Sunday, July 1, 2012

தளிரின் சென்ரியுவாய் திருக்குறள்கள் 21- 30

 தமிழ் தோட்டம் எனும் தளத்தில் திருக்குறளுக்கு சென்ரியு எழுதி வருகிறோம். திருக்குறளை எளிதில் புரிய வைத்தல் இதன் நோக்கம்! நமது வலைப்பூவில் ஏற்கனவே இருபது திருக்குறள் சென்ரியூக்கள் பதிவிடப்பட்டது. இப்போது 21லிருந்து 30 திருக்குறளுக்கு சென்ரியு பதிவிட்டுள்ளேன். உங்கள் கருத்துக்களை எதிர்பார்க்கிறேன்! நன்றி!



குறள் 21:
ஒழுக்கத்து நீத்தார் பெருமை விழுப்பத்து
வேண்டும் பனுவல் துணிவு
கலைஞர் உரை:
ஒழுக்கத்தில் உறுதியான துறவிகளின் பெருமை, சான்றோர் நூலில் விருப்பமுடனும், உயர்வாகவும் இடம் பெறும்.
மு. உரை:
ஒழுக்கத்தில் நிலைத்து நின்று பற்று விட்டவர்களின் பெருமையைச் சிறந்ததாக போற்றி கூறுவதே நூல்களின் துணிவாகும்.
சாலமன் பாப்பையா உரை:
தமக்குரிய ஒழுக்கத்தில் வாழ்ந்து, ஆசைகளை அறுத்து, உயர்ந்த மேன்மக்களின் பெருமையே, சிறந்தனவற்றுள் சிறந்தது என்று நூல்கள் சொல்கின்றன.

தளிர் சென்ரியு


நிலையான ஒழுக்கம்
நிலைத்து நிற்கும்
சான்றோர்!

ஒழுக்கத்தில் நிலையாக நிற்பவர்கள் சான்றோராய் உலகில் நிலைத்து நிற்பர்.

பற்றறுத்து
பற்றுவைப்போர்
சான்றோர்!

ஆசையை அகற்றி ஒழுக்கத்தில் பற்று வைப்போர் சான்றோர்

குறள் 22:
துறந்தார் பெருமை துணைக்கூறின் வையத்து
இறந்தாரை எண்ணிக்கொண் டற்று
கலைஞர் உரை:
உலகில் இறந்தவர்களின் எண்ணிக்கை எவ்வளவு என்று கூற முடியுமா? அதுபோலத்தான் உண்மையாகவே பற்றுகளைத் துறந்த உத்தமர்களின் பெருமையையும் அளவிடவே முடியாது.
மு. உரை:
பற்றுக்களைத் துறந்தவர்களின் பெருமையை அளந்து கூறுதல், உலகத்தில் இதுவரை பிறந்து இறந்தவர்களை கணக்கிடுவதைப்போன்றது.
சாலமன் பாப்பையா உரை:
ஆசைகளை விட்டு விலகியவரின் பெருமைக்கு, எண்ணிக்கையால் அளவு கூறுவது, இந்த உலகத்தில் இறந்து போனவர்களின் எண்ணிக்கையை எல்லாம் எண்ணுவது போலாகும்.


தளிர் சென்ரியூவாய் திருக்குறள் 22

எண்ணில் அடங்கா
மண்ணில் துறந்தோர்
பெருமை!

இந்த மண்ணில் துறந்தவரின் பெருமையை எண்ணில் அளவிட முடியாது

அளவு கோலில்லை
ஆசை
துறந்தவர்களுக்கு!

ஆசையை துறந்த துறவிகளுக்கு அளவு கோல் இல்லை!

குறள் 23:
இருமை வகைதெரிந்து ஈண்டுஅறம் பூண்டார்
பெருமை பிறங்கிற்று உலகு
கலைஞர் உரை:
நன்மை எது, தீமை எது என்பதை ஆய்ந்தறிந்து நன்மைகளை மேற்கொள்பவர்களே உலகில் பெருமைக்குரியவர்களாவார்கள்.
மு. உரை:
பிறப்பு வீடு என்பன போல் இரண்டிரண்டாக உள்ளவைகளின் கூறுபாடுகளை ஆராய்ந்தறிந்து அறத்தை மேற்கொண்டவரின் பெருமையே உலகத்தில் உயர்ந்தது.
சாலமன் பாப்பையா உரை:
இம்மையின் துன்பத்தையும் மறுமையின் இன்பத்தையும் அறிந்து, மெய் உணர்ந்து, ஆசைகள் அறுத்து எறியும் அறத்தைச்செய்தவரின் பெருமையே, இவ்வுலகில் உயர்ந்து விளங்குகிறது.


தளிரின் சென்ரியு


நன்று தீதில்
நலத்தை காண்பவன்
நல்லோன்!

