Wednesday, December 28, 2011

நாடு முழுவதும் விளைச்சல் அதிகரிப்பு... விலையை குறைக்க மறுக்கும் 'சில்லரைகள்'!

சென்னை: இந்தியா முழுவதும் விளைச்சல் அதிகரிப்பால், அனைத்து வகை மளிகைப் பொருள்களின் கொள்முதல் விலையும் குறைந்துள்ளது. ஆனால் உள்ளூரில் சில்லறை வியாபாரிகள் கொஞ்சம் கூட விலையைக் குறைக்காமல் மக்களை ஏமாற்றி வருகின்றனர்.

அனைத்து மளிகை பொருட்களின் கொள்முதல் விலையும் 30 சதவீதம் முதல் 40 சதவீதம் வரை குறைந்திருப்பது குறிப்பிடத்தக்கது. ஆனால் சில்லறை வர்த்தகர்கள் ஒரு சதவீதம் கூட விலையைக் குறைக்காமல் விற்பனை செய்து வருகின்றனர்.

இந்த ஆண்டு இந்தியா முழுவதும் பருவமழை விவசாயத்திற்கு ஏற்றப்படி நன்றாக பெய்துள்ளது. இதனால் துவரம்பருப்பு, கரும்பு, மல்லி, உளுந்து, மஞ்சள், பூண்டு உள்பட அனைத்து பொருட்களின் விளைச்சலும் அதிகரித்து உள்ளது. கடந்த மாதம் ஒரு கிலோ குண்டு மிளகாய்வத்தல் ரூ.220-க்கு விற்பனையானது. நீள மிளகாய் கிலோ ரூ 130 வரை விற்பனையானது.

பூண்டு ரூ 140 வரை விற்பனையானது.

இப்போது எக்கச்சக்க விளைச்சல் இருந்த போதும், எந்தப் பொருளின் விலையும் குறையவில்லை. மிளகாய், பூண்டு போன்றவை இப்போதும் கிட்டத்தட்ட இதே விலைக்கு விற்பனை செய்யப்படுகின்றன.

கரும்பு விளைச்சல் பெருகி, சர்க்கரை உற்பத்தி அதிகரித்துள்ளதால், விலை கணிசமாக குறைந்துள்ளது. ஆனால் இன்னமும் சில்லறை விற்பனை கடைகளில் கிலோ ரூ 35 முதல் 40 வரை விற்கப்படுகிறது.

பருப்பு, புளி, தனியா என அனைத்து மளிகைப் பொருள் வரத்தும் அதிகரித்து, கொள்முதல் விலை குறைந்தாலும் சில்லறை மார்க்கெட்டில் விலை உச்சாணிக் கொம்பிலேயே உள்ளது.

சமையல் எண்ணெய் வகைகளின் விலை இன்னும் மோசம். விளைச்சல் அதிகரித்தால் விலை குறைவதுதான் நியதி. ஆனால் வியாபாரிகளின் பேராசை காரணமாக, அனைத்து வகை சமையல் எண்ணெயும் மேலும் விலை உயர்த்தப்பட்டுள்ளது. ஒரு முறை ஏற்றப்பட்ட விலையை எக்காரணம் கொண்டும் குறைக்க விரும்புவதில்லை சில்லரை வர்த்தகர்கள்.

இதுக்குப் பேருதான் 'சில்லரைத்தனமோ'!

நன்றி தட்ஸ் தமிழ்

Tuesday, December 27, 2011

மன அழுத்தமா? உடம்பும் மனசும் குளிர நல்லா குளிங்க!

மன அழுத்தமானது மூளையின் ஆற்றலைக் குறையச் செய்து அல்லது பழுதடையச்செய்து அதனால் சிந்திக்கவோ, செயப்படவோ முடியாமல் செய்துவிடுகிறது. டல்லாக இருக்கும் ஒருவரைப் பார்த்து கேட்டாலே மனசு சரியில்லை என்றுதான் கூறுவார்கள். மனதிற்கும் அழகிற்கும் அத்தனை தொடர்புள்ளது. மனது நன்றாக இருந்தாலே முகத்தில் வசீகரம் தோன்றும் புன்னகை தவழும், அழகும் ஆரோக்கியமும் அதிகரிக்கும். எனவே மன அழுத்தம் ஏற்படாமல் தவிர்க்க நன்றாக குளிக்க வேண்டும் என்கின்றனர் உளவியலாளர்கள். உடலும் மனமும் ஆரோக்கியமாக இருக்க அதுவே வழி என்கின்றனர்.

எண்ணெய் மசாஜ்

‘சனி நீராடு’ என்று நம் முன்னோர்கள் சொல்லிவைத்துள்ளனர். அதன் காரணம் சனிக்கிழமை மட்டுமே குளிப்பது இல்லை. வாரம் ஒருநாள் உடல் முழுக்க எண்ணெய் தேய்த்து நன்றாக குளிர, குளிர குளிக்க வேண்டும் என்பதுதான். இதனால் உடலில் உள்ள சூடு குறையும், உடலும் மனமும் குளிர்ச்சியடையும்.

எண்ணெய் தேய்த்து குளிப்பதன் மூலம் உடம்பில் சேரும் விஷத்தன்மை நீங்கும் என்று ஆயுர்வேதத்தில் கூறப்பட்டுள்ளது. ஒவ்வொருவரின் உடல் வாகிற்கு தகுந்தவாறு அதற்கேற்ப எண்ணெய்களை தேய்த்து குளிக்க வேண்டும். தினமும் லேசாக எண்ணெய் தேய்த்து குளிப்பது நன்மை தரும் என்கின்றனர் மருத்துவர்கள். இதனால் சருமநோய்கள் மறையும், உடல் மெருகு கூடும். புத்துணர்ச்சி ஏற்படுவதோடு, உடலுக்கு ஆரோக்கியம் கிடைக்கும்.

இயற்கை மூலிகைகள்


குளிப்பதற்கு பயன்படுத்தப்படும் சோப்பு, ரசாயன கலப்பு கொண்டது. அதுபோல தலைக்கு தேய்க்கப் பயன்படுத்தப்படும் ஷாம்புவும் எண்ணற்ற ரசாயனங்களை கொண்டுள்ளது. அதற்குப் பதிலாக தேன், பால் கற்றாழைச் சாறு கலந்த கலவையை உடலில் தேய்த்துக்கு குளிக்கலாம். இது உடம்பில் உள்ள அழுக்கை நீக்குவதோடு அழகும், புத்துணர்ச்சியும் தரும். இந்தக் கலவையை பயன்படுத்த முடியாதவர்கள், சிறுபயறு, கடலைமாவு, தேன் கலந்து குளித்தால் சருமம் மெருகேரும். இதனால் மனஅழுத்தம் குறையும் என்கின்றனர் உளவியலாளர்கள்.

பொடுகு நீக்குங்கள்


மன அழுத்தம் தலையையும், தலைமுடியையும், அதிகம் பாதிக்கும். பொடுகு தோன்றி தலை அரிப்பு எடுக்க தொடங்கிவிடும். இதற்கு காரணம் மன அழுத்தமே என்கின்றனர் மருத்துவர்கள். எனவே நாம் தினமும் குளிப்பதைப்போலவே நாம் பயன்படுத்தும், சீப்பு, டவல் போன்றவற்றையும் சுத்தமாக வைத்துக்கொள்ள வேண்டும் என்கின்றனர் மருத்துவர்கள். வாரம் ஒருமுறையாவது சுடுநீரில் போட்டு அவற்றை அலசவேண்டும். இதனால் பொடுகு ஏற்பட வாய்ப்பில்லை என்கின்றனர் மருத்துவர்கள்.

