Wednesday, March 28, 2012

ஆரோக்கியமான பற்கள் வேண்டுமா?

ஆரோக்கியமான பற்களே ஆரோக்கியமான வாழ்க்கையை நிர்ணயிக்கின்றன என்கின்றது மருத்துவ உலகம். பண்டைய காலத்தில் பல் போனால் சொல் போச்சு என்ற பழமொழி உண்டு. இன்றைக்கு பற்கள் பாதிக்கப்பட்டால் இதயம், பக்கவாதம் போன்ற நோய்களும் எட்டிப்பார்க்கும் என்கின்றனர் மருத்துவர்கள். எனவே பற்களை ஆரோக்கியமாக பாதுகாக்க வேண்டியது அவசியம்.

பற்களை பாதுகாக்க வீட்டில் உள்ள பொருட்களே உதவுகின்றன என்கின்றனர் மருத்துவர்கள் அவர்கள் கூறும் ஆலோசனைகளை பின்பற்றுங்களேன்.

சிறு வயதில் இருந்தே பல்லை ஆரோக்யமாக வைப்பதில் கவனம் செலுத்த வேண்டும். பிரச்னை வந்து, வலிக்க ஆரம்பித்த பின்னர் தான் மருத்துவரைப் பார்க்க வேண்டும் என்ற எண்ணமே பலருக்கும் உள்ளது. குழந்தைகளுக்கு பல் முளைக்க ஆரம்பித்ததில் இருந்தே தினமும் இருமுறை பல்துலக்க வேண்டும். பல்லின் இடுக்குகளில் உணவுப் பொருள்கள் படியாமல் பார்த்துக் கொள்ள வேண்டும். அவ்வாறு சிக்கிக் கொண்டால் வாய் கொப்பளித்து உடனடியாக பல்லை சுத்தம் செய்ய வேண்டும்.

கீரைகளை நன்றாக மென்று துப்பலாம். இதனால் பல் இடுக்குகளில் உள்ள உணவுப்பொருட்கள் வெளியேறிவிடும், பற்கள் ஆரோக்கியமடையும். பச்சை வெங்காயத்தை மூன்று நிமிடம் நன்றாக மென்று துப்ப வாய், பற்களில் உள்ள தேவையற்ற கிருமிகள் இறந்துவிடும். உணவு உண்டவுடன் வெதுவெதுப்பான நீரில் ஹைட்ரஜன் பெராக்ஸைடு சேர்த்து நன்றாக கொப்பளிக்க வேண்டும்.

சத்தான உணவுகள்

சத்துக் குறைபாடான உணவுகள் மற்றும் உடலில் ஏற்படும் சர்க்கரை உள்ளிட்ட மற்ற நோய்களின் காரணமாகவும் பல் ஆரோக்யம் விரைவில் கெட்டுவிட வாய்ப்புள்ளது. எச்சிலில் உள்ள அமிலம் மற்றும் உணவில் உள்ள கார்போஹைட்ரேட்டும் சேர்ந்து பல்லில் சொத்தையை உருவாக்குகிறது.

தினசரி உணவில் கால்சியம், வைட்டமின் சி போன்றவைகளை அதிகம் சேர்த்துக்கொள்வது பற்களின் ஆரோக்கியத்திற்கு வழிவகுக்கும். தினசரி அரை எலுமிச்சையை சாறு எடுத்து வெதுவெதுப்பான நீரில் கொப்பளிக்கலாம்.

பல் சொத்தை பெரிதாக வளர்ந்து பல்லின் வேரை தாக்கும் போது தான் வலி ஏற்படுகிறது. இந்த வலியை கண்டு கொள்ளாமல் விட்டுவிட்டால் பல்லின் வேர்ப்பகுதி முழுவதும் பாதிக்கப்பட்டு பல்லை முழுமையாக இழக்கும் நிலை ஏற்படும்.

பல்வலியை போக்க

பல்வலி ஏற்பட்டால் அந்த இடத்தில் சிறிதளவு வெள்ளைப் பூண்டை எடுத்து பல் வலிக்கும் இடத்தில் வைக்க நிவாரணம் கிடைக்கும். அதேபோல் கிராம்பு பொடி செய்து பல்வலி உள்ள இடத்தில் வைக்கலாம். வெள்ளைப் பூண்டு, கல் உப்பு சேர்த்து நன்றாக பல் தேய்க்க பல்வலி குணமாகும்.

வாய் துர்நாற்றம் போக

தினசரி நன்றாக பல்துலக்க வேண்டும். வாய், நாக்கு உள்ளிட்ட இடங்களில் அழுக்குகளை நீக்க வேண்டும். கொத்தமல்லி இலைகளை நன்றாக மென்று சாறுகளை விழுங்கலாம்.

வெதுப்பான நீரில் ஒரு டீ ஸ்பூன் இஞ்சி, ஒரு டீ ஸ்பூன் எலுமிச்சை ஜூஸ் சேர்த்து நன்றாக கொப்பளிக்க வேண்டும். தினசரி மூன்று முறை இவ்வாறு செய்யலாம். சுவாசப் புத்துணர்ச்சி கிடைக்கும்.

வெதுவெதுப்பான வெந்நீரில் சிறிதளவு பேகிங் சோடா, சிறிதளவு தூள் உப்பு சேர்த்து வாய் கொப்பளிக்கலாம்.

