Friday, August 31, 2012

ருத்திராட்சம்! சில தகவல்கள்!


ருத்திராட்சம்! சில தகவல்கள்!










சிவனடியார்களும் பிராமணர்களும் ருத்திராட்சம் அணிந்திருப்பர். அந்த ருத்திராட்சம் பற்றிய சில தகவல்களை எளிமையாக தந்துள்ளேன். பிழைகள் இருப்பின் பொறுத்து சுட்டிக்காட்டவும்.

ருத்திராட்சம் தோன்றிய கதை: முன்னொரு காலத்தில் திரிபுரர் என்ற அசுரர்கள் எவராலும் வெல்ல முடியாதவர்களாக இருந்தனர். பிரம்மா விஷ்ணு, இந்திரன் போன்றவர்களுக்கும் தேவர்களுக்கும் தொல்லை தந்த திரிபுரர்களை அழிக்க முயன்று முடியாது போனதால் சிவனிடம் வந்து முறையிட்டனர். அப்போது சிவன் ஆயிரம் வருடங்கள் நிஷ்டையிலிருந்து அகோர ரூபமாய் அக்கினி சுடராய் இருந்தார். அவர் நிஷ்டையிலிருந்து விழித்ததும் அவரது கண்களில் இருந்து நீர் துளிகள் விழுந்தன. அதில் இருந்து ருத்திராட்ச விருட்சங்கள் தோன்றின. அந்த விருட்சங்களில் இருந்து சிவபெருமான் திருவுளப்படி முப்பத்தெட்டு விதமான ருத்திராட்சங்கள் உண்டாகின.
வலக்கண்ணாண சூரிய விழியில் இருந்து பன்னிரண்டு விதமான ருத்திராட்சங்களும் இடக்கண்ணான சந்திரவிழியிலிருந்து பதினாறு விதமான ருத்திராட்சங்களும் நெற்றிக்கண்ணான அக்னியிலிருந்து பத்துவிதமான ருத்திராட்சங்களும் தோன்றியது.


ருத்திராட்ச முகங்கள்: ஒருமுகமுள்ளது சிவஸ்வரூபம். இது ப்ரம்மஹத்தியை நீக்கும்
இருமுகமுள்ளது தேவி ஸ்வரூபம். அது புத்தி பூர்வம் அபுத்தி பூர்வம் என்ற இருவிதமான பாவங்களை போக்கும்.
மூன்று முகமுடையது அக்னிஸ்வரூபம், அது பெண்வதை செய்த பாபத்தை போக்கும்
நான்கு முகமுடையது ப்ரம்மஸ்வரூபம், அது மனிதவதை செய்த பாபத்தை போக்கும்.
ஐந்து முகமுடையது காலாக்னி என்ற ருத்ர ஸ்வரூபம். அது உண்ணக்கூடாததை உண்ட பாவத்தை போக்கும்.ஆறு முகமுடையது சுப்ரமண்ய ஸ்வரூபம் பிராமண வதை செய்த பாவம் போக்கும்.
   ஏழுமுகமுடைய ருத்திராட்சம் மன்மதஸ்வரூபம் அது திருடிய பாவத்தை போக்கும்.

எட்டுமுகமுடைய ருத்திராட்சம் விநாயகஸ்வரூபம் இது பலவிதபாவங்களை நீக்கி பரம பதத்தை தரக்கூடியது.ஒன்பது முகமுடையது பைரவஸ்வரூபம் அது பல பிரம்ம ஹத்திகளையும் போக்கக்கூடியது.பத்துமுகமுடையது விஷ்ணு ஸ்வரூபம் அது கிரக தோஷங்களையும் பூத பிசாச பிரம்மராட்சஸ தோஷங்களை நீக்கும் பதினோரு முகமுடையது ஏகாதச ருத்திர ஸ்வரூபம் அது ஆயிரம் அஸ்வ மேத யாகம் செய்த பலன் தரக்கூடியது இதைசிகையில் அணிய உகந்தது.
     பன்னிரண்டு முகமுடையதுதுவாதசாதித்த ஸ்வருபம். அது கோமேத அஸ்வமேத யாக பலன் தரும். பயத்தை போக்கும்.பதிமூன்று முகமுடையது ஷண்முகனுக்கு ஈடானது. அது தாய் தந்தை உடன் பிறந்தாருக்கு செய்த பாவங்களை போக்க கூடியது.சகல இஷ்ட சித்தி தரும். பதினான்கு முகமுடைய ருத்திராட்சத்தை யார் அணிந்திருக்கிறானோ அவன் சிவபெருமானுக்கு இணையானவன் ஆவான். தேவர்களும் வணங்குவர்.

சிரசில் அணியும் ருத்திராட்ச மாலையின் மணிகள் இருபத்தாறு.மார்பில் அணிய 50 மணிகள்,தோள்களில் அணிய பதினாறு.மணிக்கட்டுகளுக்கு பன்னிரண்டு.
  நூற்றிஎட்டு,ஐம்பத்துநான்கு,இருபத்து ஏழு, என்ற எண்ணிக்கையோடு மணிகள் கோர்த்து அணிந்து கொள்ளலாம். இந்த ருத்திராட்சங்களை தரித்து மந்திரம் ஜபித்து வந்தால் அவனுக்கு அஸ்வ மேத யாக பலன் கிடைக்கும்.
   ருத்திராட்சத்தை கயிற்றொடு அல்லது தங்கம் மணி முதலானவற்றொடு சேர்த்து கோர்த்து அணியலாம்.தூய்மையின்றி அணியக் கூடாது.ருத்திராட்ச மரத்தின் காற்று பட்ட தூசி கூட புண்ணிய லோகத்தை அடைகிறது.

 சிவலோகம் அடைந்த கழுதை:  விந்திய மலைச்சாரலில் கழுதை ஒன்று திரிந்து கொண்டு இருந்தது. அதன் முதுகின் மீது வியாபாரி ஒருவன் ருத்திராட்ச மூட்டைகளை ஏற்றி ஓட்டிக் கொண்டு போனான். மூட்டையின் பாரம் தாங்காமல் அது வருந்தி தரையில் விழுந்து மூச்சிழந்து உயிரை விட்டது. அப்போதே அது சிவஸ்வரூபம் பெற்று சிவலோகத்தை அடைந்தது. ருத்திராட்ச மூட்டை சுமந்ததற்கே அதற்கு சிவலோகம் கிடைத்தது. எனவே பக்தி சிரத்தையுடன் ருத்திராட்சம் அணிவதால் சிவனருள் கிடைக்கப் பெறுவோம்.ருத்திராட்சத்தை அணியும் மனிதன் அதில் எத்தனை முகம் உள்ளதோ அத்தனை முகத்திற்கு ஒவ்வொரு யுகத்திலும் சிவலோகத்தில் வைத்து பூஜிக்கப்படுவான்.
 