சத்தானதா சாப்பிடுங்க


மனச்சிக்கலால் மலச்சிக்கல் ஏற்படும். இதுவும் ஆரோக்கியம், அழகு குறைவுக்கு காரணமாகும். எனவே நார்ச்சத்து நிறைந்த காய்கறிகளையும், கீரைகள், பழங்களையும் உட்கொள்ள வேண்டும். புடலங்காய், பீர்க்கங்காய், போன்ற காய்கறிகள் அதிக நார்ச்சத்து மிக்கவையாகும். இதனால் உடல் வனப்பு கூடுவதோடு, சருமம் பளபளப்பாகும்.

நன்றி தட்ஸ் தமிழ்

அழிவின் விளிம்பில் சர்க்கஸ் கம்பெனிகள் இனி தாக்குப் பிடிக்க முடியுமா?

இந்தியாவில் சர்க்கஸ் கலைஞர்களுக்கு சலுகை வழங்காமல், அரசு முற்றிலும் புறக்கணிப்பதால், பெரிய சர்க்கஸ் கம்பெனிகள் கூட திவாலாகும் நிலைக்கு தள்ளப்பட்டுள்ளது.
சர்க்கஸ் கலை சாகசம் நிறைந்தது; உயிரைப் பணயம் வைப்பது. அந்தரத்தில் பார் விளையாட்டு, மரண கூண்டுக்குள் பைக் ரேஸ், சிங்கம், புலி, கருஞ்சிறுத்தை என, கொடிய விலங்குகளை சாட்டையின் ஒரு சொடுக்கில் ஆட்டுவிக்கும் சாகசங்கள், பார்வையாளர்களை, "சீட்'டின் நுனிக்கு வரவைக்கும்.
இந்தியாவில் கடந்த, 20 ஆண்டுகளுக்கு முன், நியூ கிராண்ட், அப்போலோ, நேஷனல், கேமல், மகாராஜா, வீனஸ் என, மிகப்பெரிய சர்க்கஸ் கம்பெனிகள் கோலோச்சின. ஒவ்வொரு கம்பெனியை நம்பியும், 350க்கும் குறையாத கலைஞர்கள் இருப்பர். இது தவிர, சின்ன கம்பெனிகள் நூற்றுக்கணக்கில் இருந்தன. இதில், 50 முதல், 75 பேர் இருப்பர்.
சர்க்கசை நம்பி, 25 ஆயிரத்திற்கும் மேற்பட்ட ஆண், பெண் சாகச கலைஞர், தொழிலாளர்கள் வாழ்ந்தனர். ஒரு குடும்பத்தில் தாய், தந்தை, மகன், மகள் ஒரே கம்பெனியில் இருப்பர். சர்க்கஸ் கூடாரம் எங்கெல்லாம் மாறுகிறதோ, அங்கெல்லாம் இடம் மாறுவர்.
இந்திய சர்க்கஸ் கலைஞர்கள், எத்தியோப்பியா, சூடான், எகிப்து, லெபனான், சிரியா, ஈராக், ஈரான், குவைத், ஜோர்டான், கிழக்கு ஆப்பிரிக்கா, இந்தோனேஷியா, சிங்கப்பூர், மலேசியா, இலங்கை போன்ற நாடுகளுக்கும் விமானத்தில் பறந்தனர். அங்குள்ள சர்க்கஸ் கம்பெனியை விடவும், அதிக சாகசம் செய்து புகழ் பெற்றனர்.
கடந்த, 2000ம் ஆண்டு, வன விலங்குகளை சர்க்கசில் பயன்படுத்த தடை விதிக்கப்பட்டதை தொடர்ந்து, சர்க்கஸ் கலைஞர்கள் வாழ்க்கை திசை மாறியுள்ளது. அடுத்த இடி, குழந்தை தொழிலாளர் முறை ஒழிப்புச் சட்டத்தின் வடிவில் வந்தது. இச்சட்டத்தால், சிறுவர், சிறுமியரை பயிற்சியில் ஈடுபடுத்துவது தடை செய்யப்பட்டது. அதனால், சர்க்கஸ் கலைஞர்கள் தங்கள் குழந்தைகளை வேறு தொழில் துறைகளுக்கு அனுப்பத் துவங்கியுள்ளனர்.
இப்போது, 40 கம்பெனிகள் அழிந்து விட்டன, 25 மட்டுமே உள்ளது. சிறிய கம்பெனி முதலாளிகள், சர்க்கஸ் கம்பெனியை வந்த விலைக்கு விற்று விட்டு, வேறு தொழில்கள் செய்து வருகின்றனர். "டிவி,' சினிமா, போன்ற பொழுது போக்கு அம்சங்களாலும், சர்க்கசுக்கு வருவோர் எண்ணிக்கை குறைந்து விட்டது. இதனால், போதிய வருமானம் இல்லை.
சர்க்கஸ் காட்சிகள் நடந்தாலும், நடக்காவிட்டாலும், கலைஞர்கள், பணியாளர்களுக்கு சம்பளம் தந்தாக வேண்டும். யானை, குதிரை, ஒட்டகம், நாய் போன்ற விலங்குகளுக்கு தீனி போட வேண்டும். 200 பேர் வரை உள்ள கம்பெனிக்கு தினமும், 40 ஆயிரம் ரூபாய் செலவாகிறது. தவிர, சர்க்கஸ் கூடார பொருட்களை இடம் மாற்ற, 40 லாரிகளுக்கு வாடகை தர வேண்டும். கூடாரம் அமைக்க ஐந்து நாட்களும், பிரிக்க இரண்டு நாட்களும் ஆகும். இதற்கு, தொழிலாளர்கள் தட்டுப்பாடும் உள்ளது. அதனால் பெரிய கம்பெனிகள் கூட, திவாலாகும் நிலையில் உள்ளது என்கிறார், தி கிரேட் இந்தியன் சர்க்கஸ் ஒருங்கிணைப்பாளர் ஈரோடு பாபு.
சர்க்கஸ் கலைஞர்களுக்கான சலுகைகள் மாநிலத்திற்கு, மாநிலம் மாறும். தமிழகம் போன்ற மாநிலங்கள் அடியோடு, இக்கலைஞர்களை புறக்கணிக்கின்றன. குஜராத், கேரளாவில், மூத்த கலைஞர்களுக்கு பென்ஷன் உண்டு; தமிழகத்தில் இல்லை. எனவே, சர்க்கஸ் கலைஞர்களுக்கு மத்திய, மாநில அரசுகள் சலுகை வழங்க வேண்டும் என்பது, இவர்களது எதிர்பார்ப்பு.

நன்றி தினமலர்

Monday, December 26, 2011

இசை நிகழ்ச்சியை தள்ளிப்போட அல்லது தவிர்க்க முயற்சிக்கிறேன்!- இசைஞானி இளையராஜா

சென்னை: மலையாள நிறுவனமான மலபார் கோல்ட் ஏற்பாடு செய்துள்ள இசை நிகழ்ச்சியை தள்ளிப்போட அல்லது தவிர்க்க முயற்சிக்கிறேன் என்று இசைஞானி இளையராஜா கூறியுள்ளார்.

