Wednesday, November 30, 2011

மரங்களுக்கும் வந்திருச்சு பீதி! பசுமை வழி சாலைக்கு வந்த சோதனை

தமிழகத்தில் அ.தி.மு.க., ஆட்சி அமைந்து, புது அமைச்சரவை பதவியேற்ற மூன்று மாதத்திற்குள், மூன்று முறை அமைச்சரவை மாற்றம் செய்யப்பட்டுள்ளது. இதனால், மக்கள் மத்தியில் மிகுந்த தாக்கத்தை ஏற்படுத்தி, இப்போது யாரை பார்த்தாலும், மீண்டும் அமைச்சரவை மாற்றம் இருக்காமே என்ற பேச்சு அடிபடுகிறது. பொதுமக்களே ஆர்வமாக இருக்கும் போது, பதவியில் உள்ளவர்கள், பதவிக்கு வரத் துடிப்போர் மத்தியில் எப்படி மனஓட்டம் இருக்கும்.

தமிழக சட்டசபைத் தேர்தலில், அ.தி.மு.க., அமோக வெற்றி பெற்று ஆட்சி பொறுப்பை ஏற்றதும், முதல்வர் ஜெயலலிதா அமைச்சரவையில் புதுமுகங்களுக்கு வாய்ப்பு அளித்தார். சீனியர்களை விட்டு விட்டு நமக்கு வாய்ப்பு வழங்கப்பட்டுள்ளதே என்று ஆச்சர்யப்பட்டவர்கள் இதை தக்க வைக்க வேண்டுமே என பயந்தும் போயினர்.

பரிகார பூஜைகள்:இதன் காரணமாக, அமைச்சர்களாக பதவியேற்றதும், கோட்டையில் தங்களுக்கு ஒதுக்கப்பட்ட அறையில் போய் அமர்வதற்கு கூட, பரிகார பூஜைகள் செய்தும், நாள், நட்சத்திரம் பார்த்தும் இருக்கின்றனர். இதற்கு காரணம் இருக்கிறது, கடந்த ஆட்சியில் அமைச்சர்களாக இருந்தவர்கள், இப்போது வழக்குகளில் சிக்கி சிறையில் உள்ளனர். இவர்கள் ராசி நமக்கும் ஒட்டிக்கொள்ள போகிறது என்று, அமைச்சர்களுக்கு ஒதுக்கப்பட்ட அறைகளில் வாஸ்துப்படி சிறு சிறு மாற்றங்களை செய்து, பூஜைகள் நடத்தி, பக்தி மணம் கமழ அறைகளை மாற்றியவர்களும் உண்டு. தங்கள் மேஜையில் முதல்வர் படத்துடன், தங்கள் இஷ்ட தெய்வங்களின் படங்களையும் வைத்துள்ள அமைச்சர்களும் உள்ளனர்.அதேபோல், அமைச்சர்கள் குடியிருப்பதற்காக, அடையாறில் பசுமை வழி சாலையில், அமைச்சர்களுக்கு வீடுகள் ஒதுக்கப்பட்டன. இவ்வாறு ஒதுக்கப்பட்ட வீடுகள், பொதுப்பணித் துறையின் கட்டுப்பாட்டில் வருகிறது. தங்களுக்கு ஒதுக்கப்பட்ட வீடுகளை அமைச்சர்கள் போய் பார்த்து, வாஸ்து நிபுணர்களின் துணையுடன் சில மாற்றங்களை செய்தனர்.

தொடர்ந்து அமைச்சராக நீடிப்பதற்காக என்ன என்ன செய்ய வேண்டும், வாசல் எங்கே இருக்க வேணடும், அலுவலக அறை எங்கே இருக்க வேண்டும் என பார்த்து பார்த்து, வீட்டையே முற்றிலுமாக மாற்றிய அமைச்சர்களும் இருக்கின்றனர். பெரிய மாற்றங்களை செய்ய முடியாது என்றாலும், சிறு சிறு மாற்றங்களை செய்துள்ளனர்.

கிலியும் வாஸ்துவும்:சமீபத்தில் அமைச்சரவையில் இருந்து ஆறு அமைச்சர்கள் நீக்கப்பட்டனர்; சிலரது இலாகாக்கள் மாற்றப்பட்டன. இதன் பிறகு தான் அமைச்சர்கள் மத்தியில், "கிலி' அதிகமானது. அதுவரை வாஸ்து பார்க்காதவர்கள் கூட, தாங்கள் குடியிருக்கும் வீடுகளில் அதிரடி மாற்றங்களை செய்து பரிகார பூஜையும் நடத்தியுள்ளனர். இதற்கும் மேல் போய், இலாகாக்களை பறிகொடுத்த அமைச்சர்கள் தங்கள் வீட்டைச் சுற்றியுள்ள மரங்கள், வாஸ்துப்படியும் தங்கள் நட்சத்திரத்திற்கு பொருத்தமாக இருக்கிறதா என ஜோசியம் பார்த்து, மரங்களை அப்புறப்படுத்த உத்தரவிட்டுள்ளனர்.பசுமை வழி சாலையில் அமைச்சர்கள் குடியிருப்பில் உள்ள மரங்கள் ஒவ்வொன்றும் நீண்ட ஆயுள் கொண்டவை. இரண்டு பேர் சேர்த்து கட்டிப் பிடிக்கும் அளவு சுற்றளவு கொண்டது.

ஒண்ணை சொன்னா... கூட இரண்டு:இந்த மரங்களை வெட்டுவதன் மூலம், 20 ஆயிரம் ரூபாய் வருமானம் கிடைப்பதால், ஒரு மரத்தை வெட்டச் சொன்னால் கூட, ஒன்றிரண்டு மரங்களை ஊழியர்கள் வெட்டி விடுகின்றனர். சமீபகாலமாக 20க்கும் மேற்பட்ட மரங்கள் வெட்டப்பட்டுள்ளன.பட்டுப்போன மரத்தை வெட்டுகிறோம். மழை காரணமாக சில மரங்கள் சாய்ந்து விழ வாய்ப்பு உள்ளது என்று கூறி, சமீபத்தில் மரங்கள் கபளீகரம் செய்யப்பட்டுள்ளன. இதனால், பசுமை வழி குடியிருப்பில் இருக்கும் வானுயர்ந்த மரங்கள் கண்ணீர் வடிக்கத் துவங்கியுள்ளன.

வாழையும், வேர்கடலையும் :சமீபத்தில் நடந்த அமைச்சரவை மாற்றத்தில் முக்கிய இலாகாவை இழந்த, மூத்த அமைச்சர் வீட்டைச் சுற்றியிருந்த மரங்கள் அனைத்தும் வெட்டப்பட்டுள்ளன. இங்கு வாழைத்தோப்பும், வேர்கடலை செடியும் நடுவதற்கு திட்டமிட்டுள்ளனர்.இந்நிலையிலும், எட்டுக்கும் மேற்பட்ட அமைச்சர்களுக்கு இன்னும் வீடு ஒதுக்கப்படாததால், சேப்பாக்கம் விருந்தினர் மாளிகையில் தங்கியிருக்கின்றனர். எங்களுக்கு வீடு ஒதுக்குங்கள் என இவர்களாக போய் கேட்காமல் இருக்கின்றனர். கிடைக்கிறப்ப கிடைக்கட்டும் என்று நிம்மதியாக இருக்கின்றனராம்.அடுத்த அமைச்சரவை மாற்றம் வந்தால், எத்தனை பேர் காணாமல் போவோமோ என, பசுமை குடியிருப்பில் உள்ள மரங்கள் பயப்படத் துவங்கியுள்ளன.

நன்றி  தினமலர்

அஸ்வின்- ஓஜா! புதிய சுழல் கூட்டணி!

அஸ்வின்- ஓஜா!  புதிய சுழல் கூட்டணி!

   இந்திய கிரிக்கெட்டிற்கு புதிய திறமையான இரு சுழல் பந்து வீச்சாளர்கள் கிடைத்துள்ளனர். இது நல்ல எதிர்காலத்தை காட்டுகிறது. இந்திய அணியில் ஒரு காலத்தில் சுழல் பந்து வீச்சாளர்களின் ஆதிக்கம் அதிகமாக இருந்தது. பிஷன் சிங்க் பேடி சந்திர சேகர் பிரசன்னா, வெங்கடராகவன், போன்றவர்கள் சுழல் பந்தில் ஜாம்பவான்களாக திகழ்ந்தார்கள்.
    இந்த ஜாம்பாவான்கள் காலத்திலும் இந்தியா பெரிய வெற்றிகளை சுவைக்கவில்லை. ஆனாலும் இவர்களின் பந்துகளை எதிர்கொள்ள உலகின் முன்னனி பேட்ஸ்மேன்கள் பயந்தனர். அந்த அளவிற்கு இவர்களும் இந்திய பிட்ச்களும் சுழற்பந்து வீச்சாளர்களின் சொர்கமாக இருந்தது.
   ஆனால் இவர்களின் காலத்திற்கு பின்னர் சுழற்பந்து வீச்சில் ஒரு வெற்றிடம் ஏற்பட்டது. இதை கும்ப்ளே-ஹர்பஜன் கூட்டணி போக்கியது. இவர்கள் இருவரும் இந்திய அணியின் துருப்புச்சீட்டாக பயன் படுத்தப்பட்டனர். கும்ப்ளேவின் லெக்-ஸ்பின்னும் ஹற்பஜனின் ஆப்-ஸ்பின்னும் எதிரணி வீரர்களை திக்குமுக்காட செய்தன. விக்கெட் வேட்டை நடத்திய இவர்கள் இந்திய அணியின் வெற்றிக்கு முக்கிய காரணமாக  திகழ்ந்தனர்.
        இப்போது இந்திய அணிக்கு தோனி கேப்டனானது ஏறுமுகம் ஆனது. உலகின் நம்பர் ஒன் அணியாக ஒரு வருடம் வலம் வந்தது. இதற்கு அணியின்கூட்டு முயற்சியோடு இந்த இரு நபர்களின் பந்து வீச்சும் முக்கிய காரணமாக அமைந்தது. டெஸ்ட் போட்டிகளில் வெற்றி பெற வேண்டுமானால் எதிரணியின் பத்து விக்கெட்களை வீழ்த்த வேண்டிய கட்டாயம் உள்ளது அதை செவ்வனே  ஜாகிர்கானுடன் இந்த கூட்டணி இனைந்து செய்தது.
   இதனால் இந்திய அணி வெற்றி மேல் வெற்றிகளை குவித்தது.இந்த நிலையில் கும்ப்ளேவின் ஓய்வு இந்திய அணியில் ஒரு வெற்றிடத்தை ஏற்படுத்தியது. இந்திய சுழல் பந்து தாக்குதல் பலவீனமடைய ஆரம்பித்தது அப்போதுதான். ஹற்பஜனும் பார்ம் இன்றி தவிக்க இங்கிலாந்தில் அடி மேல் அடி வாங்கி திரும்பியது நம் இந்திய அணி.
    இந்த சூழலில் வெஸ்ட் இண்டிஸ் அணிக்கு எதிராக ஒரு துணிச்சலான முடிவை எடுத்தது இந்திய தேர்வுக்குழு. பார்ம் இன்றி தவித்த ஹர்பஜனுக்கு ஓய்வு கொடுத்துவிட்டு பிரக்யான் ஓஜா- அஸ்வின் ஆகிய இரு இளைஞர்களுக்கு வாய்ப்பு தந்தது.
    இந்த இருவரும் போட்டி போட்டு விக்கெட் வேட்டை நடத்தியதில் வெஸ்ட் இண்டிஸ் அணியை வீழ்த்தி தொடரை வென்றது இந்தியா. அதிலும் தமிழகத்தின் அஸ்வின் ஆல்ரவுண்டராக அசத்தி 22 விக்கெட்களையும் 121 ரண்களை ஒரு சதம் உட்பட எடுத்து தொடர் நாயகன் விருது வென்றார்.
   இவர்களின் சிறப்பான ஆட்டம் ஆஸ்திரேலியாவிற்கெதிரான தொடரிலும் வாய்ப்பினை பெற்றுத் தந்துள்ளது. ஆஸ்திரேலிய மண்ணிலும் ஆஸ்திரேலியாவிற்கு எதிராகவும் சிறப்பாக செயல்படக் கூடியவர் ஹர்பஜன். அவருக்கு வாய்ப்பில்லாமல் அஸ்வினுக்கு வாய்ப்பு கிடைத்திருப்பதற்கு காரணம் அவரது திறமை. டிவெண்டி 20 போட்டிகளில் அசத்தி ஒரு நாள் அணியில் வாய்ப்பு பெற்றார். இப்போது டெஸ்ட் அணியிலும் அசத்தி கேப்டனின் நம்பிக்கையையும் தேர்வாளர்களின் நம்பிக்கையையும் பெற்றுவிட்டார்.
   இவரது புதுமையான கேரம் பால் பந்து வீச்சு எதிரணியினரை திணரடிக்க வைக்கிறது. சூழ்நிலைக்கேற்றவாறு பந்துகளை வீசி விக்கெட் சாய்ப்பதில் கில்லாடியாக இருக்கிறார். இவருக்கு இணையாக திறமையாக பந்து வீசி எதிரணியினரை திணர அடிக்கிறார் ஓஜா.
   இந்த இருவரும் திறமையாக பந்து வீசி இந்தியாவை ஆஸ்திரேலியாவிலும் வெற்றிப்பாதைக்கு கூட்டிச் செல்வார்கள் என்று எதிர்பார்ப்போம்!