ஆரோக்கியம் அவசியம்

இதேபோல் பல்லில் ஏற்படும் பல் கூச்சம், ஈறு வீக்கம், பல் சொத்தை, வாய் நாற்றம் உள்ளிட்ட எந்தப் பிரச்னையாக இருந்தாலும் உடனடியாக பல் மருத்துவரை அணுகி சிகிச்சை செய்து கொள்வதன் மூலம் பல்லின் ஆரோக்யத்தையும், உடல் ஆரோக்கியத்தையும், அழகையும் பாதுகாக்க முடியும்.

நன்றி தட்ஸ் தமிழ்

Tuesday, March 27, 2012

தளிர் ஹைக்கூ கவிதைகள்! 5


தளிர் ஹைக்கூ கவிதைகள்!

பரபரப்பான உலகில்
அமைதியாக நின்றது
சிலை!

மழை
பூமிக்கு குடை
காளான்கள்!

கூரையில்
இத்தனை பொத்தல்களா?
இரவு வானம்

ஓயாது உழைத்தவன்
ஓய்வெடுத்தால் ஒப்பாரி
மரணவீடு

சுட்டெரிக்கும் சூரியனை
பார்த்து சிரித்தன
மலர்கள்

இரைச்சலில்
தொலைந்து போனது
மவுனம்.

காற்றை விற்று
சோற்றை வாங்குகிறான்
பலூன் விற்பவன்.

யாருக்கு கை
அசைக்கின்றன
நாணல்கள்!

வான்மகளுக்கு
இத்தனை போட்டியா
மேகங்கள்!

நிலவு தேயத் தேய

ஒளி இழக்கிறது
பூமி!

தங்கள் வருகைக்கு நன்றி பதிவு குறித்த கருத்துக்களை பகிரலாமே! வாக்களித்து பிரபல படுத்தலாமே!




Thursday, March 22, 2012

சரியான நேரம் காட்டும் சூரிய "வாட்ச்': விஞ்ஞானத்தை விஞ்சும் "இயற்கை'

திருச்சி: திருச்சி அண்ணா கோளரங்களில் அமைக்கப்பட்டுள்ள சூரிய கடிகாரம் ஒன்று சரியான நேரம் காட்டி, பார்வையாளர்களை ஆச்சரியத்தில் ஆழ்த்துகிறது.
கிராமப்புறங்களில் வயலில் வேலைபார்க்கும், "வாட்ச்' கட்டாத விவசாயிகளிடம் சென்று மணி எத்தனை? என்று கேட்டால், அண்ணாந்து சூரியனைப் பார்த்து "இத்தனை மணி' என்று சரியாக கூறுவர்.பூமி தன்னைதானே சுற்றிக்கொள்வது நாளாகவும் நேரமாகவும், சூரியனை சுற்றுவது வருடமாகவும் கணக்கிடப்படுகிறது. வானத்தில் சூரியன் இருக்கும் இடத்தை வைத்து சரியான நேரத்தை சொல்வது, படிக்காத விவசாயிகளிடம் இருக்கும் அறிவியல் அறிவைக் காட்டுகிறது.

இதேபோல, திருச்சி அண்ணா கோளரங்கத்தில், சூரியனின் இருக்கும் நிலையை வைத்து மணி காட்டும், "கிடைமட்ட சூரியக்கடிகாரம்' ஒன்று, சரியான நேரம் காட்டி பார்வையாளர்களை ஆச்சரியத்தில் ஆழ்த்துகிறது.திருச்சி அண்ணா கோளரங்கத்தில், நுழைவுவாயில் அருகே, நேர்குத்து சூரியக்கடிகாரம், நடுக்கோட்டு சூரியக்கடிகாரம், கிடைமட்ட சூரியக்கடிகாரம் ஆகிய மூன்று சூரிய கடிகாரங்கள் தனித்தனியாக அமைக்கப்பட்டுள்ளன. முதலிரண்டு கடிகாரங்களும் தாமதமாக நேரங்களை காட்டுகின்றன.

*கிடைமட்ட சூரியக்கடிகாரம்: செவ்வக இரும்பு பலகையின் நடுவில், கத்திக் கப்பல் வடிவில் நீள்வாக்கில் இரும்பு தகடு ஒன்று பொருத்தப்பட்டுள்ளது. தகடின் இடதுபுறம் முற்பகல் என்றும், வலதுபுறம் பிற்பகல் என்று பிரிக்கப்பட்டுள்ளது. இரண்டு புறமும் குறிப்பிட்ட இடைவெளியில் எண்கள் குறிக்கப்பட்டு, தகடின் மேல்முனை உள்ள நடுமையத்தில், 12 என்ற எண் குறிக்கப்பட்டுள்ளது.காலை ஆறு மணி முதல் மதியம் 12 மணி வரை இடதுபுறமும், மதியம் ஒரு மணி வரை மாலை ஆறு மணிவரை வலதுபுறமும் சரியான மணியை காட்டும் வகையில் தகடின் நிழல் குறிப்பிட்ட இடத்தில் விழுகிறது.திருச்சி அண்ணா கோளரங்கத்துக்கு வரும் நூற்றுக்கணக்கான மாணவ, மாணவியர்கள் மற்றும் பார்வையாளர்கள், தங்களது "வாட்ச்'சில் உள்ள நேரத்தையும், சரியான நேரம் காட்டும் கிடைமட்ட கடிகாரத்தையும் பார்த்து ஆச்சரியத்தில் ஆழ்ந்து வருகின்றனர்.

thanks to dinamalar
Related Posts Plugin for WordPress, Blogger...