நாளை மறுதினம் சென்னையில் நேரு உள்விளையாட்டு அரங்கத்தில் மாலை 5.30 மணிக்கு, இசையமைப்பாளர் இளையராஜா பங்கேற்கும் 'என்றென்றும் ராஜா' இசை நிகழ்ச்சி நடக்கிறது.

இந்த நிகழ்ச்சியின் மெயின் ஸ்பான்சர் மலபார் கோல்ட் என்ற கேரள நிறுவனமாகும். இந்த நிறுவனத்தின் விளம்பரங்களிலும் இளையராஜா நடித்துள்ளார். இப்போது ஜெயா டிவியுடன் இணைந்து இந்த நிகழ்ச்சியை நடத்துகிறார்கள்.

இந்த நிகழ்ச்சி குறித்து அறிவிப்பு வெளியானதும், பெரியார் திகவினர் இளையராஜாவின் திநகர் வீட்டு முன்பு குவிந்தனர். முல்லைப் பெரியாறு அணை விவகாரத்தில் தமிழர்களுக்கு எதிராக இருக்கும் கேரள அரசு மற்றும் கேரள வியாபார நிறுவனங்களுக்கு இளையராஜா இசையமைக்கக் கூடாது என்பதை வலியுறுத்தி இளையராஜாவிடம் மனு கொடுப்பதற்காக வந்ததாக அவர்கள் போலீசாரிடம் தெரிவித்தனர்.

அந்த கோரிக்கையை ஏற்றுக் கொண்டு இளையராஜா வீட்டுக்குள் செல்ல பெரியார் திகவினருக்கு அனுமதி அளிக்கப்பட்டது. இளையராஜா ஊரில் இல்லாததால், அவரது உதவியாளர் மனுவைப் பெற்றுக் கொண்டார்.

இந்த விவரம் வெளிநாட்டில் இருந்த இளையராஜாவிடம் போன் மூலம் தெரிவிக்கப்பட்டது. உடனே திநகர் உதவி ஆணையர் தமிழ்செல்வனை தொடர்பு கொண்ட இளையராஜா, "இந்த இசை நிகழ்ச்சி நடத்துவதற்கான ஒப்பந்தம் கடந்த 6 மாதங்களுக்கு முன்பாகவே கையொப்பம் ஆகிவிட்டது. என் துணைவியாரின் மரணத்திற்கு பிறகு, எந்த நிகழ்ச்சிக்கும் நான் ஒப்புக் கொள்ளவில்லை. யாருடைய விளம்பரப் படத்திலும் தோன்றவோ இசையமைக்கவோ இல்லை.

இப்போது இந்த நிகழ்ச்சியை நடத்துவது சிக்கலாகியுள்ளது. இந்த நிகழ்ச்சியை நடத்தினால் தமிழர்களின், தமிழ் அமைப்புகளின் பலமான கண்டனத்துக்கு ஆளாவேன் என்பது எனக்கும் தெரியும். அவர்களின் உணர்வுகளை நான் புரிந்து கொள்கிறேன். மதிக்கிறேன்.

எனவே எப்படியாவது நான் நிகழ்ச்சியை தள்ளிப்போடுவதற்கோ, கலந்து கொள்ளாமல் தவிர்ப்பதற்கோ ஏற்பாடு செய்கிறேன் என்று போராட்டக்காரர்களிடம் எடுத்துச் சொல்லுங்கள்," என கூறினார்.

இளையராஜாவின் இந்த பதில் தமிழ் உணர்வாளர்களுக்கு திருப்தியளித்துள்ளது. முல்லைப் பெரியாறு தண்ணீரால் பலன் பெறும் தேனி மாவட்டத்தில்தான் ராஜாவின் சொந்த ஊர் பண்ணைப் புரம் உள்ளது குறிப்பிடத்தக்கது.
நன்றி தட்ஸ் தமிழ்

டெண்டுல்கர் மகனின் பேட்டிங், பவுலிங் திறமை-டீன் ஜோன்ஸ் வியப்பு

மெல்போர்ன்: சச்சின் டெண்டுல்கரின் மகன் அர்ஜூனின் கிரிக்கெட் திறமை குறித்து ஆஸ்திரேலிய முன்னாள் வீரர் டீன் ஜோன்ஸ் வியப்பும் பாராட்டும் தெரிவித்துள்ளார். அர்ஜூன் மிகப் பெரிய வீரராக உருவெடுப்பார் என்றும் பாராட்டியுள்ளார் ஜோன்ஸ்.

அரசியல், சினிமாவில் மட்டுமா வாரிசுகள் வர வேண்டும். கிரிக்கெட்டிலும் கூட ஏகப்பட்ட வாரிசுகள் கிட்டத்தட்ட அத்தனை நாடுகளிலுமே உள்ளனர். அந்த வரிசையி்ல் சச்சினின் வாரிசான அர்ஜூன் தந்தையைப் போலவே கிரிக்கெட்டில் இப்போதே பிரமாதப்படுத்தி வருகிறார்.

பேட்டிங்கில் மட்டுமல்லாமல் பந்து வீச்சிலும் அவர் ஜொலிக்கிறார். ஆஸ்திரேலிய சுற்றுப்பயணம் வந்துள்ள சச்சினுடன் அர்ஜூனும் வந்துள்ளார். மெல்போர்ன் மைதானத்தில் வெள்ளிக்கிழமையன்று அவர் தந்தை சச்சின் மற்றும் வீரேந்திர ஷேவாக்குடன் இணைந்து பந்து வீசி, பேட்டிங் செய்து பயிற்சியும் எடுத்தார்.

கிட்டத்தட்ட அரை மணி நேரம், நடந்த இந்த பயிற்சியின்போது சச்சின் தனது மகனுக்கு பந்து வீசினார். அதேபோல அர்ஜூன், ஷேவாக்குக்குப் பந்து வீசினார்.

இந்த பயிற்சியை டீன் ஜோன்ஸ் அமர்ந்திருந்து வேடிக்கை பார்த்து ரசித்தார். பின்னர் இதுகுறித்து அவர் செய்தியாளர்களிடம் பேசுகையில், அசத்துகிறார் அர்ஜூன். அவருடைய தந்தையின் திறமையில் 100ல் ஒரு பகுதியை மட்டும் அவர் வெளிப்படுத்தினால் போதும் மிகப் பெரிய வீரராக முடியும்.

தனது மகனின் கிரிக்கெட் திறமை குறித்து கூர்ந்து கவனித்து வருகிறார் சச்சின் என்று நினைக்கிறேன். சமீபத்தில் அர்ஜூனுடன் நான் பேசியபோது, தான் பள்ளி கிரிக்கெட் போட்டி ஒன்றில் சதம் அடித்தது குறித்தும், ஒரு போட்டியில் 8 விக்கெட் வீழ்த்தியது குறித்தும் அர்ஜூன் சிலாகித்துக் கூறினார்.

அவருக்குள் நல்ல திறமை உள்ளது. நிச்சயம் பெரிய வீரராக வருவார் என நம்புகிறேன் என்றார் ஜோன்ஸ்.