தங்கள் வருகைக்கு நன்றி பதிவு குறித்த கருத்துக்களை பகிரலாமே! வாக்களித்து பிரபல படுத்தலாமே!


Tuesday, November 29, 2011

பூமியின் தன்மைகள் கொண்ட புதிய கிரகம்: அமெரிக்க ஆராய்ச்சியாளர்கள் கண்டுபிடிப்பு

லண்டன்: பூமியை போன்ற ஒத்த தன்மைகள் கொண்ட புதிய கிரகம் ஒன்றை கலிப்போர்னியா பல்கலைக்கழக விண்வெளி ஆராய்ச்சிக் குழுவினர் கண்டுபிடித்துள்ளனர்.

அமெரிக்காவின் கலிபோர்னியா பல்கலைக்கழகத்தைச் சேர்ந்த விண்வெளித் துறை போராசிரியர் ஸ்டீவன் வோக்ட் தலைமையிலான குழுவினர், பூமியில் இருந்து மிக அருகில் உள்ள ஜிலிஸி 581 என்ற நட்சத்திரம் பற்றி ஆராய்ச்சி செய்து வந்தனர்.

அந்த ஆராய்ச்சியில் ஜிலிஸி 581 நட்சத்திரத்தை சுற்றி வரும் 2 புதிய கிரகங்களை கண்டுபிடித்துள்ளனர். இதில் பூமியில் இருந்து 123 திரில்லியன் மைல்களுக்கு அப்பால் உள்ள ஒரு கிரகம் பூமியை போலவே ஒத்த தன்மைகளை கொண்டுள்ளதாக ஆராய்ச்சியாளர்கள் தெரிவித்துள்ளனர். சூரியக் குடும்பத்துக்கு வெளியே உள்ள அந்த கிரகத்துக்கு ஜிலிஸி 581ஜி என்று பெயரிடப்பட்டுள்ளது.

இது குறித்து ஆஸ்ட்ரோபிஸிக்கல் ஜர்னல் என்ற பத்திரிக்கையில் வெளியான செய்தியில் கூறியிருப்பதாவது,

கடந்த 11 ஆண்டுகளாக நடந்த ஆராய்ச்சிக்கு பிறகு, ஜிலிஸி 581ஜி என்ற புதிய கிரகத்தை கண்டுபிடித்துள்ளனர். இந்த கிரகத்தில் பூமியில் இருப்பது போலவே, நீர்ம நிலையிலான தண்ணீர் இருக்கலாம் என்று தெரிகிறது. அதன்மூலம் பூமியை போன்றே அதற்கும் சந்திரன்கள் இருக்கலாம்.

பூமியில் இருந்து 20.3 ஒளி ஆண்டுகள் தொலைவில் உள்ள ஜிலிஸி 581 என்ற நட்சத்திரத்தை குறித்து ஆராய்ச்சியின் போது 2 புதிய கிரகங்களை ஆராய்ச்சிக் குழுவினர் கண்டுபிடித்தனர். ஜிலிஸி 581 நட்சத்திரத்தை சுற்றி வரும் 4 கிரகங்களை ஏற்கனவே ஆராய்ச்சியாளர்கள் கண்டுபிடித்துள்ளனர். இந்த நிலையில் புதிய கிரகங்களின் எண்ணிக்கையும் சேர்த்து தற்போது 6 கிரகங்கள் கண்டுபிடிக்கப்பட்டுள்ளது.

சூரியக் குடும்பத்தை போலவே, ஜிலிஸி 581 நட்சத்திரத்தை சுற்றிலும் உள்ள கிரகங்களுக்கும் நீள்வட்ட சுற்றுப்பாதை உள்ளது. ஜிலிஸி 581ஜி பூமியை காட்டிலும் 3 முதல் 4 மடங்கு பெரிதாக உள்ளது. மேலும் அது நட்சத்திரத்தை 37 நாட்களில் ஒருமுறை சுற்றி வருகிறது. பாறைகளாலான நிலப்பகுதியை கொண்ட இந்த கிரகத்தில் ஈர்ப்பு விசை அதிகமாக இருக்கலாம் என்று எதிர்ப்பார்ப்பதாக விஞ்ஞானிகள் தெரிவித்துள்ளனர் என்று அதில் தெரிவிக்கப்பட்டுள்ளது.

நன்றி தட்ஸ் தமிழ்

தமிழக அரசியலைப் புதுப்பிக்கும் தனி இயக்கம்

சமூகத்திற்குத் தொண்டாற்ற வேண்டும் என்ற நோக்கம் கொண்டவர்கள். தமிழகத்தின் பல்வேறு அரசியல் கட்சிகளில் பல வருடங்களாக போஸ்டர் கட்-அவுட் கோஷங்களுக்காக அடிமட்டத் தொண்டர்களாகவே காலம் கழித்தவர்கள். விரக்தியின் உச்சத்திற்கு சென்ற இவர்கள் அவரவர் கட்சிகளில் இருந்து வெளியேறி ஒன்று சேர்ந்து ஒரு தனி இயக்கத்தைத் தொடங்கி பல்வேறு எதிர்ப்புகளுக்கிடையே தமிழகத்தின் பன்முக வளர்ச்சிக்கு பாடுபடுகிறார்கள். அரசியல் கட்சியாகாமல் ஒரு தனி ராணுவ படையாக இவர்கள் செயல்படுகிறார்கள்.

கபிலன் வைரமுத்துவின் "உயிர்ச்சொல்" எனும் புதிய நாவலில் இந்த கற்பனை இடம் பெற்றிருக்கிறது. கிழக்கு பதிப்பகத்தின் இந்த புதிய வெளியீட்டை ஒரு சில இலக்கியவாதிகள் "அதீதமான கனவு- நம்பும்படியாக இல்லை" என்று விமர்சிக்கிறார்கள். ஒரு சிலர் "ஒரு மாற்று அரசியலுக்கான தாகம் இளைஞர்கள் மத்தியில இருக்கு. அந்த தாகமும் விரக்தியும் ஒட்டுமொத்தமா வெளிப்படும்போது இந்த கற்பன ஒன்னும் அதீதமா தெரியில" என்று வாதாடுகிறார்கள்.

இந்த இயக்கத்திற்கு வேண்டா வெறுப்பாக விளம்பர சேவை செய்யும் அமலன்- அவர் மனைவி தருணா - இவர்களைச் சுற்றித்தான் நகர்கிறது கதை. நீண்ட நாட்களாக குழந்தைக்கு ஏங்கி பின் குழந்தை பிறந்ததும் தருணா சந்திக்கும் மனப்போராட்டம் - பின்னணியில் தனி இயக்கத்தின் களப்போராட்டம் - இதுதான் இந்த நாவலின் இரண்டு முகங்கள். இதில் தருணா அமலன் கதை உண்மைச்சம்பவம். தனி இயக்கம் கற்பனை.

நாவல் பற்றி துளிச் செய்திகள்:

1. முதல் முறையாக ஒரு நாவலுக்கு முன்னோட்டப் பாடல் எழுதப்பட்டு இசையமைக்கப்பட்டிருக்கிறது. புத்தகத்தோடு சி.டி. இணைக்கப்பட்டிருக்கிறது.

2. இந்த முன்னோட்டப் பாடலுக்கு வந்த முதல் வாழ்த்து சூப்பர் ஸ்டார் ரஜினிகாந்த் அவர்களுடைய வாழ்த்து. கபிலனை தொலைபேசியில் அழைத்து "ரொம்ப நல்லா இருந்துச்சு கண்ணா" என்று மனமார வாழ்த்தியிருக்கிறார்

3. தருணாவும் அமலனும் தங்கள் அனுபவங்களை எழுதிக்கொள்ளும் slambook-ஆக முழு நாவலும் வடிவமைக்கப்பட்டிருக்கிறது.

4. கதையில் வரும் தருணா ஓவியத்தில் நாட்டமுடையவள். அவள் வரைவதுபோல கதையோடு இழைந்த அவள் ஓவியங்களைப் புத்தகமெங்கும் காண முடிகிறது.

யாரும் அதிகம் பகிர்ந்துகொள்ளாத ஒருவிதமன அழுத்தத்திற்கான விழிப்புணர்ச்சியாக இந்தப் புத்தகம் இருக்க வேண்டும் என்பது கபிலனின் எண்ணம். அந்த எண்ணத்தைத் தாண்டி இதில் வரும் அரசியல் பரிசோதனைகளும் சில ஆக்கபூர்வமான சிந்தனைகளைத் தூண்டுமெனத் தோன்றுகிறது. பொறுத்திருந்து பார்ப்போம்.

www.uyirsol.com என்ற தளத்தில் புத்தக விற்பனை தொடர்பான தகவல்களை பெறலாம்.
நன்றி தட்ஸ்தமிழ்

Monday, November 28, 2011

தினமும் நடந்தால் நோயின்றி வாழலாம்

 ‘நோயற்ற வாழ்வே குறைவற்ற செல்வம்’ என்பது முன்னோர் வாக்கு. கோடி கோடியாய் பணம் வைத்திருந்தாலும் அவற்றை அனுபவிக்க நோயில்லாத உடல் வேண்டும். எனவேதான் நோய்கள் வராமல் உடலை காத்துக்கொள்வது அவசியம் என்கின்றனர் மருத்துவர்கள். நடைபயிற்சி மேற்கொள்பவர்களை நோய்கள் எளிதில் தாக்குவதில்லை என்றும் கூறுகின்றனர்.

தினமும் தவறாமல் நடை பயிற்சி மேற்கொண்டால் எடை குறையும், தசை வலுவடையும், இதயநோய்கள் எட்டிப்பார்க்காது, நீரிழிவு நோய் கட்டுப்படும். ரத்த அழுத்தம் சீராகும், முதுகுவலி ஏற்படாது என்கின்றனர் மருத்துவர்கள்.

கைகளை வீசி நடங்கள்

காலை 6 மணிக்கு முன் நடப்பது மிகவும் நல்லது. முடியாதவர்கள் மாலையில் நடக்கலாம். நடக்கும் போது கைகளை வீசி நடக்கவேண்டும். குறைந்த பட்சம் இரண்டு கிலோமீட்டராவது நடந்த பின்னர் 5 நிமிடம் ஓய்வெடுக்க வேண்டும். பிறகு கைகளை பத்துமுறை நீட்டி மடக்க வேண்டும். பின்னர் இரண்டு டம்ளர் தண்ணீர் குடித்துவிட்டு காலை வேலைகளை பார்க்கலாம்.

உடல் எடை குறையும்

உடல் எடை அதிகரிப்பு என்பது இன்றைய கால கட்டத்தில் சாதரண ஒன்றாகிவிட்டது. சரியான உடல் உழைப்பு இல்லாதது. இன்றைய இளைய தலைமுறையினர் அமர்ந்த இடத்திலேயே வேலை பார்ப்பதால் உண்ணும் உணவு ஆங்காங்கே தங்கிவிடுகிறது. இதனால் உடல் எடை கூடுகிறது. இவர்கள் தினமும் அரைமணி நேரம் நடை பயிற்சி மேற்கொண்டால் உடல் எடை கட்டுக்குள் வரும். எனெனில் உடல் எடைதான் எண்ணற்ற நோய்களின் பிறப்பிடமாக உள்ளது.

புத்துணர்ச்சி அடையும்

எடை அதிகரிப்பினால் ஆங்காங்கே தசைகள் லூசாகி உடல் அமைப்பு சரியான வடிவமின்றி காணப்படும். இவர்கள் நடை பயிற்சி மேற்கொள்வதன் மூலம் உடலில் உள்ள லூசான தசைகள் வலுவடையும்.காலையில் மேற்கொள்ளும் நடை பயிற்சியினால் உடலும் உள்ளமும் புத்துணர்ச்சி அடைகிறது.

நீரிழிவு கட்டுப்படும்

தினசரி காலை, மாலை இருவேளை 45 நிமிடம் நடை பயிற்சி மேற்கொள்பவர்களுக்கு நீரிழிவு நோய் கட்டுப்பாட்டிற்குள் வந்தது ஆய்வில் கண்டுபிடிக்கப்பட்டது. எனவே நீரிழிவு நேயால் பாதிக்கப்பட்டவர்கள் கண்டிப்பாக நடை பயிற்சி மேற்கொள்ளவேண்டும் என்பது மருத்துவர்களின் அறிவுரை.

