Wednesday, February 8, 2012

இன்று முதல் 8மணி நேரம் மின்வெட்டு! இருண்ட தமிழகம்!

 
பற்றாக்குறை அதிகரிப்பால், மாநிலம் முழுவதும், அறிவிக்கப்பட்ட மின்வெட்டு, 8 மணி நேரமாக, இன்று முதல் உயர்த்தப்பட உள்ளது. கோடைக்காலம் துவங்கும் நேரத்தில், அதிகரிக்கப்பட உள்ள இந்த மின்வெட்டு, மக்களுக்கு மிகப்பெரிய அதிர்ச்சியை ஏற்படுத்தும். மின் பற்றாக்குறையால், ஏற்கனவே தமிழகம் புழுங்கி வருகிறது. புதிய மின் திட்டங்கள் அமலாக, இன்னும் நான்கு அல்லது ஐந்து மாதங்கள் ஆகும். செயலில் உள்ள திட்டங்களிலும், சொல்லிக்கொள்ளும்படியாக உற்பத்தி இல்லை. ஆனால், பயன்பாட்டு அளவு, நாளுக்கு நாள் அதிகரித்துக் கொண்டே வருகிறது.உற்பத்திக்கும், பயன்பாட்டுக்கும் இடையிலான வித்தியாசத்தை ஈடுகட்ட முடியாமல், தமிழக மின் வாரியம் திணறி வருகிறது. இதை சமாளிக்கும் வகையில், சென்னை உள்ளிட்ட பெருநகரங்களில், 1 மணி நேரம், புறநகர் மற்றும் பிற நகர்ப்பகுதிகளில், 3 மணி நேரம், கிராமப்புறங்களில், 6 மணி நேரம் என, மூன்று விதமாக, அறிவிக்கப்பட்ட மின்வெட்டு அமல்படுத்தப்பட்டது.அறிவிக்கப்பட்டது தான் இவ்வளவே தவிர, பெரும்பாலான இடங்களில், இதை விடவும் அதிகமான நேரம் மின்வெட்டு அமல்படுத்தப்படுகிறது.பாகுபாடு கிடையாது: நிலைமை இன்னும் மோசமானதைத் தொடர்ந்து, இன்று முதல், தலைநகர் சென்னை தவிர, மாநிலம் முழுவதும், 8 மணி நேரம் மின்வெட்டை அமல்படுத்த, வாரியம் உத்தரவிட்டுள்ளது.இதில், நகர்ப்பகுதி, கிராமப்பகுதி என்ற பாகுபாடே
கிடையாது. எல்லா இடங்களிலும், 8 மணி நேரம், "கரன்ட் கட்' இருக்கப் போகிறது. சென்னையில், அறிவிக்கப்படாமல், 2 மணி நேரம் வரை மின்வெட்டு இருக்கும் என, எதிர்பார்க்கப்படுகிறது. அதிகாரப்பூர்வமாக அறிவிக்கப்பட்டதே, 8 மணி நேரமாகிவிட்ட நிலையில், சிறு நகரங்கள் மற்றும் கிராமப்புறங்களில், அதை விடவும் அதிகமாகவே மின்வெட்டு இருக்கும் என அஞ்சப்படுகிறது. எந்த நேரம்?இந்த புதிய மின்வெட்டு, இரண்டு விதங்களில் அமல்படுத்தப்பட உள்ளது. காலை, 6 முதல், 9 மணி வரை, 3 மணி நேரமும்; பகல், 12 முதல், மாலை, 3 மணி வரை, 3 மணி நேரமும்; மாலை, 6 முதல், இரவு, 7 மணி வரை மற்றும் 8 முதல், 9 வரை, தலா 1 மணி நேரம் என, மொத்தம், 8 மணி நேரம் மின்வெட்டு வருகிறது.
இன்னொரு முறைப்படி, காலை, 9 மணி முதல், 12; மாலை, 3 முதல் 6; இரவு, 7 முதல், 8 மற்றும் 9
முதல், 10 என, 8 மணி நேரம் இருட்டில் மூழ்கப் போகிறது.மின்வெட்டு நேரம் அதிகரிக்கப்பட்டு விட்டாலும், மக்களிடையே அதிருப்தியை ஏற்படுத்தும் என்பதால், இது வெளிப்படையாக அறிவிக்கப்படவில்லை. குளிர்காலம் முடிந்து, கோடைக்காலம் துவங்கும் நேரம் இது; சும்மாவே, புழுக்கத்துக்கு பஞ்சமிருக்காது. மாணவர்களுக்கான தேர்வுக் காலமும் நெருங்கிவிட்டது; பரீட்சை பதட்டத்தில் இருக்கும் அவர்களுக்கும், இந்த மின்வெட்டு ஓர் இடியாகவே இறங்கும். பற்றாக்குறையும், பயன்பாடும் அதிகரித்து வருவதால், தமிழக அரசுக்கும் வேறு

