடு உள்ள பகுதியில் பிரமாண்டமான சாலை அமைக்க அதிகாரிகள் முடிவு செய்தனர். இதையடுத்து நிலத்தை கையகப்படுத்தும் பணிகள் நடந்தன. ஆனால் லூ, அரசு கொடுக்கும் இழப்பீட்டுத் தொகை மிகக் குறைவாக இருப்பதாக கூறி வீட்டைத் தர மறுத்து விட்டார்.
சீன நாட்டுச் சட்டப்படி எந்த ஒரு தனி மனிதரையும் அவரது வீட்டிலிருந்து கட்டாயப்படுத்தி வெளியேற்ற முடியாது என்பதால் லூவின் வீட்டை அரசால் கையகப்படுத்த முடியவில்லை. இதையடுத்து அந்த வீட்டை மட்டும் விட்டு விட்டு கையகப்படுத்தப்பட்ட பிற பகுதிகளில் சாலை அமைக்க முடிவானது.
அதன்படி சாலையும் பிரமாண்டமாக போடப்பட்டது. இப்போது லூவின் வீட்டைச் சுற்றிலும் பிரமாண்டமான சாலை போகிறது. ஆனால் லூவின் வீடு மட்டும் துண்டாக காட்சி தருகிறது. அதாவது சுற்றிலும் நீர் சூழ்ந்த தீவு போல லூவின் வீடு வித்தியாசமாக இருக்கிறது.
பாதுகாப்புக் காரணங்களுக்காக லூவின் வீட்டின் சில பகுதிகள் இடிக்கப்பட்டு விட்டன. இருப்பினும் இந்த ஐந்து மாடிக் கட்டடத்தில் லூவும் அவரது மனைவியும் வசித்து வருகின்றனர்.
லூ மாதிரி சீனாவில் நிறையப் பேர் உள்ளனராம். அரசு கொடுக்கும் விலை போதவில்லை என்று கூறி தங்களது வீடுகளைக் காலி செய்ய மறுத்து அதே இடத்தில் தங்கியுள்ளனர். ஆனால் அவர்களைச் சுற்றிலும் பிரமாண்டமான வர்த்தக கட்டடங்கள் குவிந்து கிடக்க இவர்களோ குட்டியூண்டு வீட்டில் தங்கியுள்ளனர்.

இந்தாண்டின் டிசம்பர் 2012-ல் உள்ள, ஐந்து வாரங்களும், சனி, ஞாயிறு, திங்கள் கிழமைகள் தொடர்ந்து வருவது, அதிர்ஷ்டமானதாகக் கருதப்படுகிறது.நடப்பு, 2012ம் ஆண்டை நிறைவு செய்ய வருகை தரும், டிசம்பர் மாதத்தில், சனி, ஞாயிறு, திங்கள் ஆகிய கிழமைகள், மாதம் முழுவதும், ஐந்து வாரங்களும் தொடர்ந்து வருகிறது. 843 ஆண்டுகளுக்கு பிறகு இதுபோன்று வரும் மாதம் மிகவும் அதிர்ஷ்டமானது என, உலக மக்கள் கொண்டாட தயாராக இருக்கின்றனர்.