கொழுப்பு குறையும்

நடைபயிற்சியின் மூலம் உடலில் தேவையற்ற இடங்களில் சேர்ந்துள்ள கொழுப்பு குறைகிறது. ரத்த நாளங்களில் கொழுப்பு குறைவதால் ரத்த ஓட்டம் சீராகிறது. இதனால் இதயநோய் பாதிப்பு குறைகிறது. ரத்த அழுத்த நோய் கட்டுப்படும்.

முதுகு வலி எட்டிப்பார்க்காது

ஒரே இடத்தில் அமர்ந்து கொண்டே வேலை பார்ப்பதால் ஒரு சிலர் முதுகு வலி கழுத்துவலியினால் பாதிக்கப்படுவர். அவர்களுக்கு நடைபயிற்சி சிறந்த தீர்வாகும். காலை நேரத்தில் மேற்கொள்ளும் நடைபயிற்சி முதுகுவலியை தூர விரட்டும்.

குழந்தை பேறு கிடைக்கும்

நடை பயிற்சியினால் தீராத சிக்கல்களுக்கும் கூட தீர்வு கிடைத்திருக்கிறது. குழந்தையில்லாத தம்பதியர் கூட சீரான நடைபயிற்சி மேற்கொண்டதன் மூலம் குழந்தை பேறு பெற்றதாக மருத்துவர்கள் தெரிவித்துள்ளனர்.

நன்றி  தட்ஸ் தமிழ்

சில்லறைத் தனமான முடிவு!


சில்லறைத் தனமான முடிவு!

சில்லறை வர்த்தகத்தில் 51% அன்னிய முதலீட்டை அனுமதிக்க மத்திய அமைச்சரவை எடுத்த முடிவு சில்லறைத் தனமானது. ஏற்கனவேபுதிய பொருளாதாரக் கொள்கை என்ற போர்வையில் நாட்டில் சுதேச தொழில்களை முடக்கி போட்ட இதே காங்கிரஸ் அரசு இன்று சில்லறை வியாபாரிகளின் தலையிலும் கை வைத்துள்ளது.
   இந்த முடிவால் பணவீக்கம் குறையுமாம் இப்படிச் சொல்லி தப்பித்துக் கொள்ள முயற்சிக்கிறது காங்கிரஸ். பணவீக்கத்தை குறைக்க இந்த முடிவுதானா கிடைத்தது. காலில் தேள் கொட்டினால் துடையிலா நெறிகட்டிக்கொள்ளும்? இப்படி ஒரு முடிவை எடுத்து மீண்டும் இந்திய பொருளாதாரத்தை அதள பாதாளத்தில் தள்ள வேண்டிய அவசியம் என்ன? நாட்டில் இந்த சில்லறை வியாபாரிகள் எத்தனை பேர் உள்ளனர்? அவர்களின் வாழ்வு என்னாவது? இதையெல்லாம் சிந்தித்து பார்க்க வேண்டாமா? மாநில அரசுகளை கலந்தாலோசிக்க வேண்டாமா? எதுவுமே இல்லாமல் திடீரென சில்லறை வியாபாரிகளின் வயிற்றில் அடித்துள்ளது மத்திய அரசு!.
   அன்று அன்னியமுதலீட்டை அதிகப்படுத்துகிறேன் என்று சொல்லி நாட்டில் கோககோலா, பெப்சியை அணுமதித்ததன் விளைவாக உள்ளூர் குளிர்பான நிறுவனங்கள் அடியோடு அழிந்து போயின. ஒன்றரை ரூபாய் தயாரிப்புக்கு இன்று 11ரூபாய்க்கு மேல் விலை கொடுக்க வேண்டிய நிலை ஏற்பட்டது. இதனால் இந்தியப் பொருளாதாரம் எப்படி உயர்ந்து விட்டது?
   ரிலையன்ஸ் போன்ற நிறுவனங்களும் சில்லறை வியாபாரத்தில் காய்கறி போன்றவை விற்றன. ஆனால் அது மக்கள் மத்தியில் வறவேற்பை பெறவில்லையே? மக்களுக்கு நன்மை செய்யவே அரசுக்களை மக்கள் தேர்ந்தெடுக்கிறார்கள் ஆனால் அரசுக்களோ அவர்களின் தலையிலேயே கைவைக்க ஆரம்பித்துவிடுகின்றன. நல்ல வேளையாக இந்த சில்லறைத்தனமான முடிவுக்கு பல மாநிலங்களில் எதிர்ப்பு கிளம்பி உள்ளது. மம்தா பானர்ஜி கடும் எதிர்ப்பு தெரிவித்து வருகிறார்.
    ஆனால் அவரை நம்ப முடியாது பெட்ரோல் விலை உயர்வில் இரட்டை நாடகம் போட்டவர் அவர். முதலில் விலை ஏற்றத்தை எதிர்த்தவர் தன் மாநிலத்திற்கு கூடுதல் நிதி ஒதுக்கீட்டை பெற்றுக் கொண்டு இனிமேல் விலை ஏற்றக் கூடாது என்று கூலாக கூறியவர் அவர். எனவே இந்த பிரச்சனையையும் அரசியல் ஆதாயத்திற்காக முயற்சி செய்யலாம்.
     தமிழக முதல்வரும் எதிர்ப்பு தெரிவிக்கிறார் அதற்கு காரணம் மாநில அரசுகளை கலந்து ஆலோசிக்காத மத்திய அரசின் ஆணவம் என்று வேறு சொல்கிறார். இவருடைய ஆணவப் போக்கை நாடே அறியும். ஒரே சமயத்தில் விலைகளை உயர்த்தி தமிழக மக்களை தவிக்க வைத்தவர் தானே இவரும்!
   மொத்தத்தில் இந்த சில்லறை வியாபாரிகளின் நிலை கவலைக்குறியதாக மாறிவிட்டது. கிராமங்களில் இனி குடிசைத் தொழிலகங்களையோ கடைகளில் உள்நாட்டு பொருள்களையோ காணமுடியாத நிலை ஏற்பட்டுவிடும் என்றே தோன்றுகிறது.
  நாட்டில் மொத்தம் 4கோடி பேர் இந்த சில்லறை வர்த்தகத்தில் ஈடுபட்டு உள்ளதாக தகவல்கள் கூறுகின்றன. இதில் பெருமளவு நபர்கள் மெத்தப் படித்தவர்கள் அல்ல! குடும்பத்தொழிலாக செய்து வருபவர்கள்  இவர்களின் எதிர்காலத்தை கேள்விக் குறியாக்கி விட்டது மத்திய அரசு.
  மஞ்சள் பொடி கடுகு மிளகாய் கூட இனி அடைத்தபாக்கெட்களில் அன்னிய தேசத் தயாரிப்பாக விற்கபடக்கூடிய நிலையை அரசு உருவாக்கிவிட்டது.நம் நாட்டுப் பொருட்களுக்கு அன்னியர்களுக்கு பணம் தரவேண்டிய அவலநிலையை அரசு உருவாக்கிவிட்டது.
   சிறுவியாபாரிகள் தம் கடைகளை இழந்து பிழைக்க வழியின்றி தவிக்கும் இந்த முடிவு தேவைதானா? அரசு சற்றே சிந்திக்க வேண்டும்!
 தங்கள் வருகைக்கு நன்றி! பதிவு குறித்த கருத்துக்களை பகிரலாமே! வாக்களித்து பிரபல படுத்தலாமே!

Sunday, November 27, 2011

எதிர்பார்ப்பை தூண்டும் புதிய நோக்கியா ஸ்மார்ட்போன்கள்!

சரவெடி போல் நோக்கியா நிறுவனம் அடுத்தடுத்து மொபைல்களை கொடுத்து கொண்டே இருக்கிறது. லுமியா வரிசையில் அடுத்து லுமியா-601 மற்றும் லுமியா-603 என்ற மொபைல்களை நோக்கியா வெளியிட உள்ளது. இந்த இரண்டு மொபைல்களுமே சிறந்த செயல்பாடுகளை கொண்டதாக இருக்கும் என்று கருதப்படுகிறது.
601 மற்றும் 603 மொபைல்கள் வெவ்வேறு ஆப்பரேட்டிங் சிஸ்டத்தில் இயங்கும் தன்மை கொண்டது. லுமியா-603 மொபைல் சிம்பையான் ஆப்பரேட்டிங் சிஸ்டத்திலும், லுமியா-601 மொபைல் விண்டோஸ் 7.5 ஆப்பரேட்டிங் சிஸ்டத்திலும் இயங்கும். இரண்டுமே சிறந்த தொழில் நுட்ப வசதிகளை கொடுக்கும்.
நோக்கியா லுமியா-603 மொபைல் 3.5 இஞ்ச் திரை வசதி கொண்டது. ஆனால், நோக்கியா 601 லுமியா மொபைல் சற்று அதிகமான திரை வசதியை வழங்கும். லுமியா-601 மொபைல் போனில் 3.7 இஞ்ச் டபிள்யூவிஜிஏ தொடுதிரை வசதி கொண்டது.
நோக்கியா 603 மொபைலில் 5 மெகா பிக்ஸல் கேமரா பொருத்தப்பட்டுள்ளது. 2592 X 1944 பிக்ஸல் துல்லியத்தை கொடுக்கும். லுமியா-601 மொபைல் 8 மெகா பிக்ஸல் கொண்டு அசத்தும். 1 ஜிகாஹெர்ட்ஸ் பிராசஸர் துணை கொண்டு இயங்குகின்றது நோக்கியா 603 மொபைல். லுமியா-601 மொபைல் 1 ஜிகாஹெர்ட்ஸ் கியூவல்காம் ஸ்னாப்டிராகன் எம்எஸ்எம் 8255 பிராசஸர் உதவியுடன் செயல்படுகிறது.
இந்த இரண்டு மொபைல்களை பொறுத்த வரையில், எதுவுமே குறைந்த வசதி அல்ல. உயர்ந்த தொழில் நுட்பம் மட்டுமே கொடுக்கப்பட்டுள்ளது என்று தாராளமாக சொல்லாம். இன்டர்நெட் வசதி கொண்ட மொபைலை வாங்குவதில் அனைத்து வாடிக்கையாளர்களுமே அதிக ஆர்வம் கொண்டிருக்கின்றனர்.
இதை புரிந்துள்ள நோக்கியா நிறுவனம் இந்த இரண்டு மொபைல்களிலுமே வைஃபை தொழில் நுட்பத்தினை கொடுத்திருக்கிறது. ஒரு மொபைலில் புளூடூத் வசதியும் அவசியம் ஆகிவிட்டது. அதனால் இந்த மொபைல்களில் புளுடூத் வசதியையும் கொடுக்கப்பட்டுள்ளது.
பொழுதுபோக்கு அம்சங்களுக்காக அனைத்து நிறுவனங்களும் பிரத்தியேக வசதிகளுடன் மொபைல்களை தயாரிக்கின்றது. இதை கவனத்தில் கொண்ட நோக்கியா நிறுவனம் இந்த ஸ்மார்ட மொபைல்களில் ஆடியோ மற்றும் வீடியோ ப்ளேயர் வசதிய கொடுக்கவும் மறக்கவில்லை.
அடுத்து, முக்கியமாக பேட்டரி வசதி. லுமியா-601 மொபைலில் ரிமூவபுல் லித்தியம் அயான் பேட்டரி கொடுக்கப்பட்டுள்ளது. லுமியா-601 மொபைலில் ஸ்டான்டர்டு லித்தியம் பேட்டரி பொருத்தப்பட்டுள்ளதால் 7 மணி நேரம் டாக் டைமையும், 490 மணி நேரம் ஸ்டான்-பை டைமையும் கொடுக்கிறது. நோக்கியா லுமியா-603 மொபைலின் விலை ரூ.20,000 விலையில் இருக்கும் என்று எதிர் பார்க்கப்படுகிறது. ஆனால் லிமியா-601 மொபைலின் விலை இன்னும் அறிவிக்கப்படவில்லை

நன்றி தட்ஸ் தமிழ்

என் இனிய பொன்நிலாவே! பகுதி 13

என் இனிய பொன்நிலாவே!  பகுதி 13

               ‘ப்ரியம்வதா’

முன் கதை சுருக்கம்} தன் கம்பெனிக்கு வேலைக்கு வரும் மதுமிதாவை விரும்பினான் அபிஷேக். அதே சமயம் அவனது உறவு பெண் அவணை ஒருதலையாக காதலித்தாள். ஒருநாள் மதுமிதாவிடம் தான் பெண் கேட்டு வரப்போவதாக அபிஷேக் தெரிவித்தான்.