வழியில்லாதது போல் தான் தெரிகிறது.மாலை, 6 மணிக்கு மேல், வர்த்தக நிறுவனங்கள், ஜெனரேட்டரைத் தான் பயன்படுத்த வேண்டும்; அரசின் மின்சாரத்தைப் பயன்படுத்தக் கூடாது. மின் உற்பத்தி சீராகும் வரை, புதிய இணைப்புகள் வழங்கப்படாது என்பன போன்ற முடிவுகளை மின்வாரியம் எடுத்தால், பற்றாக்குறையை ஓரளவு சமாளிக்க முடியும். அப்பாவி பொதுமக்களும், தொழில் துறையும் பாதிக்கப்படாமல் தடுக்க முடியும்.முதல்வரின் மவுனம் கலையுமா? தமிழகத்துக்கு மின்சாரம் கிடைக்குமா?மின் தட்டுப்பாட்டால் திணறும் ஒரு மாநிலத்தில், புதிய மின் உற்பத்தித் திட்டம் துவக்கப்படாமல் தடுக்கப்படுவது, ஒரு வினோதம் தான். கூடங்குளம் அணுமின் நிலையத்தில் உற்பத்தி துவக்கப்பட்டால், அதில், தமிழகத்தின் பங்காகமட்டும், 925 மெகாவாட் மின்சாரம் கிடைக்கும்.இன்றைய பற்றாக்குறை நிலையில், இது மிகப்பெரிய அளவு. ஆனால், அந்த நிலையத்தைத் துவக்கவிடாமல், ஒரு குறிப்பிட்ட பிரிவினர் முட்டுக்கட்டை போட்டு வருகின்றனர். மத்திய அரசு எவ்வளவோ கெஞ்சிப் பார்த்தும், பேச்சு நடத்தியும், விளக்கங்கள் பல அளித்தும், இவர்கள், தங்கள் பிடிவாதத்தை மட்டும் தளர்த்துவதாக தெரியவில்லை. எல்லா பிரச்னைகளிலும் மன உறுதியோடு நடவடிக்கை எடுக்கும் தமிழக முதல்வர் ஜெயலலிதாவும், இந்த விஷயத்தில் மட்டும் ஏன் மவுனம் காக்கிறார் என்பது, புரியாத புதிராக இருக்கிறது. ஒரு படி மேலே போய், "முதல்வரின் மவுனத்தில் உள்நோக்கம் இருக்கிறது' என்றே, தி.மு.., குற்றம் சாட்டிவிட்டது. அப்படியும், அவரது மவுனம் கலையவில்லை.முதல்வரின் மவுனம் கலையுமா? தமிழகத்துக்கு மின்சாரம் கிடைக்குமா?
-
நமது சிறப்பு நிருபர் -

நன்றி தினமலர்

Tuesday, February 7, 2012

உடலை ஸ்லிம் ஆக்கும் இந்திய உணவுகள்

மஞ்சள்

இந்திய உணவுகளில் மஞ்சளுக்கு தனி மகத்துவம் உண்டு. மருத்துவ குணம் நிறைந்த மஞ்சள் கொழுப்பு சத்தை குறைக்க வல்லது. கெட்ட கொழுப்பினை குறைத்து உடல் பருமனில் இருந்து உடலை பாதுகாக்கிறது. இதனால் உயர் ரத்த அழுத்தம் ஏற்படாமல் தடுக்கிறது. நோய் எதிர்ப்பு சக்தி அதிகம் கொண்ட மஞ்சள் கொழுப்பு சக்தியை குறைப்பதில் முக்கிய பங்குவகிக்கிறது. இதனால் இதயநோய் ஏற்படாமல் பாதுகாக்கப்படுகிறது.