ருத்திராட்சத்தை சிரசில் அணிந்து நீராடுபவனுக்கு கங்கையில் குளித்த பலன் கிடைக்கும் வறுமையில் வாடுபவன் பக்தி சிரத்தையோடு ருத்திராட்சத்தை பூஜித்து அணிந்து வந்தால் விரைவில் ராஜபோகம் அடைவான்.

ருத்திராட்சத்தை எப்போது அணிய கூடாது?
   தூங்கும் போதும் ஏதேனும் அருந்தும் போதும் மற்றெந்த தொழிலை செய்யும்போதும் மலஜலம் கழிக்கும் போதும்  ருத்திராட்சம் தரிக்க கூடாது.

அணியும் முறை:
   சிரசில் ஈசான மந்திரத்தை ஓதியும் காதுகளில் தத்புருஷ மந்திரத்தினை ஓதியும் நெற்றி இதயம் ஆகியவற்றில் அகோர பீஜ மந்திரத்தை ஓதியும் வயிற்றில் வாம தேவ மந்திரத்தை ஓதியும் மற்ற அங்கங்களில் அங்க மந்திரங்கள் ஓதியும் ருத்திராட்சத்தினை அணிய வேண்டும். குருவிடம் உபதேசம் பெற்று ருத்திராட்சம் அணிவது சிறப்பு.
இந்த மந்திரங்கள் அறியாதவர்கள் நமசிவாய என்ற ஐந்தெழுத்து மந்திரம் ஓதி அணிவது சிறப்பு.

சிறப்பு வாய்ந்த ருத்திராட்ச மாலைகள் அணிந்து இறைவனை பூஜித்து நற்கதி பெறுவோமாக!

தங்கள் வருகைக்கு நன்றி! பதிவு குறித்த கருத்துக்களை  கமெண்ட் செய்து ஊக்கப்படுத்துங்கள் நன்றி!



Thursday, August 30, 2012

குஷ்பாபிஷேகம்! ஓல்ட் ஜோக்ஸ்

ஓல்ட் ஜோக்ஸ்

டாக்டர் அந்த பேஷண்ட் தையலை பிரிக்கக்கூடாதுன்னு அடம்பிடிக்கிறாரு!
ஏன் என்ன சொல்றாரு?
ரெண்டாயிரம் செலவு பண்ணி போட்ட தையலை ஏன் பிரிக்கணும்னு கேக்கறாரு!
                  அ.தெய்வசிகாமணி.

ஏன் உங்க டிவியில ஒரே சண்டைக்காட்சியா வருது?
டிஷ் ஆண்டெனாவுக்கு பதிலா தப்பா ‘டிஷ்யூம்’ ஆண்டெனானு எதையோ போட்டுட்டு போயிட்டானுங்க!
                            பாஸ்கி.

இன்ஸ்பெக்டர்! நேத்து எங்க வீட்டுல ஒரு நகையை காணோம்னு ரிப்போர்ட் கொடுத்தேன்.. ரொம்ப சாரி! அந்த நகை கிடைச்சிடுச்சி!
  இப்ப நாங்க என்னம்மா பண்றது? நாங்க திருடனை பிடிச்சிட்டோமே!
                             கார்த்திக்.

ஒரு லாரி நிறைய பழைய பாய்  தலையணைகளா ஏத்திகிட்டு போறாங்களே?!
 ஏதாவது ஆபிஸ்ல ரெய்டு பண்ணியிருப்பாங்க!
                       கே.ஏ.கே விவேக்குமார்.

என்னதான் உங்களுக்கு ஞாபக மறதின்னாலும் வெள்ளப்பகுதியை பார்க்கப் போன இடத்தில், ‘மேலும் தண்ணீர் விட ஆவண செய்வேன்’னு பேசியிருக்க கூடாது!
                   எஸ். மஞ்சு பிரியன்.

ஹலோ டாக்டர்! நான் தான் ராமசாமி.. போன வருஷம் உங்க கிட்ட ஆபரேஷன் செய்துகிட்டேனே...!
   ஸாரி! ராங் நம்பர்!
                வேதபுரி.எஸ்.ரமேஷ்.

உங்களுக்கு கால்ல அடிபட்டதுதான் சரியாப் போச்சே! இன்னும் ஏன் நொண்டி நொண்டி நடக்கறீங்க?
நாளைக்குத் தானே எங்க கட்சி தலைவர் என்னை நலம் விசாரிக்க வரப்போறார்!
                    பா.சித்ரா.

டைரக்டர் சார்! இந்த படத்திலாவது சொந்தக்குரல்ல பேச சான்ஸ் தாங்க!
  சரிம்மா! நீங்க ஹீரோவுக்கு டப்பிங் வாய்ஸ் பேசிடுங்க!
                             தஞ்சை மாதவன்.

நான் குடிச்சிட்டு போறது என் பொண்டாட்டிக்கு பிடிக்கலை!
குடிக்காம போகவேண்டியதுதானே!
குடிக்காம போனா எனக்கு பொண்டாட்டியை பிடிக்கமாட்டேங்குதே!
                     எஸ் அருண்.

ஏன் டாக்டர் எனக்கு ஆபரேஷன் பண்ணிட்டு அழறீங்க?
அழலே ஆனந்த கண்ணீர்! சாதாரண எட்டாங்கிளாஸ் படிச்ச நான் ஆபரேசன் பண்ற அளவுக்கு வாழ்க்கையிலே உயருவோம்னு நினைக்கலை!
                         ஆர்.ஜே அனுசூயா.