ஒஸ்தி படத்தில் வாடி வாடி வாடி க்யூட் பொண்டாட்டி என்று ரிச்சாவைப்பார்த்து பாடினார் சிம்பு. அவரிடத்தில் உங்களுடன் நடித்த நடிகைகளின் எந்த நடிகை ரொம்ப க்யூட் என்று கேட்டால், ஹன்சிகாதான் என்கிறார். எதை வைத்து சொல்கிறீர்கள்? என்று கேட்டபோது, ஒரு பெண்ணைப்பார்த்ததும் நமக்குள்ளே ஏதோ கலவரம் நடக்க வேண்டும். கண்கள் அவரையே தேடிக்கொண்டிருக்க வேண்டும். எத்தனை முறை பார்த்தாலும் திரும்பத்திரும்ப பார்க்க வேண்டும் என்று மனசு துடிக்க வேண்டும். அப்படி எல்லா அம்சமும் கொண்ட ஒரு நடிகைதான் ஹன்சிகா.
ஆரம்பத்தில் அவர் நடித்த படங்கள் வெற்றி பெறாததால் அவரை ரசிகர்கள் உன்னிப்பாக கவனிக்கவில்லை. ஆனால் இப்போது கவனத்துக்கு வந்து விட்டார். அதனால்தான் அவருக்கு ஏராளமான ரசிகர்கள் பெருகி விட்டார்கள். என்னைப்பொறுத்தவரை எனது படங்களின் நாயகிகள் விசயத்தில் அதிக கவனம் செலுத்துவேன். வேட்டை மன்னன், வாலு படங்களுக்கு ஹன்சிகாவை புக் பண்ணியதுகூட ஒரு விதத்தில் அவரது அழகை முன் வைத்துதான். அவரை ரசிக்கும் ரசிகர்கள் அவர் நடிக்கும் கதாபாத்திரத்தோடும் ஒன்றிப்போவார்கள். இது படத்துக்கும் ப்ளஸ்சாக இருக்கும் என்கிறார் சிம்பு.    நன்றி: தட்ஸ் தமிழ். தினமலர்

கார்த்திகை தீபம் ஏற்றுங்கள்! கந்தன் அருளை பெற்றிடுங்கள்!


கார்த்திகை தீபம் ஏற்றுங்கள்! கந்தன் அருளை பெற்றிடுங்கள்!