கொத்தமல்லி

உடலின் கொழுப்பை குறைப்பதில் கொத்தமல்லிக்கு சிறந்த பங்கு உண்டு. உண்ட உணவை ஜீரணப்பதில் கொத்தமல்லி சிறந்த மூலிகையாக செயல்படுகிறது. உடலில் உள்ள தேவையற்ற கெட்ட கொழுப்புகளை எரித்து உடலை ஸ்லிம் ஆக்குகிறது.

கறிவேப்பிலை

உடலின் கொழுப்பை குறைப்பதில் கறிவேப்பிலை முக்கிய பங்கு வகிக்கிறது. கறிவேப்பிலையில் டாக்ஸின்கள் உள்ளன. தினமும் 8 முதல் 10 கறிவேப்பிலைகளை உட்கொண்டால் கொழுப்பு படிப்படியாக குறையும். மோர், காய்கறி சாலட், போன்றவைகளில் தினமும் சேர்த்துக்கொள்ளலாம்.

வெள்ளைப்பூண்டு

கொழுப்பை எரிப்பதில் வெள்ளைப்பூண்டுக்கு முக்கிய பங்குண்டு. இது கெட்ட பாக்டீரியாக்களை அழிக்கும் தன்மை கொண்டது. எனவே இது உடலின் கொழுப்பை குறைப்பதில் முக்கிய பங்கு வகிக்கிறது.

கடுகு எண்ணெய்

சமையல் எண்ணெயானது உடலில் கொழுப்பு சேருவதில் முக்கிய பங்கு வகிக்கிறது. எனவே குறைப்பு கொழுப்பு அமிலங்கள் உள்ள எண்ணெய்களை பயன்படுத்த வேண்டும். கடுகு எண்ணெயில் ஆண்டி ஆக்ஸிடென்ஸ்,வைட்டமின்கள் போன்றவை காணப்படுகின்றன. இது இதயத்திற்கு இதமானது.


முட்டைக்கோஸ்

உடல் கொழுப்பை கட்டுப்படுத்தும் உணவுகளில் முட்டைக்கோஸ் முக்கிய பங்கு வகிக்கிறது. உடல் குறைப்பில் சாலட் வகைகளில் முட்டைக்கோஸ் பயன்படுத்தப்படுகிறது. முட்டைக்கோஸ் உடலில் கொழுப்பு, சர்கரை போன்றவற்றை சரிசமமாக தக்கவைக்கிறது.

பாசிப்பருப்பு

பாசிப்பருப்பில் ஏ,பி,சி, மற்றும் ஈ வைட்டமின்கள் உள்ளன. இதில் கால்சியம், இரும்பு, பொட்டாசியம், உள்ளிட்ட தாது உப்புகள் உள்ளன. இது குறைந்த கொழுப்பு சத்துள்ள உணவு. உணவியல் நிபுணர்கள் உடல்குறைப்பு தொடர்பான உணவாக பாசிப்பருப்பினை பரிந்துரைக்கின்றனர். இது உயர் ரகமான நார்ச்சத்து கொண்டுள்ளது. உடலில் ரத்த அழுத்தம் ஏற்படுவதில் இருந்து பாதுகாக்கிறது.

தேன்

உடல்பருமனை குறைப்பதில் தேனின் பங்கு முக்கியம்மானது. தினமும் காலை நேரத்தில் ஒரு டம்ளர் வெதுவெதுப்பான நீரில் தேன் கலந்து வெறும் வயிற்றில் குடித்தால் உடல் பருமன் குறையும்.

மோர்
உடலுக்கு தேர்வையான நீர் சத்தை அளித்து, கொழுப்பை குறைப்பதில் மோர் முக்கிய பங்கு வகிக்கிறது. தேவையான கலோரிகளை மட்டுமே அளிக்கும் தன்மையுடையது என்பதால் தேவையற்ற கொழுப்பை உடலில் தங்கவிடாது.