மேலும் அவர் கூறுகையில், அர்ஜூனுக்கு யார் பயிற்சி தருகிறார்கள் என்று எனக்குத் தெரியவில்லை. ஆனால் இதுபோல முக்கிய வீரர்களுடன் அவர் பயிற்சியின்போது உடன் இருந்து கவனித்தாலே போதும் நல்ல பயிற்சி கிடைக்கும் என்றார் ஜோன்ஸ்.

நன்றி தட்ஸ் தமிழ்

Sunday, December 25, 2011

தமிழர்களுக்கும், தமிழக மக்களுக்கும் தமிழனாகிய நான் கடமைப்பட்டுள்ளேன்- ஏ.ஆர்.ரஹ்மான்

டேம் 999 படம் ஆஸ்கர் விருது பெற வாழ்த்தது தெரிவித்தது தொடர்பாக எழுந்துள்ள சர்ச்சை குறித்து இசைப் புயல் ஏ.ஆர்.ரஹ்மான் விளக்கம் தெரிவித்துள்ளார்.

இதுகுறித்து அவர் வெளியிட்டுள்ள அறிக்கை:

சமீபத்தில் டெல்லி ஆக்ராவில் நடைபெற்ற விண்ணைத் தாண்டி வருவாயா படத்தின் இந்திப் பதிப்பான ஏக் தீவானா தா படத்தின் இசை வெளியீட்டு விழாவின்போது நடைபெற்ற பத்திரிக்கையாளர் சந்திப்பில் டேம் 999 ப பாடல்கள் ஆஸ்கர் விருது தேர்வுக்காக பரிந்துரைக்கப்பட்டிருப்பது பற்றி குறிப்பிடும்போது சக இசையமைப்பாளர் என்ற முறையில் ஆவுசுப்பச்சனுக்கு வாழ்த்து தெரிவித்தேன். ஆனால் சிலர் இதனை வேறு விதமாக கூற தொடங்கியுள்ளனர். இது மிகவும் வருத்தமாக இருக்கிறது.

தமிழனாகிய எனக்கு என் வளர்ச்சியில் தமிழக மக்கள் மிகவும் உறுதுணையாகவும், முக்கியத் தூணாகவும் இருந்து வருகிறார்கள். அதற்கு நான் என்றென்றும் கடமைப்பட்டுள்ளேன்.

கடந்த 3 வாரங்களாக நான் ஹாலிவுட் பணியில் அமெரிக்காவில் மூழ்கி இருந்ததால், தமிழ்நாடு, கேரளாவில் நடந்து வரும் முல்லைப் பெரியாறு பிரச்சினை எந்த அளவுக்கு தீவிரமானது என்பதை நான் உணரவில்லை.

இந்தப் பிரச்சினையில் முன்னாள் ஜனாதிபதி திரு. அப்துல் கலாமின் நிலைப்பாட்டினை நான் மதிக்கிறேன்.

இந்தியாவின் வேகமான வளர்ச்சியைப் பார்த்து இன்று உலகமே வியந்து பார்த்துக் கொண்டிருக்கிறது. அதற்கு முக்கியக் காரணம் நமது ஒற்றுமையே...

அதனைக் கட்டிக் காப்பது மிகவும் முக்கியம்.

என் அருமை ரசிகர்களுக்கு எனது கிறிஸ்துமஸ் மற்றும் புத்தாண்டு வாழ்த்துகள் என்று கூறியுள்ளார் ரஹ்மான்.

நன்றி தட்ஸ் தமிழ்

என் இனிய பொன்நிலாவே பகுதி 17

என் இனிய பொன்நிலாவே  பகுதி 17

           ‘ப்ரியம்வதா’

முன்கதை சுருக்கம்}மதுவை பெண் பார்க்க வந்தான் அபிஷேக். உடன் அவனது உறவுக்கார பெண் ஸ்வேதாவும் வந்தாள். அவள் மதுவை வெறுத்தாள்.