அழகு முருகனாம் ஆறுமுகப் பெருமானுக்குரிய முக்கிய விரதம் கார்த்திகை விரதம். இந்த விரதம் சகல சௌபாக்கியங்களையும் அளிக்கவல்லது. இவ்விரதம் நட்சத்திரத்தின் அடிப்படையில் அனுஷ்டிக்கப்படுகிறது.ஒவ்வொரு மாதமும் வரும் கார்த்திகை நட்சத்தன்று விரதம் இருந்து முருகனை வழிபடுவார்கள். அருகில் உள்ள முருகன் ஆலயங்களுக்கு சென்று முருகனை தரிசித்து வருவார்கள்.
   ஒவ்வொரு கார்த்திகையுமே விசேஷம் எனும் போது. கார்த்திகை மாத கார்த்திகைக்கு பெருமை அதிகம் அல்லவா? முருகனை வளர்த்த கார்த்திகை பெண்களை சிறப்பிக்கும் இந்த கார்த்திகை மாதத்தில் வரும் கார்த்திகை அன்று தீபம் ஏற்றி வழிபட கந்தன் அருள் கைகூடும் என்பது நம்பிக்கை!
 இந்த கார்த்திகை விரதத்தை ஏற்பவர்கள் மேலான பதவிகளை அடைவர் என்பது கண்கூடு. நாரத மகரிஷி இந்த விரதத்தை பன்னிரண்டு ஆண்டுகள் கடைபிடித்து. ரிஷிகளுக்கு எல்லாம் மேலாக உயர்ந்து மூன்று உலகமும் சுற்றிவரும் பாக்கியத்தை பெற்றார். இந்த விரத நாளில் முருகனுக்குரிய சஷ்டி கவசம் முதலியவைகளை பாராயணம் செய்து வழிபடவேண்டும்.
  சிவபெருமான் தன் ஐந்து முகங்களோடு ஆறாவது முகமான அதோ முகத்தையும் சேர்த்து ஆறு கண்களில் இருந்து நெருப்பு பொறியை தோற்றுவித்தார். அப்பொறிகளை வாயுவும் அக்னியும் கங்கையில் சேர்த்தனர். அங்கு ஆறு குழந்தைகள் உருவாயின. அந்த குழந்தைகளை வளர்த்தனர் கார்த்திகைப் பெண்கள்.பின்னர் பார்வதி அனைவரையும் கட்டி அணைக்க ஒரு குழந்தையானார் முருகர்.அப்பிள்ளைக்கு கந்தன் என்று பெயர் ஏற்பட்டது. கந்தன் என்றால் ஒன்று சேர்ந்தவன் என்று பொருள். சிவபெருமான் அந்த கார்த்திகை பெண்களை வானில் நட்சத்திரமாக நிலைத்து வாழ ஆசிவழங்கி உங்கள் பெயரால் கார்த்திகேயன் என்று முருகன் அழைக்கப்படுவான்.கார்த்திகை நாளில் முருகனுக்கு விரதம் இருந்து வழிபடுவோர் எல்லா சவுபாக்கியங்களையும் பெறுவார்கள் என்று வரம் அருளினார்.
       இத்தகைய பெருமை மிக்க திருநாள் கார்த்திகை தீபத் திருநாள். இந்த நாளில் நாமும் விரதம் இருந்து கந்தனை வழிபட்டு அவனருள் பெறுவோம்.
விளக்கேற்றும் முறை!
     வீட்டின் முன் கதவை திறந்து பின்புறக் கதவை மூடிய பிறகே விளக்கேற்றவேண்டும். அதிகாலை நாலரை மணிமுதல் ஆறுமணி வரை தீபம் ஏற்றுவதாலும் மாலை ஆறரை மணிக்குள் தீபம் ஏற்றுவதாலும் நிறைவான வளமும் பலனும் நிச்சயம்.
   விளக்கை கையால் அணைக்க கூடாது. ஊதி அணைக்க கூடாது. திரி எரிந்து போக விடக்கூடாது.
பூவாலோ தூண்டும் குச்சியாலோ அழுத்தி குளிர்விக்கலாம்.
ஒருமுகம் ஏற்றினால் நினைத்த செயல்கள் நடக்கும்.
இருமுகம் ஏற்றினால் குடும்பம் சிறக்கும்.
மூன்றுமுகம் ஏற்றினால் புத்திர தோஷம் விலகும்.
நான்கு முகம் ஏற்றினால் செல்வம் பெருகும்
ஐந்து முகம் ஏற்றினால் சகல நன்மையும் உண்டாகும்.
கிழக்கு திசையில் விளக்கேற்றினால் துன்பம் நீங்கும் குடும்பம் அபிவிருத்தியாகும்
மேற்குதிசையில் விளக்கேற்றினால் கடன்கள் தோஷங்கள் நீங்கும்
வடக்கு திசையில் விளக்கேற்றினால் திருமணத்தடை அகலும்
தெற்கு நோக்கி விளக்கேற்ற கூடாது.

நெய், நல்லெண்ணை, இலுப்பை எண்ணெய், விளக்கெண்ணெய், தேங்காய் எண்ணெய் போன்றவை விளக்கேற்ற உகந்தவை கடலை எண்ணெயில் விளக்கேற்ற கூடாது.
இப்போது கடைகளில் கிடைக்கும் விளக்கேற்றும் நெய் பூஜைக்கு உகந்தது அல்ல! சுத்தமான நெய்யில் ஏற்றினால்தான் பலன் கிடைக்கும்.

கார்த்திகை தீபம் ஏற்றுவோம்! கந்தன் அருளினை பெறுவோம்!
தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!

Thursday, November 22, 2012

ஓல்டு ஜோக்ஸ் பகுதி 2


ஓல்டு ஜோக்ஸ்
    பகுதி 2

நீங்க வாங்கின புது கடிகாரம் தண்டம்!
ஏன்.. என்ன ஆச்சு?
பகல் பத்து மணிக்கு கொஞ்சம் கண் அசந்து விழித்து பார்த்தால் மாலை மூன்று மணியை காட்டுகிறது.
                                   சுதர்ஸன்.