சிறு தானியங்கள்

நார்ச்சத்து நிறைந்த கம்பு, சோளம், ராகி, தினை போன்றவை உடம்பில் கொழுப்பை ஏற விடாது. விலைகுறைவானதும் சத்து நிறைந்த்துமான இந்த தானிய உணவுகளையே பண்டைய காலத்தில் உணவாக உட்கொண்டனர்.

பட்டை, கிராம்பு

கறி சமையலுக்கு வாசனைக்காக பயன்படுத்தப்படும் பட்டை, கிராம்பு போன்றவை கொழுப்புச்சத்தை குறைக்க வல்லது. கெட்ட கொழுப்பினை உடம்பில் தங்கவிடாமல் செய்து, டைப் 2 நீரிழிவினை கட்டுப்படுத்துகிறது.

நன்றி தட்ஸ் தமிழ்

Monday, February 6, 2012

தளிர் ஹைக்கூ கவிதைகள்! 4

தளிர் ஹைக்கூ கவிதைகள்!

வானம் வரையும்
வரைபடம்
மின்னல்

பின்னிரவில் எங்கோ
ஒலிக்கும் பாடல்
தாலாட்டு

விரட்ட விரட்ட
விடாமல் துரத்துகிறது
காய்ச்சல்!

அதிகாலையிலும்
வியர்த்தன புற்கள்
பனி!

கை கால்களை உடைத்தும்
சிரித்துக் கொண்டிருந்தார்
பிள்ளையார்!

மழை
பூமிக்கு குடை
காளான்கள்!

பரபரப்பான உலகில்
அமைதியாக நின்றது
சிலை!

விசிறி
ஓய்வு எடுக்கிறது
மின் தடை!
உன் முகத்திலுமா
பருக்கள்
நிலவு!

பூட்டிய வீட்டில்
சிணுங்கல் சத்தம்
தொலைபேசி

யாருக்கு இசைக்கின்றன
இரவு நேரத்தில்
புல்லினங்கள்

கருப்பு போர்வையில்
சிகப்பு பொட்டுக்கள்
நட்சத்திரங்கள்

காலை மாலை
அணிவகுப்பு
எறும்புகள்

நெஞ்சில் ஏறி மிதித்தும்
அழவில்லை அப்பா
குழந்தை

படைப்பு தளிர் அண்ணா சுரேஷ்பாபு.
தங்கள் வருகைக்கு நன்றி! பதிவு குறித்த கருத்துக்களை பகிரலாமே! வாக்களித்து பிரபலபடுத்தலாமே!

 

Sunday, February 5, 2012

மாசானி அம்மா.. எப்படியாவது அவனை மந்திரி பதவிலருந்து தூக்கு!' -அதிமுகவினர் மிளகாய் நேர்த்தி!

பொள்ளாச்சி: 'தாயே.. மாசானி அம்மா... இந்த மந்திரியை எப்படியாவது அமைச்சரவையிலருந்து தூக்கி அருள்புரியனும்...' - பொள்ளாச்சி அருகே மாசானியம்மன் கோயிலில் அதிகமாகக் கேட்கும் அதிமுகவினர் வேண்டுதல் குரல் இது.

அதுவும் சாதாரணமாக அல்ல, மிளகாய் அரைத்துப் பூசி படு தீவிரமாக வேண்டுவதால், அதிமுக மந்திரிகைகள் ஏக கலக்கத்தில் உள்ளனர்.

தமிழக முதல்வர் ஜெயலலிதாவின் 'முன்னாள் உயிர்த்தோழி' சசிகலா பல்வேறு காரணங்களால் போயஸ் கார்டனை விட்டு வெளியேற்றப்பட்டதால், சசிகலா, ராணவன், திவாகர், மகாதேவன், எம்.நடராஜன், பவனிவேல், ராமசந்திரன் ஆகியோரால் பரிந்துரைக்கப்பட்ட அமைச்சர்கள், ஐ.ஏ.எஸ். மற்றும் ஐ.பி.எஸ். அதிகாரிகளை சமீபத்தில் முதல்வர் ஜெயலலிதா அதிரடியாக மாற்றம் செய்து வருகிறார். மேலும், சமீபத்தில், தமிழக அமைச்சரவையில் இருந்து வேலுமணி மற்றும் அக்ரி கிருஷ்ணமூர்த்தி ஆகியோர் நீக்கப்பட்டனர்.