   என்ன என்ன சொல்றீங்க? என்று  நம்ப முடியாதவளாய் கேட்டாள் மதுமிதா. உன்னை பெண்கேட்டு வரப்போவதாக சொன்னேன்!. உன் காது ஒன்றும் கோளாறு இல்லையே? என்று கேட்டான் அபிஷேக்.
     எனக்கு ஒன்றும் கோளாறு இல்லை! உங்களுக்குத் தான் இப்போது ஏதொ கோளாறு போலத் தெரிகிறது! என்றாள் மதுமிதா.
  உனக்கு ஏன் அப்படி தோன்றுகிறது! நான் தெளிவாகத்தானே பேசுகிறேன்!
 இல்லை கொஞ்ச நேரம்முன் ஏதோ என்னை பெண் கேட்டுவரப்போவதாகச் சொன்னீர்களே?
   ஆமாம் அதில் என்ன கோளாறு கண்டாய்?
இது ஸ்வேதாவுக்குத் தெரிந்தால்?
 அவள் யார் என் வாழ்க்கையில் குறுக்கிட? மேலும் அவளுக்கு இது தெரிந்து என்ன ஆகப்போகிறது?
  அவள் உங்களை மணக்கப்போவதாக ஊரெல்லாம் தம்பட்டம் அடித்து வருகிறாள் நீங்கள் என்னடாவென்றால் என்னை பெண் கேட்டு வரப்போவதாகக் கூறுகிறீர்கள். இந்த விசயம் உங்கள் அம்மாவிற்குத் தெரியுமா?
   அம்மாவிற்குத் தெரியாமல் நான் எதையும் செய்வது கிடையாது! அவர்களும் என் விருப்பத்தை மறுப்பது கிடையாது. சொல்லப்போனால் அவர்கள்தான் உன்னை பெண்கேட்டு வர சொன்னதே!
 அப்படியா? அவர்களுக்கு என்னை பிடித்துவிட்டதா?
பிடிக்காமலா உன்னை பெண்கேட்டுவரச் சொல்லுவார்கள்?
உன் வீட்டார் தான் என்ன சொல்லுவார்களோ? இந்த ஏழைக்கு உன்னைத் தர சம்மதிப்பார்களோ மாட்டார்களோ? என்றான் அபிசேக்.
   போங்க விளையாடாதீர்கள்? என்று செல்லமாய் சிணுங்கினாள் மது!
அப்பாடா இப்போதாவது என் தேவதைக்கு கோபம் தீர்ந்ததே! சரி அலுவலக விசயத்திற்கு வருவோம் அப்புறம் எப்படி அந்த அசகாய சூரர்களை சமாளித்தாய் என அபிஷேக் கேட்க சகஜ நிலைக்கு திரும்பிய மது நடந்த விவரங்களையும் காண்டிராக்ட் பெற்ற விசயத்தையும் கூறி முடித்தாள்.
   சரி மது குட் நைட்! நாளை அலுவலகத்தில் சந்திப்போம்! என்று போனை கட் செய்தான் அபிஷேக்.
   அதன் பிறகு ரொம்ப நேரம் தூக்கம் வராது தவித்தாள் மது. உலகிலேயே இந்த காதல் நோய்க்கு தீர்வே கிடையாது! இது பீடித்தால் மீள்வது என்பது ஏது? என்று அவள் நினைக்க முதன் முதலாய் அவள் அபிஷேக்கை சந்தித்தது மோதல் காதலில் முடிந்தது என்று ஒவ்வொன்றாய் நினைவிற்கு வர அப்படியே அதில் மூழ்கினாள்.
    திடிரென அவளுக்கு ஒரு சந்தேகமும் தோன்றியது! இந்த காதல் நிறைவேறுமா? அந்த ஸ்வேதா சும்மா இருப்பாளா? தன் வீட்டில் சம்மதிப்பார்களா என்று பலவாறு சிந்தித்தவள் அப்படியே உறங்கிப் போனாள்.
    அதிகாலையில் அன்ன பூரணி குரல் கொடுத்ததும் எழுந்தாள் மதுமிதா! என்ன மது கண்ணெல்லாம் சிவந்து கிடக்கிறதே? ராத்திரி சரியாத் தூங்கலையா? எதுவோ போன் வந்தது போலத் தெரிந்தது! என்ன அலுவலகத்தில் ஏதேனும் பிரச்சனையா? என்று கேள்வி மேல் கேள்வியாக அடுக்கினாள் அவள் அன்னை!
   அம்மா! கொஞ்சம் மூச்சு விட்டு கேட்கிறாயா? இப்படி கேட்டுக் கொண்டே இருந்தால் நான் எப்படி பதில் சொல்வது? என்று பதிலுக்கு எரிந்துவிழுந்தாள் மது.
   இல்லேம்மா! கண்ணெல்லாம் சிவந்து கிடக்கிறதே என்று ..
  அதெல்லாம் ஒன்றுமில்லை! நேற்று வரும் போதே கண்ணில் தூசி விழுந்திருக்கும் போல ராத்திரி கவனிக்காமல் விட்டு விட்டேன்! அதான் கண் சிவந்து கிடக்கிறது! ஆபிஸ் எம்டி நேற்று வரவில்லை அதான் போன் செய்து விசாரித்தார் வேறொன்றுமில்லை! வென்னீர் ரெடியாக இருக்கிறதா நான் ஆபிசுக்கு போக வேண்டாமா? என்று மது கேட்கவும்
   எல்லாம் ரெடியாக இருக்கு! இன்னும் எழுந்திருக்கிலையேன்னுதான் உன்னை எழுப்ப வந்தேன்! இன்னிக்கு ஒருநாள் லீவு போடேன் கண்ணெல்லாம் இப்படி சிவந்துகிடக்கே என்றாள் அன்ன பூரணி.
லீவெல்லாம் போட முடியாதும்மா இன்னிக்கு ஒரு முக்கிய மீட்டிங்க் இருக்கு என்றவள் குளிக்க கிளம்பினாள்.
   குளித்து முடித்து டிபன் அருந்த வந்தவளிடம் மது இந்த வாரம் ஞாயிற்றுக் கிழமை உன்னை பெண் பார்க்க வருவதா சொல்லி யிருக்காங்க அதனால..
   அவள் சொல்லி முடிக்கும் முன்னரே என்னது இதெல்லாம் யாரை கேட்டு முடிவு பண்றீங்க? என்று கோபமானாள் மது!
   ஏம்மா உனக்கு வயசாகிட்டு போவுதில்ல காலா காலத்தில கல்யாணம் பண்ணி பார்க்க வேண்டாமா? பெத்தவங்க எங்க கடமைய நாங்க செய்யறோம்! தரகர் மூலமா இந்த இடம் வந்திருக்கு ஜாதகம் பொருந்தியிருப்பதாக ஜோசியரும் சொல்லிட்டார்! உனக்கு பையன பிடிச்சா முடிச்சிடலாமுன்னு அப்பா சொன்னார்!
   அப்ப பையனுக்கு என்னை பிடிக்க வேண்டாமா? என்றாள் மது!
பையனுக்கு உன்னை ரொம்ப பிடிச்சு போச்சாம்! என்றபடி வந்தமர்ந்தார் அவளது தந்தை!
   ஒன்றும்புரியாமல் இதென்ன புதுக்கதை என்று அதிர்ந்தாள் மதுமிதா!

                                     நிலவு வளரும்(13)

தங்கள் வருகைக்கு நன்றி! பதிவு குறித்த கருத்துக்களை பகிரலாமே! வாக்களித்து பிரபல படுத்தலாமே!

Saturday, November 26, 2011

மும்பை டெஸ்ட் "திரில் டிரா * கோப்பை வென்றது இந்தியா

மும்பை: இந்தியா, வெஸ்ட் இண்டீஸ் அணிகள் மோதிய மும்பை டெஸ்ட், "டிரா ஆனது. இருப்பினும், 2-0 என தொடரை வென்ற இந்திய அணி, கோப்பை கைப்பற்றியது.
இந்தியா வந்துள்ள வெஸ்ட் இண்டீஸ் அணி மூன்று போட்டிகள் கொண்ட டெஸ்ட் தொடரில் பங்கேற்றது. முதலிரண்டு போட்டிகளில் வென்ற இந்திய அணி தொடரை ஏற்கனவே கைப்பற்றி விட்டது. முக்கியத்துவமில்லாத மூன்றாவது டெஸ்ட் மும்பையில் நடந்தது. முதல் இன்னிங்சில் வெஸ்ட் இண்டீஸ் 590, இந்தியா 482 ரன்கள் எடுத்தன. நான்காம் நாள் ஆட்டநேர முடிவில், வெஸ்ட் இண்டீஸ் அணி இரண்டாவது இன்னிங்சில்  2 விக்கெட்டுக்கு 81 ரன்கள் எடுத்து, 189 ரன்கள் முன்னிலை பெற்றிருந்தது. பிராத்வைட் (34), டேரன் பிராவோ (27) அவுட்டாகாமல் இருந்தனர்.
ஓஜா கலக்கல்:
இன்று ஐந்தாவது மற்றும் கடைசி நாள் ஆட்டம் நடந்தது. பிராத்வைட் (35) ஓஜாவின் சுழலில் சிக்கினார். டேரன் பிராவோ (48), சாமுவேல்ஸ் "டக் அவுட்டாகினர். கார்ல்டன் (1), பாவெல் (11), கேப்டன் சமி (10) விரைவில் நடையை கட்டினர். வெஸ்ட் இண்டீஸ் அணி, இரண்டாவது இன்னிங்சில் 134 ரன்னுக்கு சுருண்டது. சுழலில் அசத்திய பிரக்யான் ஓஜா 6, அஷ்வின் 4 விக்கெட் வீழத்தினர்.
சேவக் அரைசதம்:
இரண்டாவது இன்னிங்சில் 64 ஓவரில் 243 ரன்கள் எடுத்தால் வெற்றி என்ற நிலையில் காம்பிர் (12) ஏமாற்றினார். சேவக் 60 ரன்கள் எடுத்தார். சச்சின் (3), டிராவிட் (33), லட்சுமண் (31), தோனி (13) அடுத்தடுத்து அவுட்டாகினர். விராத் கோஹ்லி 63 ரன்கள் எடுத்தார்.
கடைசி ஓவரில் 3 ரன் எடுத்தால் வெற்றி என்ற நிலையில், அஷ்வின் (14) ரன் அவுட்டாக, இந்திய அணி இரண்டாவது இன்னிங்சில் 9 விக்கெட்டுக்கு 242 ரன்கள் மட்டும் எடுக்க, போட்டி "டிரா ஆனது.


நன்றி  தினமலர்

ரத்தத்தை சுத்தமாக்கும் கொத்தமல்லி கீரைகள்

இந்திய சமையலில் தனியா எனப்படும் கொத்தமல்லிக்கு சிறப்பு மிக்க இடமுண்டு. சமையலில் மசாலா பொருளாக வாசனைக்காகவும் சுவைக்காகவும் சேர்க்கப்படும் கொத்தமல்லியில் இருந்து வளரும் சிறுதாவரமான கொத்தமல்லி கீரையில் ஏ,பி,சி உயிர் சத்துக்களும், சுண்ணாம்புச்சத்தும், இரும்புச்சத்துக்களும் உள்ளன. மனிதனின் உடலை வலுவாக்கும் அத்தனை சத்துக்களும் இந்த சிறிய வகை தாவரத்தில் உள்ளது என்றால் மிகையில்லை. இது உடலின் கொழுப்புச்சத்தை குறைத்து ரத்த நாளங்களில் கொழுப்பு உரைவதை தடுக்கிறது. இதனால் ஹார்ட் அட்டாக் பாதிப்பு ஏற்படும் ஆபத்து குறைகிறது.

கண்பார்வை தெளிவடையும்

சிறுவயது முதலே கொத்தமல்லி கீரையைச் சாப்பிடும் பழக்கத்தை ஏற்படுத்த வேண்டும். இதனால் ஆயுள் வரை கண்பார்வை மங்காது. மாலைக்கண்நோய் ஏற்பட்டவர்கள் கொத்தமல்லிக்கீரையை உணவில் சேர்த்து வர மாலைக்கண்நோய் குணமடையும்.

மக்கட் பேறு ஏற்படும்

உடலில் புதிய ரத்தம் உண்டாகி நல்ல பலம் பெற வேண்டுமானால் கொத்தமல்லிக்கீரையை நெய்யில் வதக்கி துவையல் போல சாப்பிட்டு வரவேண்டும். இதன் மூலம் விலை உயர்ந்த டானிக்கில் கிடைக்கும் சத்துக்களை விட அதிக சத்துக்கள் கிடைக்கும். தினசரி மல்லிக்கீரையைச் சாப்பிட்டு வர எந்த நோயினாலும் பாதிக்கப்படாமல் பலசாலியாக வாழலாம்.