அந்த வீட்டிலிருந்த பூட்டை ஏன் உடைத்தாய்?
 வேறு வழியில்லீங்க! நான் கொண்டு போன சாவி எதுவுமே அதுக்கு சரியா இல்லீங்களே!
                                             எஸ்.என். ஆர்

உனக்கு முன் அனுபவம் ஏதாவது இருக்கா?
இருக்கே! இதுவரை 27 இண்டர்வியுவிலே 346 கேள்விகளுக்கு பதில் சொல்லியிருக்கேன்!
                                          தி. மோகன்

எங்க வீட்டுக்காரர் ஒருநாள் பீச்சுல காத்து வாங்க வந்தார். அங்கே என்னை பார்த்து காதலிச்சு கல்யாணம் பண்ணிகிட்டார்!
   கவனிச்சேன்! அடிக்கடி “காத்து வாங்கப்போனேன்! ஒரு கழுதை வாங்கி வந்தேன்”ன்னு பாடறாரே!
                                          கி.சீனிவாசன்.

அப்பா, எனக்கு கப் ஐஸ் வாங்கி தாப்பா!
அதெல்லாம் விலை அதிகம்! சம்பளம் வரட்டும் வாங்கித்தரேன்!
அப்ப இடைக்கால நிவாரணமா ஒரு குச்சி ஐஸாவது வாங்கித்தாப்பா!
                                           எல் ஸ்ரீனிவாசன்.

நடுக்கடல்ல ஒரு சின்ன தீவு.. அங்கே ஒரு ஆம்பளை, ரெண்டு லேடீஸ் மட்டும் இருக்காங்க.. இருந்தாலும் அவன் மனசுல ஒரு மகிழ்ச்சியே இல்லே! ஏன்?
அந்த ரெண்டு லேடீஸ்ல ஒருத்தி மனைவி, இன்னொருத்தி அம்மாவாயிருக்கும்!
                                            மதன்.

வீட்டுக்கு இவ்வளவு லேட்டா போறியே.. மனைவி ஒண்ணும் சொல்ல மாட்டாளா?
எனக்கு மனைவியே கிடையாது! இன்னும் கல்யாணமே ஆகலை!
பின் ஏன் வீட்டுக்கு லேட்டா போறே?
                                            மதன்.


நான் பிறந்த ஊர் “ரை” என் மனைவி ஊர் “ராந்தகம்”
கேள்விப்படாத ஊருங்களா இருக்கே?
டாக்டர் என்னை “மது” உபயோகப்படுத்த கூடாதுன்னு சொல்லியிருக்காரே!
                                         சுதர்ஸன்.


அப்பா அடிக்கடி அம்மாகிட்டே மன்னிப்பு கேட்பதாலேதான் “அப்பாலஜி”ங்கிற வார்த்தை வந்திருக்குமோ?  - ஒரு பையனின் சந்தேகம்.
                                    டாக்டர் சீதாராமன்.

எந்த வண்டிக்கும்மா சைலன்ஸர் வேணும்?
வண்டிக்கில்லே! இதோ இவருக்குத்தான் ராத்திரியிலே ரொம்ப குறட்டை விடறாரு!


போன வருஷ தீபாவளிக்கு உங்க கடையில வாங்கின ஸ்வீட் எல்லாம் நல்லா இருந்துச்சுங்க!
அது அப்படியேத்தான் இருக்குதுங்க! ஒரு ரெண்டு கிலோ கொடுக்கட்டுமா?
                                         காயல் முகமது.

வேளாவேளைக்கு சாப்பிடுங்க! வாரம் ஒரு தடவை எண்ணெய் தேய்ச்சு குளிங்க! வீட்டை பத்திரமா பாத்துக்குங்கன்னு சொல்லிட்டு உங்க மனைவி எங்க போறாங்க! ஊருக்கா?
  இல்லே! ஜவுளி கடைக்கு!
                                       அவ்வை கே.சஞ்சீவ பாரதி.