சர்வ அலங்காரத்துடன் கையில் காபி டிரேயுடன் வரும் மதுவை எரிச்சலுடன் பார்த்தாள் ஸ்வேதா. எங்கிருந்து வந்து எனக்கு போட்டியாக வந்து தொலைத்தாயாடி? கைக்கு எட்டியது என் வாய்க்கு எட்டாமல் பண்ணிவிட்டாயே? எப்படியாவது அபியை மணந்து பலகோடி சொத்துக்கு சொந்தக் காரி ஆகிவிடலாம் என்று நினைத்த என் ஆசையில் மண் அள்ளி போட்டு விட்டாயே? என்று கறுவிக் கொண்டிருந்தது அவளது மனம்.
  அகத்தின் அழகு முகத்தில் தெரியும் என்று சொல்வார்கள் ஆனால் ஸ்வேதாவின் முகம் அவள் நினைத்த எதையும் வெளிக்காட்டாமல் புன்னகைத்துக் கொண்டு இருந்தது.
 அனைவருக்கும் காபியை தந்து கொண்டிருந்த மதுவிடம் நீ என்னை இங்கு எதிர்பார்க்கவில்லைதானே! எப்படி எதிர்பாராமல் உனக்கு அதிர்ச்சி தந்தேன் பார்த்தாயா? இது இனி தொடரும் என்று பல்லிளித்தாள் ஸ்வேதா!
  சட்டென முகம் மாறினாலும் சுதாரித்துக் கொண்டு  ஆம் நீங்கள் வந்தது எனக்கு எதிர்பாராத அதிர்ச்சிதான்! இதுவே வேறு யாராக இருந்தாலும் வரமாட்டார்கள் நீங்கள் வந்து இந்த ஏழையை கவுரவித்துவிட்டீர்கள் என்று சூசகமாக பதில் உரைத்தாள் மது.
 என்னமாக பேசுகிறாள்! என்று ஒரு கணம் ஸ்வேதாவே பிரமித்துவிட்டாள் இவளிடம் எப்படியும் எச்சரிக்கையாக நடந்து கொள்ள வேண்டும் என்றும் நினைத்துக் கொண்டாள்.
  பெண்பார்க்கும் படலம் இனிதே நடந்து முடிந்தது ஸ்வேதாதான் அசட்டுத்தனமாக ஏதேதோ உளற மனோன்மணி அம்மாள் அவளை அடக்கிவிட்டார். வருகிற தையில் ஒரு நல்ல மூகூர்த்தம் பாருங்கள்! கல்யாணத்தை வைத்துக் கொள்ளலாம் என்றார் அவர்.
   தைமாதத்திலேயா?
ஆம் நல்ல காரியத்தை ஏன் தள்ளி போடவேண்டும்?
இல்லை ஒரு மாதம் தானே இடையில் உள்ளது கல்யாண செலவுகளுக்கு பணம் புரட்ட வேண்டாமா? இழுத்தார் வினாயகம்.
உங்களை யார் செலவு பண்ணச் சொன்னது?
 என்னம்மா சொல்கிறீர்கள்? கல்யாணத்தை நான் தானே நடத்திக் கொடுக்கவேண்டும்? இல்லையென்றால் என் சொந்த பந்தங்கள் நாளைக்கு கேலி பேசுமே என்றார் வினாயகம்.
  கல்யாண செலவை பற்றி நீங்கள் கவலைப் பட வேண்டியதே இல்லை அதையெல்லாம் எங்கள் அபியே பார்த்துக் கொள்வான். நீங்கள் உங்கள் பெண்ணை அழைத்துவந்தால் போதும் என்றாள் மணோன்மனி.
  அதெப்படி அத்தை! பெண் வீட்டார்தானே கல்யாணம் செய்ய வேண்டும்.நல்லபடி செய்ய அவர்களுக்கு அவகாசம் வேண்டாமா? அவசரகதியில் ஏற்பாடுகள் செய்து நாளைக்கு ஒரு குறைஎன்றால் பெண்வீட்டாரைத்தானே சொல்வார்கள் என்றாள் ஸ்வேதா.
  அவளுக்கு இந்த கல்யாணத்தை தள்ளிப் போட்டு பின் எப்படியாவது நிறுத்திவிடவேண்டும் என்று ஆசை. இதுதான் சாக்கு என்று சொல்லவும்,
 ஸ்வேதா உனக்கு எங்கள் குடும்ப வழக்கம் எப்படித் தெரியும்? எதுவும் தெரியாமல் இதில் நீ மூக்கை நுழைக்காதே என்று கடிந்து கொண்டாள் மனொன்மணி. இல்ல அத்தை!
  எப்போதிருந்து நான் உனக்கு அத்தை ஆனேன். கிண்டலாக கேட்டாள் மனோன்மனி.
  அ.. அது வந்து நீங்கள் என் அப்பாவை அண்ணா என்று தானே அழைப்பீர்கள் அப்படியானால் நீங்கள் என் அத்தைதானே!
  சரியாக கண்டுபிடித்தாய் போ! வயதில் மூத்தவரான  உன் அப்பாவை நான் பெயர் சொல்லியா அழைக்க முடியும். மரியாதைக்கு அழைக்கப் போய் நல்ல உறவுமுறை சம்பாதித்துக் கொண்டாயம்மா என்றூ கேலி பேசவும்  ஸ்வேதாவுக்கு தான் ஏன் இங்கு வந்தோம் என்று ஆகிவிட்டது.
  சாரி ஆண்ட்டி! என்றாள்.
 தமிழை விட்டு ஆங்கிலத்திற்கு தாவிவிட்டாய்! சரி போகட்டும் என்னை எப்படியோ அழைத்துக் கொள் ஆனால் என் குடும்ப விசயத்தில் நீ அளவுக்கு அதிகமாக தலையிடாதே அது உனக்கு தெரியாத விசயம் என்று கண்டிப்புடன் கூறினாள் மனொன்மணி.
  இப்படி மூன்றாவது நபர் முன் என்னை அவமானப் படுத்துவதற்கு என்னை அழைக்காமலேயே வந்திருக்கலாம் அல்லவா? கண்களில் நீர் பொங்க கேட்டாள் ஸ்வேதா.
  நல்ல காரியம் நடக்கும் இடத்தில் அழாதே நீ சிறு பெண்! உனக்கும் மதுவின் வயதுதான் இருக்கும். பெரியவர்கள் நாங்கள் பேசிக் கொண்டிருக்கும் சமயம் குறுக்கிடாதே என்பதற்குத் தான் சொன்னேன். மேலும் இவர்கள் மூன்றாவது மனிதர்கள் அல்ல. என் சம்பந்தி வீட்டார். சொல்லப் போனால் உன்னைவிட உறவு அதிகம் ஆகிவிட்டது. எனவே நீ கொஞ்சம் அமைதியாக இருக்கிறாயா? என்றாள் மனொன்மனி.
 ஸ்வேதாவிற்கு பெரும் அவமானம் ஆகிப் போய்விட்டது. எப்படியாவது இந்த பங்ஷனை நிறுத்திவிடலாம் இடையூறு செய்து விடலாம் என்று நினைத்தே அவள் கிளம்பி வந்தது. அது போலவே ஆரம்பம் முதலே குறுக்கீடும் செய்து வந்தாள். ஆனால் இந்த மனோன்மணி பெரும் முட்டுக் கட்டையை போட்டு அவள் வாயை அடைத்துவிட்டாளே!
  எப்படியாவது அபியை மணந்து கொண்டு இவள் கொட்டத்தை அடக்கி கொட்டிலில் அடைக்கவேண்டுமே இந்த கல்யாணம் எப்படியாவது நின்று விடக்கூடாதா என்று பிரார்த்தித்து கொண்டாள் அவள்.
 கடவுள் இப்படிப்பட்ட  வேண்டுகோளை லட்சியம் செய்யவில்லை போலும். அதனால் அவள் வேண்டிக் கொண்டது பலிக்கவில்லை. மனொன்மணி அம்மாள் தொடர்ந்து பேசினாள். சம்பந்தி நீங்கள் கல்யாண செலவைப் பற்றி கவலைப்பட வேண்டாம். உங்கள் மகளுக்கு நீங்கள் சவரனாய் இழைக்க வேண்டியதில்லை. எங்கள் குடும்பத்திற்கு ஒரு குலவிளக்குத்தான் தேவை.நகை பொம்மை தேவை இல்லை உங்களுடைய நிலவரம் பற்றி எனக்கு நன்றாகத் தெரியும். அதனால் உங்கள் வசதிப்படி எவ்வளவு முடியுமோ அவ்வளவு செய்தால் போதும்.
 கல்யாண செலவு எங்களுடையது!. எங்கள் வழக்கப்படி பிள்ளை வீட்டார்தான் கல்யாணம் செய்து கொள்வார்கள். நீங்கள் பெண்ணை அழைத்து வந்தால் போதுமானது. என்றாள்.

  இல்லையம்மா இது நன்றாக இருக்குமா? நாளைக்கு யாராவது கூறினால் அசிங்கமாகிவிடாதா? என்றார் வினாயகம்.
 யாருக்கு நாம் பயப்பட வேண்டும். எங்கள் வழக்கப்படி நாங்கள் திருமணம் செய்து கொள்ள போகிறோம். இதில் யார் என்ன சொல்லப் போகிறார்கள். நீங்கள் எதற்கும் கவலைப் படவேண்டாம். நாளைக்கு ஜோசியரை கலந்து பேசிவிட்டு நாள் குறித்து அனுப்புகிறேன். இப்போது எங்களுக்கு தேவை உங்கள் சம்மதம்தான் என்றார் மனோன்மணி.
  சரிம்மா அப்போது உங்கள் இஷ்டம்! என்றார் வினாயகம்.
ஐயோ! இந்த கல்யாணம் இவ்வளவு சீக்கிரம் நடந்து விடுகிறதே என்று பொறுமினாள் ஸ்வேதா.
                      நிலவு வளரும்(17)

தங்கள் வருகைக்கு நன்றி! பதிவுகுறித்த கருத்துக்களை பகிரலாமே! வாக்களித்து பிரபலபடுத்தலாமே

Saturday, December 24, 2011

மீண்டு வரணும், மீண்டும் வரணும் : பி.சி.ஸ்ரீராம்க்கு ஓர் உருக்கமான வேண்டுகோள்!