போலீஸ் திருடனிடம்,
   கபாலி உன் தொழிலுக்கும் வீரம் தேவை என் தொழிலுக்கும் வீரம் தேவை.. என்ன நான் சொல்றது?
உண்மைதான் எஜமான்.. ஆனா என் தொழிலுக்கு கொஞ்சம் புத்திசாலித் தனமும் தேவையாச்சுங்களே!
                             அ.தெய்வசிகாமணி.

நீ ஏன் உன் மனைவியை கொலை செய்தாய்?
என்கிட்ட அவள் ‘நான் உங்க முன்னாடி போயிடனும் உங்களுக்கு முன்னாடி போயிடனும்னு’ அடிக்கடி சொல்லிகிட்டே இருந்தாள்... அவ ஆசையை நிறைவேத்தி வைச்சேன்! இது தப்பா?
                              அ.தெய்வசிகாமணி.


சிக்கண நடவடிக்கை தேவைதாங்க! அதுக்காக சுற்றறிக்கையை இப்படி உள்ளங்கையில எழுதிட்டு வந்து காட்டறது கொஞ்சம் கூட நல்லா இல்லே!
         ஸ்ரீகலைமகள்.

வேலைக்காரியை நீங்க கை நீட்டி அடிச்சிருக்க கூடாது சார்!
சார்! நீங்க புரிஞ்சுக்காம பேசறீங்க... நான் அவளை வேலைக்காரியா நினைச்சு ஒருநாள் கூட பழகியதில்லை சார்!
                         அ.தெய்வசிகாமணி.

தலைவர் சமாதியை  கண்டுபிடிச்சிட்டீங்களா?
அதை ஏன் கேக்கறீங்க.. இங்க கூட ஏதோ பினாமி பேரைக் கொடுத்திருக்காராம்!
                         கார்த்திக்.

நீங்க எப்படி இவ்ளோ பெரிய அகராதி எழுதனீங்க?
ஒருநாள் நானும் என் சம்சாரமும் சண்டைபோட ஆரம்பிச்சோம்! வார்த்தைக்கு வார்த்தை வளர்ந்து போச்சு!
                          கார்த்திக்.

வெயில் காலம் வந்துடுச்சேன்னு நினைச்சா பயமா இருக்கு!
  ஏன்?
 ஆபிஸூக்கு லீவு போட்டுட்டு வடாம் பிழியணுமே!
                     ஆர்.வசந்தகுமார்.

என்னங்க கோயில் கும்பாபிஷேகத்திற்கு இவ்வளவு கூட்டம்?
போஸ்டர்ல ‘குஷ்பாபிஷேகம்’னு தப்பா போட்டுட்டாங்களாம்!
                  பாஸ்கி.

மிஸ்டர் கோ.. உங்களுக்கு போன் வந்திருக்கு!
ஏன் சார் கோபாலகிருஷ்ணன்னு கூப்பிடக்கூடாதா? எதுக்கு பெயரை சுருக்கிக் கொஞ்சமா’கோ’னு கூப்பிடறீங்க?
  உங்க மனைவிதான் உங்களை ‘கொஞ்சம்’ கூப்பிடச் சொன்னாங்க!
                       வி.கி.குமார்.

தமிழ்நாட்டிலிருந்து பெண்களை வெளிநாட்டிற்கு கடத்திகிட்டு போயிருக்கே.. இது எத்தனை காலமா நடக்குது?
 ரொம்ப பின்னோக்கிப் போகனும்னா, ராவணன் சீதையைக் கடத்திகிட்டு போன காலத்திலிருந்தே நடக்குதுங்க!
                               வாணி.
 நன்றி} ஆனந்தவிகடன்.

தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்தலாமே!

Wednesday, August 29, 2012

கழுதை! கௌரவம் கிடைக்கலன்னா!

பதவிக்கு மரியாதை!

கடவுள் உருவம் செதுக்கப்பட்டிருந்த கல் ஒன்றை ஓர் ஊரிலிருந்து இன்னோரு ஊருக்கு கொண்டு செல்ல வேண்டியிருந்தது. அதை ஒரு கழுதையின் மேல் ஏற்றினார்கள். கழுதையின் சொந்தக்காரன் அதை ஓட்டிக் கொண்டு புறப்பட்டான்.
  வழியில் மக்கள் பலர் கழுதையின் மேலிருந்த கடவுள் சிலையை கண்டார்கள். எல்லோரும் வணங்கினார்கள்.
   இதைப்பார்த்த கழுதை தன்னைத்தான் மனிதர்கள் வணங்குகிறார்கள் என்று நினைத்தது. அதற்கு பெருமை பிடிபடவில்லை. மனிதர்களின் வணக்கத்தை ஏற்றுக் கொண்டதுபோல தலையை ஆட்டிக்கொண்டு கம்பீரமாக நின்றது.
  அதன் உள்ளக் கருத்தை புரிந்து கொண்ட சொந்தக்காரன், ‘ஏ கழுதையே! உனக்கு இவ்வளவு திமிரா? கழுதையை மனிதர்கள் வணங்கும் காலம் எப்போதும் வராது. நட” எண்று அதை அடித்து விரட்டினான்.
    *******************************************************************************************
   இந்த கதையை சமீபத்தில் புத்தகம் ஒன்றில் படித்ததும் பிடித்து போனது. மனிதர்கள் நாமும் இந்த கழுதையைப் போலத்தான் நடந்து கொள்கிறோம். உருவத்திற்கு ஏது கவுரவம். நம் பண்புக்குத்தான் கவுரவம் உண்டு.
   சிலர் இப்படித்தான்! நாம் ஏதாவது பதவியில் இருக்கும் வரையோ அல்லது நம்மால் ஏதாவது காரியம் ஆக வேண்டும் என்றாலோ சுற்றி சுற்றி வந்து நம்மை கவனித்து மரியாதை செய்து கொண்டிருப்பர். காரியம் ஆனதும் கண்டு கொள்ளமாட்டார்கள்.
   இன்னும் சிலர் ஒரு பதவியில் இருக்கும் போது பலர் தம்மை வணங்குவதையும் நாம் உயர்ந்த இடத்தில் இருக்கிறோம் என்றும் நினைத்து வீண் பெருமை பேசிக் கொள்ளுவர்.டாம்பீகமாக தனக்குத்தான் இத்தனை கவுரவம் என்று நினைத்துக் கொள்வர்.
   உண்மையில் அது உண்மையான மரியாதை அல்ல! அவருக்கான மரியாதை அல்ல அது அவர் வகிக்கும் பதவிக்கான மரியாதை! ஒருவனிடம் மிகுந்த பணம் இருக்கிறது என்றால் அவனை சுற்றி எப்போதும் ஒரு கூட்டம் இருக்கும். அவன் சொல்வதற்கெல்லாம் ஆமாம் சாமி போடும்! மறுத்து பேசாது! அவரும் தனக்கு இவ்வளவு செல்வாக்கு இருக்கிறது என்று நினைத்து பெருமித பட்டுக் கொள்ளலாம்! ஆனால் அது நிலையானது கிடையாது.
   பொதி சுமந்த இந்த கழுதையை வணங்கிய கதையாகிவிடும்! நாம் நம் உண்மை நிலையை உணர்ந்து நடந்து கொண்டால் நம் கவுரவம் நம்மை காப்பாற்றும்!