கண் முன்னால சின்ன சின்னதா பூச்சி பறந்தது.. கண் டாக்டரை பார்த்து கண்ணாடி போட்டுகிட்டேன்!
 இப்ப எப்படி இருக்குது!
பூச்சி பெருசு பெருசா இருக்குது!
                                  கார்த்திக்.
ஆஸ்பத்திரி வாசல்ல குடை ராட்டினம் நிறுத்தி வைச்சிருக்கீங்களே! எதுக்கு டாக்டர்?
திடீர்னு மயக்க மருந்து தீர்ந்துட்டா பேஷண்டை அதுல உட்கார வைச்சு சுத்திவிடத்தான்!
                                            ஜெயா பிரியன்.

என்ன மாடல் ஜாக்கெட் தைக்கனும்? ஜன்னல் வெச்சா? கதவு வெச்சா?
 என்னம்மோ “புல்லட் புருப்” ஜாக்கெட்னு சொல்றாங்களே அந்த மாடல்ல தைச்சுக்கொடுங்க!
                                          நிலா.

நன்றி: ஆனந்தவிகடன்

தங்கள்வருகைக்கு நன்றி! பதிவு குறித்த கருத்துக்களை கமெண்ட் செய்து உற்சாக படுத்துங்கள்! நன்றி!

Tuesday, November 20, 2012

பேய்கள் ஓய்வதில்லை! பகுதி 15


பேய்கள் ஓய்வதில்லை! பகுதி 15

உங்கள் ப்ரிய “பிசாசு”

முன்கதைசுருக்கம்: ராகவனின் நண்பன் வினோத் அழைத்து வரும் பெண்ணிற்கு பேய் பிடித்துவிட்டதாக சொல்லி பாயிடம் மந்திரிக்க அழைத்துச் செல்கின்றனர். முகேஷின் நண்பன் ரவி திருப்பதி செல்லும் வழியில் காணாமல் போகிறான். முகேஷை அவனது சித்தப்பா அழைத்து வரச்சொல்லி ஒரு ஆட்டோ டிரைவரை அனுப்புகிறார். அவருடன் சென்ற முகேஷ் அங்கு சித்தப்பா பேய் ஓட்டுவதை கண்ணாற பார்க்கிறான். இனி

முந்தைய பகுதிகளுக்கான லிங்க்:

 அந்த முழு பூசணிக்காய் முழுவதுமாக வெடித்து சிதற அதன் பாகங்கள் இரத்த சிவப்பில் ஆங்காங்கே சிதறிக்கிடக்க அந்த பேய் பிடித்த பெண்மணி அப்படியே மயங்கி சரிந்தார்.
  முகேஷ் வைத்த கண் வாங்காது பார்த்துக் கொண்டிருக்க அவனது சித்தப்பாம் அந்த பெண்ணின் உச்சி முடியை ஒரு ஆணியில் கட்டி அதை வெட்டினார். பின்னர் சிறிது விபூதியை கையில் எடுத்து ஏதோ மந்திரம் உச்சரித்து அப்பெண்ணின் நெற்றியில் பூசினார். இரண்டு எலுமிச்சை பழங்களையும் திருஷ்டி போல சுற்றி வீசிவிட்டு கையில் கொஞ்சம் விபூதியை கொடுத்து கிளம்ப சொன்னார்.
  அந்த பெண்ணை கூட்டி வந்தவர்கள் சுவாமிஜி! இனி பயமில்லையே! என்று கேட்க.
அதெல்லாம் ஒன்றும் பயப்பட தேவையே இல்லை! இவளை பிடிச்ச பேயை விரட்டி ஆச்சு?இன்னும் கொஞ்சம் நேரத்துல தெளிஞ்சி நார்மலுக்கு வந்துடுவா! தைரியமா கூட்டிட்டு போங்க! அதோ அங்க பிரசாதம் தருவாங்க! வாங்கி சாப்பிட்டு விட்டு போங்க! என்றார்.
  பின்னர் முகேஷை நோக்கி, வாப்பா! முகேஷ்! இப்பத்தான் இந்த சித்தப்பா நினைப்பு உனக்கு வந்துருக்காப் போல என்றார்.
   இல்ல சித்தப்பா! வேலைக்கு போயிடறாதாலே அடிக்கடி வெளியே கிளம்ப முடியலை! சின்னவயசுல இந்த பக்கம் வந்தது. இப்ப எவ்வளவோ மாறி போயிருக்கு! ஒரே ஆச்சர்யமா இருக்கு!
  இந்த மலையே பெரிய அதிசயம் தான்! உலகத்துல மாற்றம் ஒன்று தான் மாறாதது! நாம மாறி வரும் ஜெனரேசனுக்கு தகுந்தா மாதிரி அப்டேட் ஆகிக்கணும் இன்னும் ஆதிவாசியாகவே நாம இல்லை இல்லையா? காலத்துக்கு தகுந்தா மாதிரி நம்ம நடவடிக்கைகளும் மாறனும். அப்பத்தான் காலம் தள்ள முடியும். என்ன வந்தவுடன் உன்னை தத்துவம் பேசி போரடிச்சிட்டேனா? வா உள்ளே போயி கை கால் கழுவிட்டு வா! சாப்பிட்டு விட்டு பிறகு பேசலாம். என்ன சந்திரா! உனக்கும் தான்! என்றவர் உள்ளேநுழைந்தார்.
    கொண்டபள்ளி கிராமத்தின் குஹாத்ரி மலைக்குன்று மனதிற்கு ரம்யமாக இருந்தது. அந்த மலைக்குன்றின் உச்சியில்  ஒரு குகை அதன் எதிர்ப்புறம் இரு சிறு குடிசைகள் வேயப்பட்டு இருந்தது. அதில் ஒன்றில் சமையல் நடந்துகொண்டிருந்தது. குஹாத்ரி வருவோருக்கு அங்கு உணவு வழங்கப்பட்டு கொண்டிருந்தது. மற்றொண்றில் தான் அவனது சித்தப்பா தங்கியிருந்தார்.
   மாலை நேரக்காற்று சுகமாக தென்றலாக வீச மலையில் முளைத்துள்ள மூலிகைச்செடிகளின் வாசம் மூக்கை துளைத்தது. சித்தப்பாவின் பின் நுழைந்து அங்கு தொட்டியில் வைக்கப்பட்டிருந்த நீரில் கை கால் முகம் கழுவிக் கொண்டு வெளியே வந்தான் முகேஷ்.
  முகேஷ் இங்க எல்லோரும் சமம்! இங்க வர்றவங்க என்னோட இருக்கறவங்க எல்லோரும் சேர்ந்து ஒண்ணாத்தான் சாப்பிடுவோம். நீயும் இன்னிக்கு எங்களோட கலந்துக்க போறே வா! என்று அழைத்து சென்றார் சித்தப்பா.
  பக்கத்து குடிசையில் தரையில் பாய் விரித்து வித்தியாசமாக தைத்த இலையில் உணவு பறிமாறப்பட்டது. மண் குவளைகளில் நீர் வைக்கப்பட்டது. உணவு மிகவும் ருசியாக இருந்தது. நீரும் மிகவும் சுவையாக இருந்தது.
  சித்தப்பா! இந்த மெட்ரோ வாட்டர் தண்ணி குடிச்சி குடிச்சி நாக்கு செத்து போய் இருந்தது. எப்ப பாரு ஒரே மருந்து வாசனை! இந்த தண்ணி சுத்தமா சுவையா இருக்கே! என்றான்.
   முகேஷ்! இயற்கை நமக்கு எந்த குறையும் வைப்பது இல்லை! அதைத்தான் நாம பாழடைச்சு நம்மை நாமே கெடுத்துக்கிறோம். இயற்கையிலேயே நல்ல சுத்தமான தண்ணி கிடைக்குது. மனிதர்களான நாமதான் இந்த பூமியிலே கண்ட கழிவுகளையும் போட்டு வதைச்சு நீரை எல்லாம் உறிஞ்சி புது நீர் உள்ளே போக முடியாதபடி காங்கீரிட் போட்டு இயற்கை வளங்களை சிதைக்கிறோம் அதனால மாசடைஞ்ச நீர் குடிக்கிறோம்.