தமிழ் சினிமா ரசிகர்களுக்கு தன் கேமரா மூலம், ஓவியமாய் கண்களுக்கு விருந்து படைத்தவர் பி.சி.ஸ்ரீராம். மீண்டும் ஒரு காதல் கதையில் தொடங்கி மவுன ராகம், நாயகன், அக்னி நட்சத்திரம், தேவர் மகன், குருதி புனல், அலைபாயுதே, பா, என்று அவர் கேமரா தூக்கிய அத்தனை படங்களும் மாபெரும் வெற்றி பெற்றவை. அதிலும் அவர் ஒளிப்பதிவில் வந்த குருதிபுனல் படம் ஆஸ்கர் விருதுக்கு பரிந்துரைக்கப்பட்டது குறுப்பிடத்தக்கது. உலக அளவில் தமிழ் சினிமாவை பேச வைத்த பெருமை இவருக்கு உண்டு. இவரிடம் உதவியாளர்களாக இருந்து இப்போது, தமிழ் சினிமாவில் கலக்கி வரும் நீரவ் ஷா, கே.வி.ஆனந்த், கதிர், பாலசுப்ரமணியம், திரு, வேல்ராஜ், பிரபு என்ற பல பிரபலங்களையும் உருவாக்கிய பெருமை இவருக்கு உண்டு.

சாதனைகள் பல படைத்தாலும், பி.சி.யின் வாழ்விலும் ஒரு சோகம் எட்டி பார்த்துள்ளது. சமீபத்தில் இவரது ஒரே ஆசை மகள் இறந்து போனது, அவரை வீட்டுக்குள் முடக்கி வைத்துள்ளது. அதிலிருந்து மீள முடியாமல் ரொம்பவே தவித்து வருகிறார். கற்பனை குதிரை கட்டி, காமிராவை தூக்கி ஓடியவர், இன்று கண் கலங்கி நிற்கிறார்.  வார்த்தைகள் இல்லாமல் வலிகளோடு வாழும் பி.சி.யை நாம் சந்தித்த போது, நம்மாலும் உணர முடிந்தது. சமீபத்தில் தவிர்க்க முடியாமல் இளையராஜாவை வைத்து, ஒரு விளம்பரம் இவரால் எடுக்கப்பட்டுள்ளது. அழகும், நேர்த்தியும் குறையாமல் அப்படியே ஜொலிக்கிறது அந்த விளம்பரம்.

நாம் அவரிடம் பேசியபோது, வார்த்தைகள் முட்டி, வலிகளோடு பேசினார். நான் நிறைய படங்கள் பண்ணியிருக்கேன், விளம்பரமும் எடுத்திருக்கேன். படங்கள் சிலவற்றை சீக்கிரம் எடுத்து முடிச்சிருக்கேன். பா படத்தை 80 நாளில் எடுத்தேன், ஆனா அதற்கான பேப்பர் வொர்க் கிட்டத்தட்ட நான்கு மாதம் பண்ணிணேன். இப்பெல்லாம் விஞ்ஞானம் ரொம்பவே முன்னேறிடுச்சு. ரெட் ஒன், எஸ்12கே., என்று ஏகப்பட்டது வந்திடுச்சு. என்னதான் லேட்டஸ்ட் வந்தாலும் அதில் தரம் ரொம்ப முக்கியம். மக்கள் இப்ப ரொம்ப தெளிவா இருக்காங்க, நல்லத ரசிக்கிறாங்க, எல்லாத்துக்கும் மேல கற்பனைத்திறன் ரொம்ப முக்கியம்.

நான் ஜோதிகாவை வைத்து காபி விளம்பரத்தை ரெண்டு நாள் சூட் பண்ணிணேன். ஆனா அதற்கான பேப்பர் வொர்க் பல நாள். இப்ப கூட ராஜாவாவை வைத்து ஒரு விளம்பரம் பண்ணிணேன். ஒரு நாள் சூட் தான், ஆனா பேப்பர் வொர்க் நிறைய பண்ணிணேன். எந்த வேலையாக இருந்தாலும் கான்செப்ட் புரிஞ்சு வேலை பார்க்கணும். அப்பன்னாத்தான் ரீச்சாகும். விளம்பரத்தை மக்கள் கிட்ட சேர்க்க போட்டிகள் நிறைய இருக்கு, அதுக்கு தரமும் ரொம்ப முக்கியம் என்றவரிடம் மீண்டும் எப்ப சார் படத்தில வொர்க் பண்ணுவீங்க என்று கேட்டால், ஒரு அமைதி  மட்டுமே பதிலாய் வருகிறது.

கலரையும், காட்சிகளையும் கவிதை போல அமைத்த பி.சி.ஸ்ரீராம் மீண்டும் சினிமாவிற்கு வந்தால், தமிழ் சினிமா அடுத்த கட்டம் செல்ல அவர் பேர் உதவியாய் இருப்பார்.  இன்னும் பலர் அவரை போல, தமிழ் சினிமாவை உலகத்தரத்திற்கு எடுத்து போவர் என்பது எள் அளவும் சந்தேகம் இல்லை.

thanks to dinamalar.

ரஜினிக்குப் பின் அஜீத்... சத்தமில்லாமல் ஒரு சாதனை!

ஒழுங்காக ஒரு வெற்றிப்படம் கூட தரமுடியாத நடிகர்கள் அடுத்த சூப்பர் ஸ்டார் நானாக்கும் என்று விரலாட்டிக் கொண்டிருக்க, சத்தமில்லாமல் ஒரு சாதனை செய்துவிட்டு அமைதி காக்கிறார் அஜீத்.

இவரும் கூட ஒரு காலத்தில் நானே அடுத்த சூப்பர் ஸ்டார் என்று சொன்னவர்தான். ஆனால் பின்னாளில் சூப்பர் ஸ்டார் என்ற அந்தஸ்தை அடைய எத்தனை பாடுகள் படவேண்டும், எத்தனை வெற்றிகள் தரவேண்டும், அந்த வெற்றிகளின் பிரமாண்டம் எப்படி இருக்க வேண்டும் என்பது புரிந்து அமைதியாகிவிட்டார் (இப்போது சூப்பர் ஸ்டார் ரஜினியிடம் ஒரு படத்திலாவது அடிவாங்கினால் போதும் என்கிறார்!)

அஜீத் நடிக்க மங்காத்தா படம் மொத்தம் ரூ 130 கோடியை வசூலித்துள்ளதாக பாக்ஸ் ஆபீஸ் விவரங்கள் தெரிவிக்கின்றன. சன் பிக்சர்ஸ் நிறுவனமும் இதனை உறுதிப்படுத்தியுள்ளது. இதன் மூலம் ரஜினிக்கு அடுத்து அதிக வசூல் தரும் நாயகன் என்ற அந்தஸ்து அஜீத்துக்கு கிடைத்துள்ளது.

இந்த வெற்றி மற்றும் வசூல் காரணமாக, அஜீத்தின் அடுத்த படத்துக்கான வர்த்தகம் எகிறிவிட்டது. சன் பிக்சர்ஸ் ஒரு பக்கம், வேறு போட்டி நிறுவனங்கள் மறுபக்கம் என அந்தப் படத்தை வாங்கப் போட்டி போடுகின்றன!

நன்றி தட்ஸ் தமிழ்

எம்ஜிஆர்... ஒரு நிகரில்லா மனிதரின் நினைவு நாள்!