கொத்தமல்லிக்கீரையை தினசரி சாப்பிட்டு வர ரத்தம் சுத்தமடையும், புதிய ரத்தம் உற்பத்தியாகும். இதனால் தாது விருத்தி அடையும். மக்கட் பேறுக்கு வழிகிடைக்கும்.

கர்ப்பிணிகள் கர்ப்பம் தரிக்கத் தொடங்கிய மாதத்தில் இருந்து கொத்தமல்லி கீரையை உணவில் சேர்த்து வர வயிற்றில் வளரும் குழந்தை ஆரோக்கியமாக வளரும். குழந்தையில் எலும்புகளும், பற்களும் உறுதியடையும். சொறி, சிரங்கு உள்ளிட்ட நோய்கள் தாக்காது.

வயிற்றுப்புண் குணமடையும்

வயிற்றில் புண் இருந்து அதன் மூலம் அடிக்கடி வலி ஏற்படுபவர்கள் கொத்தமல்லிக்கீரையை உணவில் சேர்த்துக்கொள்ள வேண்டும் இதனால் புண் ஆறி வயிற்று வலி குணமடையும்.

வாய், உதடு போன்றவற்றில் சிறு புண் ஏற்பட்டிருந்தாலும் கொத்தமல்லியை துவையல் செய்து உட்கொண்டு வர விரைவில் நிவாரணம் கிடைக்கும்

மூக்கு தொடர்புடைய நோய்கள்

பீனிசம்,மூக்கடைப்பு,மூக்கில்புண்,மூக்கில் சதை வளர்தல் போன்ற நோயினால் சிரமப்படுபவர்கள் கொத்தமல்லித் துவையலை உணவில் சேர்த்து உட்கொள்ளவேண்டும். இதனால் மூக்கு தொடர்புடைய அனைத்து வியாதிகளும் குணமடையும்.

தோல் நோய்கள் குணமாக்குவதில் கொத்தமல்லி முக்கிய பங்கு வகிக்கிறது. சொறி, சிரங்கு, புண் போன்றவைகளுக்கு மருந்து போட்டுக்கொண்டு வந்தாலும் தினசரி கொத்து மல்லிக்கீரையை உணவில் சேர்த்து வர அவை சீக்கிரம் குணமடையும்.

நன்றி தட்ஸ் தமிழ்

தளிர் ஹைக்கூ கவிதைகள்! 3

தளிர் ஹைக்கூ கவிதைகள்!

காலிப்பாத்திரத்தில்
சமைத்து பசி ஆற்றுகிறது!
குழந்தை!

நீந்த தெரியாது
நின்றது குதிரை!
குளத்தில் நிழல்!

துடைத்தெடுத்தது
இருட்டை!
ஒளி!

உள்ளம் குமுறுகையில்
வார்த்தைகளில்
வெடிக்கிறது கோபம்!

பறவைகளின் இசையில்
பயிர்களின் நாட்டியம்!
மழை வருகை!

ஒடுங்கும் முதுமையில்
ஓடும் குழந்தையாகிறது
மனசு!

குளத்தில்
கோலம் போட்டது
மழைத்துளி!

மஞ்சள் வெயில்!
மலர் சொறிந்தன
வண்ணத்துப்பூச்சிகள்!

முகத்தை திருப்பிக்கொண்டது
முழுநிலவு
அமாவாசை!

வேண்டுதல் இன்றி
மொட்டை போட்ட மரங்கள்!
இலையுதிர் காலம்!

தங்கள் வருகைக்கு நன்றி பதிவு குறித்த கருத்துக்களை பகிரலாமே! வாக்களித்து பிரபல படுத்தலாமே!

Friday, November 25, 2011

ஷாக் அடிக்கும் மின்கட்டண உயர்வு? ரூ 10 வரை உயர்வு?

சென்னை: மின்சார கட்டணம் உயர்த்தப்படும் என தமிழக அரசு கடந்த சில நாட்களுக்கு முன்னர் அறிவித்தது.இது தொடர்பாக மின்சார ஒழுங்கு முறை ஆணையத்திடம் முறையீடு செய்யப்பட்டிருந்தது. தமிழக அரசு பரிந்துரைத்துள்ள மின்சார கட்டணம் தற்போது வெளிவரத்துவங்கியுள்ளது. இதன் படி வீடுகளுக்கு மின் சார கட்டணம் 100 யூனிட் வரை ஒரு யனிட்டிற்கு ரூ.1.50 எனவும், 101 முதல் 600 வரை ரூ.5.75 என உயர்த்த பரிந்துரை செய்யப்பட்டுள்ளது. மேலும் பள்ளிகளுக்கு யூனிட் ஒன்றிற்கு ரூ.5.50 எனவும், தொழிற்சாலைகளுக்கு யூனிட் ஒன்றிற்கு ரூ. 5 எனவும், கடைகளுக்கு யூனிட் ஒன்றிற்கு ரூ.6.50 எனவும் உயர்த்த பரிந்துரை செய்யப்பட்டுள்ளதாக தகவல் தெரிவிக்கின்றன. இதனிடையே மின்சார கட்டண உயர்வு குறித்து 4 வாரத்தில் மக்கள் கருத்துக்களை தெரிவிக்கலாம் எனவும், சென்னை தவிர மற்ற நகரங்களில் மக்கள் கருத்து கேட்க கூட்டம் நடத்தப்படும் எனவும் தமிழக மின்சார ஒழுங்கு முறை ஆணைய தலைவர் கபிலன் கூறியுள்ளார். மேலும் அவர் மின் கட்டண உயர்வு குறித்து 90 நாட்களுக்குள் முடிவு செய்யப்படும் எனவும் கூறினார்.

நன்றி தினமலர்

ஒரே இன்னிங்க்சில் 5 விக்கெட்கள், அதிரடி சதம் - அஸ்வின் அசத்தல் சாதனை

மும்பை: அறிமுகமாகிய முதல் டெஸ்ட் போட்டியில் 9 விக்கெட்களை வாரிய அஸ்வின், தனது 3வது போட்டியில் ஒரே இன்னிங்ஸில் 5 விக்கெட் வீழ்த்தி, ஒரு சதமும் அடித்து அசத்தி விட்டார்.

சென்னையை சேர்ந்த அஸ்வின் மேற்கிந்திய தீவுகளுக்கு எதிரான முதல் போட்டியில் கலந்து கொண்டு சிறப்பாக ஆடினார். 9 விக்கெட்களை வீழ்த்தி ஆட்டநாயகன் விருது பெற்றார்.

அதன்பிறகு 2வது டெஸ்ட் போட்டியில் மேற்கிந்திய தீவுகளுக்கு எதிராக சிறப்பாக பந்துவீசி, ரன் வேகத்தை குறைத்தார். இந்த நிலையில் தற்போது மும்பையி்ல் நடந்து வரும் 3வது டெஸ்ட் போட்டியின் முதல் இன்னிங்க்சில், அஸ்வின் 5 விக்கெட்களை வீழ்த்தினார்.

அதன்பின் களமிறங்கிய இந்திய அணியில் முன்னணி பேட்ஸ்மேன்களின் சதம், அரைசதம் குறித்து ரசிகர்களிடையே பெரும் எதிர்பார்ப்பு இருந்தது. முக்கியமாக சச்சின் 100வது சதம் குறித்து ரசிகர்களிடையே பலத்த எதிர்பார்ப்பு நிலவியது. சச்சின் 100வது சதம் அடிக்க வேண்டும் என்று யாகங்கள், பூஜைகள் செய்த ரசிகர்களும் உண்டு. இந்த நிலையில் முதல் இன்னிங்க்சில் இந்தியா 7 விக்கெட்களை இழந்து நம்பிக்கையற்ற நிலையில் இருந்த போது களமிறங்கினார் அஸ்வின்.

தனது 3வது டெஸ்ட் போட்டியில் பேட்டிங் செய்ய வந்த அஸ்வின் என்ன ரன் அடிக்க போகிறார் என்று ரசிகர்கள் சாதாரணமாக பார்ததனர். ஆனால் அதிரடியில் இறங்கிய அஸ்வினின் ஆட்டத்தை பார்த்த போது, நடப்பது ஒருநாளா, டெஸ்ட் போட்டியா என்ற சந்தேகம் ஏற்பட்டது.

விக்கெட்கள் ஒருபுறம் விழுந்து கொண்டிருக்க, அஸ்வின் அதிரடியை மட்டும் கடைசி வரை நிறுத்தவே இல்லை. 2 சிக்ஸ், 15 பவுண்டரிகள் விளாசிய அஸ்வின் 117 பந்துகளில் 103 ரன்களை எடுத்தார். ஆனால் அடுத்த பந்திலேயே ஆட்டமிழந்தார். அவரை ரசிகர்கள் மற்றும் சகவீரர்கள் அனைவரும் எழுந்து நின்று பாராட்டினர்.

3வது இந்தியர்

ஒரே இன்னிங்க்சில் 5 விக்கெட் விக்கெட் எடுத்த 3வது இந்தியர் அஸ்வின் ஆவார். இதற்கு முன்பு வினூ மங்கட், பாலி உம்ரிகர் ஆகியோர் இந்த சாதனையைப் படைத்துள்ளனர். 1952ல் மங்கட்டும், 1962ம் ஆண்டு உம்ரிகரும் இந்த சாதனையைச் செய்தனர். அதன் பின்னர் ஒரு இந்திய வீரர் இந்த சாதனையைச்செய்வது இதுவே முதல் முறையாகும்.

சாதனைத் தமிழருக்கு வாழ்த்துக்கள்!

நன்றி தட்ஸ் தமிழ்

மீன் ஏன் குட்டி போடுவதில்லை? பாப்பா மலர்!


மீன் ஏன் குட்டி போடுவதில்லை?