  இங்கே எல்லாமே இயற்கைதான்! இந்த மலையிலே ஒரு சுனை இருக்கு! எவ்வளவு கடுமையான வெயிலிலும் அங்கு நீர் சுரக்கும் அந்த நீர் தான் இது.
  ரொம்ப இண்ட்ரஸ்டிங்கா இருக்கே நான் பார்க்க முடியுமா?
அந்த இடத்துக்கு இருட்டுலெ போக முடியாது நாளைக்கு கூட்டிட்டு போறேன்.
 சரி சித்தப்பா! இந்த இலை கூட வித்தியாசமா இருக்கே! எங்க பக்கத்துல மந்தார இலையை தையல் இலையா தைப்பாங்க! ஆனா இந்த இலை அது மாதிரி இல்லையே!
  இது பலாச இலை! தமிழ்ல முறுக்கன் இலைன்னு சொல்லுவாங்க! இந்த மரம் இங்க நிறைய செழித்து வளருது. இலைகள் இந்த மாதிரி சாப்பிட உதவுவது. ஆடு மாடுகளும் இந்த இலையை விரும்பி சாப்பிடும். சரி சாப்பிடு நல்லா ரெஸ்ட் எடு! நாளைக்கு நீ வந்த வேலையை கவனிப்போம்.
   நான் வந்த வேலை எதுன்னு உங்களுக்கு தெரியுமா சித்தப்பா?
அதுகூட தெரியலைன்னா அப்புறம் நான் எதுக்கு மந்திரவாதி?
 எப்படி எப்படி தெரிஞ்சிகிட்டீங்க? நான் உங்க கிட்ட எதுவும் சொல்லவே இல்லையே?
 நீ சொல்லித்தான் நான் தெரிஞ்சிக்கணும்கிறது இல்லே!
அப்புறம் எப்படி தெரியும் அப்பா எதாவது போன் பண்ணாறா?
உங்கப்பாதான் என்கிட்ட பேசவே மாட்டாரே?
அப்புறம் எப்படி தெரிஞ்சது?
நீ எப்படி இங்க வந்தே? நான் அனுப்பிச்ச  சந்திரன் கூடத்தானே?
ஆமாம்!
அவனை எப்படி உன்கிட்ட அனுப்பிச்சேன்! அதே மாதிரிதான் இதுவும்.
எப்படி சித்தப்பா?
இதெல்லாம் மாந்தீரிகத்துல சகஜம்! நாம சில தேவதைகளை வசியம் பண்ணிகிட்டா எல்லாவற்றையும் தெரிஞ்சிக்கலாம்!
எல்லாமே ஆச்சர்யமா இருக்கு! எனக்கும் சொல்லித்தருவீங்களா?
இது எல்லாரும் கத்துக்கற கலை இல்லே கண்ணா! இதுக்குன்னு சில அமைப்புக்கள் உன் ஜாதகத்துல அமையனும் அப்படி அமைஞ்சா நீ வேண்டாமுன்னு சொன்னா கூட அது உன்னை தேடி வரும்.
அப்படி ஒரு அமைப்பு என் ஜாதகத்துல இருக்குதா?
அது உன்னோட ஜாதகத்தை பார்த்தாதான் தெரியும்!
சரி சித்தப்பா! இப்ப சாப்பிட்டு முடிச்சாச்சு! நைட் படுக்கை எங்கே! அந்த குடில்லதானே!
  குடில் உள்ளேயும் படுத்துக்கலாம்! இல்லே காத்தோட்டமா இந்த மலை மேலயும் படுத்துக்கலாம்!
 இங்க மலை மேல வெட்ட வெளியிலா?
ஆமாம்! இங்க எந்த பயமும் இல்லே! நீ வேணா உள்ளே தூங்கு!  நான் காத்தோட்டமா வெளியேத்தான் தூங்குவேன்.
   சரி சித்தப்பா நான் உள்ளேயே தூங்கறேன்.
இருவரும் உணவு உண்டு முடித்துவிட்டு கை கழுவிக்கொண்டு வந்து குடில் முன் அமர்ந்தனர். சித்தப்பா வெற்றிலை மடித்து போட்டுக்கொண்டிருந்தார். சில நிமிடங்களில் அங்கே பதட்டமாக இருவர் வந்தனர். சாமிஜி! சாமிஜி! நீங்கதான் காப்பாத்தனும் கீழே புள்ளை தவியா தவிக்குது நீங்க உடனே வரனும் என்றனர்.
  என்ன விசயம்?
என்னமோ தெரியலை சாமி! குழந்தைக்கு திடீர் திடீர்னு அலறுது! ஒரே அழுகை நீங்க வந்து கொஞ்சம் மந்திரிக்கணும்.
  கண்டிப்பா வரேன்! முகேஷ்! நீ கதவை சாத்திக்கிட்டு தூங்கு! நான் கீழே போயிட்டு வந்துடறேன். சந்திரன் உனக்கு துணையா இருப்பான் சந்திரன் எங்கே? சந்திரா!
   இல்ல சித்தப்பா! அவர் சாப்பிட்டதுமே கிளம்பிட்டார்! காலையிலே ஏதோ சவாரி இருக்குன்னு சொல்லிகிட்டு இருந்தார்.நான் தான் அனுப்பி வைச்சிட்டேன்.
  சரி! உனக்கு துணையா இருப்பான்னு பார்த்தேன்! உனக்கு ஒரு பயமும் இல்லே! இது என் கட்டுப்பாட்டில் இருக்கிற இடம் நீ தைரியமா தூங்கு! நான் வந்திடறேன் சொன்னவர் கிளம்பிவிட்டார்