உன்னை நம்பி எம்புள்ளைய படிக்க வச்சேன்... நீ வேலை தருவியா மாட்டியா?' - ஏதோ ஒரு குக்கிராமத்திலிருந்து கோபத்துடன் ராமாவரம் தோட்டத்துக்கு வந்து, எந்தக் கட்டுக்காவலுமில்லாமல் வீட்டுக்குள் நுழைந்து எம்ஜிஆரிடம் நேருக்கு நேர் சண்டை பிடிக்கிறார் ஒரு தந்தை. அதைப் புன்னகையுடன் கேட்டுக் கொண்ட எம்ஜிஆர், 'போங்க... முதல்ல சாப்பிட்டுவிட்டு வாங்க... பேசலாம்' என்கிறார். ஆனால் அந்த தந்தை கோபம் தணியாமல், 'இல்ல, நீ எனக்கு பதில் சொல்லு. எம்புள்ளைக்கு வேலை தருவியா மாட்டியா?'

'போய் சாப்பிட்டுவிட்டு வாங்க. அடுத்த மாசம் உங்க கையில அரசாங்க சம்பளம் இருக்கும்' என மீண்டும் அதே மாறாத புன்னகையுடன் தலைவர் சொல்ல, அதன் பிறகு சமாதானமாகி சாப்பிட்டுவிட்டு வருகிறார் அந்த பெரியவர்.

உடனே, அவரிடம் விவரங்களை வாங்கிக் கொண்ட எம்ஜிஆர், கையில் ஐந்நூறு ரூபாய் கொடுத்து, பத்திரமாக அவரை பஸ் ஏற்றி அனுப்புமாறு உதவியாளருக்கு கட்டளை இடுகிறார். அன்று அவர் தமிழகத்தின் முதல்வர்... அதுவும் இரண்டாவது முறையாகப் பதவியேற்றிருக்கிறார்!

அடுத்த மாதம் மீண்டும் அதே தந்தை ராமாவரம் தோட்டத்துக்கு வந்தார். இந்த முறை அவர் கையில் மாலை, தேங்காய், பழங்கள்... கூடவே அரசாங்க சம்பள கவர். புன்னகையுடன் அவரை வரவேற்ற எம்ஜிஆர், இப்போதும் அவரை சாப்பிட வைக்கிறார். தாம் கொண்டு வந்ததை எம்ஜிஆர் என்ற கடவுளின் முன் வைத்து கும்பிட்டுவிட்டுப் போகிறார் அந்த தந்தை.

அந்தக் குடும்பம் முதல் முதலாகப் பெற்ற அரசு சம்பளம் அது. இன்றும் அந்தப் பெரியவர் இருக்கிறார். அவர் மனசுக்குள், அந்த குடும்பத்துக்குள், அவர்கள் பூஜையறையில் அதே ஈரத்துடன் வாழ்ந்து கொண்டிருக்கிறார் எம்ஜிஆர். இப்படி நிறைய தந்தைகள், குடும்பங்கள் தமிழ்நாட்டில் உள்ளன!

இன்றைக்கு ஒரு மாநில முதல்வரை யாராவது இப்படிச் சந்தித்துவிட முடியுமா... உரிமையாக சண்டை போட்டு தனக்கு வேண்டியதைப் பெற முடியுமா... அல்லது இதையெல்லாம் அனுமதிக்கும் பெரிய மனசுதான் யாருக்காவது வருமா?

மனிதருள் புனிதர் என்ற பெயர் யாருக்குப் பொருந்துகிறதோ இல்லையோ.... சமகால சரித்திர நாயகரான புரட்சித் தலைவர், பொன் மனச் செம்மல், மக்கள் திலகம் எம்ஜிஆருக்கு மிகப் பொருந்தும்... அவர் கருணைப் பார்வையில் நல்ல கல்வியும் வளமான வாழ்க்கையும் பெற்றவர்கள் எண்ணிக்கை கொஞ்சமல்ல.

ஒரு மனிதன் கடவுளை வேண்டுவது பெரும்பாலும் இந்த இரண்டிற்காகவும்தான். அந்த வகையில் வாழ்ந்தபோதே பலருக்கும் கடவுளாகத் திகழ்ந்தவர் பொன்மனச் செம்மல். தமிழை வைத்து பிழைப்பு நடத்தியவர்கள் மத்தியில் தமிழனுக்கு தனி நாடு அமையவே பாடுபட்ட புரட்சியாளர் இந்த பெருமகன்!

அவரைப் பற்றி ஏதாவது சொல்லத் தொடங்கினால்... அல்லது எழுத ஆரம்பித்தால் கண்களை நீர் மறைக்கிறது. இந்த வாழ்நாளில் இன்னொரு முறை இப்படியொரு மனிதரின் அருள் பார்வை கிடைக்குமா? மக்களை மட்டுமே நினைத்த ஒரு தலைவர் கிடைப்பாரா என்ற ஏக்கத்தின் விளைவு அது!

'என் மனதை நானறிவேன்.. என் உறவை நான் மறவேன்... எதுவான போதிலும் ஆகட்டுமே' என நெஞ்சில் உரமும் நேர்மைத் துணிவும் கொண்டு தமிழருக்காக பாடுபட்ட தலைவர் அவர்.

பெருந்தலைவர் காமராஜருக்குப் பின் கல்வியின் அருமையை உணர்ந்த ஒரே தலைவர் எம்ஜிஆர்தான். இன்றைய முதல்வர்கள் தனியார் கல்வி கொள்ளையர்களை மட்டுமே ஊக்கப்படுத்துகிறார்கள். ஆனால் எம்ஜிஆர் காலத்தில் மட்டும் திறக்கப்பட்ட அரசுப் பள்ளிகள் 47000!

புதிய அரசுக் கல்லூரிகள், அரசுப் பல்கலைக்கழகங்கள், தமிழுக்கென்று தனிப் பல்கலைக் கழகம், பெண்களுக்கு தனி பல்கலைக்கழகம் என அவர் செய்த கல்விப் புரட்சிக்கு நிகரில்லை.

எம்ஜிஆர் என்றவுடன், தமிழகத்தில் உள்ள படித்தவர், பாமரர், விமர்சகர், பத்திரிகையாளர் என அத்தனை பேருமே ஏதோ ஒரு நெகிழ்ச்சியான சம்பவத்தை- நினைவைப் பகிர்ந்து கொள்வதைப் பார்க்கலாம்.

எம்ஜிஆர் எனும் பெருமழை தந்த ஈரம் இன்னும் கூட வற்றாமல் இருப்பதற்கு சான்று அது!

எம்ஜிஆர் என்ற அரசியல்வாதியை விமர்சித்தவர்கள் கூட, எம்ஜிஆர் என்ற ஈகைப் பெருந்தகையாளரை மனமார வாழ்த்திக் கொண்டேதான் இருக்கிறார்கள். இன்று அவரை விமர்சிக்கும் துணிச்சல் எந்த அரசியல்வாதிக்கும் கிடையாது. காரணம், மக்கள் தங்கள் மனங்களில் அவருக்குக் கொடுத்திருக்கும் சிம்மாசனம் அத்தகையது!

வாழ்ந்த போதும், வாழ்ந்து மறைந்து பின்னும் வாழ்வு தரும் வள்ளல் என்றால், அவர் எம்ஜிஆர் மட்டுமே. வள்ளல்களுக்கு வயதில்லை... என்றுமே வாழ்பவர்கள் அவர்கள்!