                 அறிவியல் கதை

ஜகன் வீட்டு மேஜை மீதிருந்த கண்ணாடி தொட்டிக்குள் மீன்கள் உலாவுவதை வேடிக்கைப் பார்த்துக் கொண்டிருந்தான். வண்ண வண்ண மீன்கள் நீரினுள் நீந்திக் கொண்டு இருந்தது. நேற்றுதான் அந்த மீன் தொட்டியை அவனது தந்தை வாங்கி வந்திருந்தார். அழகான மீன்களை வேடிக்கை பார்ப்பதில் அவனது பொழுது கொஞ்சம் கழிந்தது.
   என்ன ஜகன் மீன் தொட்டியை அப்படியே வச்ச கண்வைக்காமே அப்படியே முறைச்சி பார்த்துகிட்டிருக்கே? மீன்கள் என்ன சொல்லுது? என்றவாறு அவனருகே வந்தார் அவனது தந்தை
   அப்பா மீன் குஞ்சுகளை நல்லா உன்னிச்சு பாருங்கப்பா! என்றான். அவனது தந்தை சற்று கவனித்துவிட்டு என்னப்பா எதைச் சொல்றே? ஒன்னும் தெரியலையே? என்று கூறினார்.
    நல்லா பாருங்கப்பா எல்லா மீன் குஞ்சுகளும் அடிக்கடி வாயை திறந்திகிட்டும் மூடிகிட்டும் இருக்குது! ஏன் அப்படி செய்யுதுங்க? அதைத் தான் ரொம்ப நேரமா பார்த்துகிட்டு இருக்கேன் என்றான்.
   அதுவா அதுக்கான காரணத்தை நான் சொல்றேன். மீனோட தலையில இரண்டு பக்கமும் பிளவு பட்ட ஒரு பகுதி இருக்குதுபார்! அதுக்கு பேருதான் செவுள்! என்றான் ஜகன். ஆமா நீ சொன்னது கரெக்ட்! அந்த செவுள கொஞ்சம் நீக்கினா இரத்த சிவப்பான ஒரு பகுதி தெரியும். அப்பகுதியில் ஏராளமான இரத்த நாளங்கள் உள்ளது. வாயை திறக்கும் மீன் தண்ணீரை வாய் நிறைய எடுத்துக் கொள்கிறது. இந்த தண்ணீர் இரத்த நாளங்கள் உள்ள பகுதியில் பாயும். அங்க இரத்த நாளங்கள் தண்ணீரில் உள்ள ஆக்சிஜனை எடுத்துகிட்டு கார்பன் டை ஆக்சைடை வெளியேற்றுகின்றன. பிறகு அசுத்த நீர் செவுள் வழியா வெளியேறிடும். அதனாலதான் மீன் எந்நேரமும் வாயைத் திறந்து திறந்து மூடிக்கிட்டு இருக்கு! அதாவது செவுள் மூலம் சுவாசிக்கிறது என்றார் அவனது தந்தை.
   அப்பாடா! இதுக்கே இவ்வளவு அறிவியலா என வியந்தான் ஜகன். அப்பா அந்த மீன் எல்லா மீன் போல நீந்தாம மல்லாக்க நீந்துதே என்றான் ஜகன்.
     ஜகன் மீன்கள் செத்துப்போனாதான் அப்படி நீந்தும். தண்ணி கெட்டுப் போனாத் தான் இப்படி நடக்கும் தண்ணி கெட்டுப் போயிருக்கும்னு நினைக்கிறேன் சீக்கிரம் தண்ணியை மாத்தணும் வா உதவி செய் என்று இருவரும் இணைந்து நீரை மாற்றினர்.
   அவர் சொன்னபடி அந்த மீன் இறந்து விட்டிருந்தது. அப்பா எல்லா மீனுமே செத்துப் போனாத் தான் மல்லாக்க மிதக்குமா என்றான். இல்ல ஜகன் ‘கேட் பிஷ்’னு ஒருவகை மீன் மட்டும் உயிருடன் இருக்கும் போதே மல்லாக்க நீந்தும் என புதிய செய்தியை கூறினார் அவனது தந்தை.
   அப்பா அந்த குட்டி மீன் எவ்வளவு அழகா இருக்கு பார்த்தீங்களா? என்றான் ஜகன். ஆமா ஜகன் ரொம்ப அழகா இருக்கு! ஆனா இதை விட சிறிய மீனெல்லாம் இருக்கு! உலகத்திலேயே மிகச்சிறிய மீன் ‘கோபிஷ்’ இதன் நீளம் 1செண்டிமீட்டர்தான்!
   ஆச்சர்யமாயிருக்கே! என்ற ஜகன், அப்பா எனக்கொரு சந்தேகம் மீன் மட்டும் ஏன் குட்டி போடலை? ஆனா திமிங்கலம் குட்டி போடுகிறதே? என்றான்.
    இதைக்கேட்டு ஹாஹாவென சிரித்த அவனது தந்தையை அப்பா நான் ஏதாவது தப்பா கேட்டுட்டேனா என்றான் ஜகன். இல்லை ஜகன் நீ கேட்ட கேள்வி சிரிப்பை வரவழைச்சிடுச்சு! ஆனா நல்ல கேள்விதான் கேட்டுருக்கே!
  திமிங்கலம் மீன் மாதிரி இருந்தாலும் அது மீன் இனம் இல்லை!திமிங்கலம் மீன் மாத்ரி செவுள் மூலம் சுவாசிப்பதில்லை!அதுக்கு நுரையீரல் உள்ளது. மீன் தட்ப இரத்த பிராணி,எனவே முட்டை போட்டு குஞ்சு பொறிக்குது. ஆனா திமிங்கலம் வெப்ப இரத்த பிராணி அதனால குட்டிப்போட்டு பாலூட்டுது.
   திமிங்கலம் ஒரு பாலூட்டி! அவை ஒருகாலத்தில் நிலத்தில் வாழ்ந்த பாலூட்டிகளே! காலப்போக்கில் கடலை இருப்பிடமாக கொண்டு விட்டன என்றும் ஆராய்சியாளருங்க கருதறாங்க! திமிங்கலத்தோட துடுப்புகள் ஒருகாலத்தில் கால்களா இருந்ததுன்னு ஆராய்ச்சியாளருங்க கருதறாங்க அதனால திமிங்கலமும் மீனும் ஒண்ணுன்னு குழம்பிக்காதே என்றார் அவனது தந்தை.
 மீன்கள் பத்தி எவ்வளவோ சொல்லலாம்! ஆனா இப்ப படிக்கிற நேரம் போய் படி என்று அவனை அனுப்பினார்.
  மீன்களை பற்றிய விசித்திர நினைவுகளுடன் அவ்விடத்தை விட்டு அகன்றான் ஜகன்.
தகவல் உதவி} பொது அறிவுக் களஞ்சியம்
அறவுரை!

முதுமொழிக்காஞ்சி!

இயல்வது கரத்தலின் கொடுமை இல்லை
உணர்விலன் ஆதலின் சாக்காடு இல்லை
நசையின் பெரியதோர் நல்குரவு இல்லை
இசையின் பெரியதோர் எச்சம் இல்லை

விளக்கம்} கொடுக்க முடிவதை கொடுக்க வேண்டும் புகழ் அற்றவனாய் இருப்பதைவிட சாவதே மேல். ஆசையை விட பெரிய வறுமை இல்லை.புகழைத் தவிர எஞ்சி நிற்கும் பொருளில் பெரிது எதுவும் இல்லை!

உங்களுக்குத் தெரியுமா?
பிரிட்டனின் பழைய பெயர் ஆலிபியோன்

தங்கள் வருகைக்கு நன்றி பதிவு குறித்த கருத்துக்களை பகிரலாமே! வாக்களித்து பிரபலபடுத்தலாமே!

Thursday, November 24, 2011

நண்பேன்டா...! டீ மாஸ்டருடன் விளையாடும் அணில்: ஆச்சர்யப்பட வைக்கும் பாசப் பிணைப்பு

விழுப்புரம் : விழுப்புரத்தில், ஒரு டீ கடைக்காரருடன் விளையாடியபடி நட்புடன் பழகி வரும் அணிலின் பாசப் பிணைப்பு, ஆச்சர்யத்தை ஏற்படுத்தியுள்ளது.

விழுப்புரம், கணபதி நகரை சேர்ந்தவர் வேல்முருகன். திருச்சி நெடுஞ்சாலையில் மகளிர் கல்லூரி எதிரே, டீ கடை வைத்துள்ளார். எப்போதும் இவருடன் விளையாடிக் கொண்டிருக்கும் அணிலைப் பார்த்து, கடைக்கு வரும் மக்கள் ஆச்சர்யப்படுகின்றனர்.பங்க் கடையில் விற்பனை, டீ போடும் போதும், அவரது தோளிலும், கைகளிலும் திரிந்தபடி விளையாடிக் கொண்டிருக்கிறது அந்த அணில். கண்ணில் பட்டவுடன் ஓடிவிடும் சுபாவம் கொண்ட அணில், ஒருவருடன் நட்புறவாக ஒட்டிக்கொண்டுள்ளது, அனைவரையும் ஆச்சர்யப்பட வைக்கிறது.அவர் கொடுக்கும் உணவுகளை சுவைத்தபடி சுற்றி வரும் அந்த அணில், டீ கடை மேல் கூரை, பங்க் கடை பகுதிகளில் உலவுகிறது, காஞ்சன் என செல்லமாக அவர் அழைத்த குரலுக்கு, உடனே ஓடி வந்து, அவர் தோள் மீது உட்கார்ந்து விளையாடுகிறது. அவருடன் சண்டை கூட போடுகிறது.

அணிலுடன் ஏற்பட்ட நட்பு குறித்து வேல்முருகன் கூறியதாவது:கடந்த இரண்டு மாதங்களுக்கு முன், கடையின் அருகே இருந்த மரத்தின் கூட்டிலிருந்து, இந்த அணில் குஞ்சு கீழே விழுந்து கிடந்தது. கண் திறக்காமல் இருந்த அணில் குஞ்சை எடுத்து, பால் வாங்கி ஊற்றி வளர்த்தேன்.பால், பிஸ்கட், சாதம் ஆகியவற்றை உணவாகக் கொடுத்து வந்தேன். அணில் என்னுடனே ஒட்டிக் கொண்டது. காலையில் கடை திறந்தவுடன், என் மீது அமரும். மாலை இருள் சூழ்ந்தவுடன், 6 மணிக்கு, கடையின் உள்ளே சென்றுவிடும்; வெளியே வராது. மறு நாள் காலை கடையைத் திறந்தவுடன், என்னுடன் வந்துவிடும்.பால், பிஸ்கட், சாதம், வறுகடலை, மணிலா பயிறு வடை என, நான் கொடுப்பது அனைத்தையும் சாப்பிடும். சிக்கன், மட்டன், மீன் உணவையும் இது ருசித்துள்ளது. நான் டீ போடும் போதும், விற்பனை செய்யும் போதும், என் மீது விளையாடிக் கொண்டிருக்கும். எந்த பொருளையும் வீணடிக்காது; நான் கொடுப்பதை மட்டுமே சாப்பிடும்.மற்றவர்கள் மீது விட்டால், நுகர்ந்து பார்த்து விட்டு, உடனே திரும்பி என் மீது ஒட்டிக் கொள்ளும். நான் வெளியூர் செல்லும் போதும், என்னுடன் பைக்கில் பலமுறை பயணித்துள்ளது. உறவினர் திருமணத்திற்கு வெளியூர் சென்ற போது, என் பாக்கெட்டினுள் பயணித்து, திரும்பி வந்துள்ளது.இவ்வாறு வேல்முருகன் கூறினார்.இந்த பாசப் பிணைப்பை பொதுமக்கள் பலரும் பாராட்டிச் செல்கின்றனர்.

நன்றி தினமலர்

Wednesday, November 23, 2011

தமிழகத்தில் 7 மணி நேர மின்வெட்டு.. இருளில் தவிக்கும் மக்கள்- தொழில்கள் பாதிப்பு

சென்னை: தமிழ்நாட்டில் உள்ள மின் உற்பத்தி நிலையங்களில் உற்பத்தி குறைந்துள்ளதால் ஏழு மணி நேரம் மின் வெட்டு அமலாக்கப்படுகிறது. இந்த மின் வெட்டினால் மாநிலம் முழுவதும் தொழிற்சாலைகளில் உற்பத்தி பாதிக்கப்பட்டுள்ளது.

கடந்த காலங்களில் மூன்று முதல் நான்கு மணிநேரமாக இருந்த மின்வெட்டு தற்போது 7 மணி நேரமாக அதிகரித்துள்ளது.

தமிழக மின் நிலையங்களின் மூலம் 3,560 மெகாவாட், தனியார் மின் நிலையங்களால் 940 மெகாவாட், மரபுசாரா எரிசக்தி மூலம் 100, காற்றாலைகளால் 1,150, மத்திய தொகுப்பால் 2,060 மெகாவாட் மின்சாரம் கிடைத்துள்ளது. 800 மெகாவாட் மின்சாரம், தனியாரிடமிருந்து வாங்கப்பட்டுள்ளது.

இதுபோக 3,700 மெகாவாட் மின்சாரம் பற்றாக்குறையாக உள்ளது. இதனால் கடும் மின்வெட்டு அமலாக்கப்பட்டு வருகிறது.

இதற்கு தமிழக மின்வாரியம் பல்வேறு காரணங்களை தெரிவித்து வருகிறது. நிலக்கரி இருப்பு குறைவு, பராமரிப்பு, நிலையங்களில் கோளாறு, தளவாட பொருட்களுக்கு பற்றாக்குறை என வரிசையாக காரணங்களை சொல்கிறார்கள்.

இதனால் சென்னை தவிர மாநிலத்தின் மற்ற பகுதிகள் பயங்கர மின் வெட்டை சந்தித்து வருகின்றன. கிட்டத்தட்ட 7 மணி நேரம் கரண்ட் இல்லை. மூன்று மணி நேரம் தொடர்ச்சியாகவும், பின்னர் 4 மணி நேரம் சுழற்சி முறையிலும் பவர் கட் ஆகிறது.

சென்னையில் தினமும் ஒரு மணி நேரம் மட்டுமே மின்வெட்டு அமலாக்கப்படுகிறது.

தொழிற்சாலைகளில் பாதிப்பு:

இதனால் மிக அதிகமாக பாதிக்கப்பட்டுள்ளது கோவை, திருப்பூர், ஈரோடு, காஞ்சிபுரம், சென்னை, திருவள்ளூர் உள்ளிட்ட மாவட்டங்களில் உள்ள தொழிற்சாலைகள், தொழில் நிறுவனங்கள், வர்த்தக நிறுவனங்கள் தான்.

பெரும் பாதிப்பு ஏற்பட்டுள்ளது.இதனால், பண்டிகை காலத்தில் மேற்கொள்ளப்படும், நாள்காட்டி, ஆயத்த ஆடைகள், வீட்டு உபயோக பொருட்கள் உள்ளிட்டவற்றின் உற்பத்தி பணிகள், மிகுந்த பாதிப்பு அடைந்துள்ளன.

இதற்கிடையே, மின் வெட்டோடு, விரைவில் மின் கட்டணத்தையும் தமிழக அரசு உயர்த்தவுள்ளது.

மின் கட்டணத்தை உயர்த்தச் சொல்லி தமிழக மின் வாரியம் சார்பில் கடந்த 17ம் தேதி, தமிழ்நாடு மின்சார ஒழுங்குமுறை ஆணையத்திடம் மனு தாக்கல் செய்யப்பட்டது. இது வரும் 25ம் தேதி, ஆணைய சேர்மன் கபிலன் முன் விசாரணைக்கு வருகிறது. மின் வாரியம் சார்பில் அதன் தலைவர் ராஜிவ் ரஞ்சன் ஆஜராகி விளக்கம் சொல்வார்.

இதையடுத்து மின் கட்டணத்தை அதிகரிக்க ஆணையம் அனுமதி வழங்கும் என்று தெரிகிறது.