   ஏதோ எனக்கு தெரிஞ்சதை சொல்லியிருக்கேன்! இன்னும் விவரமா சொல்ல விவரம் பத்தலை! அதுவும் இல்லாம நிறைய வேளைப்பளு இருக்கு! அதனால இன்னிக்கு உங்கள இதோட விட்டுடறேன்! நன்றி!

தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள் நண்பர்களே! நன்றி!

Tuesday, August 28, 2012

பேய்கள் ஓய்வதில்லை! பகுதி 6

பேய்கள் ஓய்வதில்லை! பகுதி 6
 முந்தைய பகுதிகள் படிக்க லிங்க்:


உங்கள் ப்ரிய “பிசாசு”

முன்கதை: பஞ்செட்டியில் வசிக்கும் முகேஷ் டி வியில் ஆவிகள் சீரியல் பார்க்கும் வரும் அவனது நண்பன் ரவி கிண்டல் செய்கிறான். அப்போது கரண்ட் ஆப் ஆக ரவியை பேய் பிடித்துக் கொள்கிறது. அவன் ஓட ஆரம்பிக்கிறான். இரண்டு கி.மீ தொலைவில் வீரபத்திரர் கோயில் அருகில் அவனை பிடித்து உடன் ஒரு பெரியவரையும் துணைக்கு அழைத்து வருகிறான் முகேஷ். அவனது வீடு வந்த பின் அந்த பெரியவர் மாயமாய் மறைகிறார். அதே சமயம் ராகவனின் நண்பன் வினோத் ஒரு பெண்ணை அழைத்து வருகிறான். அந்த பெண்ணும் பேய் பீடித்தார் போல வித்தியாசமாக நடந்து கொள்ள ஊரே ராகவனை துக்கம் விசாரிக்கையில் அவனது நண்பர் தனது பேத்திக்கு நடந்த சம்பவம் பற்றி கூறுகிறார். இனி.

   முகேஷ் மிகவும் பயந்து போயிருந்தான். அவனுடன் வந்த பெரியவரை காணவில்லை! உள்ளே நுழையும் போது ரவியை பார்த்து நாய்கள் பயங்கரமாக குரைக்க ஆரம்பித்தது. அவனுக்கு வேர்த்து வழிந்தது. இன்று யார் முகத்தில் முழித்தோமோ தெரியலை? வீட்டுல அப்பா அம்மாவும் இல்லே சரியான சமயத்தில இந்த ரவி பயல் வந்து நம்மை இந்த ஆட்டு ஆட வைக்கிறானே என்று மனதில் புலம்பிக் கொண்டிருந்தான். வேறு என்ன செய்ய முடியும் உள்ளே நுழைந்தான். வா ரவி என்று அழைத்தான்.
   ரவி அதை காதில் வாங்காதது போல இருந்தான். ரவி உன்னை தான்! வா! காலையில நீ வீட்டுக்கு போகலாம்.இப்ப இங்கேயே படுத்து தூங்கு என்றான்.  ரவி அரை மனதாக உள்ளே வந்தான். முகேஷ் பாத்ரூம் போய் கால் கழுவி வந்தான். ரவி நீயும் போய் கழுவி வா என்றான்.
  ரவி பாத்ரூமிற்குள் சென்றான். முகேஷ் சுவரில் தொங்கிய கடியாரத்தை பார்த்தான். மணி நள்ளிரவு 1ஐ கடந்து இருந்தது. ஆங்கில கணக்குப்படி விடிந்து விட்டது. நாய் இன்னும் குரைத்துக் கொண்டே இருந்தது. இவனுடைய வாழ்நாளில் இந்த நேரத்திற்கு முழித்துக்கொண்டு இருந்ததில்லை. அத்துடன் இப்படி ஒரு சம்பவம் நிகழ்ந்ததும் இல்லை.
   அவன் நெஞ்சு படபடவென அடித்துக் கொண்டது. பூஜையறைக்குள் சென்றான். சுவாமி படம் முன் காமாட்சி விளக்கு எரிந்து கொண்டு இருந்தது. அவன் வீட்டில் சதா விளக்கு எரிந்து கொண்டு இருக்கும். ஒரு ஊதுபத்தியை கொளுத்தி சாமி படம் முன் வைத்து விட்டு சிறிது கற்பூரம் ஏற்றி சாமிக்கு காட்டினான். பின் அங்கிருந்த விபூதியை எடுத்து நெற்றியில் வைத்துக் கொண்டான்.
   திடீரென முதுகில் எதுவோ குத்துவது போல தோன்ற திரும்பினான் முகேஷ். அங்கு இவனை வெறித்துப்பார்த்தபடி நின்று கொண்டிருந்தான் ரவி.
   ஒரு முறுவலுடன். ரவி இந்தா விபூதி என்று அவன் நெற்றியில் பூசிவிட்டு வா படுத்துக்கலாம் என்று பெட் ரூமிற்குள் நுழைந்தான் முகேஷ். மவுனமாக பின் தொடர்ந்தான் ரவி.
   நேரம் ரொம்ப ஓடிப்போயிடுச்சு! காலையில் வேளைக்கு போகனும் சீக்கிரம் எழுந்துக்கணும். படுத்துக்கோ ரவி என்று கட்டிலில் ஒரு ஓரமாக விழுந்தான் முகேஷ்.
சிறிது நேரத்தில் முகேஷ் தூங்கி போனான். மாலையில் இருந்து நிகழ்ந்த நிகழ்வுகள் அவனுக்கு அலுப்பை தந்து உறங்க வைத்தன. ரவியால் தூங்க முடியவில்லை! அவனுக்குள் ஏதோ ஒன்று புகுந்தார் போல தோன்றியது.
   உடலே பாரமானது போல உணர்ந்தான். அரைமயக்க நிலையில் அவன் இருந்தான். அப்போது ஒரு குரல் அவனை எழுப்பியது. ரவி நீ ஏன் தூங்கறே உனக்கு நிறைய வேலை இருக்கு வா என் கூட என்று அது அழைத்தது.
      ரவியின் வாய் குழறியது.. நீ. யாய்!.. யாருய்.. என்று உளறினான்.
  நான் தான் உன் உடலில் இருக்கிற நண்பன் ஆவி! நீ பயப்படாதே என் காரியம் முடிஞ்சதும் நானே போயிடுவேன். எனக்கு உன்னோட ஒத்துழைப்பு வேணும் என்று குரல் அவன் காதில் ஒலித்தது.
   எ.. என்ன.. ஒத்துழைப்பு?
நான் பழிவாங்கணும் !
யா.. யாரை ?
அது இப்ப உனக்கு தேவையில்லை! நீ எழுந்திரு! என் கூட வா! அவனை உனக்கு காட்டறேன்! தனியா வசமா வந்திருக்கான்! வா போயி சாச்சிட்டு வந்துருவோம்!
  என்னால மு.. முடியா.. து!
  இந்த நண்பனுக்கு உதவ மாட்டியா? கண்டிப்பா நீ வருவே!
வா! நண்பா! அவனை முடிச்சதும் உனக்கு விடுதலை! உன்னை விட்டு போயிடறேன்!
  எ.. எப்படி நம்பறது?
நம்பிக்கைதானே வாழ்க்கை நண்பா!
வா ரவி! இன்னிக்கு அமாவாசையா இருந்தா விசேஷமா இருக்கும்! அஷ்டமியா போச்சு! இருந்தா என்ன? வா போகலாம் வா!
  இது எதுவும் முகேஷிற்கு தெரியவில்லை அவன் ஆழ்ந்து உறங்கிக் கொண்டிருந்தான். ரவி மெதுவாக அவனை பார்த்தான்.
  நீ ஏன் அவனை பார்க்கிறே! வேண்டாம்! அவன் இப்ப எழுந்துக்க மாட்டான்! வா நமக்கு நேரம்  போயிட்டே இருக்குது. வா?
   ரவி எழுந்தான். நடக்க ஆரம்பித்தான். கதவை திறந்து கொண்டு அங்கிருந்த ஸ்பெலண்டரை ஸ்டார்ட் செய்து கிளம்ப ஆரம்பித்தான். இது எதுவுமே அறியாது ஆழ்ந்து உறங்கி கொண்டிருந்தான் முகேஷ்.