(இன்று டிசம்பர் 24 புரட்சித் தலைவர் எம்ஜிஆர் நினைவு நாள்)

-எஸ்எஸ்

நன்றி  தட்ஸ் தமிழ்

Friday, December 23, 2011

சசி பெயர்ச்சி சில ருசிகர தகவல்கள்! கோடிகள் சுருட்டியது அம்பலம்!


சசிகலா மற்றும் அவரது உறவினர்கள் வெளியேற்றப்பட்டதன் பின்னணியில், மேலும் பல சம்பவங்கள் நடந்துள்ள விவரம், .தி.மு.., வட்டாரத்தில் இருந்து வெளிவரத் துவங்கியுள்ளது. சசிகலா உட்பட 14 பேர், .தி.மு..,வில் இருந்து நீக்கப்பட்டதை தொடர்ந்து, நேற்று, மேலும் இருவர் கட்சியின் அடிப்படை உறுப்பினர் பொறுப்பில் இருந்து நீக்கப்பட்டுள்ளனர். இந்த அதிரடி நடவடிக்கையின் பின்னணி குறித்து, வெளிவரும் தகவல்கள்: .தி.மு.., ஆட்சிக்கு வரும்போது, ஜெயலலிதாவிடம் சசிகலா உள்ள நெருக்கத்தைப் பயன்படுத்தி, சசிகலாவின் உறவினர்கள், வெளியில் பணம் பெற்றுக் கொண்டு, அரசில் முக்கிய காரியங்களைச் சாதிப்பது, வழக்கமான நடைமுறையாக இருந்தது. ஆனால், இந்த முறை, முக்கிய பொறுப்புகள் அனைத்திலும், தங்கள் ஆதரவாளர்களை உட்கார வைத்து, ஜெயலலிதாவின் தயவு இல்லாமலேயே, இவர்கள் நேரடியாக உத்தரவு பிறப்பித்து, காரியங்களை சாதித்தது தான், அவர்களது ஆட்டத்திற்கு முடிவு கட்டியுள்ளது. பணம் "பத்தும்' செய்யும்: குறிப்பாக, கோவையில் இருந்து ஆட்டிப் படைத்த ராவணனைப் பிடித்தால், என்ன காரியம் வேண்டுமானாலும் முடிக்கலாம் என்ற, "இமேஜ்' உருவானது. அதற்கேற்ப, "பல லட்சங்களைப்' பெற்றுக் கொண்டு, எந்தப் பதவிக்கும் ஆட்களை நியமிப்பது, மாறுதல் அளிப்பது என, அனைத்துக் காரியங்களும் அங்கிருந்து நடந்துள்ளன.
பணம் கொடுத்தால் போதும்,காரியம் நடந்துவிடும். மணல், டெண்டர் உட்பட அனைத்திலும், அவரது ஆதிக்கம் இருந்துள்ளது. தி.மு.., ஆட்சியில், 65 பாயின்ட்களாக இருந்த டெண்டர் மதிப்புகள், 125 பாயின்ட்களாக உயர்த்தப்பட்டன.அதற்கு, பெரும் தொகை கைமாறியது. கேரளா, கர்நாடகா, மகாராஷ்டிரா ஆகிய மாநிலங்களுக்கு, மணல் கடத்த, அனுமதி பெற்றுத் தந்துள்ளனர். மணல் மூலம், மாதம் கோடிக்கணக்கில், தொடர் வருவாயும் பெற்றதாக, தகவல்கள் தெரிவிக்கின்றன. டீலா நோ டீலா: எதிர்க்கட்சியைச் சேர்ந்த, "டிவி'யின் கேபிள் நெட்வொர்க்கிற்கு, தொந்தரவு கொடுக்காமல் இருக்க, பல கோடி ரூபாய் கைமாறியதாகவும், அந்த "டிவி'யைச் சேர்ந்தவர்கள் மீது வழக்கு தொடர்ந்தபோது, அவர்கள் வழக்கில் இருந்து வெளிவரவும், வழக்கை அப்படியே கிடப்பில் போடவும், பேரம் பேசப்பட்டு, பெரும் தொகை கைமாறியதாக கூறப்படுகிறது. மாவட்ட அரசு நிர்வாகங்களில், முக்கிய பொறுப்புகளில் ஆட்களை நியமிக்க, கட்சிப் பொறுப்புகளில் ஆட்களை நியமிக்க என, 50 லட்சம், 20 லட்ச ரூபாய் என, தொகைகள் கைமாறி உள்ளன. கடந்த சட்டசபைத் தேர்தல், உள்ளாட்சித் தேர்தல்களில் சீட் வாங்கவே பணம் கொடுத்துள்ளனர். பலர், அமைச்சர் பதவி பெறவும் பணம் கொடுத்துள்ளனர். பி..,க்களாக வருவதற்கும் பணம் கொடுத்துள்ளனர். தேர்தலில் துவங்கி, கடந்த மே மாதம் ஆட்சி அமைந்தது முதல், ஏழு மாதங்களில், இதுவரை சசிகலா உறவினர்கள் சம்பாதித்த தொகை, பல ஆயிரம் கோடி ரூபாய் என்று கட்சியினர் கணிக்கின்றனர். இந்தப் பணம் போன இடம் எங்கே என்ற கேள்வியை .தி.மு.., தொண்டர்கள் தற்போது எழுப்புகின்றனர். தொடராத முடிவு தானே: சசிகலா மற்றும் அவரது உறவினர்களை, ஜெயலலிதா, பலமுறை வெளியேற்றியுள்ளார். ஆனால், அவர்கள் வெவ்வேறு உருவத்தில், கட்சிக்குள் மீண்டும் நுழைந்து, ஆதிக்கம் செலுத்திய வரலாறு உண்டு. எனவே, அதுபோல மீண்டும் திரும்பி விடக்கூடாது என்று, .தி.மு..,வினர் பயப்படுகின்றனர். இந்த முடிவு நிரந்தரமா என்பதில், .தி.மு..,வினர் மத்தியில் மட்டுமல்லாது, தமிழக மக்களே முழுமையாக நம்ப முடியாமல் இருக்கின்றனர். உண்மையில் சொல்லப் போனால், ஜெயலலிதா , ஜெயா "டிவி'யில் தோன்றி, நான் எடுத்த முடிவு தான் என உறுதிபடத் தெரிவித்தால், அவர் தமிழகத்தின் நிரந்தர முதல்வர் என்று, பெரும்பாலான மக்கள் கூக்குரலிட காத்திருக்கின்றனர்.


குவிகிறது வாழ்த்து: ஆனால், சசிகலா குடும்பத்தினரை வெளியேற்றியதும், தேசிய அளவில், முதல்வருக்கு நெருக்கமான தலைவர்கள் பலர், தொலைபேசியில் தொடர்பு கொண்டு, வாழ்த்து தெரிவித்ததாகவும், "யு ஹேவ் டேக்கன் குட் டெசிஷன்' என்று பாராட்டியுள்ளதாகவும் தெரிவதால், இந்த முறை ஜெயலலிதா எடுத்துள்ள முடிவு, நிரந்தர முடிவாகவே இருக்கும் என்றும் கூறப்படுகிறது.
நன்றி தினமலர்





Related Posts Plugin for WordPress, Blogger...