ஆனால், முக்கியமாக எதிர்பார்க்கப்பட்ட பல அமைச்சர்கள் மாற்றம் செய்யப்படவில்லை. இதனால் அதிர்ச்சி அடைந்த அதிமுக நிர்வாகிகள் அமைச்சர்களின் அடாவடி, அத்துமீறல், சட்ட விதி மீறல், திமுகவினருடன் உள்ள தொடர்புகள் குறித்து வழக்கம் போல் போயஸ்கார்டனுக்கு புகார் அனுப்பிவைத்த வண்ணம் உள்ளனர்.

மிளகாய் அரைத்து வழிபாடு

இந்த நிலையில் இதன் உச்ச கட்டமாக தங்களது எதிரிகளாக உள்ள அமைச்சர்களை முதல்வர் ஜெயலலிதா நீக்க கோரி, பொள்ளாச்சி அருகே உள்ள மாசானி அம்மன் கோவிலுக்கு அதிமுகவினர் படையெடுத்து வருகின்றனர். அங்கு மிளகாய் அரைத்து பூசி நேர்த்திகடன் செய்கின்றனர். 'தாயே.. மாசானி அம்மா... இந்த மந்திரியை எப்படியாவது அமைச்சரவையிலருந்து தூக்கி அருள்புரியனும்...' என்று வாய்விட்டு சத்தமாகக் கூறி வேண்டுகின்றனர்.

இவ்வாறு செய்வதால் எதிரிகள் பலம் இழந்து போவார்கள், அழிந்து போவார்கள் என்பதும் ஐதீகம். பொள்ளாச்சி மாசானி அம்மன் கோவிலுக்கு நாளுக்கு நாள் அதிமுகவினர் கூட்டம் அலை மோதுகின்றது. இதனால் ஏராளமானேருக்கு இப்போதே கிலி பிடிக்கத்தொடங்கியுள்ளது.

நன்றி தட்ஸ் தமிழ்

திண்ணை!

திண்ணை!


எட்டாப்பு படிக்கையிலே
ஒரு மாச லீவுக்கு ஒடிடுவோம்
தாத்தா ஊருக்கு!
தாத்தாவோடு கைப்பிடித்து நடக்கையில்
தெருவெல்லாம் வேடிக்கை பார்க்கும்!
திண்ணை வைத்துக் கட்டப்பட்ட
கூடல்வாய் ஓட்டுவீடுகளில் முற்றத்தில்
நிலா முகம் காட்டும்!
ஓடி பிடித்து விளையாட கல்லாங்காய்
கண்ணாமூச்சி எல்லாத்துக்கும் சாட்சியாய்
நிற்கும் திண்ணையில் படுத்திருக்கும் பெரிசுகள்!
மத்தியான போதினிலே திண்ணையிலே சாய்ந்திருக்கும்
பாட்டிமார்கள் கதைக்கும் ஊர் கதைக்கு தனிமவுசு!
எப்பொழுதும் கூட்டமிருக்கும் எதிர்வீட்டுத் திண்ணை!
முப்பொழுதும் அங்கு நடக்கும் ரம்மி!
முன்னிரவு வேளையிலே சிறுசுகளை சேர்த்து
முனியாண்டி கதை சொல்லும் முனியம்மா!
எப்போதும் திண்ணையிலே கால்நீட்டி படுத்திருக்கும்
செல்லம்மாக் கிழவி!
திண்ணையிலே மெத்தைவிரித்து கைவிசிறிக்கொண்டு
விசிறி தூங்கும் ரத்னம் தாத்தா!
ஓவ்வொருவராய் உலகைவிட்டு விடைபெற
இன்று நம்மை விட்டு விடை பெற்றது திண்ணை!
பல ஆண்டுகழித்து பட்டணம் சென்று ஊர் திரும்புகையில்
பல அடுக்குமாடிகள் ஊரிலே நிறைந்திருக்க
பாந்தமான திண்ணை மட்டும் காணவில்லை!
சொந்தங்களையே மறக்கும் நமக்கு
திண்ணையை மறந்ததில் ஆச்சரியமில்லை!
ஆனாலும் என்னவோ செய்தது
திண்ணை இல்லா கிராமங்களை பார்க்கையில்!
Related Posts Plugin for WordPress, Blogger...