 கோயில் படிக்கட்டில் அமர்ந்து தனது பேத்திக்கு நடந்ததை சொல்லிக் கொண்டிருந்த மணி, சில நொடிகள் பேச்சை நிறுத்தினார். ஏம்பா ராகவா! நம்ம  மூணு பேருதானே இங்க இருந்தோம். வேற யாரும் இல்லயே? என்றார்.
   எதுக்கு கேக்கறீங்க? இதை நான் யார்கிட்டேயும் சொல்ல மாட்டேன் என்ற ராகவன். வித்தியாசமாக உணர்ந்தான். ஏதோ மல்லிகைப் பூ வாசம் அடிக்கிறாப்பொல தெரியுது! வினோத் நீ ஏதாவது செண்ட் பூசி  இருக்கியாடா? என்றான்.
  அட நீ வேற! நானே நொந்து கிடக்கேன்! இதுல செண்ட் எங்க அடிக்கிறது?
மணி ராகவனை பார்த்து சிரித்தார்! தம்பி நான் கேட்டது இதுக்குத்தான்! இங்கன யாரோ கண்ணுக்கு தெரியாம இருக்காங்க! அதான் மல்லி வாசம் வீசுது!
  இதென்ன பெரியவரே பீதியை கிளப்பறீங்க!
ஆமாம் தம்பி! பேய் பிசாசுகளோட வேலையே இப்படி வாசம் வீசுறதுதான்! அதனாலதான் இந்த மாதிரி செண்ட் அடிச்சிகிட்டு மல்லிப்பூ வச்சிகிட்டு வெய்ய நேரத்துலயும் இருட்டுன பொழுதிலயும் தனியா போகக்கூடாதுன்னு சொல்லுவாங்க தம்பி!
   அட இது வித்தியாசமா இருக்கே!
இதுல என்ன வித்தியாசம் இருக்கு தம்பி! பேய்ங்களுக்கு இந்த மாதிரி வாசனையும் பிடிக்கும் கருவாடு மீன் வாசனையும் பிடிக்கும் இதுக்கும் ஒரு கதை இருக்கு தெரியுமா என்றார்.
   நீங்க உங்க பேத்தி கதையே சொல்லி முடிக்கல அதுக்குள்ளே வேற சப்ஜெக்டுக்கு தாவுறீங்களே? என்றான் வினோத்.
  பேத்தி கதை அப்பறம் பேசிக்கலாம்! இப்ப நாம பேசறதை யாரோ ஒட்டு கேக்கிறாங்க! அதனாலதான் மாத்தி பேசறேன் என்று குரல் தாழ்த்தி சொன்ன பெரியவர் மணி தொடர்ந்து சொல்ல ஆரம்பித்தார்.
   நம்ம ஊருல நடந்த கதை தான் இது. ரைஸ்மில் தாண்டி கொத்தவால் சாவடியார் தோப்பு இருக்கு இல்லை!
  ஆமாம் இருக்கு அங்க ஒரு பெரிய புளிய மரமும் இருக்கு என்றான் ராகவன்.
 ஆம்! அந்த புளிய மரத்துலதான் ஒரு பேய் இருக்கு! ராத்திரியிலே தனியா வர்ரவங்களை அது படுத்துற பாடு இருக்கே!
  நீங்க எப்பவாவது அதுங்கிட்ட மாட்டியிருக்கீங்களா?
நான் மாட்டலை நான்வேற விதமா மாட்டியிருக்கேன்! இந்த பொம்பளை பேயி கதையை கேளுங்க!
  பொம்பளை பேயின்னு உங்களுக்கு எப்படி தெரியும் பெரியவரே?
இப்படித்தான் இடக்கு மடக்கா கேள்வி கேக்கப்படாது! பாத்தவங்க சொன்னதுதான் நானா போயி நேரடியா பாத்து வந்தேன்!
  நீங்க சொல்லுங்க பெரியவரே! இவன் கிடக்கான் என்றான் ராகவன்.
அந்த புளிய மரத்துல ஒரு பொம்பளை பேயி இருக்குன்னு ஊரெல்லாம் ஒரே பேச்சா இருந்துச்சு ஒரு பத்து வருஷத்துக்கு முன்னாலே  ராவாணா பதினோறு மணிக்கு மேல அந்த பக்கம் தனியா போகவே எல்லோருக்கும் பயம் கையில தடி டார்ச் கால்ல செருப்பு இத்தனையும் கூட ஒரு பேச்சு துணையும் இருந்தாத் தான் அந்த பக்கம் போவாங்க!
   அப்படி என்ன பண்ணுச்சு அந்த பொம்பளை பேயி?
  அது நைட் ஷிப்ட் முடிஞ்சு சைக்கிள்ள வரவங்க பின்னாடி ஏறி உக்காந்துக்குமாம்! சைக்கிள் மிதிக்க மிதிக்க நகரவே நகராதாம் நம்ம ஆளுங்க மிதிச்சி களைச்சி போயி திரும்பி பார்த்தா இது சைக்கிளை இழுத்து புடிச்சிகிட்டு நிக்குமாம் தலையை விரிச்சு போட்டுகிட்டு ஆளுங்க அப்படியே மிரண்டு சைக்கிளை போட்டுட்டு ஓடுவாங்களாம்! ஆனாலும் அது துரத்திகிட்டே நம்ம போரியம்மா கோயில் வரைக்கும் ஓடியாருமாம்.
 அதுக்கப்புறம் காணாம போயிருமாம்.
  மிரண்டு வந்தவங்க  காய்ச்சல்ல விழுந்து திரும்ப வேலைக்கு போக ஒரு வாரம் ஆகிடுமாம்! அதுக்கப்புறம் அவங்க நைட் ஷிப்ட் போனாலும் பொழுதோட கிளம்பி போயிடுவாங்க காலையில தான் வருவாங்க என்றார் மணி.
  ஆச்சர்யமா இருக்கே!
  இதுல என்ன ஆச்சர்யம் தம்பி! ஆத்மா கெட்டதுங்க! இப்படித்தான் ஆவியா அலையும் அதுங்க ஆசை நிறைவேறாம அறைகுறையா போயிடுது இல்லே அதனால இப்படி அலைஞ்சிகிட்டு இருக்குதுங்க!
   இன்னொரு கதை கேளு! என் ப்ரெண்ட் ஒருத்தனுக்கு கருவாடுன்னா உசுறு! ஒருநா மெட்ராஸ்ல ஏதோ வேலையா போனவன் திரும்ப வரும்போது மார்க்கெட்ல ஒரு கிலோ கருவாடு வாங்கிட்டு கடைசி பஸ்ஸீக்கு பஞ்செட்டியில வந்து இறங்கி இதே போல சைக்கிளை எடுத்துகிட்டு வந்து இருக்கான்.
  ராத்திரி பதினோரு மணி ஆயிருச்சு அவனுக்குஇந்த நேரத்துல ஆவிங்க நடமாட்டம் இருக்குமுன்னு தெரியலையோ இல்லை தெனாவட்டோ தெரியலை!
 அப்படியே எம். ஜி. ஆர் பாட்டு பாடிகிட்டு அந்த புளியமரம் கிட்ட வந்துட்டான். அதுவரைக்கும் நல்லா போயிகிட்டிருந்த சைக்கிள் அப்படியே ஸ்லோ ஆயிடுச்சு! என்னடா சைக்கிள்ல காத்து இல்லையோன்னு இறங்கி பாத்துருக்கான். சரியாத்தான் இருக்கு. திரும்பவும் ஏறி மிதிக்க சைக்கிள் நகரவே இல்ல!
 இறங்கலாம்னு திரும்பி பாத்துருக்கான்!
  அந்த பேயிதான் அவன் பின்னாடி சைக்கிளை பிடிச்சி இழுத்தபடி! எங்கே அவசரமா போறே எனக்கு ரெண்டு கருவாட்ட தந்துட்டு போ! ன்னு கேட்டுச்சாம்!
பெரியவர் சொல்ல சொல்ல ஆர்வமாய் கேட்டுக் கொண்டிருந்தனர் ராகவனும் வினோத்தும்!
                                     மிரட்டும் (6)

தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து ஊக்கப்படுத்துங்கள்! நன்றி!

Monday, August 27, 2012

நினைவுகள்!


நினைவுகள்!


நடக்கும்போது கூட வரும்
முழுநிலவு போன்று
உன் நினைவுகள் என்னுடன்
வருகின்றன.

வெப்பத்தில்வாடும் பயிர்களை
திடீர் மழை
குளிர்விப்பதுபோல நீ
நுழைந்தால் குளிர்கிறது
மனசு.

ஜன்னலோர சீட்டில்
பஸ்ஸில் பயணிக்கும் போது
முகம் வருடும் தென்றலாய்
நீ!

தூரத்தில் கேட்கும்
பறவைகளின்சப்தத்தில்
உன் கொலுசொலி
கேட்கின்றேன்!

யாரோ கடந்து செல்கையில்
வீசும் சந்தனவாசம்
உன் அருகாமையை
நினைவு படுத்துகிறது.

என் வீட்டு ஒற்றைரோஜா
பூத்து உன்
கூந்தலை ஞாபகப்படுத்துகிறது!
 
கடலலைகள் போல
மன அலைகள் எழும்பி
உன்னை தேடுகிறது!

என் அன்பே! நீ விலகி
சென்றாலும் விலக மறுக்கின்றன
உன் நினைவுகள்!

தங்கள் வருகைக்கு நன்றி! பதிவு குறித்த கருத்துக்களை கமெண்ட் செய்து உற்சாகப்படுத்துங்கள்! நன்றி!