அதுக்கென்ன சித்தப்பா! நான் இருக்கறேன் நீங்க போயிட்டு வாங்க! என்று தைரியமாக சொல்லிவிட்டாலும் அந்த இடத்தின் அமைதி அவனுக்கு என்னவோ போலிருந்தது. நகரம் என்றில்லாவிட்டாலும் புறநகர் போலிருந்த பஞ்செட்டிக்கும் அந்த குஹாத்ரி மலைக்கும் ஏக வித்தியாசங்கள். அவன் இருந்த இடம் தவிர சுற்றிலும் ஒரே இருட்டு! ஏதோ பறவைகள் கத்தும் ஒலி! தூரத்தில் தெரியும் மின்விளக்குகள்! வானில் ஒளிரும் நட்சத்திரங்கள் இதை தவிர வேறோன்றும் இல்லை!
  சித்தப்பா சென்ற சில மணி நேரங்கள் உறக்கம் பிடிக்காமல் புரண்டு படுத்துக் கொண்டிருந்தவன் அப்படியே தூங்கிப்போனான். சரியாக நள்ளிரவு பன்னிரண்டு மணி இருக்கும் அவனது காலை பிடித்து யாரோ இழுத்தார்கள்!
  யா.. யாரு! ஏன் இழுக்கறே! என் காலை விடு! கத்தி காலை உதற முயற்சித்தான்.முடியவில்லை!
கண்களை திறக்க முடியவில்லை! காலை உதறமுடியவில்லை! வாயில் பேச்சு எழவில்லை! ஐயோ சித்தப்பா காப்பாத்துங்க! கத்தினான்! காற்றுதான் வந்தது!
                                     மிரட்டும்(15)

தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!
Related Posts Plugin for WordPress, Blogger...