நனமை தீமை இரண்டிலும் நல்லதை எடுத்துக் கொள்பவன் நல்லவனாய் வணங்கப்படுவான்!

குறள் 24:
உரனென்னும் தோட்டியான் ஓரைந்தும் காப்பான்
வரனென்னும் வைப்பிற்கோர் வித்தது
கலைஞர் உரை:
உறுதியென்ற அங்குசம் கொண்டு, ஐம்பொறிகளையும் அடக்கிக் காப்பவன், துறவறம் எனும் நிலத்திற்கு ஏற்ற விதையாவான்.
மு. உரை:
அறிவு என்னும் கருவியினால் ஐம்பொறிகளாகிய யானைகளை அடக்கி காக்க வல்லவன், மேலான வீட்டிற்கு விதை போன்றவன்.
சாலமன் பாப்பையா உரை:
மெய், வாய்,கண், மூக்கு, செவி என்னும் ஐந்து யானைகளும் தத்தம் புலன்கள் ஆகிய ஊறு, சுவை, ஒளி,
நாற்றம், ஓசை ஆகியவற்றின் மேல் செல்லாமல், அவற்றை மன உறுதி என்னும் அங்குசத்தால் காப்பவன் எல்லாவற்றிலும் சிறந்ததாகிய வீட்டுலகிற்கு ஒருவிதை ஆவான்.


தளிரின் சென்ரியு

மனம் கட்டினால்
வசமாகும்
வீடு பேறு.

மன அடக்கம் நல்கிடும் துறவறம்.

புலனொடுக்கி
வலம் வறின் வாய்க்கும்
நல்லறம்!

ஐம்புலன்களை அடக்கி ஆள்பவனுக்கு துறவறம் கைகூடும்


குறள் 25:
ஐந்தவித்தான் ஆற்றல் அகல்விசும்பு ளார்கோமான்
இந்திரனே சாலுங் கரி
கலைஞர் உரை:
புலன்களை அடக்க முடியாமல் வழிதவறிச் சென்றிடும் மனிதனுக்குச் சான்றாக இந்திரன் விளங்கி, ஐம்புலன்களால் ஏற்படும் ஆசைகளைக் கட்டுப்படுத்தியதால் வான்புகழ் கொண்டவர்களின் ஆற்றலை எடுத்துக் காட்டுகிறான்.
மு. உரை:
ஐந்து புலன்களாலாகும் ஆசைகளை ஒழித்தவனுடைய வல்லமைக்கு, வானுலகத்தாரின் தலைவனாகிய இந்திரனே போதுமான சான்று ஆவான்.
சாலமன் பாப்பையா உரை:
அகன்ற வானத்து வாழ்பவரின் இறைவனாகிய இந்திரனே, புலன்வழிப் பெருகும் ஆசை ஐந்தையும் அறுத்தவனின் வலிமைக்குத் தகுந்த சான்று ஆவான்.


தளிரின் சென்ரியு


ஐம்பொறிகளை
ஐயிக்கியவன்
ஐயன்.

ஐம்புலன்களை அடக்கியவன் உலகின் தலைவன்.


குறள் 26:
செயற்கரிய செய்வார் பெரியர் சிறியர்
செயற்கரிய செய்கலா தார்.
கலைஞர் உரை:
பெருமை தரும் செயல்களைப் புரிவோரைப் பெரியோர் என்றும், சிறுமையான செயல்களையன்றிப் பெருமைக்குரிய செயல்களைச் செய்யாதவர்களைச் சிறியோர் என்றும் வரையறுத்துவிட முடியும்.
மு. உரை:
செய்வதற்கு அருமையான செயல்களை செய்ய வல்லவரே பெரியோர். செய்வதற்கு அரிய செயல்களைச் செய்யமாட்டாதவர் சிறியோர்.
சாலமன் பாப்பையா உரை:
பிறர் செய்வதற்கு முடியாத செயல்களைச் செய்பவரே மேன்மக்கள்; செய்ய முடியாதவரோ சிறியவரே.


தளிரின் சென்ரியு

இல்லாதவனிடம்
இருக்கின்றது
இரக்கம்.

ஏழைகளிடம் இரக்கம் எனும் உணர்வு மிகுதி

பெரியோன் சிறியோன்
அளவுகோல்
சீரிய செயல்!

பெரியவர் சிறியவர் என்பது அவர்களின் செயலில் உள்ளது.


குறள் 27:
சுவைஒளி ஊறுஓசை நாற்றமென ஐந்தின்
வகைதெரிவான் கட்டே உலகு.
கலைஞர் உரை:
ஐம்புலன்களின் இயல்பை உணர்ந்து அவற்றை அடக்கியாளும் திறன் கொண்டவனையே உலகம் போற்றும்.
மு. உரை:
சுவை, ஒளி, ஊறு, ஓசை, நாற்றம் என்று சொல்லப்படும் ஐந்தின் வகைகளையும் ஆராய்ந்து அறிய வல்லவனுடைய அறிவில் உள்ளது உலகம்.
சாலமன் பாப்பையா உரை:
சுவை, ஒளி, ஊறு, ஓசை, நாற்றம் என்று கூறப்படும் ஐந்து புலன்களின் வழிப் பிறக்கும் ஆசைகளை அறுத்து எறிபவனின் வசப்பட்டதே இவ்வுலகம்.