Sunday, August 26, 2012

சபாஷ் இளம் இந்தியா! மூன்றாவது முறையாக உலக கோப்பை வென்று சாதனை!

டவுன்ஸ்வில்லே: ஆஸ்திரேலியாவில் நடைபெற்ற 19 வயதுக்குட்பட்டோருக்கான ஜூனியர் உலகக் கோப்பை கிரிக்கெட் இறுதிப் போட்டியில் நடப்பு சாம்பியனான ஆஸ்திரேலியாவை 6 விக்கெட் வித்தியாசத்தில் இந்தியா வீழ்த்தியது. இதன் மூலம் ஜூனியர் உலகக் கோப்பை கிரிக்கெட் போட்டிகளில் இந்திய அணி மூன்றாவது முறையாக கோப்பையைக் கைப்பற்றியுள்ளது.
இன்றைய போட்டியில் முதலில் டாஸ் வென்ற இந்திய அணியின் கேப்டன் உன்முக்த் சந்த், பீல்டிங்கை தேர்வு செய்தார். ஆஸ்திரேலிய அணி தொடக்கத்தில் தட்டுத் தடுமாறி ரன்களை எடுத்துக் கொண்டிருந்தது. 38 ரன்களில் 4 விக்கெட்டுகளைப் பறிகொடுத்திருந்த நிலையில் அந்த அணியின் கேப்டன் வில்லியம் அதிரடியாக ஆடினார். அவர் 87 ரன்களை எடுத்தார். அவருக்கு டிராவிஸ் ஹெட் கை கொடுத்தார். டிராவிஸ் 37 ரன்களை எடுத்தார். 200 ரன்களைக் கூட எடுக்காது என்று நினைத்திருந்த ஆஸ்திரேலிய அணி 8 விக்கெட் இழப்புக்கு 225 ரன்களை எடுத்தது. இந்திய அணியின் சந்தீப் சர்மா 4 விக்கெட்டுகளை வீழ்த்தியிருந்தார்.
226 ரன்கள் எடுத்தால் வெற்றி என்ற இலக்குடன் இந்திய அணி அடுத்து களமிறங்கியது. இந்திய அணி வீரர்கள் தொடக்கம் முதலே விக்கெட்டுகளை காப்பாற்றிக் கொண்டு அபாரமாக ஆடினர். இந்திய அணி 4 விக்கெட் இழப்புக்கு 227 ரன்களை எடுத்து 6 விக்கெட் வித்தியாசத்தில் அபாரமாக வெற்றி பெற்றது. இந்திய அணியின் உன்முத் சந்த் 111 ரன்களைக் குவித்து ஆட்டமிழக்காமல் இருந்தார்.
நடப்பு சாம்பியனான ஆஸ்திரேலியாவை வீழ்த்தியிருக்கும் இந்தியா ஜூனியர் உலகக் கோப்பையை 3-வது முறையாக கைப்பற்றியிருக்கிறது.

நன்றி  தட்ஸ் தமிழ்.

பாட்டிவைத்தியம்! எளிய சித்த மருத்துவ குறிப்புகள்!

பாட்டிவைத்தியம்! 
 
                எளிய சித்த மருத்துவ குறிப்புகள்!
 குப்பை மேனி

புண் சிரங்கு குணமாக நுனா இலையை அரைத்து பற்றுப் போட குணமாகும்

தேமல் குணமாக ஆரஞ்சு பழத் தோலை வெயிலில் உலர்த்தி பொடி செய்து தினமும் தேய்த்து குளித்துவர தேமல் குணமாகும்.

கோரைக்கிழங்கு கஷாயம் வைத்து சாப்பிட எவ்வித காய்ச்சலும் குணமாகும்.

ஆடாதொடை 
சளிக்காய்ச்சல் குணமாக ஆடாதொடை இலையை கஷாயம் வைத்து குடிக்க  குணமாகும்.

ஜலதோஷம் நீங்க துளசிச் சாறு இஞ்சி சம அளவு கலந்து குடிக்கலாம்.

இருமல் குணமாக வெந்தயக்கீரை சமைத்து உண்டு வந்தால் குணமாகும்.

வெட்டுக்காயம் குணமாக இலந்தை மர இலையை அரைத்து காயத்தின் மீது பூசி வர குணமாகும்.

வில்வ இலையை தினமும் காலையில் மென்று தின்று வர வாய்திக்கல் குணமாகும்.
 வில்வம்

வாத நோய் தீர ஊமத்தை இலையை நல்லெண்ணையில் வதக்கி கட்டி வர குணமாகும்.

 அகத்திக்கீரை
அகத்திக் கீரை வாரம் ஒருநாள்  சமைத்து உண்டுவர  மலச்சிக்கல் குணமாகும்.

துத்திக்கீரை
 கற்றாழை
துத்திக்கீரை பொரியல் செய்து சோற்றுடன் 120 நாட்கள் தொடர்ந்து சாப்பிட மூல நோய் குணமாகும். இந்த நாட்களில் மாமிசம் புளி காரம் சேர்க்க கூடாது.

அத்திப்பழம் தினம் தோறும் ஐந்து சாப்பிட்டு வர நரம்புத் தளர்ச்சி நீங்கும்.

காய்ச்சிய வெப்பெண்ணையை தடவி வர சேற்றுப் புண் குணமாகும்.

நாக்கு பூச்சி நீங்க குப்பைமேனி வேர் பொடி கஷாயம் செய்து சாப்பிடலாம்.

தான்றிக்காய் பொடி கால் ஸ்பூன் தேனில் கலந்து காலையில் சாப்பிட்டுவர கண்பார்வை நன்றாக தெரியும்.

இஞ்சி சாறுடன் தேன் கலந்து தினமும் சாப்பிட ரத்தம் சுத்தமாகும்.

பூவரசு இலைகளை அரைத்து வதக்கி கட்ட வீக்கம் குணமாகும்.

கசகசா கற்கண்டு சேர்த்து சாப்பிட்டுவர தூக்கம் நன்கு வரும்.

சிலந்திகடி குணமாக கடிவாயில் கற்றாழை வைத்துக் கட்ட குணமாகும்.

பாம்புக் கடி விஷம் குறைய ஆடு தின்னாப் பாலை வேர் எடுத்து கஷாயம் செய்து குடித்தால் விஷம் முறியும்.