நன்றி தட்ஸ் தமிழ்!

சரண்யா மோகனை கண்டுக்காத தமிழ் சினிமா!


சரண்யா மோகனை கண்டுக்காத தமிழ் சினிமா!

ஆளாளுக்கு இந்த சரண்யா மோகனை ஜொள்ளு விட்டுத் திரியறப்ப நாமளும் எதுக்கு மனசுக்குள்ள பூட்டி வைச்சி இருக்கிறது! கொஞ்சம் அவுத்து விடலாமுன்னு தான் இந்த பதிவு! சரண்யா மோகன் ரசிகர்களே காதில் புகை வந்தாலும் தொடர்ந்து படிப்பீங்கன்னு நம்பி எழுதறேன்!
  யாருடா இந்த சரண்யா மோகன் என்று தமிழ் சினிமாவே பார்த்திராத அப்பாவி வாசகர்களும் அந்த காலத்து சரோஜாதேவி சாவித்திரிய தவிர வேற யாரையும் பார்க்க மாட்டோம்னு அடம் பிடிக்கும் சில பெரிசுகளும் இவங்களை பார்த்தா விடமாட்டாங்க! அப்படிப்பட்ட இந்த் சரண்யாவை தமிழ் சினிமா சரியா பயன் படுத்தலைங்கிறதுதான் என் வாதம்! அதென்ன வாதம் பித்தம்னு கேட்காதீங்க? வாதம்னா என்ன சொல்லலாம்?ம்ம்! என்னோட கருத்து!
  இப்ப எதுக்கு இந்த தீடீர் பதிவு! சரண்யா மோகனை பத்தி எப்படி உனக்கு நினைப்பு வந்துச்சு? இதே மாதிரி எத்தனையோ பேர காணாம போக்கி இருக்கு நம்ம தமிழ் திரையுலகம் அவங்க மேல இல்லாத அக்கறை இவங்க மேல என்ன? என்று கேட்கலாம் நீங்கள்?
  சரண்யா மோகனை பத்தி நண்பர் கே. எஸ் ராஜ் ஒரு பதிவில் குறிப்பிட்டு இருந்தார் இவங்க எனக்கு பிடிச்ச நடிகைன்னு ஆனா தமிழ் சினிமா இவங்களுக்கு கதாநாயகி வாய்ப்பு தரலைன்னு வருத்தப்பட்டிருந்தார்! அதுல ஒரு நியாயம் இருப்பதா எனக்கு தோணுச்சு அப்போதைக்கு ஒரு கமெண்ட் போட்டுட்டு வந்துட்டேன்!.அப்புறமா அதையே மறந்திட்டேன்! நேத்து திடீர்னு அவங்க ஞாபகம் நைட்டு வந்துச்சு! பார்த்தியா பார்த்தியா தப்பா நினைச்சுகிறீங்களே!
   பொழுது போகாம நேத்து நைட்டு கே டீவிய போட்டா மகேஷ் சரண்யா மற்றும் பலர் னு ஒரு படம் போட்டாங்க!அதுல கதாநாயகி பேரு சரண்யா! ஆனா அவங்களை யாரு பார்த்தாங்க அந்த கதாநாயகனைத் தவிர? கதாநாயகனோட தங்கச்சியா செமையா நடிச்சிருந்தாங்க நம்ம சரண்யா மோகன்! இயல்பாவே அவங்களுக்கு நடிப்பு நல்லா வருது! அந்த கதாநாயகனும் கதாநாயகியும் தான் மத்தவங்க நடிப்பை இமிடேட் செய்தாங்க! நம்ம சரண்யாவோ தனது டிரெட்மார்க் குறும்பு நடிப்பால் மனதை கொள்ளையடித்துவிட்டார்! கதையெல்லாம் கேக்காதீங்க! படத்த முழுசா பார்க்கலை! தூங்கிவிட்டேன்!
   என்கேள்வி என்னவென்றால் இத்தகையான திறமையான நடிகையை ஏன் தமிழ் சினிமா ஒதுக்குகிறது? மொக்கை நடிகைகளின் பின்னால் ஓடும் தயாரிப்பாளர்கள் இது போன்ற திறமைசாலிகளை கண்டு கொள்வதில்லையே ஏன்? இவர் மட்டுமல்ல இன்னும் சில நடிகைகளையும் தமிழ் சினிமா ஒதுக்கிவைத்துள்ளது. திறமையான இவருக்கு தொடர்ந்து தங்கச்சி வேடமே கொடுத்து ஜுனியர் ஆர்ட்டிஸ்ட் ரேஞ்சிலேயே வைப்பது நியாயம் தானா?
  இவரது முதல் படத்திலேயே ரொம்ப அட்டகாசமா இருக்கும் அவரது நடிப்பு!  யாரடி நீ மோகினி அந்த படம்! அதில் இவருக்காகவே நிறையபேர் இந்த படத்த பார்த்ததா அப்பவே நிறைய பேர் சொன்னாங்க! அந்த படம் வந்து ஒரு மூணு வருசம் ஆகியும் இன்னும் கதாநாயகியா ஆகற வாய்ப்பு அவங்களுக்கு கிடைக்கலை!
 இப்ப வேலாயுதம் படத்திலயும் தங்கச்சி வேடத்தில கலக்கலா நடிச்சிருக்காங்கன்னு கேள்விப் பட்டேன்! இந்த அழகிய நடிகை கூடிய சீக்கிரம் தமிழ் சினிமாவின் நம்பர் ஒன் நாயகியா வருவாங்கண்ணு நம்புவோம்!


தங்கள் வருகைக்கு நன்றி! பதிவு குறித்த கருத்துக்களை பகிரலாமே! வாக்களித்து பிரபலபடுத்தலாமே!


Tuesday, November 22, 2011

கர்ப்பிணிகளை பாதிக்கும் இரும்பு சத்து மாத்திரைகள் - ஆய்வில் தகவல்

இரும்பு சத்து குறைபாடு காரணமாக, 33 சதவீதம் பேர் அனிமீயா என்னும் இரத்தச் சோகை நோயால் அவதியுறுவதாக உலக சுகாதார மையம் தெரிவித்துள்ளது. உடலின் ஆரோக்கியத்திற்கு இரும்புச் சத்து மிகவும் அவசியம். ஆனால் கர்ப்பிணிகள் அதிக அளவில் இரும்பு சத்து மாத்திரைகள் உட்கொள்வது ஆபத்தானது என்று ஆய்வு ஒன்றில் தெரியவந்துள்ளது.

ரத்தத்தில் சிவப்பணுக்களின் எண்ணிக்கையை அதிகரிப்பதில் இருப்பு சத்தின் பங்கு அதிகம். இந்தியா போன்ற வளரும் நாடுகளில் இரும்புச்சத்து குறைபாடு அதிகம் காணப்படுகிறது.உடலில் இரும்புச்சத்து குறைபாடு ஏற்படுவதால் இரத்த சோகை உண்டாகும். இதனால் உடல் சோர்வடைந்து சுறுசுறுப்பு குறைந்து விடும்.

பெண்களுக்கு இரும்பு சத்து

பெரும்பாலும் பெண்களுக்கே அதிக அளவில் இரும்புச்சத்து தேவைப்படுகிறது. மாதவிலக்கு காலங்களில் அதிக இரத்தப் போக்கு இருந்தால் உடலில் இரும்புச்சத்தின் இருப்பு குறைய ஆரம்பிக்கும். இதனால் இரத்த சிவப்பணுக்களின் எண்ணிக்கை கணிசமாக குறையும்.

குழந்தைகளுக்கு இரும்பு சத்து குறைபாடினால் மூளை வளர்ச்சி குறைவது, புரிந்து கொள்ளும் திறன் குறைவது போன்றவை ஏற்படும். உடலில் நோய் எதிர்ப்பு சக்தி குறைந்து விடும். இதன் காரணமாகவே கர்ப்பமாக இருக்கும் போதே பெண்களுக்கு இரும்பு சத்து அதிகம் உள்ள உணவுகளை உட்கொள்ள வேண்டும் என்று மருத்துவர்கள் அறிவுறுத்துகின்றனர். அதே சமயம் அதிக அளவில் இரும்பு சத்து மாத்திரை உட்கொள்வது ஆபத்தை ஏற்படுத்தும் என்று மருத்துவர்கள் அறிவுறுத்தியுள்ளனர்.

கர்ப்பிணிப் பெண்களுக்கு சாதாரண பெண்களுக்கு தேவைப்படும் இரும்புச்சத்தை விட 50% அதிகம் தேவைப்படும். சாதாரணமாக பெண்களுக்கு நாள் ஒன்றுக்கு 9 மி.கி அளவு தேவை. ஆனால் கர்ப்பகாலத்தில் இதன் அளவு 27 மி.கி அளவு தேவைப்படுகிறது. தினசரி உணவில் 30 மி.கி இரும்பு சத்து கிடைக்கும் வகையில் இருக்க வேண்டும்.

கர்ப்ப காலத்தில் இரும்புச்சத்து அதிகம் தேவை என்பதால் மருந்து மாத்திரை அதிகம் எடுத்தால், அது வாயுவை அலர்ஜியுறச் செய்யும். மலச் சிக்கலை ஏற்படுத்தும். வாந்தி, வயிற்றுப் போக்கு, உடல் சோர்வு, தலைச்சுற்றல், மயக்கம் போன்றவற்றை உண்டாக்கும். சில சமயங்களில் கருவுக்கே பாதிப்பை ஏற்படுத்தும். எனவே உணவு மூலமே இரும்புச் சத்தினை பெற முயற்சிக்க வேண்டும் என்பது மருத்துவர்களின் அறிவுரை.

நச்சாகும் இரும்பு சத்து

சிறு குழந்தைகளுக்கும் தேவைக்கதிகமாக இரும்புச் சத்து நிறைந்த மருந்து மாத்திரைகளைக் கொடுத்தால் அது உடலில் நச்சுப் பொருளாக மாறிவிடுகிறது. இதனால் குழந்தைகளுக்கு இரும்புச் சத்து கொடுக்கும் மருந்து மாத்திரைகளை தவிர்ப்பது நல்லது. உணவின் மூலம் கொடுப்பதே சிறந்தது என்கின்றனர் மருத்துவர்கள்.

காய்கறிகள் கீரைகள்

சைவ உணவு உண்பவர்களை விட அசைவ உணவு உண்பவர்களுக்கு மிக அதிக அளவில் இரும்புச்சத்து கிடைக்கிறது. ஆனால் சைவ உணவில் அதிகளவு இரும்புச்சத்து நிறைந்த கீரை வகைகளை அன்றாடம் சேர்த்துக்கொள்வது நல்லது.

முருங்கைக் கீரை, அகத்திக் கீரை, பொன்னாங்கண்ணிக் கீரை, ஆரைக்கீரை, புதினா, குப்பைக் கீரை போன்றவற்றில் அதிகம் உள்ளது. அதுபோல் பழங்களில் பேரீச்சை, அத்திப்பழம் போன்றவற்றில் அதிகம் உள்ளது. மற்ற பழங்களிலும் ஓரளவு உள்ளது.முட்டை, மீன், ஆட்டு ஈரல் போன்றவற்றில் இரும்புச்சத்து அதிகம் உள்ளது

காபி, தேநீர், மதுபானம் போன்றவற்றை அதிகம் அருந்துபவர்களுக்கு அதில் உள்ள கார்பாலிக் அமிலம் குடலில் இரும்பு சத்து உறிஞ்சப்படுவதை தடுக்கிறது. இதனால் மேற்கண்ட பானங்களை தவிர்ப்பது நல்லது என்றும் மருத்துவர்கள் தெரிவித்துள்ளனர்.

நன்றி தட்ஸ் தமிழ்

கட்டண உயர்வும் கலங்கும் மக்களும்!


கட்டண உயர்வும் கலங்கும் மக்களும்!