தளிரின் சென்ரியு

பற்றறுத்தால்
பற்றிக் கொள்ளும்
துறவறம்.

உலகப் பற்றை விட்டால் துறவறம் பற்றிக் கொள்ளும்.

ஐஞ்சுவை விலக்கின்
ஆழியும்
வசமாகும்.

ஐந்து சுவைகளை விலக்கினால் உலகமும் அவன் வசமாகும்


குறள் 28:
நிறைமொழி மாந்தர் பெருமை நிலத்து
மறைமொழி காட்டி விடும்.
கலைஞர் உரை:
சான்றோர்களின் பெருமையை, இந்த உலகில் அழியாமல் நிலைத்து நிற்கும் அவர்களது அறவழி நூல்களே எடுத்துக் காட்டும்.
மு. உரை:
பயன் நிறைந்த மொழிகளில் வல்ல சான்றோரின் பெருமையை, உலகத்தில் அழியாமல் விளங்கும் அவர்களுடைய மறைமொழிகளே காட்டிவிடும்.
சாலமன் பாப்பையா உரை:
நிறைவான வாக்குப் பெருமை உடைய மேன் மக்களின் உயர்வை, அவர்கள் இவ்வுலகில் சொன்ன மந்திரச் சொற்களே அடையாளம் காட்டிவிடும்.


தளிரின் சென்ரியுவாய் திருக்குறள் 28

நில்லா உலகில்
நிலைப்பது
நிறை மொழி!

அழியும் உலகில் அழியாமலிருப்பது சான்றோர்களின் நிறைவான நூல்களே!

மாந்தர் மறையினும்
மறைமொழி
மறவாது!

மாந்தர்கள் மறையக் கூடியவர்கள் ஆனால் அவர்கள் படைத்த நல்ல நூல்கள் என்றும் அழியாது.

குறள் 29:
குணமென்னும் குன்றேறி நின்றார் வெகுளி
கணமேயும் காத்தல் அரிது.
கலைஞர் உரை:
குணக்குன்றுகளான பெரியவர்கள் கோபம் கொண்டால் அந்தக் கோபம் அவர்கள் உள்ளத்தில் ஒரு கணம் கூட நிலைத்து நிற்காது.
மு. உரை:
நல்ல பண்புகளாகிய மலையின்மேல் ஏறி நின்ற பெரியோர், ஒரு கணப்பொழுதே சினம் கொள்வார் ஆயினும் அதிலிருந்து ஒருவரைக் காத்தல் அரிதாகும்.
சாலமன் பாப்பையா உரை:
நற்குணங்களாம் சிறுமலை மீது ஏறி நின்ற அம் மேன்மக்கள், தமக்குள் ஒரு கணப்பொழுதும் கோபத்தைக் கொண்டிருப்பது கடினம்.


தளிரின் சென்ரியு


பிறைநிலா
அளவு
பெரியோர் கோபம்

பிறைநிலா சிறிது நேரமே ஒளிருவது போல் பெரியோரின் கோபமும் சிறிது நேரமே இருக்கும்.


குறள் 30:
அந்தணர் என்போர் அறவோர்மற் றெவ்வுயிர்க்கும்
செந்தண்மை பூண்டொழுக லான்.
கலைஞர் உரை:
அனைத்து உயிர்களிடத்திலும் அன்புகொண்டு அருள் பொழியும் சான்றோர் எவராயினும் அவர் அந்தணர் எனப்படுவார்.
மு. உரை:
எல்லா உயிர்களிடத்திலும் செம்மையான அருளை மேற்கொண்டு ஒழுகுவதால், அறவோரே அந்தணர் எனப்படுவோர் ஆவர்.
சாலமன் பாப்பையா உரை:
எல்லா உயிர்களிடத்திலும் இரக்கம் கொண்டு வாழ்பவரே அறவோர்; அவரே அந்தணர்.


தளிரின் சென்ரியு

அறத்தை
மறக்காதோர்
அந்தணர்.

அறம் எனும் தர்மத்தை கடைபிடிப்போரே அந்தணர்.

எல்லோர் இன்பம்
எப்பொழுதும் விரும்புபவன்
அந்தணன்.

எல்லோரும் நலமாக இன்பமாக இருக்க வேண்டுபவனே அந்தணன்.


தங்கள் வருகைக்கு நன்றி! பதிவு குறித்த கருத்துக்களை பகிருங்கள்!


No comments:

Post a Comment

Related Posts Plugin for WordPress, Blogger...