பூரான் கடிக்கு குப்பை மேனி உப்பு மஞ்சள் அரைத்து பற்று போட குணமாகும்.

நாய்க்கடி விஷம் முறிய ஊமத்தை இலையை அரைத்து நல்லெண்ணையில் வதக்கி கட்ட முறியும்.

தேள் கடிக்கு நாயுருவி வேரை பச்சையாக மென்று சாறை உட்கொள்ள விஷம் குறையும்.

சீதபேதி குணமாக கசகசாவை சர்க்கரை சேர்த்து சாப்பிட்டு வர மூன்று நாட்களில் குணமாகும்.

முள்ளங்கிச் சாறு சாப்பிட தலைவலி, ஜலதோஷம் , இருமல் குணமாகும்.

அகத்தி இலை அவித்த தண்ணீர் பருகினால் வாய்ப்புண் குணமாகும்.

தேங்காய் பாலுடன் தேன் கலந்து குடித்தால் வாய்ப்புண் குணமாகும்.
 துளசி

வல்லாரை இலையுடன் தூதுவளை சேர்த்து அரைத்து பாலில் கலந்து சாப்பிட்டு வர நுரையீரலில் உள்ள சளி நீங்கும்.

மகிழம் இலையை கஷாயம் செய்து வாய் கொப்பளித்து வர பல் நோய்கள் வராது.

பிரம்ம தண்டு எரித்த சாம்பலால் பல் துலக்கி வர பல்கரை பல்சொத்தை குணமாகும்.

சிறியா நங்கை தினமும் சிறிது மென்று தின்று வர நீரிழவு நோய்கள் குறையும்.

கோவைப்பழம் தினசரி 1 சாப்பிட்டுவர சர்க்கரை நோய் கட்டுப்படும்.

குப்பைமேனி சாறை தடவினால் தலைவலி குறையும்.

தங்கள் வருகைக்கு நன்றி பதிவு குறித்த கருத்துக்களை கமெண்ட் செய்து உற்சாகப்படுத்துங்கள்! நன்றி! 


Saturday, August 25, 2012

பிறந்த குழந்தை பேசியது! பரவிய வதந்தியால் தேங்காய் விலை ஏறியது!

திருப்பூர்: பிறந்த குழந்தை பேசியதாகவும், குழந்தைகள் உயிருக்கு ஆபத்து என வதந்தி பரவியதாலும் தமிழகத்தில் பலரும் தங்களுடைய குழந்தைக்கு தலையை சுற்றி தேங்காய் உடைத்தனர். இதனால் தேங்கி கிடந்த தேங்காய்க்கு மவுசு ஏற்பட்டதுடன் சில மாவட்டங்களில் தேங்காய் தட்டுப்பாடும் ஏற்பட்டது.

தர்ம்புரி, கிருஷ்ணகிரி, அரியலூர், திருப்பூர் உள்ளிட்ட மாவட்டங்களில் பல் முளைத்த பிறந்த குழந்தை பேசியது என்பது தான் அந்த செய்தி :
தகவல் விவரம் வருமாறு:


ஒரு குழந்தை பிறந்தவுடன் இதற்கு பல் முளைத்து இருந்தது. பிறந்த உடன் பேசியது. நான் இன்னும் சற்று நேரத்தில் இறந்து விடுவேன் . என்னுடன் ஆயிரத்து 500 குழந்தைகளை உயிரோடு அழைத்து செல்வேன். இவ்வாறு கூறியது. இந்த தகவல் எல்லா ஊர்களுக்கும் பரவியது. அவரவர் உறவினர்களுக்கு இந்த தகவலை சொல்லி பரிகாரம் செய்து கொள்ளவும் கேட்டுக்கொண்டனர். அதாவது குழந்தையை காப்பாற்ற வேண்டுமானால் தேங்காய் வாங்கி மஞ்சள் குங்குமம் தடவி, தலையை சுற்றி முச்சந்தியில் உடைக்க வேண்டும். இந்த பரிகாரம் செய்தால் குழந்தை உயிருக்கு ஆபத்து வராது என்று நம்பப்பட்டது. இதனால் திருப்பூரில் கரும்பாளையம், மங்கலம்கோடு, பெரிச்சிபாளையம், கோட்டை மாரியம்மன் கோயில் தெரு, உள்ளிட்ட பகுதிகளில் இந்த வதந்தியால் பரபரப்பு நிலவியது. இது போல கிருஷ்ணகிரி, தர்மபுரியிலும் இதே நிலை நீடித்தது. இத்த தகவல் மேலும் சென்னை உள்பட பல மாவட்டங்களுக்கு பரவி வருகிறது. ஆங்காங்கே தேங்காய் உடைப்பு காட்சியை பார்க்க முடிந்தது.


தமிழகத்தை ஆட்டிப்படைத்த வதந்தி விவரம்:

இதற்கு முன்னர் இதுபோல மூட நம்பிக்கை வதந்தி பல நமது தமிழகத்தை பாதித்துள்ளது. தலையில்லா முண்டம் வருது. வேப்பமரத்தில் பால் வடிந்தது. பிள்ளையார் பால் குடித்தார், மேரி மாதா கண்ணில் ரத்தம் வடிகிறது, சகோதரர்கள் தங்கைக்கு பச்சை சேலை வாங்கி கொடுக்கனும், தலைப்புள்ள ஆம்பிளையாக இருந்தால் ஏழு பேருக்கு குங்குமம் கொடுக்கணும், சமீபத்திய மெகந்தியால் மயக்கம், இது போன்று வதந்தி பரவியிருப்பதை வாசகர்களுக்கு நினைவுபடுத்துகிறோம்.

சமீபத்தில் தேங்காய் வியாபாரம் குறைவாக இருந்ததாகவும், இதன் விலை வீழ்ச்சி அடைந்து இருந்தது. நேற்று வரை 3 தேங்காய் 10 ரூபாய்க்கு விற்று வந்தது. ஆனால் இன்று தேங்காய் ஒன்று 20 ரூபாய் அளவிற்கு உயர்ந்தது. திருப்பூர் பகுதியில் தேங்காய் கிடைக்காமல் பலர் கடை, கடையாக அலைந்தனர்.

நன்றி } தினமலர்

Related Posts Plugin for WordPress, Blogger...