ஜெயா அரசு பஸ் கட்டணத்தையும் பால் கட்டணத்தையும் உயர்த்தியதும் உடனடியாக ஆதரவாக ஓர் பதிவிட்டேன்! அதற்கு பிராயசித்தமாக ஒர் பதிவு இது! இப்பொழுதும் எனது கருத்தில் மாற்றமில்லைதான் கட்டண உயர்வு என்பது காலத்தின் கட்டாயம்தான்! விலைவாசி அசுர வேகத்தில் ஏறிவரும் வேளையில் பொதுத்துறை நிறுவனங்கள் கடனில் மூழ்கும் இந்த நிலையில்தான் கட்டண உயர்வு மக்கள் மேல் சுமத்தப்பட்டிருக்கிறது!
    இந்த சுமை மக்களுக்கு பழகிப் போன ஒன்றுதான் என்றாலும் தாங்க கூடிய அளவில் இருக்கிறதா என்று சற்று சிந்தித்து பார்த்திருக்கலாம் அம்மா! அம்மா என்று பெயரிருந்தால் போதுமா? அந்த பெயரின் அர்த்தம் கருணை அல்லவா? எதையும் தடாலடியாக தைரியமாக அணுகுவது என்பது உங்கள் பலமாக நீங்கள் கருதினாலும் அதுவே உங்கள் பலவீனமாக அமைந்து விடுகிறது!
    காரிலும் இரு சக்கர வாகனங்களிலும் பயணிப்பவர்களுக்கு இந்த கட்டண உயர்வு சுமையாக தெரிய வாய்ப்பில்லை! நானும் ஒரு இரு சக்கர வாகனன் என்ற முறையில் பெட்ரோல் விலை மாதத்திற்கு ஒரு முறை ஏறும் போதெல்லாம் புலம்பித் தீர்த்துவிட்டு சொகுசு பயணத்தை விட முடியாது தொடர்ந்து கொண்டே இருக்கிறேன்! ஆனால் பேருந்து இது ஏழைகளின் போக்குவரத்து சாதனம் அல்லவா? அதனால் தானே பொதுத்துறை நிறுவனமாயிருக்கிறது! இல்லையென்றால் தனியாருக்கு தாரை வார்த்திருக்கலாமே?
    திடீரென முன்னறிவிப்பில்லாமல் கட்டணங்களை தாறுமாறாக உயர்த்தி கலங்க வைத்துவிட்டது தமிழக அரசு. பத்து ஆண்டுகளாக உயர்த்தவில்லை சரி ஒத்துக் கொள்கிறோம்! அதற்காக பத்து மடங்காக உயர்த்தினால் எப்படி இதுதான் இப்பொழுது மக்களின் கேள்வி? உயர்த்துங்கள் சுமக்க நாங்க ரெடி ஆனால் எவ்வளவு சுமக்க முடியுமோ அவ்வளவுதானே சுமக்க முடியும்? அளவுக்கு மீறி பாரம் ஏற்றினால் அச்சு முறிந்து போகாதா? என்கிறார்கள் மக்கள்?
   இது எதையும் காதில் வாங்கிக் கொள்ளவில்லை அரசு? எங்களுக்கு கலெக்சன் பேட்டா உயர்த்தி தரவில்லை என்று டிரைவர்களும் கண்டக்டர்களும் வேறு இப்போது களத்தில் குதித்து உள்ளனர்.
   சென்னை மாநகரில் 3200 பேருந்துகள் ஓடுகின்றனவாம்! அதில் வெறும் எண்ணூறு பேருந்துகள் மட்டுமே சாதாரண பேருந்துகள் இந்த பேருந்துகளின் தான் சாதாரண கட்டணம் வசூலிக்க படுகிறது. எல்.எஸ்.எஸ். பிபி பேருந்துகள் நீக்கப்பட்டு விட்டன. ஏழுவகை இப்போது நான்கு வகையாக பிரிக்கப்பட்டு கட்டணக் கொள்ளை அடிக்கப் படுகிறது!
    சாதாரணபேருந்தை விட எக்ஸ்பிரஸ்களில் ஒன்றறை மடங்கு அதிகமாக வசூலிக்கப்படுகிறது டீலக்ஸ்களில் சொல்லவே வேண்டாம். சாதாரணபேருந்துகளின் எண்ணிக்கை அதிகரிக்க படவேண்டும். மக்களில் சிலர்தான் சொகுசை எதிர்பார்க்கின்றனர். அவர்கள் பேருந்துகளை நாடுவது இல்லை! தினமும் பஸ்களில் பயணிப்பவர்கள் நடுத்தர மக்களும் ஏழைகளும் தான்! அவர்கள் இந்த உயர்வை எப்படி தாங்குவார்கள் என்று சற்றே சிந்தித்து பார்க்க வேண்டும். நான்கு ரூபாய் கட்டணம் 11 ரூபாயாக உயர்த்தப்பட்டுள்ளது சென்றுவர எட்டு ரூபாய் இருந்தாலே போது மானதாக இருந்தது இன்று போகவே கூடுதலாக ஏழு ரூபாய் தேவைப்பட்டால் எப்படி சமாளிப்பார்கள்?
     பாரத்தை ஏற்றாமல் சுமையாக ஏற்றுங்கள் ஒரெ மொத்தமாக கட்டணத்தை திணிக்காமல் கொஞ்சம் கொஞ்சமாக திணியுங்கள்! இந்த கட்டண உயர்வுகளால் இந்த பொதுத்துறை நிறுவனங்கள் பொலிவு பெற்று விடுமா? கட்டாயமாக இல்லை? இப்போதே கமிசன் உயர்த்தி கொடி பிடிப்பவர்கள் சம்பளம் உயர்த்த கோருவார்கள் அடுத்து அடுத்து ஊழியர்கள் களத்தில் குதித்து கொண்டேதான் இருப்பார்கள் போதிய நிர்வாக திறமை அற்றவர்கள் இந்த துறைகளில் ஊடுருவியதன் காரணமாகவே இந்த துறைகள் நசித்து போயுள்ளன. சுயலாபம் கருதி ஊழல் மிகுந்த இந்த நிறுவனங்கள் சீரடைய வேண்டுமானால் அடி மட்டத்திலிருந்து மாற்றம் தேவை அதை செய்ய தயாராக உள்ளதா அரசு?
பத்து ஆண்டுகளாக ஒரே கட்டணம் செலுத்தி பழகியவர்களை திடீரென கட்டணங்களை உயர்த்தி முழிபிதுங்க செய்துவிட்ட அரசு சற்றே சிந்தித்து கட்டண விகிதங்களை சற்றே மாற்றி அமைத்து குறைத்து ஏழைகளின் வயிற்றில் பால் வார்க்க வேண்டும்.
  பால் என்றதும் தான் பால் விலையும் ஞாபகம் வருகிறது! இதிலும் அதிகாரிகளின் பேச்சை கேட்டு கொள்முதல் விலைகுறைவாகவும் விற்பனைவிலை அதிகமாகவும் உயர்த்தி அட்டூழியம் செய்துள்ளது அரசு. பால் அத்தியாவசிய பொருள் இதில் லிட்டருக்கு ஆறேகால் ரூபாய் உயர்த்தி அடி வயிற்றில் அடித்துவிட்டது இந்த அரசு. பால் வற்றிப் போன தாய்மார்கள் தங்கள் குழந்தைகளுக்கு நம்பி இருந்தது ஆவினைத் தான்.
  ஆனால் அதுவும் இப்படி ஏறிப் போக தலையில் துண்டு விரித்துக் கொண்டு முடங்கிப் போயுள்ளனர் மக்கள்! பலபேரின் கூலிகள் உயர்ந்துள்ளது நியாயமே ஆனால் அதற்கேற்ப விலைவாசியும் உயர்ந்து அல்லவா நிற்கிறது? இலவசங்களை கொடுத்து விலைவாசியை ஏற்றுவது எந்த விதத்தில் நியாயம்?
    உங்கள் பொதுத்துறை நிறுவனங்களை நட்டத்தில் மூழ்கடிக்க வேண்டாம் அதே சமயத்தில் எங்கள் வாழ்க்கையையும் குழி தோண்டி புதைக்க வேண்டாம் என்பதுதான் இன்று மக்களின் கோரிக்கை! இது முதல்வரின் காதுகளில் விழுமா? இல்லை இதற்கும் கோர்ட்தான் தீர்ப்பளிக்குமா? என்பது போக போகத் தெரியும்!

தங்கள் வருகைக்கு நன்றி பதிவு குறித்த கருத்துக்களை பகிரலாமே! வாக்களித்து பிரபலபடுத்தலாமே!

Sunday, November 20, 2011

எப்பொழுதெல்லாம் கணவர் பொய் சொல்கிறார்?

கணவன்மார்கள் தங்கள் மனைவியிடம் பொய் சொல்வதுண்டு. காரணம் மனைவி மனம் வருத்தப்படக்கூடாது என்பது தான். அப்படி கணவன்மார்கள் எப்பொழுதெல்லாம் பொய் சொல்கிறார்கள் என்று பார்க்கலாம்.

ஒரு சேலையைக் கட்டிக் கொண்டு போய் கணவன் முன் நின்று என்னங்க இந்த சேலை எப்படி இருக்கு என்று மனைவி கேட்பாள். அதற்கு கணவன் நீயும், உன் சேலை செலக்ஷனும் என்று உண்மையைச் சொல்ல முடியுமா?. உடனே சேலை ரொம்ப நல்லா இருக்கும்மா என்பார்கள். அவர்கள் சொல்வது சேலையைத் தான், அந்த சேலை உங்களுக்கு நன்றாக இருக்காவிட்டாலும் கூட பெரும்பாலானவர்கள் அப்படித்தான் சொல்கிறார்களாம். நல்லா இல்லைன்னு சொன்னா அடுத்து என்ன நடக்கும் என்பது ஆண்களுக்குத்தானே தெரியும்!.

மனைவியுடன் பொது இடத்தில் நடந்து செல்லும்போது ஒரு அழகான பெண் யாராவது அந்த வழியாகச் சென்றால், அப்படியே ஒரு சின்ன லுக் விடுவது பலருக்கும் இருக்கும் பழக்கம். அப்போது மனைவி கணவரை நோக்கி, என்ன கண்ணு கண்டமேனிக்கு திரியுது. இப்ப எதுக்கு அந்தப் பெண்ணை பார்த்தீங்க என்று கேட்டால். சீச்சீ என்னைப் போய் இப்படி நினைத்துவிட்டாயே. நான் அந்த பெண்ணைப் பார்க்கவே இல்லை, நீ பக்கத்தில் இருக்கும்போது நான் எதுக்கு 'அதை'ப் பார்க்கணும் என்பார்கள். இதுவும் கூட பொய்களில் ஒன்றுதான்.

ஏதாவது புதுசா ஒரு ஐட்டம் சமைத்துக் கொண்டு வந்து சாப்பிடச் சொல்வார்கள். கணவன்மார்களும் மூச்சு, மொட இல்லாம சாப்பிட்டுவிட்டு எழுந்து விடுவார்கள். என்னங்க நான் புதுசா சமைத்தது எப்படி இருந்தது என்று கேட்பார்கள், மனைவிகள். அதற்கு கணவன்மார்கள் ஓ, ரொம்ப நல்லா இருந்தது என்று பாராட்டுவார்கள். மனைவி உச்சி குளிர்ந்து போய் அந்த உணவை தன் வாயில் வைத்தவுடன் தான் அது எவ்வளவு மோசமாக இருந்தது என்றே உணர்வார்கள். அதற்காக எல்லோரும் மோசமாக சமைப்பவர்கள் இல்லை என்பதையும் இங்கு சொல்லியாக வேண்டும்.

இருந்தாலும், சாப்பாடு நல்லா இல்லாவிட்டாலும் கூட, அதையும் பெண்கள் அழகாக சமாளிப்பார்கள். அன்னைக்கு ஒரு நாள் நான் ஏதோ புதுசா ஒரு ரெசிபி சமைச்சேன். அதை வாயில் வைக்கவே முடியவில்லை. ஆனால் என் புருஷன் ஒரு வார்த்தைக் கூட சொல்லாம அமைதியா சாப்பிட்டார். அவர் மாதிரி வருமா என்று பெருமை பேசிக்கொள்வார்கள். அதாவது கணவன் பொய் சொன்னாலும் கூட, அதை பெருந்தன்மையாக கருதுவதுதான் ஒரு மனைவியின் குணம்.

கணவன் மனைவி இருவருக்கும் ஒரே மாதிரியான டேஸ்ட் இருக்க வேண்டும் என்றில்லை. சந்தோஷ் சுப்பிரமணியம் படத்தில் வருவது மாதிரி, தானே கணவருக்கு ஒரு சட்டையைத் தேர்ந்தெடுத்து அது அவருக்கு பிடிக்காவிட்டாலும் சூப்பர் என்று சொல்லிவிடுவார்கள் மனைவிகள். உடனே அது தனக்கு பிடிக்காவிட்டாலும் மனைவியின் சந்தோஷத்திற்காக அந்த சட்டையை அணிந்து கொள்வார்கள் ஆண்கள்.

இந்த மாதிரி சின்னச் சின்ன விஷயங்களில் ஆண்கள் பொய் சொல்வது மனைவி மனம் வருத்தப்படக் கூடாது, தாம்பத்யத்தில் இனிமை கெட்டு விடக் கூடாது, குடும்பத்தில் பூசல் வெடித்து விடக் கூடாது என்பதற்காகத் தான். மற்றபடி எதுக்கெடுத்தாலும் பொய் சொன்னா கண்டிப்பாக பூகம்பம்தான் வெடிக்கும் என்பதை மனதில் கொள்வது நல்லது.

நன்றி தட்ஸ் தமிழ்
Related Posts Plugin for WordPress, Blogger...